Taa, on wara tî xakn̂e Abraaw, poritomotho me takî tî xakn̂e ero yimaw. Ahce na poko exitaw noro nakronomekn̂e Kaan, mîn hak marha nîmyakn̂e yîwya. Ero wa tî xakn̂e Kporin komo Abraaw poko.

2 Ero yimaw tmaywen takî tî nan̂ikyakn̂e Abraaw poritomo me xa cehsom, anarî noro maywen komo yopono me ha. Yîhyawno tî mîk xakn̂e emyawno yenîn̂e me. Miyan komo yenîn̂e rma tî mîk xakn̂e. Noro yipu tî nan̂ikyakn̂e Abraaw. On wara tî kekn̂e yîwya, Ai, oona ka amoko. Opetî ka ahsîko yaaro xa amtapotachome.

3 On wara cma re mîîkes owya, Amumuru pici me cehsom yahsîra ro mak wasî tantono komo yemsîrî, Kanan pono komo yemsîrî ha, mîîkesî cma re owya. Yaaro men kasko Kporin komo n̂entarî me. Ponaro kah yawno komo yehtopo etacko, ponaro roowo pono komo yehtopo rma Mîk Noro etacko yaaro xa kachome owya.

4 Oyekenho pona xa matko etoko, oyanan komo yaka ha. N̂examro yemsîrî xa ehta omumuru pici me, Isake pici me ha, kekn̂e tî Abraaw tmaywen ya.

5 On wara tko tî n̂eyukyakn̂e maywen, Ahce wa wiir̂a amn̂e tmoku xera exitaw wooxam Kanan pona? Amumuru xa katî waar̂a awekenhîrî pona? kekn̂e tî.

6 Pîra ro mak, kekn̂e tî Abraaw yîwya. Oyekenho pona omumuru arîhra ro mak esko.

7 Aywapu tko wa ancu n̂en̂epesî Kporin komo, ponaro kah yawno komo yehtopo ha. Oona oyekyakn̂e Kporin komo apapa mîn yai, oyanan komo yeken poi ha. Oona oyekîche on wara kekn̂e owya, On wîmyasî awepamthîrî komo ya amn̂e roowo ha. Yaaro tan wîîkesî cemaro pîn me ro mak, kekn̂e owya. Noro rma Mîk n̂en̂epesî tanton ancu aywapu ha. Ero ke omumuru pici rma mekyasî awtoche ha.

8 Tmoku xera exitaw rma tko wooxam, towso tak n̂expe amtapotachonhîrî, Wooxam wekyas amn̂e oona, kachonho. Omumuru tko arîhra ro mak men esko iina, kekn̂e tî. Ero wa tî kekn̂e Abraaw tmaywen ya.

9 Ero yentache takî tî Abraaw petî nahsîyakn̂e maywen ha. Ero wara xa wiir̂a ham, kekn̂e ha tî. Kaan n̂entarî me xa tan wîîkesî towîhnî me ro mak, kekn̂e tî. Ero wa tî kekn̂e Abraaw maywen.

10 Taa, ero wa kache Abraaw yoku takî tî nahsîyakn̂e kameru. 10 rma tî nahsîyakn̂e. Ero wa tî nahsîyakn̂e tanme ro mak tantoman̂e yemyawno yenîn̂e me cexirî ke. Ero yinhîrî takî tî cekn̂e miya Mesopotamia pona, Nao yewton pona.

11 Iito tî xakn̂e tuuna ahtoxapu. Ewto panaw rma tî xakn̂e. Iina takî tî tooku n̂eremanmekyakn̂e kameru. Ero yimaw kokon̂inwakn̂e xa tak. Tuuna ka wooxam mohtopo me tak xakn̂e.

12 Iito cexitaw takî tî Kaan yakro ka nîmtapowakn̂e. On wara tî kekn̂e yîwya, Apa, Kaan xa Amoro, ponaro xa Abraaw yehtopo Amoro. Awakro cma re kîmtapowasî. On wara wîîkes awya, Noro cma re mîwakres oroto, oyantoman̂e ha. Ehn̂an me men ow cirko noro mumuru pici yenîrî poko.

13 Tan kecececesî Apa tuuna yanîmtopo to. Oroto na mokyatu tantono komo yemsîrî tuuna ka.

14 Ero ke on wara cma re wîîkesî, wooxam komo mokuche, Ai okopur̂wa, wîîkesî anarî ya, owokru xe cma re wasî tuuna. Awer̂anî cma re menîhcesî owokru me, wîîkesî yîwya. On wara na oyeyukya, On ha awokru tuuna. Awok marha wokpesî, kee ha na anarimaw owya. Ero wa ketaw, Noro xa ham Isake pici me cehsom, amaywen pici me cehsom ha, wîîkesî tak ha. Ero wa kan̂e me cma re wooxam miir̂asî, Noro xa ham yipici me anmen̂ekathîrî. Oyantoman̂e makronome ham noro yenporî ke, wîîkesî tak, kekn̂e tî. Ero wa tî kekn̂e Abraaw maywen Kaan ya.

15 Taa, yîmtapowataw rma wooxam takî tî mokyakn̂e weer̂a ke tmotawnoye. Hebeka tî mîk noro yosotî. Betuew yemsîrî tî mîk xakn̂e. Miwka mrerî tî mîkî xakn̂e Betuew hara. Nao pici tî mîk xakn̂e Miwka ha, Abraaw yakno pic ha. Ero wa tî xatken̂e Hebeka yanan komo.

