Taa, iito tî xakn̂e Xako yemsîrî hara, Cina tî mîk xakn̂e noro yosotî. Ria yenakanînho tî mîk xakn̂e. Ero yimaw takî tî noro cekn̂e Kanan pono komo wosîn yenso.

2 N̂examro chew exitaw tko tî noro n̂een̂akn̂e kîîrî, Siken tî osotî. Amo mumuru tî mîk xakn̂e, Epew mumuru ha tî. Iitono komo yantoman̂e tî mîk xakn̂e Amo. Cina yenîche Siken ya tîmîn yaka tî naar̂akn̂e, n̂etakriyakn̂e marha tî enaka kica. Ero wa tî Cina nîwîrîmekn̂e kica.

3 Ero yinhîrî takî tî yiixe ro mak xakn̂e Siken, Xako yemsîrî xe. Ero ke tî tawake nîmtapowakn̂e noro yakro.

4 Ero yinhîrî tîîm yakro tî nîmtapowakn̂e hara Siken, Amo yakro. On wara tî kekn̂e yîwya, Apa, Xako yemsîrî xe cma re wasî opici me. Ero ke yîîm yakro cma re mîmtapowasî. Awemsîrî yahsî xe tî nai omumuru cipici me, mîîkesî cma re yîwya, kekn̂e tî.

5 Ero yinhîrî takî tî Xako n̂encekn̂e cemsîrî yehtoponho. Awemsîrî tî nîwîrîmai kica Siken, kacho tî n̂encekn̂e. Ero yipu yencetaw meye tî xatken̂e yumumuru komo. Paaka yenîrî poko tî xatken̂e woskara po. Ero ke tî ka ahce wa na kahra xakn̂e Xako. Tumumuru komo makî tî momokyakn̂e.

6 Taa, ero yimaw rma takî tî Amo cekn̂e Xako yakro esentaxi. Siken yîîm mîk cekn̂e.

7 Ero yimaw marha tî Xako mumuru komo tî mokyatken̂e woskara pononho. Cepeka yehtoponho tî n̂encetken̂e woskara po rma. Ero ke tî mokyatken̂e tîîm komo yaka. Kica, ketken̂e ro makî tî. Nîrwonatken̂e xa tî Siken poko cepeka yîwîrîmarî poyero. Ixaw Yana komo yîwîrîman̂e mîkro kica, ketken̂e tî. Apapa yemsîrî nukukmai kica. Ero wara exihra ro mak cexpore nasî, ketken̂e tî.

8 Ero yinhîrî rma takî tî Amo mokyakn̂e Xako yakro esentaxi. Yumumuru komo yakro meero tî n̂esencekn̂e. On wara tî kekn̂e yîwya so, Ai oyakno komo, on wara wîîkes awya so, omumuru tî nai awemsîrî xe. Cerewre ro makî tî nai yiixe. Ero ke cma re yipici me mîmyaxe yîwya.

9 On wara roro cehcerî ha, awemsîrî komo tîmcoko roro amna ya amna pici me. Amna yemsîrî komo marha ahsîcoko roro amyamro hara amumuru komo pici me hara.

10 Ero wa awexitaw so amna chewno ro me xa tak maxe. Awanme ro so mak tak meen̂axe awewton komo kir̂wan ha. Amna yakro marha mîwarawanwaxe. Ero wa awemyawno komo mepamnoyaxe, kekn̂e tî. Ero wa tî kekn̂e Amo Xako ya, yumumuru komo ya marha.

11-12 Ero yinhîrî Siken marha tî n̂esencekn̂e emasî yîîm yakro, epeka komo yakro marha. On wara tî kekn̂e yîwya so, Oyakno komo, tawake awexi xe so cma re was opoko. Awemsîrî xe ro mak wasî, awepeka kom ha. Opici me ahsî xe men wasî. Noro yepetho wîmyas awya so. Atî wicakî na metahcatu awepeka komo yepetho ero wicakî rma wîmyas ahnoro. Awepeka komo tîmî xe ro mak men was awya so opici me ha, kekn̂e tî. Ero wa tî kekn̂e Siken.

13 On wara tko tî xatken̂e Xako mumuru komo, cesemîknosom me makî tî Siken n̂eyukyatken̂e, yîîm marha tî n̂eyukyatken̂e. Ero wa tî nîmtapowatken̂e akro so cepeka komo yîwîrîmarî poyero.

14 On wara tî ketken̂e yîwya, Tîmîhra ro mak nas amna awya so etanpikara awexirî ke kica. Cepeka tîmîhra ro mak nas amna etanpikan ya. Kicicme ro mak nas amna ya noro yipu ya tîmtopo.

15-16 Ero ke etanpikacoko amyamro, kîrkomo ahnoro. Ero wa awexitaw so makî twosîn amna nîmyas awya so, awosîn komo marha tak amna nahsîyas hara cipici me. Achewno komo me xa tak nas amna. Noro re wa tak taxe ero yimaw.

