Taa, ero yinhîrî takî tî n̂etînaketken̂e iitono komo Kanan pono pen komo. Pahxa Abraaw exitaw etînakacho komo xakn̂e ero wa xa marha tî xakn̂e etînakacho komo xa hara. Ero ke Isake takî tî cekn̂e Abimereke yaka. Piristew komo kayaritomon tî mîk xakn̂e Abimereke. Xera pono tî mîk xakn̂e. Noro yaka tî cekn̂e.

2 Ero yimaw takî tî Kporin komo n̂esenpekn̂e Isake ya. On wara tî kekn̂e yîwya, Ai Isake, Exitu pona tohra esko. Roowo wenpes amn̂e awya ero po mak esko.

3 On roowo po mak esko awakronomachome owya, awakrechome marha owya. On roowo wîmyas arowon komo me ahnoro. Awya wîmyasî, awepamthîrî komo ya marha. Ero wa xa marha wîîkekn̂e aamo pen ya, Abraaw pen ya. Yaaro xa wîîkekn̂e yîwya cemarontan me ro mak. Ero ke ero wa xa marha tan wîîkes awya hara, kekn̂e tî.

4 Awepamthîrî wepamnoyas amn̂e mer̂pora ro mak. Xir̂ko yakenon wara ro mak naxe awepamthîrî komo amn̂e. On roowo tak wîmyasî yîrowon me so. Awepamthîrî ke rma tak mîk hak rowon pono komo wakronomesî, roowo poko hakno kom ha, kekn̂e tî.

5 Ero wa awepamthîrî komo Ow wakresî Abraaw poyero rma. Omtapotarî yewetîn̂enho mîk xakn̂e Abraaw, owya tpanatanmetopo yewetîn̂enho kir̂wan̂he okre. Noro poyero xa awepamthîrî komo wakresî. Ero wa wakreno wiir̂asî, kekn̂e ha tî. Ero wa tî kekn̂e Kporin komo Isake ya.

6 Taa, iina takî tî n̂esekenmekn̂e Isake Xera pona.

7 Iito exitaw on wara tî xatken̂e kîrkomo iitono komo, Isake tî n̂encetken̂e yipici poko. Oyepeka mîkro, kekn̂e tî Isake yîwya so. Opici mîkro, ka xera tî xakn̂e cerahtîmrî ke. Opici mîkro, ketaw owaiketu men okwe kîrkomo tantono kom ha. Hebeka xe cexirî ke so owaikexe cenpore xa exirî ke noro, kekn̂e tî.

8 Taa, pahkî n̂he tî xakn̂e Isake iito Xera po. Pahkî exiche takî tî Isake n̂een̂akn̂e Abimereke, Piristew kayaritomon ha. Cewkanapan yaro tî n̂een̂akn̂e. Cipici tî wakremekyakn̂e Isake. Ero wa tî n̂een̂akn̂e.

9 Ero ke takî tî Isake nan̂ikyakn̂e Abimereke. Apici rma mexe mîkro wooxam, kekn̂e tî yîwya. Ahce kacho, Oyepeka mîkro, mîîkai hara kica amna ya? kekn̂e tî yîwya. On wara tî n̂eyukyakn̂e Isake, On wara mak wîhtînoyakn̂e kica, Owaiketu men moxam okwe noro xe cexirî ke so, wîîkekn̂e mak. Ero ke ero wa wîîkekn̂e awya so opici poko, kekn̂e tî Isake yîwya.

10 Ahce kacho ero wa amna miire hara kopi? kekn̂e tî Abimereke. Anarimaw apici yenaka na re n̂etakricerî omaywen komo. Ero wa exitaw, Kicicitho mîkyam ha, kacho me amna mirirî ha re kopi, kekn̂e tî.

11 Ero wa kache Isake ya tmaywen komo takî tî nîtwermekn̂e Abimereke. On wara tî kekn̂e yîwya so, Moso yemetanmekîra ro mak men ehcoko ha, yipici yemetanmekîra marha. Emetanmekyataw awya so twaihkaxmu me men maxe okwe, kekn̂e tî. Ero wa tî kekn̂e Abimereke tmaywen komo ya.

