Taa, ero yinhîrî takî tî pahkî exiche on wara xakn̂e Xako, tîtamru mumuru komo mtapotarî tî n̂encekn̂e. On wara tî ketken̂e, Apapa yemyawnonho tak nowtîkes okwe Xako, iyokuthîrî marha nowtîkes okwe. Cemyawnoi xa tak nasî noro apapa yemyawno yanme rma kica, ketken̂e tî. Ero wa kacho takî tî n̂encekn̂e Xako.

2 Ero yimaw marha tî cewîrwoxe tîtamru n̂een̂akn̂e Xako, tîîxatî pîn me tak okwe. Ero wa tî noro yewru n̂een̂akn̂e.

3 Ero yimaw marha tî Kporin komo nîmtapowakn̂e Xako yakro. On wara tî kekn̂e yîwya, Ai Xako, etoko tak hara aamo komo yeken pona hara. Ayanan komo yaka tak etok hara. Iina awcetaw rma kakronomesî, kekn̂e tî. Ero wa tî kekn̂e Kporin komo Xako ya.

4 Ero yimaw woskara po rma tî xakn̂e Xako. Tîtamru yok yenîrî poko rma tî xakn̂e. Ero ke takî tî cipici komo nan̂ikyakn̂e. Ria, Hakew kom ha.

5 On wara takî tî kekn̂e yîwya so, On wara tak ween̂asî aamo komo yewru okwe, ooxatî pîn wara tak ween̂as okwe. Ero wa tak nasî ooxatînhîrî cma re okwe. Kaanî rma tko oyakronomesî ponaro apapa yehtopo ha.

6 Aamo komo yanton me oyehtopo rma wa meen̂axe. Ketapickekn̂e ro mak noro yemyawno poko. Yuwun̂ura ro mak ketapickekn̂e.

7 Noro tko oyemîknoyakn̂e kica. Anarmerpa so naknamekn̂e oyepetho tîmtopo kica. 10-ro naknamekn̂e tîmtapotachonhîrî yaw rorohra kica. Kaanî tko oyemetanmekpora rma xakn̂e yîwya.

8 On wara ka kekn̂e owya yihcirî me, parapara komo mak ahsîko awepethîrî ha, kekn̂e cma re owya. Ero wa kache iime roro mak paaka n̂ewruyakn̂e parapara me rma. Ero yinhîrî tak anarî me kekn̂e hara, Twarîhkotosom komo mewru xa ahsîko awepethîrî ha, kekn̂e. Ero wa kache twarîhkotosom mewru me makîrha n̂ewruyakn̂e hara.

9 Ero wa Kaan nowyakn̂e aamo komo yokutho. Oyok me tak nîmyakn̂e hara.

10 Ero yinhîrî tak on wara wîxakn̂e woosî poko exitaw iyoku kîîrî ha, kwosowakn̂e tak. Boce ween̂akn̂e owosoto woosî pokono. Twarîhkotosom komo tî mîk xakn̂e woosî poko, parapara komo marha, tapatapa komo marha. Ero yipu mîk ween̂akn̂e owosoto.

11 Ero yipu yeen̂ataw owosoto ancu mtapotarî tak wencekn̂e hara Kaan yancunî mtapotarî, Xako, kekn̂e. Ahce Apa? wîîkekn̂e yîwya.

12 Xako, boce enko woosî pokono. Twarîhkotosom mîk meen̂asî woosî pokono, kparakparano, tapatapa komo. Awemîknorî ween̂asî rma atamru ya.

13 Kaan Ow ha, Betew po meen̂akn̂e Noro rma. Iito awexitaw toh pore mukmamyakn̂e katî. On wara mîîkekn̂e owya, Oyakronoman̂e me awexitaw aponaro xa tak wasî. Yaaro xa tan wîîkesî, mîîkekn̂e owya. Noro rma Ow ha. Ero ke on wara wîîkes awya, on roowo poi tak etok hara ayanan komo yeken pona hara, kekn̂e owya, kekn̂e tî. Ero wa tî kekn̂e Xako cipici komo ya.

14 Ero yipu yentache on wara tî n̂eyukyatken̂e Hakew, Ria komo, Exihra ro mak tak nasî apapa yemyawno amna ya tîmsom, noro waipuche tîmsom ha.

15 Tîyanan pîn wara ro mak amna n̂een̂asî apapa. Amna nîmyakn̂e awya epethîrî pona. Amna yepetho rma tak n̂irihtîkai okwe.

