Ero yinhîrî takî tî on wara kekn̂e Hakew hara, Okwe, Xako xîkrî yon me exihra ro mak was okwe, kekn̂e tî. Ero ke Hakew yewresawra takî tî xakn̂e akno yaake tîmxîkye. Ero ke on wara tî kekn̂e Xako ya, Omxîkrî ka cirko okwe. Cirihra awexitaw kwaihyasî mak okwe, kekn̂e tî.

2 Ero yipu yentache takî tî nîrwonakn̂e Xako. On wara tî kekn̂e Hakew ya, Ahce kacho ero wa mîîke owya? Kaan ma ow ha awya? Noro mak awir̂asî yîmxîtan me okwe, kekn̂e tî.

3 On wara tî kekn̂e xa hara Hakew ciin̂o ya, Tanî nai oyanton. Noro xa ahsîko apici me ha. Noro yewruche tak omxîkrî me tak nai, kekn̂e tî.

4 Ero ke tanton takî tî nîmyakn̂e Hakew Xako ya yipici me. Bira tî xakn̂e noro yosotî. Ero ke noro yenaka tî n̂etakriyakn̂e hara Xako.

5 Ero ke takî tî n̂etahsîyakn̂e Bira. N̂ewruyakn̂e hara tî kîîrî, Xako mumuru ha.

6 Noro yewruche ciki takî tî on wara kekn̂e Hakew, Kaan tak owîrîyakan̂e n̂en̂eke ham. Omtapotarî n̂enta ham. Ero ke omrerî nîîm, kekn̂e tî. Ero ke tî Taan me nosohcekn̂e tîmrerî.

7 Ero yinhîrî takî tî Hakew yanton n̂etahsîyakn̂e xa hara, Bira. N̂ewruyakn̂e tî kîîrî xa marha, Xako mumuru xa hara.

8 Ewruche on wara tî kekn̂e Hakew, Oyakno yopono me tak wai ham. Wîyoponka tak ham, kekn̂e tî. Ero wa tî kekn̂e Hakew. Ero ke Nahtari me tî nosohcekn̂e tîmrerî.

9 Taa, ero yinhîrî on wara tî kekn̂e Ria hara, Etahsîra tak wai ham okwe, kekn̂e tî. Ero ke tanton xa marha tî nîmyakn̂e ciin̂o ya yipici me, Siwpa tî osotî.

10 Ero ke takî tî Ria yanton n̂ewruyakn̂e kîîrî hara.

11 Noro yewruche on wara tî kekn̂e Ria, Owakresî xa hara Kporin komo, kekn̂e tî. Ero ke Kace me tî nosohcekn̂e tîmrerî ha.

12 Ero yinhîrî takî tî Ria yanton n̂ewruyakn̂e hara kîîrî xa marha, Xako mumuru xa hara.

13 Noro yewruche takî tî on wara tî kekn̂e Ria, Tawake xa tak wasî. Kaan nwakretho xa tak mîkro, kexe tak opoko wooxam komo, kekn̂e tî. Ero ke Ase me ciki tî nosohcekn̂e noro hara tîmrerî. Ero wa tî xakn̂e Ria.

14 Taa, ero yinhîrî takî tî Xako mumuru cekn̂e mararî pona Huben ha. Puruma yeperîrî yenmetopo me exitaw tî cekn̂e. Iito tî n̂een̂akn̂e tanmero atîhtaxapu. Mantakora tî mîn xakn̂e, tumn̂em ha. Ero mun takî tî naar̂akn̂e tîson yaka Ria yaka. Ero yinhîrî takî tî Hakew mokyakn̂e Ria yaka. On wara tî kekn̂e yîwya, Mantakora mun tî n̂eekî amrerî oroto. Ero poi cma re mîmyas owya, kekn̂e tî yîwya.

15 Okwe, kekn̂e tî Ria, oyin̂o yewyoman̂e amoro kica. Oroto tak tow xe mas omrerî n̂ekîtho hara mantakora kica, kekn̂e tî. Taa, kekn̂e tî Hakew, kosope awenaka n̂etakripe kiin̂o, amrerî n̂ekîtho yepetho me ha, kekn̂e tî.

