Taa, ero yinhîrî takî tî Xako cekn̂e en̂exa tîyanan komo yesamarî yaw. Ero wa cetaw takî tî Kaan yancun komo n̂esenpekn̂e yîwya.

2 N̂examro yenîrî ke on wara tî kekn̂e Xako, Kaan yetarî on ham. Ero ke Maanain me tak wosohcesî, kekn̂e tî.

3 Ero yinhîrî takî tî tmaywen komo n̂en̂epekn̂e Xako tîywapu so, takno yaka tî n̂en̂epekn̂e, Esau yaka. Noro yewton tî xakn̂e Eton po. Sei kacho rma mîn Eton. Ero ke takî tî iina n̂en̂epekn̂e tmaywen kom ha.

4 On wara tî kekn̂e yîwya so, On wara kacoko Esau ya, Ai apa, on wara tî nîîke awanton Xako, Meye ka wîxakn̂e kîtamru yaw. Pahkî wîxakn̂e yîhyaw.

5 Oroto tak cemyawnoi wasî. Oyoku nasî paaka, buhu marha, oper̂a marha. Oyanton komo marha naxe kîrkomo, wooxam komo marha. Ero ke moxam wen̂epesî ahyaka cekaipore omohtome. Oyantoman̂e yakan wara moxam wen̂epesî. Tawake awexi xe cma re wasî opoko, kacoko yîwya, kekn̂e tî Xako yîwya so tmaywen komo ya.

6 Ero ke ero wa kaxi tî cetken̂e Esau yaka. Ero yinhîrî n̂etîrametken̂e hara tî Xako yaka. On wara tî ketken̂e yîwya, Amna cekn̂e Esau yaka amohtopo yekatîmso. Ero ke noro takî tî mokya awenso. Kîrkomo tî mokyatu noro yakro mer̂pora kopi. 400 tî mokyatu kopi, ketken̂e tî.

7 Ero yipu yentache n̂eraswakn̂e xa takî tî Xako, n̂eserepokekn̂e xa. Ero ke tmaywen komo takî tî nîraconkekn̂e. Toh komo marha tî nîraconkekn̂e. Anarî komo tî n̂en̂epekn̂e tîywapu. Ero yinhîrî anarî komo xa hara tî n̂en̂epekn̂e n̂examro yokomn̂i xa hara.

8 On wara tî kekn̂e Xako, Kîywapu so tîtosom komo na nar̂me Esau. Ero wa exitaw mapitaw toxapunhîrî komo tak n̂emahciyaxe waipîra rma, kekn̂e tî.

9 Taa, ero wa en̂epeno riche Kaan yakro tî nîmtapowakn̂e Xako. Apa, kekn̂e tî, Kaan Amoro, oporin aponaro xakn̂e Abraaw ha. Apapa marha aponaro nasî Isake, Noro Amoro. Ero ke on wara wîîkes awya, On wara kan̂enho cma re Amoro owya, Awekenhîrî pona etok hara ayanan komo yaka hara. Iito awexitaw kakronomesî, kan̂enho Amoro owya.

10 Awanton mak ow ha. Noro pînîn yaw men esko kir̂wan̂he xa exirî ke, kacho pînî ro mak ow ha. Opînîn yaw rma tko masî. Emapona roro ow makronomekn̂e amtapotachonhîrî yaw roro rma. Ow marha memyawnomekn̂e. Pahxa Xotaw wacetaw owya emyawnomra ro mak wîxakn̂e. Oyamoyin mak xakn̂e oyemyawno. Kepamtîkai tak. Oywapu cexe anarî komo, yaake. Tan marha naxe anarî komo, yaake xa marha.

11 Ero ke on wara wîîkes awya Apa, Owî cma re mukurunpesî. Keraswasî xa oyakno pona. Oyetapaxi na mokya, wîîkesî. Rikomo yon meero na n̂etape, yîmxîkrî komo meero na n̂etapetîke, wîîkesî.

12 On wara cma re mîîkekn̂e owya, Kakronomesî amn̂e, awepamthîrî komo marha wepamnoyasî mer̂pora cehso ro, mîîkekn̂e cma re owya. Axawa wara mak naxe awepamthîrî komo amn̂e yukuknomarî yopo, mîîkekn̂e owya. Ero ke owî cma re mukurunpesî oroto, kekn̂e tî. Ero wa tî kekn̂e Xako Kaan yakro tîmtapowataw.

13 Ero yinhîrî iito rma takî tî nîwînîkyakn̂e Xako kosope. Ero yimaw rma takî tî tooku men̂ekekn̂e takno ya tîmsom.

14 On warai komo tî men̂ekekn̂e Xako, kabra 200, boce 20, oper̂a 200, kahn̂eru marha, 20. Ero wa so men̂ekekn̂e Xako.

15 Kameru marha tî men̂ekekn̂e woosî, 30. Yîmxîkrî yakro rma tî men̂ekekn̂e. Paaka marha tî men̂ekekn̂e woosî 40, bui hara 10. Buhu marha tî men̂ekekn̂e, woosî 20, yîmxîkrî kom hara 10 mak. Ero warai komo tî men̂ekekn̂e Xako Esau ya tîmsom.

