Taa, Esau yepamtho yosotî tan wetahcasî. Etonî rma mîk Esau, asakî tî xakn̂e noro yosotî.

2 On wara tî xakn̂e Esau, Kanan pono komo yemsîrî tî nahsîyakn̂e cipici me. Ata tî nahsîyakn̂e, Eron yemsîrî, Etew yemsîrî ha. Aoribama marha tî nahsîyakn̂e Sibeaw yemsîrî, Epew yemsîrî ha.

3 Basemace marha tî nahsîyakn̂e Esau cipici me, Ismaew yemsîrî. N̂ebaioce yakno tî mîk xakn̂e Basemace.

4 Ero yinhîrî takî tî Ata n̂ewruyakn̂e kîîrî, Esau mumuru. Eripas tî mîk xakn̂e Ata mrerî yosotî.

5 Ero yinhîrî takî tî Aoribama marha tî n̂ewruyakn̂e kîîrî. Osorwaw tî xatken̂e noro mrerî komo, Xeus, Xaraw, Kore, ero wa tî xakn̂e yîmrerî komo yosotî. Ero wicakî tî xatken̂e Esau mumuru komo Kaanan po ewruxapu kom ha.

6 Ero yinhîrî takî tî miya cekn̂e Esau takno yai mooxeno pona Xako yai ha. Cipici komo naar̂akn̂e, tumumuru komo, cemsîrî komo, ahnoro tîhyawno komo, tooku paaka, ahnoro toh komo, cemyawno ahnoro, Kanan po ahsîxapu ha. Ero wa tî tîhyawno komo naar̂akn̂e Esau.

7 Mer̂pora ro makî tî xakn̂e Esau yemyawno, Xako yemyawno marha. Ero ke iito re exirî komo yarohra thakwa tî xakn̂e. Kanan po tî xatken̂e anarî yana komo chewno me mak. Wahra tko tî xakn̂e roowo iyoh komo nahmacho yecenarîra okwe. Mer̂pora ro makî tî xakn̂e iyoh komo.

8 Ero ke Sei Yîpîn pona takî tî n̂esekenmekn̂e Esau. Etonî rma tî mîk xakn̂e Esau. Asakî tî xakn̂e noro yosotî.

9 Taa, Esau yepamtho yosotî tak wetahcasî. Etomew komo porin tî mîk xakn̂e Esau Sei Yîpîn pono komo porin.

10 On wara tî xakn̂e Esau mumuru komo yosotî. Eripas tî xakn̂e Ata mrerî yosotî, Esau pici mrerî. Hewew tî xakn̂e Basemace mrerî yosot hara. Esau pici xa marha tî mîk xakn̂e Basemace.

11 On wara tî xakn̂e Eripas mumuru komo yosotî, Teman, Oma, Sepo, Kaetan, Kenas. Ero wa tî xakn̂e Eripas mumuru komo yosotî.

12 Taa, On wara tî xakn̂e Eripas, Esau mumuru ha, yipici wara cehsom tî xakn̂e hara, Cimna tî mîk xakn̂e noro yosotî. Noro mrerî tî xakn̂e hara, Amareke tî osotî, Eripas mumuru yosot ha. Ero wa tî xatken̂e Ata mrerî komo, noro parî komo marha. Esau pici tî mîk xakn̂e Ata.

13 Taa, Heuew mumuru komo tan wetahcas hara, Naate, Sera, Sama, Misa. Ero wa tî xakn̂e Basemace parî komo yosotî, Esau pici parî komo yosot ha.

14 Aoribama marha tî xakn̂e Esau pici me. Aana yemsîrî tî mîk xakn̂e Aoribama. Sibeaw parî tî mîk xakn̂e. Ero wara tî xakn̂e Aoribama. On wara tî xakn̂e noro mrerî komo. Xeus, Xaran, Kore. N̂examro tî n̂ewruyakn̂e Aoribama mrerî komo, Esau mumuru kom ha.

15-16 Taa, kayaritomo me tî xatken̂e Esau parî komo. N̂examro yosotî tan wetahcasî. Eripas mumuru komo ka wetahcasî kayaritomo me ehxapu komo. Esau mumuru tî mîk xakn̂e Eripas poritomo ha. On wara tî xatken̂e noro mumuru komo kayaritomo me ehxapu kom ha, Teman, Oma, Sepo, Kenas, Kore, Kaetan, Amareke. Ero wa tî xatken̂e kayaritomo komo yosotî Eripas mumuru komo yosotî mak ha. Ata parî komo tî mîkyam xatken̂e.

17 Taa, Heuew marha tî xakn̂e Esau mumuru hara. Kayaritomo me marha tî xatken̂e noro mumuru kom hara. On wara tî xakn̂e noro mumuru komo yosotî, kayaritomo me ehxapu komo yosotî, Naate, Sera, Sama, Misa. Ero wa tî xatken̂e Heuew mumuru komo yosotî, kayaritomo me ehxapu komo yosotî. Basemace parî komo tî mîkyam xatken̂e, Esau pici parî kom ha.

18 On wara tî xakn̂e Aoribama mrerî komo yosot hara, Esau pici mrerî komo yosot ha. Xeus, Xaraw, Kore, ero wara. Kayaritomo komo tî mîkyam xatken̂e, Aoribama mrerî kom ha. Esau pici tî mîk xakn̂e Aoribama, Ana yemsîrî ha.

