Taa, ero yinhîrî takî tî on wara kekn̂e Kaan Xako ya, Ai Xako, esewekacoko tak, etocoko hara Betew pona. Iitono ro me tak ehcoko. Owya tîmsom yakn̂itopo akîhtoko iito. Pahxa awakno yai memahciyakn̂e. Ero yimaw kesenpekn̂e awya iito Betew po. Iina rma akîhtota owya tîmsom yakn̂itopo, kekn̂e tî. Ero wa tî kekn̂e Kaan Xako ya.

2 Ero ke on wara tî kekn̂e Xako tîhyawno komo ya, takrono komo ya ahnoro, Ahyaw so nasî akîhtoxaputho mko, ponaro anarî yana komo yehtopo. Ero yiputho kr̂a tak ar̂macoko. Eyehcoko marha tak. Kir̂wan tak amrucoko aponon kom hara.

3 Kaikatko tak ha tî Betew pona hara. Iito kexitaw so tak Kaan ya tîmsom yakn̂itopo tî wakîhce. Iito wîxakn̂e pahxa oyesemetanmekyataw. Ero yimaw omtapotarî n̂eyukyakn̂e Kporin komo. Ero yinhîrî esama yaw owcetaw marha oyakronomekn̂e roro. Ero ke tî Noro ya tîmsom yakn̂itopo tî wakîhce iito, kekn̂e tî Xako.

4 Ero ke Xako ya tî nîmyatken̂e akîhtoxaputho mko tîhyawnonhîrî. Ahnoro tî nîmtîketken̂e yîwya. Tpanatarînthîrî komo marha tî nîmyatken̂e yîwya. Ero yipu mko takî tî Xako nahruyakn̂e ewtarî yaka. Kapar̂u yepu yapomyaka rma tî nahruyakn̂e Siken panawno yapomyaw ha.

5 Ero yinhîrî takî tî cetken̂e. Iitono komo tko tî n̂eraswatken̂e Xako pona. Kaan yanme rma tî ero wa xatken̂e. Ero ke Xako mumuru komo waparî me mokuhra xatken̂e. Ero wa tî xatken̂e.

6 Ero ke takî tî Rus pona cekn̂e Xako. Kanan pono rma mîn Rus. Betew rma mîn ha. Ahnoro tî cetken̂e iina Xako komo.

7 Iito cexitaw takî tî Xako Kaan ya tîmsom yakn̂itopo tî nakîhcekn̂e. Ero yimaw tî cewton nosohcekn̂e Ew-Betew me. Ero wa tî nosohcekn̂e Kaan yesenporî ke tîwya. Pahxa rma tî Kaan n̂esenpekn̂e yîwya iito, takno yai emahciyataw. Ero ke tî ero wa nosohcekn̂e cewton.

8 Iito exitaw so takî tî Tebora pen waihyakn̂e okwe Hebeka yantonînho. Ero ke iina rma tî nahruyatken̂e kapar̂u yepu yapomyaka rma. Ero ke takî tî iitono nosohcetken̂e weewe, Aron-Bakuce me tî nosohcetken̂e ero.

9 Pahxa n̂he tî Kaan n̂esenpekn̂e Xako ya iito rma. Patan-Aran poi mokyataw tî n̂esenpekn̂e yîwya. Xako wakretopo tî n̂ekatîmyakn̂e yîwya.

10 Ero yimaw marha tî on wara kekn̂e Kaan yîwya, Xako amoro, awosotî. Anarî me tak kosohcesî Xako mera tak. Ixaw me tak kosohces hara, kekn̂e tî. Ero wa tî Xako nosohcekn̂e.

11 On wara marha tî Kaan kekn̂e yîwya, Kaan Ow ha Karitî ro. Mer̂pono pîn me cepamsom me tak esko amoro amn̂e. Anarî yana me naxe awepamthîrî komo amn̂e. Mîn hak rowon pono me naxe ha.

12 On wîmyakn̂e roowo Abraaw ya, Isake ya marha, kekn̂e tî. Ero rma wîmyas awya hara. Awepamthîrî komo ya marha wîmyasî, kekn̂e tî. Ero wa tî kekn̂e Kaan Xako ya.

