Taa, pahkî exiche takî tî poritomotho me xakn̂e Isake. Ewuhnî me ro makî takî tî xakn̂e okwe. Ero yimaw takî tî tumumuru nan̂ikyakn̂e Esau ha, potuthîrî. On wara tî kekn̂e yîwya, Okopuci kekn̂e tî. Ahce apa? kekn̂e tî Esau yîwya.

2 On wara wîîkes awya okopuci, poritomo me tak was okwe. Ahcemaw na kwaihya, yîhtînopîra wasî.

3 Ero ke oyotî twota woskara pona. Akrapan arko, awuhre kom ha.

4 On wara wasî, owaipîrarî ka awakretopo poko kîmtapowasî. Ero ke oyotî twota. Twoche tak awya yupunthîrî tîyoko, ainpeko marha. Tpoxwe ciin̂e xa amoro okre. Ero ke ero wara cirko. Eeko tak oyotî. Tonoche owya awakretopo poko tak kîmtapowasî.

5-6 Ero ke takî tî woskara pona cekn̂e noro wooto woso. Hebeka tko tî iito xakn̂e Esau yakro yîmtapowataw Isake. Yîmtapotarî tî n̂encekn̂e. Ero ke takî tî Xako nan̂ikyakn̂e hara. Ai okopuci, kekn̂e tî yîwya, on wara wenta apapa mtapotarî. Awakno ya nîîka Esau ya.

7 Waipîra ka oyexitaw awakretopo poko kîmtapowasî. Ero ke oyotî men ka twota. Twoche tak awya yupunthîrî tîyoko. Tpoxwe xa cirko oyotî. Tonoche owya awakretopo poko tak kîmtapowasî Kaan n̂entarî me, nîîka kica.

8-9 Ero ke on wara wîîkes awya okopuci, omtapotarî men ewetko ha. Kookuthîrî ka ehta kabritu. Asakî ehta kir̂wan komo. Yupun wîyesî amn̂e apapa yotî me. Tpoxwe xa wîyesî noro wakon me.

10 Onîyotho tak arko iyotî. Tonoche yîwya awakretopo poko tak nîmtapowasî twaipîrarî ha ka, kekn̂e tî. Ero wa tî kekn̂e Hebeka tîmrerî ya Xako ya.

11 On wara tko tî n̂eyukyakn̂e Xako, Apohana yeme, tîhpoxe xa nasî oyakno pun. Yîhpora reha nas opunu reha okwe.

12 Anarimaw na apapa oyapeya kopi. Cemarontaxmu me na ohtînoya. Ero warai me ohtînoyataw oyemetanmetopo poko men nîmtapowa kopi oyakronomapotopo poko yîmtapotara ro mak nas okwe, kekn̂e tî.

13 On wara tko kekn̂e yîson hara, Awemetanmetopo poko yîmtapowataw apapa oyemetanmetopo me xa matko n̂expe yîmtapotarî. Omtapotarî mak ewetko. Kabritu ka ehta yohno ha, kekn̂e tî. Ero wara tî kekn̂e tîmrerî ya.

14 Ero ke tî cekn̂e Xako kabritu yehso. Tîson yaka tî n̂ekyakn̂e yupunthîrî. Ero ke takî tî nîyekn̂e, nainpekn̂e marha. Tpoxwe ro mak n̂iir̂akn̂e ciin̂o wakon me.

15-16 Ero yinhîrî takî tî Esau ponon n̂ekyakn̂e potuthîrî ponon, kir̂wan ha. Tîhyawno rma mîn n̂ekyakn̂e mîîmo yawno. Xako ya tî namrupekn̂e mahtîkîthîrî ya. Kabritu pichotho marha tî n̂imiyakn̂e amorî poko so, yîpîmtari marha.

17 Ero wa ciriche takî tî yîîm yotî nîmyakn̂e Xako ya tînîyothîrî. Iyuru marha tî nîmyakn̂e tînaithîrî ha. Ero wa tî nîmyakn̂e Xako ya.

18 Ero ke takî tî tîîm yaka cekn̂e Xako. Apa, kekn̂e tî yîwya. Ahce? kekn̂e tî yîîm. Onoke amoro hara okopuci? kekn̂e tî yîwya.

19 Esau ow ha poritomo ha, kekn̂e tî kopi tîîm ya. Amtapotarî wewet ha. On ha awotî kooso. Ahkantakî kapu aweseresmachome. Aweseresmache owakretopo poko tak amtapotakî, kekn̂e tî.