16 Noro yipu komo tî narpekn̂e tanton komo ya. On wara tî kekn̂e yîwya so, Oywapu etocoko ha. Oyoku aacoko. On wara aacoko, cewyaro aacoko paaka, cewyaro marha aacoko buhu hara, cewyaro marha aacoko oper̂a xa hara. Ero wa cewyaro so aacoko oyok ahnoro, kekn̂e tî Xako yîwya so.

17 On wara marha tî kekn̂e tîywapu tîtosom komo ya, Oyakno yenîche awya so on wara na nîîke awya so, Onoke yanton amyamro ha? Ahna mîîcetu? Onoke yoku moso maar̂atu? nîîke na awya so.

18 Ero wa ketaw awya so on wara kacoko yîwya, Awanton yoku moso Xako yoku, awya tîmsom ha tî apa. Noro rma mokyasî osom amna mapitaw, kacoko yîwya, kekn̂e tî yîwya so.

19 Ero wa xa marha tî kekn̂e Xako n̂examro pona tîtosom komo ya hara. Ero wa xa marha tî kekn̂e n̂examro pona tîtosom komo ya xa hara. Ahnoro tîyawpu tîtosom komo ya rma tî ero wa kekn̂e. Esau yenîche awya so ero wa xa marha men kacoko yîwya, kekn̂e tî yîwya so.

20 On wara men kacoko yîwya, Awanton mokyasî Xako amna mapitaw, kacoko, kekn̂e tî. On wara tî kekn̂e tîhnaw, Oyakno na wîrwoxinke wakrecho ke, oywapu arpoxapu tîmrî ke yîwya. Oyenîche tak tawake na nai opoko, kekn̂e tî. Ero wa tî kekn̂e Xako.

21 Ero ke Esau ya tîmsom yaan̂e komo takî tî cetken̂e Xako ywapu. Iito rma tî kokmamyakn̂e Xako reha eeta yaw rma.

22 Ero yinhîrî takî tî tuuna yepu wacekn̂e Xako kosope. Xaboke tî mîn xakn̂e tuuna yosotî. Cipici tî naar̂akn̂e. Cipici yanton marha tî naar̂akn̂e, tumumuru komo marha tî. Eeco pona tî naar̂akn̂e.

23 Ero wa tî wacetken̂e. Toh komo marha tî wacekn̂e, tmaywen komo marha tî. Ahnoro tî wacetken̂e.

24 N̂examro toche iito rma tî xakn̂e Xako cewn̂e. Iito exitaw takî tî tooto mokyakn̂e yîhyaka. Xako tî nahsîyakn̂e, chow. N̂etar̂mekn̂e takî tî noro yakro cenmakaxi ro.

25 Xako yar̂mara rma tko tî xakn̂e mohxapu. Ero ke noro petî makî takî tî napeyakn̂e, teme. Ero yapeche rma takî tî n̂esewkekn̂e oko Xako petî. Ero wa tî xakn̂e.

26 Pahkî etar̂mache so takî tî on wara kekn̂e mohxapu Xako ya, Ow tak ahsîpînkakî, owto xe tak wasî. N̂enmayasî tak, kekn̂e tî yîwya. Pîra, kekn̂e tî Xako. Awahsîpînkara ka wasî. Oyakronomacho poko xa ka amtapotakî awahsîpînkachome tak owya, kekn̂e tî yîwya.

27 Ai ha, taa, onoke awosotî? kekn̂e tî mohxapu Xako ya. Xako ow ha, kekn̂e tî.

28 On wara takî tî kekn̂e mohxapu, Taa, anarî me tak kosohcesî oroto. Xako mera tak masî. Ixaw me tak kosohces hara oroto antomano rin̂e wara awexirî ke. Kar̂pe mai ham Kaan yakro awetar̂metaw, tooto komo yakro awetar̂metaw marha. Ero ke wa Ixaw me kosohcesî, kekn̂e tî yîwya.

29 Ero yinhîrî on wara takî tî kekn̂e hara Xako yîwya, Awosotî cma re mekatîmyas owya Amoro hara, kekn̂e tî Xako yîwya. Ai ha, ahce kacho oyosotî yenta xe mai ha? kekn̂e tî mohxapu. Ero yinhîrî takî tî Xako yakronomacho poko nîmtapowakn̂e. Ero wa tî nîmtapowakn̂e.

30 Ero ke cetakritoponhîrî takî tî nosohcekn̂e Xako Pen̂iew me. On wara tî kekn̂e, Kaan yewru xa wenwo kopi. Waipîra rma tko wasî, kekn̂e tî. Ero ke tî ero wa nosohcekn̂e.

31 Enmayataw takî tî tuuna wacekn̂e Xako. Tîknaka, tîknaka kaxi tî cekn̂e oko. Ero wa tî cekn̂e Xako petîhra cexirî ke okwe.

32 Ero ke on wara naxe Ixaw Yana komo oroto, wooto yon̂etaw tîwya so petî micintho nîmcexe tonohra. Ancu ya Xako petkachonho ponaro cexirî ke so ero wa naxe.