19 Ero wa tî xakn̂e Esau yepamtho yosotî, kayaritomo me ehxapu komo yosot ha. Etonî rma tî mîk xakn̂e Esau.

20-21 Taa, iito takî tî xakn̂e Esau Sei yîpîn yamrinaw. Iito marha tî xakn̂e Orew yepamtho tumumuru komo yakro rma. Sei tî mîk xakn̂e noro yosotî. Ero re pono rma tî mîkyam xatken̂e tîrowon komo pono rma. On wara tî xakn̂e noro mumuru komo yosot hara, Rotan, Sobaw, Sibeaw, Ana, Tison, Ese, Tisan. Sei mumuru komo re tî mîkyam xatken̂e kayaritomo me ehxapu kom ha. Eton tî mîn xakn̂e n̂examro rowon yosotî.

22 On wara tî xakn̂e Rotan mumuru komo yosot hara, Ori, Oman, ero wara. Cimna tî xakn̂e Rotan yepeka yosot hara.

23 On wara tî xakn̂e Sobaw mumuru kom hara, Awpan, Manaace, Ebaw, Sepo, Onan, ero wara.

24 On wara tî xakn̂e Sibeaw mumuru kom hara, Aya, Ana, ero wara. On warai tî mîk xakn̂e Ana, tîîm yoku nahman̂e ro tî mîk xakn̂e buhu yenîn̂e ro. Ero poko exitaw tuuna tî n̂een̂akn̂e axawa imo po. Noro yipu tî mîk xakn̂e Ana.

25 On wara tî xakn̂e Ana xîkrî komo yosotî, Tison, Aoribama. Aana yemsîrî tî mîk xakn̂e Aoribama.

26 On wara tî xakn̂e Cison mumuru komo yosotî, Entan, Esman, Itiran, Keran, ero wara.

27 On wara tî xakn̂e Ese mumuru komo yosotî, Biran, Saavan, Akan, ero wara.

28 On wara tî xakn̂e Cisan mumuru komo yosotî, Usu, Aran, ero wara.

29-30 On wara tî xakn̂e Orew komo kayaritomon komo yosotî, Rotan, Sobaw, Sibeaw, Ana, Cison, Ese, Cisan, ero wara tî xatken̂e Orew kayaritomon komo, Sei pono komo kayaritomon komo.

31 Pahxa n̂he tî xatken̂e Eton pono kayaritomon komo exihra rma ka exitaw Ixaw Yana komo kayaritomon.

32 On wara tî xakn̂e n̂examro yosotî, Eton pono komo kayaritomon yosotî, pahxan komo mak ha ka, Bera tî xakn̂e n̂examro kayaritomon. Beo mumuru tî mîk xakn̂e Bera. Cinaba tî xakn̂e noro yewton yosotî.

33 Ero yinhîrî takî tî waihyakn̂e Bera pen. Noro pen retawno me takî tî xakn̂e Xobabe kayaritomo me hara. Sera mumuru tî mîk xakn̂e Xobabe Bosora pono mumuru.

34 Ero yinhîrî takî tî waihyakn̂e Xobabe pen. Noro pen retawno me takî tî xakn̂e Usaw kayaritomo me hara. Teman Yana komo rowon pono tî mîk xakn̂e.

35 Ero yinhîrî takî tî waihyakn̂e Usaw pen. Noro pen retawno me takî tî xakn̂e Atace kayaritomo me hara. Betace mumuru tî mîk xakn̂e Atace. Mician̂ita komo wapatho tî mîk xakn̂e Atace. Moabe woskaran po exitaw so Mician̂ita komo n̂examro pen yakro tî n̂etar̂mekn̂e. Apice tî xakn̂e Atace yewton yosotî.

36 Ero yinhîrî takî tî waihyakn̂e Atace pen. Noro pen retawno me takî tî xakn̂e Samra kayaritomo me hara. Masareka pono tî mîk xakn̂e.

37 Ero yinhîrî takî tî waihyakn̂e Samra pen. Noro pen retawno me takî tî xakn̂e Sau kayaritomo me hara. Heoboce pono tî mîk xakn̂e Sau, Ewpratesî yecihtawno pono ha.

38 Ero yinhîrî takî tî waihyakn̂e Sau pen. Noro pen retawno me takî tî xakn̂e Baaw Anan kayaritomo me hara. Aboro mumuru tî mîk xakn̂e Baaw Anan.

39 Ero yinhîrî takî tî waihyakn̂e Baaw Anan pen, Aboro mumutho pen. Noro retawno me takî tî xakn̂e Ata kayaritomo me hara. Paw tî xakn̂e noro yewton yosotî. Metabew tî xakn̂e Paw pici yosotî. Materece yemsîrî tî mîk xakn̂e Metabew. Mesaabe mumuru tî mîk xakn̂e Materece. Ero wara tî xatken̂e Eton pono komo kayaritomon pahxan pen komo mak ha.

40 Taa, on wara tî xakn̂e Esau yepamtho yantoman̂e komo yosotî. Tîyanan komo yantoman̂e me so tî xatken̂e, cenmayipu komo yantoman̂e me so marha. Cimna, Awpa, Xetece,

41-42 Aoribama, Era, Pinon, Kenas, Teman, Mibsara,

43 Makaciew, Iran, ero wara xatken̂e Etomew yantoman̂e komo, cenmayipu yantoman̂e kom ha, tîrowon pono komo yantoman̂e komo. Esau tî xakn̂e Eton Yana komo porin me yihcithîrî ha. Ero wara tî xatken̂e.