13 Ero wa kache takî tî Kaan cekn̂e hara Xako yakro tîmtapotache.

14 Ero ke toopu takî tî nanîmyakn̂e Xako piiri. Ero wa ciriche wooku takî tî nukmamyakn̂e ero pore. Katî marha tî nukmamyakn̂e ero pore Kaan ya tîmsom me.

15 Ero yimaw iitono takî tî nosohcekn̂e roowo Betew me. Ero wa tî nosohcekn̂e Kaanî mtapotarî yentachonho tîwya. Ero wa tî nosohcekn̂e.

16 Taa, ero yinhîrî takî tî Betew poi cetken̂e hara Xako komo. Eprata yesamarî yaw tî cetken̂e. Ewto pahnoke exitaw so Hakew yewrutopo me takî tî xakn̂e ero yimaw. N̂erewakn̂e takî tî. Ewrupora tko tî xakn̂e okwe.

17 Erewataw xa takî tî on wara kekn̂e ewrunokan̂e yîwya, Erasîra esko. Mewruyasî wa ha, kîîrî cik amrerî n̂ewruyasî, kekn̂e tî yîwya.

18 Waihyakn̂e thakwa tî okwe yîsonînhîrî pen. Noro yekatîtho cetaw rma tî Benon̂i me tî nosohcekn̂e tîmrerî. Yîîmî tko tî nosohcekn̂e hara Benxamin me takî.

19 Ero wa tî waihyakn̂e Hakew pen okwe. Noro yokoputho tî nahruyatken̂e Eprata yesamarî yakumyaka. Berenî rma mîn Eprata, kacho.

20 Ero yinhîrî takî tî toopu n̂irpekn̂e Xako noro pen yahrutoponho pona. Porin tî mîn n̂irpekn̂e piirino. Hakew pen yahrutoponho kuknon tî mîn n̂irpekn̂e. Iito rma nasî oroto yin̂irpothîrî.

21 Taa, cihcinhîrî yokoputho yahruche takî tî cekn̂e rma Ixaw Ete mkai. Ete po nai mîîmo kawno. Mehxa n̂he takî tî tîmîn n̂iir̂akn̂e hara roona mak ha tî.

22 Iito tî xakn̂e Ixaw pahkî. Iito exitaw on wara tî xakn̂e yumumuru Huben, tîîm pici wara cehsom poko tî xakn̂e kica, Bira poko. Ero wa ehtopo tko tî n̂encekn̂e Ixaw. Ero wa tî xakn̂e okwe noro.

23 Taa, Xako mumuru komo yosotî tan wetahcasî. On wara tî xakn̂e Ria mrerî komo yosotî, Huben, Xako mumuru komo poturu tî mîk xakn̂e. Simeaw, Repi, Xuta, Isaka, Seburon. Ero wa tî xakn̂e Ria mrerî komo yosotî.

24 Hakew mrerî komo yosotî reha tî xakn̂e on wara, Xose, Benxamin. Ero wa tî xakn̂e Hakew mrerî komo yosotî.

25 On wara tî xakn̂e Bira mrerî komo yosot hara. Hakew yanton tî mîk xakn̂e Bira. Taan, Nahtari, ero wa tî xakn̂e noro mrerî komo yosotî.

26 On wara tî xakn̂e Siwpa mrerî komo yosot hara. Ria yanton tî mîk xakn̂e Siwpa. Kace, Ase, ero wa tî xakn̂e Siwpa mrerî komo yosotî. Ero wa tî xatken̂e Xako mumuru komo Patan-Aran po ewruxapu kom ha.

27 Ero yinhîrî takî tî Manîre pona cekn̂e hara Xako. Tîîm yenso tî cekn̂e, Isake yenso. Ahba rma tî mîn Manîre. Ebronî rma tî mîn ero yosot hara. Abraaw pen yewtontho tî mîn xakn̂e Manîre, Isake yewton me takî tî xakn̂e hara.

28-29 Ero yimaw takî tî Isake pen waihyakn̂e okwe. Poritomotho me xa tî xakn̂e. 180 cimn̂ipu tî xakn̂e noro pen yewrutoponho. Waipuche yumumuthîrî komo takî tî nahruyatken̂e okoputhîrî. Esau, Xako, ero wa tî xatken̂e ahrun̂e komo. Ero wa tî xatken̂e okwe.