Taa, ero yinhîrî takî tî cekn̂e xa hara Xako. Miya tî cekn̂e resce n̂ixan komo rowon pona.

2 Ewto pahnoke cexitaw tuuna takî tî n̂een̂akn̂e ahtoxapu. Ewto panaw tî xakn̂e. Tuuna mîtwo tî n̂een̂akn̂e oper̂a hara yaake. Osorwawno komo yoku tî n̂een̂akn̂e. Tpomxe so tî xakn̂e noro re yoku cetîraposo. Oper̂a wokru rma tî mîn xakn̂e tuuna. Tahruso tko tî xakn̂e okwe toh ke porin ke.

3 Iina tî toh komo n̂ekyatken̂e roro oper̂a yenîn̂e komo. Mohtîkache so tak toopu tî nîhmametken̂e ahtoxapu yahrunkachome, oper̂a wokpachome. Wokpache tuuna tak nahruyatken̂e hara toh ke hara. Ero wa tî oper̂a wokpetken̂e roro iina.

4 Ero ke takî tî Xako cekn̂e oper̂a yenîn̂e komo yaka. On wara tî kekn̂e yîwya so, Oyakno komo, ahtono amyamro ha, kekn̂e tî. Aran pono amna, ketken̂e tî yîwya.

5 Ai ha, Rabaw meen̂atu, Nao mumuru? kekn̂e tî Xako yîwya so. Nhnk, amna n̂een̂asî, ketken̂e tî yîwya.

6 Kir̂wan̂he nai ha? kekn̂e hara tî Xako yîwya so. Nhnk, kir̂wan̂he nai. Noro yemsîrî mokyasî oroto Hakew, enko xe. Tîîm yoku n̂ekyasî oper̂a, ketken̂e tî.

7 On wara takî tî kekn̂e Xako, yohno n̂he wokpacoko awoh komo cuh pona aatome hara awya so, yînahrî pona. Kaw rma ka nasî kaamo oper̂a yenmecho mera ka. Ero ke yînahmacoko rma ka, kekn̂e tî yîwya so.

8 Wokpara thakwa ka nas amna, ketken̂e tî Xako ya. Oper̂a yenîn̂e komo mohtîkache so mak toopu nîhmames amna tuuna yahrutopo. Ero yimaw mak wokpes amna. Ero wa nas amna, ketken̂e tî Xako ya.

9 Ero wa ketaw rma yîwya so Hakew takî tî mokyakn̂e. Tîîm yoku tî n̂ekyakn̂e oper̂a. Noro yoku yenîn̂e me tî xakn̂e. Ero wa tî xakn̂e Hakew.

10 Taa, noro yenîche takî tî on wara kekn̂e Xako, Noro xa ham yememe yepeka yemsîrî, Rabaw yemsîrî ham. Noro yoku n̂ek ham. Ero ke toopu yîhmamaxi takî tî cekn̂e noro rma. Ahtoxapu tî nahrunkekn̂e. Tuuna tî nanîmyakn̂e tîtamru yok wokru.

11 Wokpache Hakew takî tî n̂ewcokekn̂e Xako. Nîwracekn̂e marha tî.

12 Aamo yepeka mrerî ow ha, Hebeka mrerî, kekn̂e tî yîwya. Ero wa kacho yentache takî tî Hakew cekn̂e tîîm ya ekatîmso. Kar̂pe tî cekn̂e.

13 Taa, Xako yekaci yentache Rabaw ya, Mînto nai awepeka mrerî ha, kacho yentache enso takî tî cekn̂e. Enîche nîpîmîmiyakn̂e, n̂ewcokekn̂e marha tî. Tîmîn yaka takî tî naar̂akn̂e. Ero yimaw tak cehtoponhîrî takî tî n̂ekatîmyakn̂e Xako yîwya.

14 Ero yipu yentache takî tî on wara kekn̂e Rabaw yîwya, Oyananî ro xa amoro, kekn̂e tî Xako ya. Ero yinhîrî takî tî iito n̂enmayakn̂e Xako Rabaw yaw. Cewn̂e nuun̂i tî ka xakn̂e iito.

15 Ero yinhîrî takî tî nîmtapowakn̂e Rabaw Xako yakro etapickacho poko. On wara tî kekn̂e yîwya, Oyanan me rma re masî. Wara rma tohnaw awapicka xera wasî. Wepemesî rma awetapickachonhîrî. Ahce xe mai ha awepethîrî? kekn̂e tî yîwya.

16 Taa, asakî tî xatken̂e Rabaw yemsîrî. Potuthîrî yosotî tî xakn̂e Ria. Mahtîkîthîrî yosotî reha tî xakn̂e Hakew. Ero wa tî xakn̂e Rabaw yemsîrî komo yosotî.

17 Anarî me n̂he tî xakn̂e Ria yewru, cenporera n̂he tî xakn̂e. Hakew reha tî xakn̂e cenporem me xa.

18 Ero ke tî Hakew xe xakn̂e Xako cipici me. Ero ke on wara tî kekn̂e Rabaw ya, Awemsîrî xe mak wasî oyetapickachonho yepetho me. Hakew xe xa wasî ha mahtîkîthîrî. 7 cimn̂ipu ketapickesî awanme noro yepetho me, kekn̂e tî yîwya.

