Ero ke takî tî Xako nan̂ikyakn̂e Isake. Mokuche Kaan ya akronomacho n̂ekatîmyakn̂e xa hara yîwya. Panatanmekyakn̂e marha yipici yahsîtopo poko. On wara tî kekn̂e yîwya, Kanan pono komo yemsîrî ahsîra ro mak men esko okopuci apici me.

2 Patan-Aran pona xa matko etoko atamru yaka Betuew yaka. Iito awexitaw tak anocwan yepeka yemsîrî tak ahsîko apici me, Rabaw yemsîrî ha.

3 Taa, apici yahsîche awya awakronoma xe xa men wasî Kaan ya Karitî ro ya. Awepamno xe ro mak wasî yîwya. Mer̂pora ro mak exi xe so was awepamthîrî kom ha.

4 Apapa pen nakronomekn̂e Kaan, Abraaw pen ha. Ero wa xa marha awakronoma xe was hara yîwya. Awepamthîrî komo yakronoma xe marha wasî yîwya. On roowo nîmyakn̂e Kaan Abraaw ya, yiipo mas ero. Anarî yana komo chewno me rma re masî. Ero rma tko nahsîyaxe amn̂e awepamthîrî komo, Kaanî mtapotachonho yaw roro rma, kekn̂e tî. Ero wa tî kekn̂e Isake tumumuru ya Xako ya.

5 Ero wa tî tumumuru n̂en̂epekn̂e Isake. Ero ke miya takî tî cekn̂e noro Patan-Aran pona Rabaw yaka. Betuew mumuru tî mîk xakn̂e Rabaw, Sirio mumuru ha tî. Hebeka yepeka tî mîk xakn̂e, Xako nocwan yepeka, Esau nocwan yepeka ha. Noro yaka tî cekn̂e Xako.

6 Taa, ero yimaw on wara takî tî xakn̂e Esau hara, Isake ya takno yakronomapotopo tî n̂encekn̂e. Yipici ka Patan-Aran pona noro yen̂epetoponho marha tî n̂encekn̂e. On wara kacho marha tî n̂encekn̂e tîîmî mtapotarî, Kanan pono komo yemsîrî ahsîra ro mak men esko apici me, kachonho tî n̂encekn̂e. Ero wa kacho tî n̂encekn̂e Esau tîîmî mtapotarî.

7 Tîîm yewetîtopo marha tî n̂een̂akn̂e Xako ya, tînocwan yewetîtopo marha. Patan-Aran pona etoko, kacho yewetîtopo n̂een̂akn̂e.

8 Ero wa tî n̂een̂akn̂e Esaw ha. Ero ke on wara tî kekn̂e tîhnaw, Ahwora nai ham apapa opici komo poko okwe, Kanan pono komo yemsîrî me exirî ke so, kekn̂e tî. Ero wa tî kekn̂e Esau.

9 Ero ke Ismaew yaka takî tî cekn̂e Abraaw pen mumutho yaka. Noro yemsîrî takî tî nahsîyakn̂e hara cipici me hara. Maaraci tî mîk xakn̂e noro yosotî. N̂ebayoce yakno tî mîk xakn̂e Maaraci. Noro tî nahsîyakn̂e Esaw cipici me, pahxa tînahsîthîrî komo yakrono me rma. Ero wa tî nahsîyakn̂e.

10 Taa, on wara tî xakn̂e hara Xako, Behseba poi tî cekn̂e Aran yesamarî yaw.

11 Mooxe tî cekn̂e kokmamso ro. Kokmamche tîwîntopo takî tî n̂een̂akn̂e. Ero ke tî n̂etîrapekn̂e puknow wa mak. Toopu mak tî namekyakn̂e tîhtîpîrî yapon me. Ero wa tî n̂etîrapekn̂e tîwîntome.