16 Apapa yokutho Kaan nîmyakn̂e awya hara, amna ya tîmsomunhîrî rma mîn nîmyakn̂e. Amna xîkrî komo ya tîmsomunhîrî marha mîk nîmyakn̂e awya. Ahce wa na nîîkai Kaan awya ero wa kacho rma ewetko, ketken̂e tî yîwya. Ero wa tî ketken̂e Xako pici komo yîwya.

17 Ero ke takî tî cekn̂e Xako. On wara tî cekn̂e, kameru mkahsî tî nakriyakn̂e tumumuru komo, cipici komo marha.

18 Cemyawno komo marha tî naar̂akn̂e iito Patan-Aran po ahsîxapu, tok marha tî naar̂akn̂e iito ahsîxapu ha. Kanan yesamarî yaw takî tî cekn̂e tîîm yaka tîtotome, Isake yaka ha.

19-20 Mooxe tî xakn̂e Rabaw ero yimaw. Tok poci yawotoso tî cekn̂e, oper̂a pocî. Ero yimaw takî tî Xako n̂esen̂epanmekyakn̂e okwe. Tîtamru ya tî esekatîmra ro mak cekn̂e. Siriu tî mîk xakn̂e yîtamru. Taa, on wara tî xakn̂e Hakew hara, mîk hak warai me ciixapu komo tî xakn̂e iito, ponaro yîîm yehtopo. Ero poko tî n̂en̂epanakn̂e kopi.

21 Ero wa tî cekn̂e Xako en̂epa me mak. Cemyawno tî naatîkekn̂e ahnoro, toh komo marha tî, tmaywen komo marha tî. Tuuna yepu takî tî wacetken̂e. Îîpî yesamarî yaw tî cetken̂e Xireace yesamarî yaw.

22 Taa, osorwaw enmapuche tak Xako yesen̂epanmetoponho takî tî n̂encekn̂e Rabaw.

23 Ero ke noro takî tî cekn̂e Xako yesamatho yaw. Takno komo takî tî naar̂akn̂e. Mooxe tî cetken̂e, 7 kaamo wicakî moxenon ha tî. Ero wicakî toche so tak Xako komo tî n̂een̂atken̂e mooxe îh po Xireace po.

24 Kosope tko tî Kaan n̂esenpekn̂e Rabaw ya, Siriu ya. Twosoto tî n̂een̂akn̂e. On wara tî kekn̂e yîwya, Rabaw, on wara men wîîkes awya, twerî men amtapotakî amn̂e Xako yakro. Wakretopo poko yîmtapotara esko. Emetanmetopo poko marha yîmtapotara esko, kekn̂e tî. Ero wa tî kekn̂e Kaan Rabaw ya.

25 Ero yinhîrî enmapuche takî tî Rabaw komo n̂esepor̂atken̂e Xako yakro. Îh po rma tî n̂etakriyatken̂e Xako komo Xireace po. Ero ke iina marha tî n̂etakriyatken̂e yîtamru kom hara. Roona yaw so tî n̂enmayatken̂e iito.

26 Ero yinhîrî on wara tî kekn̂e Rabaw Xako ya, Ai okopuci, ahce kacho esekatîmra mîmokye okwe? Oyemsîrî marha mekye okwe waapa narîtho wara mak.

27 Ahce kacho mesen̂epanmekye okwe? Owya esekatîmra ro mak mîmokye okwe. Owya awesekatîmyataw ketaw ha re waano taacerî ha re amokrî me so, maraka marha re tîyorkacerî, raatî marha. Ero wa kahwotacho komo poko re cehcerî ha awtorî me.

28 Oparî komo yewcoka xe thakwa wîxakn̂e okwe awtorî komo me. En̂epa me mak mîmohce okwe. Akpîra mehxe ham okwe.

29 Ayopo so thakwa tko nas amna. Awetapa xe rma re wehxe okwe. Kaanî rma tko nîmtapota oyakro oroto kosope. Ponaro nasî aamo Noro nîmtapota oyakro. On wara nîîka owya, Rabaw, twerî men amtapotakî Xako yakro. Wakretopo poko yîmtapotara esko. Emetanmetopo poko marha yîmtapotara esko noro yakro, nîîka owya.

30 On wara rma re kîhtînoyasî, aamo yaka thakwa awto xe masî. Ero ke mîmokye ham. On wara tko wîîkes awya, Ahce kacho ponaro oyehtopo mehce ha ke okwe akîhtoxaputho komo? kekn̂e tî. Ero wa tî kekn̂e Rabaw Xako ya.

