Taa, ero yinhîrî takî tî Xako yakro n̂esepor̂atken̂e Esau komo. 400 yakenon yakro rma mokyakn̂e noro kîrkomo yakro. Mooxe rma ka exitaw so tî n̂examro n̂een̂akn̂e Xako. Ero ke takî tî wooxam komo ya kekn̂e, Ai, amxîkrî komo an̂ihcoko, kekn̂e tî. Ero ke tîmxîkrî komo nan̂ikyakn̂e Ria. Hakew marha tî nan̂ikyakn̂e tîmxîkrî hara, n̂examro yanton komo marha tî nan̂ikyatken̂e tîmxîkrî kom hara.

2 Mokuche so n̂examro nakpayakn̂e Xako. Poturme tî n̂en̂epekn̂e cipici yanton komo yîmxîkrî komo yakro rma. Yîmkai so tî n̂en̂epekn̂e Ria hara yîmxîkrî komo yakro hara. Hakew takî tî cekn̂e mapitaw so Xose yakro rma.

3 Ero yinhîrî n̂examro poturme rma tî cekn̂e hara Xako. Esau pahnoke xa cexitaw Xako nutupenwakn̂e takî tî 7-ro. Cesewnaposo ro tî nutupenwakn̂e. Ero wa tî cekn̂e Esau yaka roro.

4 Xako yenîche Esau ya yîhyaka takî tî cekn̂e kar̂pe. Nîpîmîmiyakn̂e takî tî, chow. N̂esesunukyatken̂e marha tî. Nîwracetken̂e marha tî asakno roro rma.

5 Ero yinhîrî wooxam komo tî n̂een̂akn̂e Esau, rikomo komo marha. Onoke moxam awakro mokyatu n̂examro? kekn̂e tî yîwya. Omxîkrî komo moxam Kaan nîmîtho ha. Moxam ke awanton wakrekn̂e Kaan, owakrekn̂e ha, kekn̂e. Ero wa tî kekn̂e Xako.

6 Ero yinhîrî takî tî Xako pici yanton komo mokyatken̂e hara Esau yaka. Tîmxîkrî komo tî n̂ekyatken̂e. Nutupenwatken̂e xa marha n̂examro hara Esau yaka tmokrî me so.

7 Ero yinhîrî takî Ria tî mokyakn̂e hara yîhyaka tîmxîkrî komo yakro hara. N̂examro marha tî nutupenwatken̂e hara. Ero yinhîrî takî tî Xose n̂ekyakn̂e Rakew hara. N̂examro xa marha tî nutupenwatken̂e hara.

8 Ero yinhîrî on wara takî tî kekn̂e hara Esau takno ya, Ahce kacho awoku men̂epekn̂e aywapu? kekn̂e tî yîwya. Atawakeretopo cma re mîk wen̂epei, kekn̂e tî Xako.

9 Ai ha, tokye marha was oyakno, kekn̂e tko tî Esau. Ahyaw rma n̂expe awoku, kekn̂e tî.

10 Pîra, ahsîko rma, kekn̂e tko tî Xako. Tawake awexitaw opoko ahsîko rma. Kir̂wan̂he xa nasî awewru yenîrî owya. Kaan yewru yenîn̂e wara rma wasî tawake. Ero wa wasî tawake awexirî ke opoko, kekn̂e tî Xako.

11 Ero ke ahsîko rma oyokutho. Owakrekn̂e xa Kaan. Ero ke mer̂pora nas ohyaw. Ero ke ahsîko rma, kekn̂e tî. Cerewre tî kekn̂e yîwya. Ero ke tî nahsîyakn̂e rma Esau.

12 Ero yinhîrî on wara tî kekn̂e Esau, Taa, tîhcet ha na. Poturme na kîwce ow ha, omapitaw tak amohcoko amyamro, kekn̂e tî.

13 Apohana n̂oon̂o, kekn̂e tko tî Xako. Kar̂pera so naxe rikomo komo. Paaka komo marha nasî tîmxîkye so, oper̂a komo marha. Ero ke kar̂pe xa aar̂ataw owya waihyas thakwa okwe oyok pen ahnoro.

14 Ero ke amoro na mîîce amna ywapu ha. Yarî kmokyasî yamoro mak paaka yekar̂karî pona, rikomo yekar̂karî pona marha. Ero wa amna mokyasî ahyaka roro Sei pona roro, kekn̂e tî Xako.

15 Taa, kîwce rma ham, kekn̂e takî tî Esau. Oyakrono komo mak na wînomya asakî mak awakrono komo me, kekn̂e tî. Apohana, kekn̂e tî Xako, takronoi rma thakwa wasî. Ero ke mîîcetu rma na ahnoro, kekn̂e tî. Ero wa tî kekn̂e Xako takno ya.

16 Ero ke cekn̂e tak hara tî Esau Sei yesamarî yaw hara.

17 Xako reha tî cekn̂e Sukoci pona. Iito cexitaw tîmîn takî tî n̂iir̂akn̂e. Tok wacan marha tî n̂iir̂akn̂e. Ero ke ero wara tî nosohcekn̂e cewton, Sukoci me tî nosohcekn̂e.

18 Ero yinhîrî Siken pona tî cekn̂e hara Xako. Kanan pono tî mîn Siken. Kir̂wan̂he tî n̂epatakekn̂e iina. Iina tî n̂iir̂akn̂e hara tîmîn roona makî. Ewto panaw rma tî n̂iir̂akn̂e. Ero wa tî xakn̂e Xako Patan-Aran poi mohxapu.

19 Ero yinhîrî takî tî cewton nahsîyakn̂e epethîrî pona. 100 exepeyu tî nîmyakn̂e ero yepetho me. Amo xîkrî komo ya tî mîn nîmyakn̂e epethîrî, Siken yîîm xîkrî komo ya ha. Ero wa tî n̂epemekn̂e cewton yahsîtome tak.

20 Iito takî tî toopu n̂enmekyakn̂e Xako Kaan ya tîmsom yakn̂itopo. Ero ke on wara tî nosohcekn̂e cewton iitono ha, Kaan, Ponaro Ixaw Yehtopo Ha, kacho tî mîn. Ero wa tî nosohcekn̂e.