16 Taa, kokon̂i takî tî Xako mokyakn̂e mararî pononho. Noro potpona tî cekn̂e Ria. On wara tî kekn̂e yîwya, Ai, oroto tî metakriya oyenaka omrerî n̂ekîtho yepetho me, mantakora yepetho me ha, kekn̂e tî yîwya. Ero ke Xako takî tî n̂etakriyakn̂e Ria yenaka ero po rma kosope.

17 Ero yimaw takî tî Ria mtapotarî n̂encekn̂e Kporin komo. Ero ke takî tî n̂etahsîyakn̂e xa hara. Ero yinhîrî takî tî n̂ewruyakn̂e Xako mumuru ciki. 5-nhîrî ciki tî mîk xakn̂e yîmrerî.

18 Ero ke takî tî on wara tî kekn̂e Ria, Oyepema tak ham Kaan. Oyanton wîmye oyin̂o ya yipici me. Ero wa tîmtoponho yepetho me cik nîîm haram moso owya, kekn̂e tî. Ero ke, Isaka moso, kekn̂e tî. Ero wa tî n̂osohcekn̂e.

19 Ero yinhîrî takî tî n̂etahsîyakn̂e xa hara. N̂ewruyakn̂e hara Xako mumuru ciki xa hara. 6-înhîrî tî mîk xakn̂e Ria mrerî.

20 Noro yewruche ciki on wara tî kekn̂e Ria, Oyepetho me Kaan nîmye ham kir̂wan xa tak. Ero ke oponaro n̂he tak nai oyin̂o tumumuru me oyewruru ke, 6 tak okre. Ero ke, Seburon moso, kekn̂e tî. Ero wa tî tîmrerî nosohcekn̂e Ria.

21 Ero yinhîrî takî tî n̂ewruyakn̂e xa hara Ria, woosî ciki tak ha tî. Ciina moso, kekn̂e tî. Ero wa tî cemsîrî nosohcekn̂e.

22 Taa, ero yinhîrî takî tî Hakew ponaro takî tî xakn̂e Kaan. Yîmtapotarî tî n̂encekn̂e. Cetahsîsom me takî tî n̂iir̂akn̂e.

23 Ero ke takî tî n̂etahsîyakn̂e, Hakew. N̂ewruyakn̂e hara kîîrî me okre. Ewruche takî tî on wara kekn̂e, Yîwîrîyakan me tak oriw ham Kaan okre, kekn̂e tî.

24 Ero ke takî tî tîmrerî nosohcekn̂e. Xose moso ham, kekn̂e tî. Anarî xa hara wa nîmya Kaan amn̂e owya omrerî xa hara, kekn̂e tî. Ero wa tî kekn̂e Hakew.

25 Taa, on wara takî tî xakn̂e Xako Hakew mrerî cik yewruche, Xose ha, Rabaw yakro tî nîmtapowakn̂e Xako. On wara tî kekn̂e yîwya, Owto xe cma re was hara oyeken pona. Ero ke takî cma re ow mahsîpînkesî.

26 Opici komo marha cma re men̂epesî oyakro, omxîkrî komo marha. Opici yepetho me thakwa ketapickekn̂e awemyawno poko ha. Pahkî xa thakwa ketapickekn̂e, kekn̂e tî.

27 Okwe, kekn̂e tî Rabaw, tanî rma cma re awexi xe was okwe. Ooxe awexitaw owî cma re tînomra masî. On wara wîhtînoyasî, tan awexirî ke ohyaw oyemyawno n̂epamnoyasî Kporin komo, wîîkesî. Xako yexirî ke makî cma ohyaw oyemyawno n̂epamnoyasî Kporin komo, wîîkesî. Ero ke tanî rma awexi xe wasî, kekn̂e tî.

28 Ahce xe tak na mai awepethîrî hara? Ero cma re metahcasî. Wîmyasî wa ha awya, kekn̂e tî. Ero wa tî kekn̂e Rabaw Xako ya.

29 On wara tî n̂eyukyakn̂e Xako, Taa, meen̂asî rma wa pahkî oyetapickachonho awanton me ha. Awoku komo xakn̂e ohyaw roro, kekn̂e tî.

30 Asakî mak xakn̂e awoku omokyataw oona. Mer̂pora ro mak tak nas oroto. Tan oyexitaw ahyaw awakrekn̂e Kporin komo. Ero ke on wara mak tak wîîkes awya, ahcemaw wepamnoya oyok hara, omxîkrî yok marha? wîîkes awya, kekn̂e tî. Ero wa tî kekn̂e Xako yîwya.