20 Ai ha, kekn̂e tî yîîm yîwya, Yohno xa mîmoko hara okopuci. Ahce wa xa yohno wooto menwo hara kopi? kekn̂e tî yîwya. Kporin komo cma n̂enpo owya ponaro awehtopo ha, kekn̂e tî Xako.

21 On wara tko tî kekn̂e yîîm, Eeko ika, kapesî Esau xa ham moso, kachome tak owya, noro pînî tko moso ham, wîîke na anarimaw, kekn̂e tî.

22 Ero ke takî tî tîîm mîtkoso cekn̂e Xako. Napeyakn̂e takî tî yîîm ha. On wara takî tî kekn̂e, Xako me cma re wencesî amtapotarî. Esau yamorî me tko wahsîyasî awamorî ha, kekn̂e tî yîwya. Ero wa tî kekn̂e Isake.

23 Ero ke Xako me yîhtînopîra rma tî xakn̂e yîîm tamohpoxe exirî ke. Akno yamorî wara rma tî xakn̂e tamohpoxe, Esau yamorî wara rma. Ero ke takî tî wakretopo poko nîmtapowakn̂e.

24 Cewn̂e ro xa hara tî kekn̂e yîwya. Esau xa amoro ha? kekn̂e tî yîwya. Nhnk, noro rma ow ha, kekn̂e tî Xako yîwya kica.

25 Taa, oyotî ek ha. Omumuru rma amoro ham. Ero ke awotowathîrî ka won̂es ha Kaan ya awakronomacho yekatîmtome owya. Ero ke takî tî yîhyaka naar̂akn̂e. Wooku marha tî naar̂akn̂e yîhyaka. Ero ke takî tî n̂eseresmekn̂e yîîm.

26 Ceseresmatîkache on wara takî tî kekn̂e tumumuru ya, Xiya n̂he ka amok ha okopuci. Ow ka ewcokakî, kekn̂e tî yîwya.

27 Ero ke yîhyaka xa takî tî cekn̂e Xako. Tîîm takî tî n̂ewcokekn̂e. Noro ponon tî n̂esunukyakn̂e yîîm. Esau ponon me rma tî kotowakn̂e. Ero ke wakretopo takî tî n̂ekatîmyakn̂e yîwya. On wara tî kekn̂e, Mararî wara xa kotowas okre omumuru. Ewtî mexan me Kporin komo n̂iritho wara xa kotowas okre.

28 Ero ke Kaan ya awakronoma xe men wasî okopuci. Cicakî ke amararîn yatîkre xe men wasî yîwya. Naatî yewtî me xa ciri xe wasî amararîn yîwya. Ero wa ciri xe wasî mer̂pora ehtome anatîrî yeperîrî puruma, awokru marha uupa yukun.

29 Awanton me so n̂ehcowpe anarî yana komo. Mîk hak rowon pono komo marha nutupentacowpe amamakan me. Awakno komo yantoman̂e me marha esko amoro ha. Amamakan me marha nutupentacowpe anocwanî mrerî komo. Awîrîman̂enhîrî komo nîwîrîmape hara Kaan. Awakroman̂enhîrî komo nakronomape hara Noro. Ero wara men awir̂i xe wasî Kaan ya amn̂e, kekn̂e tî. Ero wa tî Xako yakronomapotopo n̂ekatîmyakn̂e yîîm.

30 Ero yipu yekatîmche cekn̂e tak ha tî Xako. Noro mahyaka rma takî tî mokyakn̂e akno hara, Esau ha. Toche xa tî mokyakn̂e esetakaxapunhîrî.

31 Totowathîrî tî nîyekn̂e noro rma. Tpoxwe xa marha tî n̂iir̂akn̂e. Naar̂akn̂e takî tî tîîm yaka. Apa, kekn̂e tî. On ha oyotowatho awot ha, amumuru yotowatho. Ahkantak ha kapu. Tonoko ha ka oyakronomapotopo poko amtapotachome, kekn̂e tî.

32 Onoke amoro hara kopi? kekn̂e tî Isake yîwya. Amumuru ow ha poritomo ha. Esau ow ha, kekn̂e tî.

33 Ero yipu yentache takî tî n̂eserepokekn̂e xa takî tî Isake. Tatanakn̂e ro makî tî. Onok ma mîkro hara? Oona moko, oyotî n̂ek ha. Yîn̂ekîthîrî wonotîka amokunaw ha ka. Yîwya rma wakretopo wekatmo ha. Ero ke men Kaanî nwakrerî me xa nasî noro, kekn̂e tî.

