Taa, ero yinhîrî takî tî anarî nahsîyakn̂e Abraaw cipic hara. Ketura tî mîk nahsîyakn̂e.

2 Noro takî tî n̂ewruyakn̂e yaake ro. Wetahcasî takî yîmrerî komo yosotî, Sinran, Xoksan, Metan, Mician, Xisbake, Sua, ero wa tî xatken̂e yîmrerî komo.

3 Taa, Xoksan mumuru komo tî xatken̂e hara, Seba, Tetan, ero wa tî xatken̂e noro mumuru komo. Taa, Tetan mumuru komo tî xatken̂e hara. Asurin, Retusin, Reumin, ero wa tî xatken̂e Tetan mumuru komo.

4 Taa, Mician mumuru komo tî xatken̂e hara. Eepa, Eepe, Enoke, Abita, Ewta, ero wa tî xatken̂e Mician mumuru kom ha. Ero wa xatken̂e Ketura yepamtho komo.

5 On wara tko tî xakn̂e Abraaw, cemyawnonhîrî nîmtîkekn̂e Isake ya mak.

6 Abraaw yanton komo marha tî xatken̂e hara yipici wara cehsom me. N̂examro mrerî komo rma tî re wakrekn̂e Abraaw, ahce na nîmyakn̂e yîwya so. Wakreche n̂examro takî tî n̂en̂epekn̂e tumumuru yai Isake yai. Resce yaw roro tî n̂en̂epekn̂e.

7 Taa, ero yimaw takî tî poritomo me xa xakn̂e Abraaw. 175 cimn̂ipu tî xakn̂e noro yewrutoponho.

8 Ero yimaw takî tî waihyakn̂e thakwa okwe. Poritomo me xa tî xakn̂e twaihyataw. Ero wa tî cekn̂e okwe tîyanan pen komo yaka.

9 Noro pen yokoputho tî nahruyatken̂e yumumuru komo. Isake, Ismaew, ero wara tî nahruyatken̂e. Ewtarî yaka tî nahruyatken̂e, Makpera pono yaka ha tî. Manîre panawno mîn Makpera. Ehron pen mararîntho pono yaka tî nahruyatken̂e. Soa pen mumutho tî mîk xakn̂e Ehron pen. Etew komo tî mîkyam xatken̂e.

10 Etew komo mararîntho nahsîyakn̂e Abraaw epethîrî pona, iina tî nahruyatken̂e noro pen yokoputho. Yipici pen yocho yawxari rma tî nahruyatken̂e, Sara pen yocho yawxari ha.

11 Taa, Abraaw pen waipuche Isake tî wakrekn̂e rma Kaan. Bee-Laai-Hoi xakn̂e noro yeken.

12 Taa, Ismaew mumuru komo wetahcas hara. Abraaw pen mumutho tî mîk xakn̂e Ismaew, Aka mrerî ha. Exipsiu tî mîk xakn̂e yîson Sara yanton ha.

13-15 On wara tî xatken̂e Ismaew mumuru komo, etponanî re komo tan wetahcasî, N̂ebayoce tî xakn̂e potuthîrî, taa, Keta, Acbew, Mibsaw, Misma, Tuma, Masa, Atace, Tema, Xetu, Napis, Ketema.

16 Ero wa tî xatken̂e Ismaew mumuru komo yosotî. Antomano rin̂e me tî xatken̂e n̂examro. N̂examro yosotî poko tî n̂esosocetken̂e Ismaew yepamtho komo ahnoro. N̂examro yewton marha tî nosohcetken̂e Ismaew mumuru komo yosotî poko hara. Ero wa tî nosohcetken̂e.

17 Taa, ero yimaw poritomo me takî tî xakn̂e Ismaew. 137 cimn̂ipu tî xakn̂e noro yewrutoponho. Ero wicakî exiche ewrutoponhîrî waihyakn̂e takî tî okwe. Ero wa tî cekn̂e tîyanan pen komo yaka.

18 On wara tî xakn̂e yumumuru komo rowon, Apira tî xakn̂e potarî me. Miya takî tî xakn̂e n̂examro yewtonî Suru pona roro. Exitu panawno mîn Suru. Miya marha tî xakn̂e n̂examro rowon, Asiria yesamarî porero. Ero wa tî xakn̂e yîrowon komo, Ismaew yepamtho komo rowon ha. Ero wa waihyakn̂e Ismaew, ahnoro tîyanan komo wero ro rma waihyakn̂e. Ero wa xakn̂e noro.

19 Taa, on wara tî xatken̂e Isake mumuru kom hara. Abraaw mumuru tî mîk xakn̂e Isake.

20 40 cimn̂ipu tî xakn̂e Isake yewrutoponho Hebeka yahsîyataw cipici me. Betuew yemsîrî tî mîk xakn̂e Hebeka, Rabaw yepeka ha. Siriu yana tî mîk xakn̂e Betuew, Patan-Aran pono ha. Noro yemsîrî tî mîk xakn̂e Hebeka.