12 Taa, iito rma tî xakn̂e Isake Xera po rma. Tmararîy takî tî xakn̂e iito. Kir̂wan̂he tî natîkwakn̂e yînatîrî okre. 1 kiru ciriche naatî yatho 100 kiru takî tî xakn̂e ero yeperîrî hara epetache. Ero wa tî noro wakrekn̂e Kporin komo.

13-14 Isake purantan marha tî n̂epamyakn̂e, emyawno marha tî, maywen komo marha, iyoku marha. Ahce na xakn̂e yîhyaw mer̂pora ro mak. Piristew komo yewresawra tak xakn̂e noro okwe cemyawnoi xa exirî ke.

15 On wara tî xatken̂e Piristew komo, tuuna yanîmtopo komo tî nahruyatken̂e Abraaw pen yanton komo nahtotho, Isake yîîm pen nahtotho. Roowo ke tî nahruyatken̂e okwe. Ero wa tî nahruyatken̂e Piristew komo.

16 Ero yimaw on wara tî kekn̂e Abimereke Isake ya, Anana n̂he cma re mîîcesî. Amna yopo thakwa mas amoro kar̂pe xa kopi, kekn̂e tî yîwya.

17 Ero ke takî tî ewto poi cekn̂e Isake. Pohnîntaka makî tî cekn̂e capahno pona, Xera pona ha. Iina takî tî tîmîn n̂iir̂akn̂e hara.

18 Iito cexitaw tuuna takî tî nahtopekn̂e xa hara Isake. Pahxa Abraaw maywen nahtotho tak nahruyatken̂e Piristew komo, Abraaw pen waipuche tî nahruyatken̂e ero mko rma tî nahtopekn̂e xa hara yaake. Ahtoche xa hara ahtoxapu mko tî nosohcekn̂e xa hara Isake. Tîîm pen nosohtotho yaw roro rma tî nosohcekn̂e xa hara.

19 Ero yinhîrî tuuna yanîmtopo nahcetken̂e xa hara Isake maywen komo yaxan hara. Îîpî yotaw rma tî nahcetken̂e. Ahtoche tuuna pîtho me takî tî xakn̂e okre.

20 N̂eseiyatken̂e ha tko tî okwe Xera pono komo tuuna poyero kica. Okno yenîn̂e komo tî mîkyam n̂eseiyatken̂e Isake yoku yenîn̂e komo yakro. Ero ke, Eseke tan ham okwe, kekn̂e tî Isake. Ero wa tî nosohcekn̂e tuuna eseicho komo poyero.

21 Ero yinhîrî anato tî nahcetken̂e xa hara Isake maywen komo. Xera pono komo tko tî cetken̂e iina hara n̂examro rma. Ero poyero marha tî n̂eseiyatken̂e. Ero ke, Sitna tan ha, kekn̂e hara tî Isake ero poko hara. Ero wa tî nosohcekn̂e.

22 Ero yinhîrî anana takî tî cekn̂e xa hara Isake. Iina tî nahcetken̂e xa hara tuuna. Eseira takî tî xatken̂e Xera pono komo ero poyero. Ero ke, Heoboce tan ham, kekn̂e tî Isake ero poko hara. Kecenarîno tak n̂enpo ham Kporin komo kîwya so roowo. Twokye xa takî tat ham amn̂e on ke tuuna ke, kekn̂e tî Isake. Ero wa exirî ke Heoboce me tî nosohcekn̂e.

23 Ero yinhîrî Behseba pona takî tî cekn̂e hara Isake. Iina takî tî n̂esekenmekn̂e hara.

24 Iina toche rma tî Kporin komo n̂esenpekn̂e yîwya. Kosope tî n̂esenpekn̂e. On wara tî kekn̂e yîwya, Ai Isake, ponaro aamo pen yehtopo Ow ha, ponaro Abraaw yehtopo. Erasîn me mak esko. Awakro was ha. Kwakresî xa amn̂e. Awepamthîrî komo wepamnoyasî mer̂pora cehso ro. Ero wa kiir̂asî Abraaw poyero mak, oyanton poyero ha, kekn̂e tî Kporin komo Isake ya.