34 On wara takî tî xakn̂e Esau tîîmî mtapotarî yentache, nîwracekn̂e xa takî tî. Kar̂pe xa tî nîwracekn̂e ahwora ro mak. On wara tî kekn̂e hara tîîm ya, Apa, oyakronomapotopo meero cma re mekatîmyas ha, kekn̂e tî yîwya.

35 On wara tko tî n̂eyukyakn̂e yîîm, Awakno moko oroto emku me. Awakretoponhîrî thakwa nou okwe, kekn̂e tî.

36 Kica, kekn̂e takî tî Esau. Yaaro rma kyam wa nai noro yosotî Xako me ha. Asakî ro oyoponkan̂enho mîkro kica. Potuthîrî me oyehtoponho ka nowye. Oroto tak nou xa hara kica owakretoponhîrî, kekn̂e tî. Yîmtora n̂he na mex okwe owakretopo hara Apa? kekn̂e tî.

37 Okwe, kekn̂e tî Isake yîwya. Akayaritomon me thakwa wiirî awakno. Iyanan komo ahnoro wiitîka noro yanton me. Tînatkem me xa wiirî puruma ke. Twokyem me marha wiirî uupa yukun ke. Ero ke ahce ke thakwa re kwakrepe hara okopuci? kekn̂e tî.

38 Ketîkekn̂e rma ha tko tî Esau tîîm ya. Cewn̂e xa tko na nai owakrecho apa ahyaw. Apa, ow meero wakrepoko ha, kekn̂e tî. Ero wa kache nîwracekn̂e xa hara tî Esau.

39 Ero ke on wara tî kekn̂e yîîm yîwya, Taa, on wara mas amn̂e okopuci, ewtî mexan po tak masî. Tuuna marha mokyasî roro anatîrî yatîkrecho okre.

40 Kacipara imo poko tko masî awaparî yen̂epetopo poko. Awakno yanton me rma mas ha. Pahkî awexiche iyopono me tak mas hara. Noro maywen mera tak masî, kekn̂e tî. Ero warai ciki tî n̂ekatîmyakn̂e Isake Esau wakretopo.

41 Ero ke Xako xera ro makî takî tî xakn̂e Esau noro wakretoponho poyero, yîîm n̂ekatîmyakn̂e ero poyero. On wara tî kekn̂e, Pahnoke tak nasî apapa waihtopo, yîpînîn yaw kîwratatopo. Kîwratatopo yîtîhkache tak oyakno waihkesî kr̂a, Xako pen ha, kekn̂e tî.

42 Yîmtapotarî tko tî n̂encekn̂e hara Hebeka. Ero ke noro yakno takî tî nan̂ikyakn̂e mahtîkîthîrî. On wara tî kekn̂e yîwya, Okopuci, on wara nas awakno, on wara karî ke n̂eserepotanmekyasî, Oyakno kr̂a wetapesî amn̂e, karî ke.

43 Ero ke on wara wîîkesî okopuci awya, omtapotarî men ewetko ha. Miya men ka emahciko Aran pona. Iito nas oyepeka Rabaw. Noro yaka etok ha.

44 Noro yaw ka esko yohno mak. Ahri ka, awakno ka n̂etîrwoxinkape amohtome hara.

45 Etîrwoxinkache tak yîwya kan̂ikpes hara awya cemîknotoponhîrî yîhcamnopuche. Omrerî komo waipu xera ro mak men wasî asakno roro rma. Ero kaamo po rma awaipu xera so ro mak was okwe, kekn̂e tî. Ero wa tî kekn̂e Hebeka Xako ya.

46 Ero yinhîrî Isake yakro takî tî nîmtapowakn̂e hara Hebeka. On wara tî kekn̂e yîwya, Kicicme ro mak naxe moxam Etew komo yemsîrî, Esau pici kom ha. Expon me ro mak wasî n̂examro yanme. Owaipu xe kr̂a mak wasî. Taa, Xako marha men wa nahsîya Etew yemsîrî hara kica. Noro yipu komo yahsîyataw yîwya, okwe, expora ro mak wasî owaitopo pona roro, kekn̂e tî. Ero wa tî kekn̂e Hebeka Isake ya.