19 On wara tî n̂eyukyakn̂e Rabaw, Taa, wîmyas awya. Anarî ya tîmî xera n̂he wasî. Ero ke tan esko, kekn̂e tî yîwya.

20 Ero ke takî tî 7 cimn̂ipu n̂etapickekn̂e Xako Hakew yepetho me. Yohnono wara tî n̂enmayakn̂e yîwya yiixe xa exirî ke.

21 Ero yinhîrî takî tî Rabaw yakro nîmtapowakn̂e hara Xako. On wara tî kekn̂e yîwya, Taa, n̂eexi tak oyetapickacho noro yepetho me. Opici tak tîmko ha, enaka tak oyetakritome, kekn̂e tî.

22 Ero ke takî tî erewsî n̂iirakn̂e Rabaw, ceseresmacho komo. Ahnoro tî nan̂ikyakn̂e iitono komo. Ero ke tî n̂eseresmetken̂e.

23 Taa, kosope takî tî Ria n̂ekyakn̂e Rabaw Xako yaka yipici me. Ero ke takî tî noro yenaka n̂etakriyakn̂e Xako.

24 Ero yimaw tantonînhîrî marha tî nîmyakn̂e Rabaw cemsîrî yanton me, Ria yanton me ha. Siwpa tî mîk xakn̂e noro yanton yosotî.

25 Taa, enmapuche takî tî cenawno n̂een̂akn̂e Xako. Ria makî tî n̂een̂akn̂e okwe. Ero ke Rabaw yakro tî nîmtapowakn̂e Xako. Ahce kacho Ria mîm hara okwe opici me? kekn̂e tî yîwya. Hakew yepetho me xa ketapickai. Ahce kacho ow memîknopu kica? kekn̂e tî yîwya.

26 On wara tî kekn̂e hara Rabaw, On wara mak nas amna tantono, mahtîkîthîrî tîmîhra ka nas amna yihcirî me. Potuthîrî makî ka amna nîmyasî yihcirî me.

27 Ero ke etapickakî xa hara 7 cimn̂ipu xa hara. Ero wicakî awetapickache xa hara wîmyasî tak mahtîkîthîrî awya, kekn̂e tî Rabaw yîwya.

28 Ero ke 7 cimn̂ipu xa hara tî n̂etapickekn̂e thakwa Xako. Ero wicakî etapickache Hakew takî tî nîmyakn̂e Rabaw yipici me.

29 Ero yimaw marha anarî tî nîmyakn̂e hara Rabaw tantononhîrî. Hakew yanton me tî nîmyakn̂e. Bira tî xakn̂e noro yanton yosotî.

30 Ero yinhîrî takî tî Hakew yenaka n̂etakriyakn̂e Xako. Hakew xe xa tî xakn̂e. Ria xera n̂he tî xakn̂e okwe. Ero wa tî xakn̂e Xako okwe. Ero yinhîrî 7 cimn̂ipu xa hara tî n̂etapickekn̂e Rabaw maywen me.

31 Ero yimaw takî tî Ria xera Xako yehtopo n̂een̂akn̂e Kporin komo. Ero ke takî tî tîmxîtaxmu me noro n̂iir̂akn̂e. Yîmxîtara reha tî xakn̂e Hakew okwe. Ero wa tî Kporin komo n̂iir̂akn̂e.

32 Ero ke takî tî Ria n̂etahsîyakn̂e. N̂ewruyakn̂e tak kîîrî. On wara tî kekn̂e, Oyahwokacho n̂een̂e ham Kporin komo. Ero ke omrerî cik nîîm. Moso poyero cik ooxe tak nai oyin̂o, kekn̂e tî. Ero ke tî Huben me nosohcekn̂e.

33 Ero yinhîrî takî tî n̂etahsîyakn̂e xa hara Ria. N̂ewruyakn̂e xa hara kîîrî xa marha. On wara tî kekn̂e yîson noro yewruche, Ooxera oyino yehtopo n̂een̂a ham Kporin komo. Ero ke omrerî xa hara nîîm ham, kekn̂e tî. Ero ke Simeaw me tî nosohcekn̂e.

34 Ero yinhîrî takî tî n̂etahsîyakn̂e xa hara noro xa marha. N̂ewruyakn̂e xa hara kîîrî. On wara tî kekn̂e noro yewruche, Ooxe xa tak nai ha oyin̂o osorwaw yumumuru komo yon me oyexirî ke, kekn̂e tî. Ero ke tî Repi me nosohcekn̂e.

35 Ero yinhîrî takî tî n̂etahsîyakn̂e xa hara noro xa marha. N̂ewruyakn̂e tî kîîrî xa hara. Xuta me tî noro ciki nosohcekn̂e. On wara tî kekn̂e yîson noro yewruche, Kporin komo poko tak kahwowasî xa, kekn̂e tî. Ero wa tî kekn̂e Ria. Ero ke tî Xuta me tî nosohcekn̂e. Ero yinhîrî yîmxîtara takî tî xakn̂e. Ero wa tî xakn̂e Ria.