17 Etanpikara awexitaw so reha amna tak cesî, cepeka amna naar̂asî, ketken̂e tî. Ero wa tî ketken̂e Xako mumuru komo Siken ya, yîîm komo ya.

18 Kir̂wan̂he tî n̂encekn̂e yîmtapotarî komo Amo. Ero wa xa marha tî n̂encekn̂e Siken hara, yumumuru.

19 Yohno ro makî tî n̂examro n̂ewehcakn̂e kar̂pamxan, Siken ha. Okwe, kahra ro makî tî xakn̂e. Ero wa tî xakn̂e noro Xako yemsîrî xe xa cexirî ke. On warai tî mîk xakn̂e Siken, takîhsom tî mîk xakn̂e. Pîra n̂he reha tî xatken̂e iyanan komo.

20 Ero ke Amo komo takî tî cetken̂e cewton wacan potaka, Siken kom ha. Kîrkomo yakro tî n̂esencetken̂e ero pono komo yakro.

21 On wara tî ketken̂e yîwya so, Tawakem komo mîkyam kpoko so. Ero ke kîchew so rma n̂ehcowpe. Kakro so marha warawantacowpe. Porin me nasî roowo. N̂examro yecenarî rma nasî. On wara marha cehcerî, n̂examro yemsîrî komo takî tahsîcerî kipici komo me. Kemsîrî komo marha tîmcerî yipici komo me hara.

22 On wara makî tko kexe kîwya so, Cetanpikapore makî ka nasî ahnoro kîrkomo. Amna nasî cetanpikaxmu me. Ero ke ero wa xa marha ehcoko amyamro hara. Ero wa awexitaw so mak achewno komo me nas amna. Noro re me tak taxe ero yimaw, kexe.

23 Ero ke yîmtapotarî komo cewetîcerî kîchewno me so tak ehtome so. Ero wa kexitaw so noro re me tak taxe. N̂examro yoku tak nasî koh komo me so. Emyawno komo marha nasî kemyawno me so. Ero wa taxe okre, ketken̂e tî. Ero wa tî ketken̂e Amo komo, yumumuru yakro.

24 Ero ke n̂examro mtapotarî takî tî n̂ewehcatken̂e kîrkomo ahnoro ewto metatan yaro cepatakaxmu komo. N̂etanpiketken̂e tî ahnoro iitono komo. Ero wa tî xatken̂e.

25 Ero yinhîrî takî tî asakî ro enmapuche n̂erewatken̂e rma etanpikaxapu komo. Ero wa exitaw so tî ewto pona cetken̂e Xako mumuru komo asakî, Repi, Simeaw kom ha. Cina yepeka komo mîkyam n̂examro. Kacipara imo ke cemyarke tî cetken̂e. Erasîn me ro mak cetken̂e. Iitono pen komo tî waihketken̂e kîîrî pen komo ahnoro okwe.

26 Amo pen meero tî waihketken̂e, yumumuthîrî pen marha tî Siken pen ha. Kacipara imo ke tî waihkano n̂iir̂atken̂e okwe. Iito rma tî xakn̂e n̂examro yepeka Siken mîntho yaw. Ero ke takî tî noro naar̂atken̂e tîmîn komo yaka hara.

27 Ero yinhîrî takî tî ahnoro mokyatken̂e Xako mumuru komo ewto pona. Iitononhîrî pen komo yemyawnonho tî naatîketken̂e. Ero wa tî n̂iir̂atken̂e cepeka komo yîwîrîmachonho poyero.

28 Iyokuthîrî komo tî naatîketken̂e oper̂a pen, paaka pen, buhu pen, ahnoro tî n̂aatîketken̂e. Emyawnonhîrî komo tî naatîketken̂e ewto pononho mko, mararî pononho mko marha.

29 Yupurantanthîrî komo marha tî naatîketken̂e, yîmxîkîthîrî komo marha tî, yihcinhîrî komo marha tî. Emyawnonhîrî komo marha tî naatîketken̂e, mîîmo yawnonho komo. Ero wa tî naar̂atken̂e Xako mumuru komo okwe.

30 Ero yinhîrî on wara tî kekn̂e Xako Simeaw ya, Repi komo ya, Ai okopuci komo, ow mîponanîmtoce ro mak okwe. Ooxera tak men naxe on roowo pono komo apoyero so ha. Kananew komo naxe ooxera, Peresew komo marha. Asakî mak maxe ohyawno komo okwe. Ero ke waapa me tak men mokyaxe cow wara oyar̂maxi, owaihkaxi okwe. Kwaihyasî tak ow pen okwe, ahnoro ohyawno komo tîtwaitîkexe, kekn̂e tî yîwya so.

31 On wara makî tko tî tîîm komo n̂eyukyatken̂e yumumuru komo, Kicicitho me ro mak n̂iir̂atken̂e kica amna yepeka kîîrî pohkan̂e ro wara kica. Kir̂wan̂he katî nai ero yipu awya? ketken̂e hara tî yîwya. Ero wa tî ketken̂e.