31 On wara tî n̂eyukyakn̂e Xako, Keraswakn̂e mak apona okwe. Cemsîrî komo na nowya ohyai okwe, wîîkekn̂e thakwa. Ero ke mak esekatîmra kmokye.

32 Ponaro awehtopo yekîhra thakwa tko amna n̂ehxe ha. Enko xe ka. Oyakro mohxapu komo yaw enîche awya noro kr̂a waihkakî. Amna yemyawno entîkakî kyanan komo wero ro. Awemyawnonhîrî yenîche awya arko hara, wîîkes awya, kekn̂e tî. Ero wa tî kekn̂e Xako Rabaw ya ha. Aatopo tko tî ekatîmra xakn̂e Hakew Xako ya. Ero ke exihnî wara tî nîhtînoyakn̂e.

33 Ero ke takî tî n̂ewomyakn̂e Rabaw Xako mîn yaka, Ria mîn yaka marha, yipici komo yanton mîn yaka marha. Iina so tî re ponaro cehtopo n̂epor̂akn̂e. Enîhra rma tko tî xakn̂e. Taa, ero yinhîrî takî tî Hakew mîn yaka n̂ewomyakn̂e hara.

34 Hakew yaw rma tko tî xakn̂e ciixaputho, ponaro yîîm yehtopo komo kopi. Kameru mkahsî keremacho tî xakn̂e yîhyaw. Emyawno yen xakn̂e ero yaw. Ero yaka tî n̂enkayakn̂e ciixaputho. Ero pona rma tko tî n̂eremekn̂e Hakew. Ero po ceremaxi exitaw yîmîn tî n̂entîkekn̂e yîîm. Ponaro cehtopo yenîhra rma tî xakn̂e.

35 On wara tko tî kekn̂e Hakew tîîm ya, Ahwora na mai opoko apa awomra oyexirî ke. Ahce kacho ceremaxi mak oyemsîrî nîmtapowa oyakro, mîîke ha na. Roopo thakwa tko wasî kica. Ero ke thakwa awomra wasî, kekn̂e ha tî re Hakew. Ero ke anana makî tî n̂epor̂akn̂e Rabaw. Ciixaputho yenîhra rma tî xakn̂e okwe. Ero wa tî xakn̂e.

36 Ero yimaw takî tî nîrwonakn̂e Xako tîtamru poko. N̂eiyakn̂e takî tî. On wara tî kekn̂e yîwya, Ahce kacho kicicitho me ow mîhtînoya kica? Awemetanmekn̂e me ma ow mîhtînoya ke. Ero ke rîîwoxe mîmokye ham owece.

37 Oyemyawno rma cma re mentîka. Ahce takî re menwo ohyaw awemyawno? Ero yipu exitaw amna yaw oona ka ek ha oyakrono komo n̂enîrî me, awakno komo n̂enîrî me marha. N̂examro takî kicicme kehtopo n̂etahcaxe kicicme keen̂ataw so, kekn̂e tî.

38 Pahkî ketapickekn̂e awanton me 20 cimn̂ipu okwe. Awok yenîrî poko oyexitaw emarakara xakn̂e oper̂a, kabra marha. Awokuthîrî pun tonohra marha wîxakn̂e, kîîrî ha.

39 On wara marha wîxakn̂e, awokuthîrî yeskache kamara ya arîhra wîxakn̂e ahyaka. Oyokutho thakwa wîmyakn̂e awya epethîrî me hara. En̂epanmexapu men epemakî mîîkekn̂e owya, kosope aaxapu, katpanaw aaxapu marha. Ero ke ero wa wîmyakn̂e.

40 Kaamo thakwa opikekn̂e roro katpanaw. Kosope hara komsî wînîmyakn̂e. Ketwînîkpormekn̂e marha okwe.

41 20 cimn̂ipu wîxakn̂e ahyaw. 14 cimn̂ipu awanton me ketapickekn̂e awemsîrî komo yepetho me. Ero yinhîrî 6 cimn̂ipu ketapickekn̂e awokuthîrî yepetho me hara. Emapona roro tko ow memîknoi oyepetho poko kica, 10-ro ha.

42 Kaan makî cma oyakronomai, ponaro Abraaw yehtopo ha. Twerî xa Isake n̂etahcasî Noro xa oyakronomai ha. Oyakronomara exitaw ketaw ha re emyawnomra ro makî re ow men̂eperî ha, yipihra marha, iyokumra marha. Ero wa so ow men̂eperî ha re okwe. Oyetapickachonho tko n̂een̂akn̂e ham Kaan, oyemetanmetoponho awya n̂een̂akn̂e marha. Ero ke wa atwermekn̂e noro kokon̂oro opoko, kekn̂e tî. Ero wa tî kekn̂e Xako Rabaw ya.