31 Taa, ahce tak wîmya awya ha? kekn̂e tî Rabaw Xako ya. Pîra, kekn̂e tî Xako yîwya. Ahce na komo tîmn̂e me awexi xera ro mak was owya. On wara mak oyexi xe wasî, kekn̂e tî Xako.

32 Oroto cma re awoku wîcherenonkesî oper̂a. Parapara komo na nai, tapatapa komo marha na nai. Ero wara exitaw noro yipu komo wahsîyasî oyok me. Cicwiyem marha exitaw oper̂a xîkrî noro yipu marha wahsîyasî. Kabra marha wahsîyasî parapara komo, tapatapa komo, ero yipu komo mak. Noro yipu makî wîcherenonkesî awoku poyinonho. Oyok me tak wahsîyasî.

33 Ero ke pahxaro oyepetho yîhtînoyataw tak awya oyoku meen̂asî kir̂wan̂he oyentome awya. Tumutwem yexitaw oyoku oper̂a, en̂epanmexapu mîk ham, mîîkesî. Ero wa marha mîîkesî kabra poko hara tumutwem exitaw ohyaw hara, kekn̂e tî.

34 Taa, kekn̂e tî Rabaw yîwya, amtapotarî yaw roro rma exi xe wasî, kekn̂e tî.

35-36 Ero ke ero po rma takî tî Rabaw cekn̂e tooku yîcherenonkaxi. Boce komo tî n̂iir̂akn̂e cewyaro parapara komo mak. Ero wa tî n̂iir̂akn̂e kabra hara. Kabra marha tî nîcherenonkekn̂e hara, cucurem tî n̂iir̂akn̂e cewyaro. Ero warai komo tî n̂iir̂akn̂e cewyaro. Tumumuru komo takî tî n̂iir̂akn̂e noro yipu komo yenîn̂e me. Ero yinhîrî takî tî mooxe takî tî toku naar̂akn̂e Rabaw Xako yai. 3 kaamo kîwtotopo wicakî moxenon tî naar̂akn̂e cewyaro n̂he tak cehtome. Iito rma tko tî xakn̂e Xako. Rabaw yoku tî n̂een̂akn̂e xa hara iito rma.

37 Ero yinhîrî takî tî on wara n̂iir̂akn̂e Xako, weewe xîkrî tî nîhkocekn̂e yaake. N̂ipikekn̂e ha re, mînto mînto wara mak twarîhkotoso ehtome.

38 Ero yipu takî tî n̂enmekyakn̂e tuuna yen mîtkoso. Tuuna yeeso mokyataw paaka iito rma tî kîîrî xakn̂e wos poko. Ero wa tî xakn̂e oper̂a marha, kabra marha.

39 Ero ke weewe yipikaxapu mîtwo rma tî kîîrî xakn̂e woosî poko, tapatapa me yipikaxapu mîtwo. Ero ke tapatapa me takî tî n̂ewruyakn̂e paaka.

40 On wara marha tî Xako n̂iir̂akn̂e oper̂a hara Rabaw yok ha, woosî komo tî nîcherenonkekn̂e, tapatapa komo, cucurem kom hara. Ero yinhîrî kîîrî takî tî naar̂akn̂e noro yipu komo cheka, woosî cheka ha. Cewyaro tî n̂iir̂akn̂e toh komo reha, Rabaw yoku cheka tî arîhra xakn̂e.

41 On wara marha tî xakn̂e, karitî komo makî tî naar̂akn̂e weewe xîkrî mîtkoso twarîhkotosom me yipikaxapu mîtkoso. Ero yipu chew etahsîtome so iina naar̂akn̂e. Iito takî tî woosî poko xakn̂e kîîrî.

42 Kar̂pen komo yarîhra tî xakn̂e Rabaw yoku weewe xîkrî mîtkoso. Ero ke kar̂pen komo yewruche Rabaw yok me tî xakn̂e yîmxîkrî. Karitî yewruche reha Xako yok me reha tî xakn̂e yîmxîkrî.

43 Ero ke mer̂pora ro makî takî tî n̂epamyakn̂e Xako yoku, paaka, oper̂a, kameru, buhu, ahnoro mak. Mer̂pora marha tî xakn̂e noro maywen wooxam komo, kîrkomo marha. Ero wa tî xakn̂e Xako.