25 Ero ke takî tî Kaan ya tîmsom yakn̂itopo nakîhcekn̂e iito Isake. Ayanan me oyexirî ke cma re ow makronomesî Apa, kekn̂e tî. Iina marha tî tîmîn n̂iir̂akn̂e roona. Iito marha tî nahcetken̂e xa hara tuuna Isake maywen komo. Ero wa tî xatken̂e.

26 Taa, ero yinhîrî takî tî Abimereke cekn̂e Xera poi Isake yaka. Noro yakrono marha tî cekn̂e noro yakro, Awsace tî xakn̂e noro yosotî. Pikow marha tî cekn̂e akro so sowtatu komo yantoman̂e ha. Ero wa tî cetken̂e.

27 N̂examro mokuche on wara tî kekn̂e Isake yîwya so, Ai, ahce kacho mîmohcow? Ooxatî pîn mexe amyamro ha. Ow men̂epetken̂e kica ahyai so, kekn̂e tî yîwya so.

28 On wara tko tî ketken̂e yîwya, Oyakno, on warai me awen̂as amna, Kporin komo nakronomarî me xa amna awen̂asî. Ero ke on wara kes amna, Etîxatî me cehcerî, kacho poko tîmtapotacerî, kesî mak amna awya. Yaaro xa tan wîîkesî, towîhnî me ro mak, tîtkacerî.

29 On wara xa cma re mîîkesî amoro, awemetanmekîra so ro mak was ow ha, mîîkesî cma ha re. Awemetanmekîra ro mak xakn̂e amna chew awexitaw. Tawake mak amna awen̂epei xiya. Ero ke ero wa xa marha esko amoro amna poko hara. Kaanî nakronomarî me xa awexirî ke ero wa kes amna awya, ketken̂e tî yîwya.

30 Yîmtapotarî komo yentache takî tî on wara xakn̂e Isake, erewsî takî tî n̂iir̂akn̂e. N̂examro tî n̂erewusmekn̂e. Ero ke n̂eseresmetken̂e pawana kom ha, wok marha tî n̂eer̂atken̂e.

31 Enmapuche hara tpakache so rma tak on wara tî ketken̂e pawana komo Isake ya, Awemetanmekîra ro mak nas amna, ketken̂e tî yîwya. Ero wa xa marha tî kekn̂e Isake yîwya so hara. Yaaro xa tan wîîkesî cemaro pîn me ro mak, ketken̂e tî. Ero wa tî ketken̂e. Taa, kir̂wan̂he etocoko hara, kekn̂e tî Isake yîwya so. Tawake tî xatken̂e etpoko.

32 Taa, n̂examro toche ero po rma Isake maywen takî tî mokyatken̂e yîhyaka tuuna yahton̂enho komo. Tuuna tak amna n̂enwo okre, ketken̂e tî yîwya.

33 Ero ke, Seba tan ha, kekn̂e tî Isake tuuna poko. Ero ke ero poko rma tî n̂etahcatken̂e ewto hara, Behseba mîn ham, ketken̂e tî ero poko. Oroto rma ero wa n̂etahcaxe.

34 Taa, on wara tî xakn̂e Esau hara, 40 cimn̂ipu exitaw noro yewrutoponho cipici takî tî nahsîyakn̂e. Xutice tî mîk nahsîyakn̂e Beeri yemsîrî. Basemaci marha tî nahsîyakn̂e hara, Eron yemsîrî ha. Etew komo tî mîkyam xatken̂e.

35 Ahwora ro makî tko tî xakn̂e Isake Esau pici komo poko. Hebeka marha tî xakn̂e ahwora n̂examro poko. Ero wa tî xatken̂e.