21 Yîmxîtan me tko tî ka xakn̂e okwe Hebeka. Ero ke Kporin komo yakro tî nîmtapowakn̂e Isake cipici yetahsîtopo poko. Cerewre tî nîmtapowakn̂e. Ero ke yîmtapotarî tî n̂ewehcakn̂e Kporin komo. N̂etahsîyakn̂e takî tî Hebeka.

22 Asakno me tî n̂etahsîyakn̂e. Ero wa exiche asakno komo takî tî n̂etar̂metken̂e yîropotaw. Ero ke tî n̂eserepokekn̂e yîson. Ahce poyero on wara wai okwe? kekn̂e tî. Ero ke takî tî Kporin komo mtapotarî yentaxi cekn̂e.

23 On wara tî kekn̂e Kporin komo yîwya, Asak hakno pono komo naxe aropotaw. Anarî rowon pono me so naxe asak hakno pono me. Ero wa naxe aropotainonhîrî komo. Anarî yepamtho komo naxe kar̂pe takno yepamtho komo yopono me. Mahtîkîthîrî yepamtho komo maywen me naxe potuthîrî yepamtho komo, kekn̂e tî. Ero wa tî kekn̂e Kporin komo Hebeka ya.

24 Taa, ewrutopo me exitaw takî tî asakno komo n̂ewruyatken̂e.

25 Cucure tî n̂ewruyakn̂e potuthîrî. Tîhpoxe marha tî xakn̂e ahnoro yupun. Ponon wara rma tî xakn̂e yîhpoci. Ero ke Esau me tî nosohcetken̂e noro.

26 Ero yinhîrî akno takî tî n̂ewruyakn̂e hara. Esau yîtakmarun poko tî nahsîyakn̂e. Ero ke Xako me tî nosohcetken̂e noro hara. Ero wa so tî nosohcetken̂e tîmxîkrî komo. 60 cimn̂ipu tî xakn̂e Isake yewrutoponho n̂examro yewruyataw.

27 Taa, on wara takî tî xatken̂e Isake mumuru komo, ewruche so por̂mamyatken̂e takî tî cetîtîkaxi ro. Esau tî xakn̂e wooto waparî me xa. Woskara pore makî tî n̂esetakekn̂e. Etarin me reha tî xakn̂e Xako. Mîîmo yawno me makî tî xakn̂e.

28 Taa, Esau xe xa tî xakn̂e Isake tpoxwe exirî ke otowarî yîwya. Hebeka reha tî xakn̂e Xako xe xa. Ero wa tî xatken̂e tîmxîkrî komo poko okwe.

29 Ero yinhîrî takî tî on wara xatken̂e Isake mumuru komo, erewsî tî nîîyekn̂e Xako. Ero yimaw rma takî tî Esau mokyakn̂e esetakaxapunhîrî. Cekar̂kaxî xa tî xakn̂e okwe.

30 Ero ke on wara tî kekn̂e Esau takno ya, Ai cîw, onahrî xe xa was okre. Cucurem mîîyo ero xe xa was okre onahrî. Kekar̂ka ro mak okwe, kekn̂e tî. Ero wa tî kekn̂e Esau. Ero wa karî ke Eton me takî tî n̂etahcatken̂e hara noro.

31 On wara tko tî n̂eyukyakn̂e Xako, Opotutho amoro. Ero ke Kaan nakronomarî me xa masî oyopo. Ow xa matko cirko Kaan nakronmarî me xa awemtaka hara oroto. Ero wa oriche awya on wîmyasî anahrî ero yepetho me, kekn̂e tî Xako yîwya okwe.

32 Ai ha, kekn̂e tî Esau. Waiporo xa was okwe. Owaipuche tak Kaan nakronomatorî me thakwa was okwe. Ero ke Kaan nakronomarî me xa kiir̂asî rma oyemtakan me hara, kekn̂e tî. Ero wa tî kekn̂e takno ya.

33 Yaaro men kasko owya cemaro pîn me ro mak, kekn̂e tko tî Xako yîwya, Ero ke yaaro xa takî tî kekn̂e Esau yîwya, cemaro pîn me ro makî. Ero wa tî Kaanî nakronomarî me xa Xako n̂iir̂akn̂e epethîrî pona okwe.

34 Ero ke on wara takî tî kekn̂e Xako yîwya, Taa, on ha anahrî kumasa, kekn̂e tî Xako. Iyuru marha tî n̂etakekn̂e, wokru marha tî. Ero ke takî tî n̂eseresmekn̂e Esau. Ceseresmache takî tî anana cekn̂e. Ero wa tî xakn̂e Esau, Kaanî nakronomarî me xa cehtoponhîrî nîpînînkekn̂e okwe. Ero wa tî xakn̂e okwe.