43 On wara tko tî n̂eyukyakn̂e Rabaw, Oyemsîrî komo moxam wooxam komo. Omxîkrî komo marha moxam rikomo kom hara. Oyoku marha moso paaka komo, oper̂a komo. Owyanî re rma tan moxam ahnoro. Wemetanmekya ha ma re awya oyemsîrî komo? Kicicme ma re wiir̂a awya oparî komo rma ciki? Pîra ro mak.

44 Ero ke on wara xa wîîkesî, Etîxatî me kehtopo poko tak tîmtapotacerî. Ero yinhîrî ero wa kîmtapotacho ponaro tak men cehcerî miya roro, kekn̂e tî. Ero wa tî kekn̂e Rabaw.

45 Ero ke takî tî toopu n̂ekyakn̂e Xako. Piiri tî n̂iir̂akn̂e tîmtapotachonhîrî komo ponaro ehtopo komo me.

46 Ero yinhîrî takî tî toopu tî n̂enmekpekn̂e takrono komo ya hara. Ero yipu pona takî tî erewsî n̂etaketken̂e enmexapu pona. Iito takî tî n̂eseresmetken̂e.

47 Ero yipu takî tî nosohcetken̂e toopu, Xako n̂enmekpotho ha. Xeka-Satuta me tî nosohcekn̂e Rabaw. Anarî me tî nosohcekn̂e Xako reha. Karece me tî nosohcekn̂e noro reha.

48 On wara tî kekn̂e Rabaw, Kwokpan me tak nasî on toopu enmexapu, kekn̂e tî. Ero ke Karece me nai osot ham.

49 Mispa me marha tî nosohcetken̂e ero rma toopu. On wara tî kekn̂e Rabaw, Kporin komo exi xe wasî kenîn̂e komo me ketahsîpînkache so tak. Etmoxe so kexitaw so tak ero wa exi xe wasî Noro kenîn̂e komo me, kekn̂e tî. Ero ke ero wa kacho yaw roro marha tî nosohcetken̂e hara tîn̂enmekîthîrî komo toopu.

50 On wara marha tî kekn̂e Rabaw, Kaan mak nas awekatîmn̂e me. Oyemsîrî komo yemetanmekyataw awya Noro mak awen̂asî, anarî exihra nasî kenîn̂e. Noro marha nas awekatîmn̂e me anarî yahsîyataw hara awya apici me kica.

51-52 Enko men on toopu an̂enmekpothîrî. On̂iritho marha enko pirino, kekn̂e tî Rabaw. Kyotawno me wa wirî ha. Watohra ro mak wasî Xako yemetanmetome, kacho ponaro oyehtopo tan toopu. Ero wa xa marha kasko amoro hara. On watohra ro mak wasî Rabaw yemetanmeso, kasko marha amoro hara. Ero wa kacho ponaro kehtopo xa on toopu, kekn̂e tî Rabaw.

53 Kicicme kexitaw so etpoko Kaan xa nasî kepanîn̂e me. Ponaro xatken̂e Abraaw komo, Nao komo, n̂examro yîîm komo marha, Noro rma nasî kepanîn̂e me, kekn̂e tî. Ero wa tî kekn̂e Rabaw Xako ya. Ero ke nîmtapowakn̂e Xako hara. On wara tî kekn̂e, On watohra ro mak was ow hara awemetanmeso, kekn̂e tî. Yaaro xa tan wîîkesî. Twerî apapa, Isake n̂etacitho nasî, Noro n̂entarî me xa tan wîîkesî, kekn̂e tî. Ero wa tî kekn̂e Xako.

54 Ero yinhîrî takî tî paaka pun nakn̂iyakn̂e Xako Kaan ya tîmsom me, oper̂a puntho marha tî. Iito rma tî nakn̂iyakn̂e îh po rma. Ero yakn̂ipuche takno komo takî tî nan̂ikyakn̂e eseresmachome so. Ero ke takî tî n̂eseresmetken̂e. Ceseresmache so iito rma tî n̂enmayatken̂e îh po rma.

55 Ero yinhîrî takî tî pakekn̂e Rabaw enmarî yakro ro. Tparî komo takî tî n̂ewcokekn̂e, cemsîrî komo marha tî. Awakre xe so wasî Kaan ya, kekn̂e tî yîwya so. Ero wa kache n̂etîramekn̂e hara tî Rabaw komo, ceken pona hara. Ero wa tî cekn̂e.