12 Tîwînkîche takî tî wosowakn̂e. Ehyu tî n̂een̂akn̂e twosoto. Roowo pona roro tî xakn̂e ehyu mapirî. Miya tî xakn̂e kah yaka roro poturu hara. Kaan yancun komo marha tî n̂een̂akn̂e. Ehyu pore tî kainatken̂e, nîhcetken̂e marha ehyu pore hara.

13 Kporin komo marha tî n̂een̂akn̂e ehyu yepoi. On wara tî kekn̂e Noro Xako ya, Aporin komo Ow, Kaan ha. Ponaro xakn̂e aporin pen Abraaw Noro ow ha. Ponaro Isake yehtopo marha Ow ha. On wara wîîkes awya okopuci, roowo pona metîrapo ero rma wîmyas amn̂e awya, awepamthîrî komo ya marha.

14 Mer̂pora ro mak naxe amn̂e awepamthîrî komo, roowo pupuntho wara ro mak naxe. N̂examronhîrî yepamche miya so tak n̂etakpayaxe. Oesce yaw roro, resce yaw roro, suu yaw roro, nohce yaw roro. Ero wa n̂etakpayaxe awepamthîrî mer̂pora ro mak cexirî ke so. N̂examro ke rma roowo pono komo wakronomes Ow miyan komo rma.

15 Awakrono ro xa Ow ha. Ahna so na awcetaw kukurunpesî. On pona xa marha kekyas hara amn̂e roowo pona. On wara kîîr̂asî, wîîkai awya, ero wa kacho yaw roro rma kir̂wan̂he kiir̂asî. Awahsîpînkara ro mak wasî ero wara awitome owya, kekn̂e tî. Ero wa tî kekn̂e Xako ya Kporin komo.

16 Ero wa kacho yentache takî tî tîtîk, pakekn̂e Xako. Kopi, kekn̂e tî, kopi. Tanî nai ham kopi Kporin komo. Yîhtînopîra weexi kopi, kekn̂e tî.

17 Ero ke tî n̂eraswakn̂e Xako. On wara tî kekn̂e, Keserepokacho xa on roowo kopi. Kaan yeken xa tan ham kopi, kaapu potarî rma on ham kopi, kekn̂e tî. Ero wa tî kekn̂e Xako.

18 Ero yinhîrî takî tî enmarî yakro ro nawomyakn̂e hara Xako. Piiri takî tî n̂iir̂akn̂e toopu tîhtîpîrî yaponho rma. Ero wa ciriche katî tî nukmamyakn̂e ero pore rma Kaan ya tîmsom. Ero wa tî xakn̂e Xako.

19 Ero ke anarî me tî nosohcekn̂e cetîrapotoponhîrî. Rus kachonho tî mîn xakn̂e iitono komo ya. Betew me takî tî nosohcekn̂e. Ero wa tî nosohcekn̂e Xako.

20 Ero yinhîrî takî tî Kaan ponaro cehtopo poko nîmtapowakn̂e. On wara tî kekn̂e, Oyakrono me exi xe wasî Kaan, miya roro owtotopo pona roro oyakronoman̂e me exi xe xa wasî. Okurunpe xe wasî yîwya, oyuru yenpo xe marha wasî yîwya, oponon yenpo xe marha wasî.

21 Ero yinhîrî xiya oyekî xe was hara yîwya apapa yaka hara, ahwokan me rma oyekî xe wasî yîwya. Ero wa oyakronoman̂e me roro exitaw Kporin komo, Noro tak wiir̂asî ponaro xa oyehtopo me.

22 Kaan mîn me tak nasî on toopu, piiri wiirî, ero, kekn̂e tî. On wara takî tî kekn̂e Kaan ya, Opurantan exitaw anmîthîrî Apa, ero wîraconkesî tak awya tîmsom me hara, 10 poyinonho cewn̂e so wiir̂asî awya tîmsom me. Ero wicakî xa marha wîraconkesî ahnoro anmîthîrî owya, awya tîmsom me hara, kekn̂e tî. Ero wa tî kekn̂e Xako Kporin komo ya.