16 Kir̂wan xa tî mîk xakn̂e wooxam Hebeka. Kîîrî pokono pîn tî mîk xakn̂e. Noro takî tî nîhcekn̂e ehyu pore tuuna yanîmso. Twer̂an tî narîhcekn̂e. Ero yinhîrî takî tî nawomyakn̂e hara.

17 Ero yinhîrî takî tî Abraaw maywen cekn̂e noro yaka. Kar̂pe tî cekn̂e. On wara tî kekn̂e yîwya, Ai, okopur̂wa, awer̂an yawno cma re weer̂asî tuuna, kekn̂e tî yîwya.

18 Taa, erko ha apa, kekn̂e tî Hebeka. Yohno rma tî n̂enîhcekn̂e twer̂an wokpatome tak. Ero wa tî wokpekn̂e.

19 Wokpache takî tî on wara kekn̂e hara emasî yîwya, Awoku marha wokpesî kameru ha. Ahnoro wokpetîkesî.

20 Ero ke takî tî twer̂an narkekn̂e yohno okno wokpacho yaka, xoo. Ahtoxapu yaka xa hara tî nîhcekn̂e emapona roro. Tuuna tî nanîmyakn̂e mer̂pora iyoku wokpatîkachome. Ero wa tî xakn̂e Hebeka.

21 Tooku wokpetaw rma tak Hebeka ya ahce wa na kahra ka xakn̂e Abraaw maywen. N̂eserepokekn̂e makî tî. Ehn̂ara rma na oriya Kporin komo, tohnaw oyekîra n̂ex ham, kekn̂e tî.

22 Ero yinhîrî takî tî kameru wokpatîkache Hebeka panatarîn tî nîmyakn̂e Abraaw maywen. Ooru tî mîn xakn̂e meia sikru wicakno. Emeknarî marha tî nîmyakn̂e asakî. Ooru rma tî mîn xakn̂e 10 sikru wicakno hara. Ero yipu tî nîmyakn̂e Hebeka ya.

23 Ero yinhîrî takî tî on wara kekn̂e hara Hebeka ya, Onok yemsîrî amoro ha? Aamo mîn yaw amna yetarî exihra nai ha? kekn̂e tî yîwya.

24 Betuew yemsîrî ow, Miwka mrerî mîk apapa, kekn̂e. Nao pici mîk Miwka onoci.

25 Awetarî komo nai ha apapa mîn yaw. Awoku yetîrapotopo marha nai cuupu, yînahrî marha, kekn̂e tî. Ero wa tî kekn̂e Hebeka Abraaw maywen ya.

26 Ero yentache nutupenwakn̂e takî tî Abraaw maywen. Kporin komo poko takî tî n̂ahwowakn̂e xa hara.

27 On wara tî kekn̂e, Kir̂wan̂he xa nai Kporin komo Kaan ham okre, ponaro nai oyantoman̂e Noro. Oyantoman̂e pînîn yaw rma nai ham. Yaarono me xa cehtopo marha n̂enpe ham yîwya. Mooxe kmokye xiya. Oona omokuche rma xa tak oyantoman̂e yanan n̂enpo owya okre, kekn̂e tî. Ero wa tî n̂ahwowakn̂e Abraaw maywen Kaan poko.

28 Ero yinhîrî takî tî emasî cekn̂e hara. Yohno tî cekn̂e tîson komo yaka. Abraaw maywen mohtopo tî n̂ekatîmyakn̂e yîwya so, yîmtapotachonhîrî marha tî n̂ekatîmyakn̂e.

29 Taa, Hebeka yepeka tî xakn̂e iito, Rabaw tî osotî. Noro takî tî cekn̂e tuuna yanîmtopo yaka Abraaw maywen yenso.

30 Noro nîmîtho tî n̂een̂akn̂e Rabaw, Hebeka panatarîn, emeknarî marha. Noro mtapotarî marha tî n̂encekn̂e, cepeka mtapotarî ha. On wara nîîka pawana owya, kacho tî n̂encekn̂e. Ero ke yîhyaka tî cekn̂e, Abraaw maywen yaka. Iito rma tî xakn̂e noro pawana tuuna yanîmtopo to rma. Piiri tî xakn̂e tok mîtwo rma.

31 Ero ke takî tî on wara kekn̂e Rabaw yîwya, Ai, oyakno, Kaan nakronomatho xa amoro ham. Amok ha amna yaka. Mîîmo yawhra mak mas okwe tan. Wakir̂wama awetarî ha oroto. Awok yetîrapotopo marha wakir̂wama, kekn̂e tî. Ero wa tî kekn̂e Rabaw Abraaw maywen ya.

32 Ero ke yîmîn komo yaka takî tî cekn̂e. Iito tî kameru mkawnonho n̂enîhcekn̂e Rabaw. Cuupu marha tî n̂ekyakn̂e kameru yetîrapotopo, nînahmekn̂e marha tî. Ero wa tî kameru n̂iir̂akn̂e. Tuuna marha tî n̂ekpekn̂e Abraaw maywen tarî korokacho, akrono komo tarî korokacho marha.

33 N̂examro yerewusmacho marha tî n̂etakekn̂e. On wara tko tî kekn̂e Abraaw maywen, Amn̂e mak keseresmesî. Omtapotarî ka wekatîmyas awya so, wece omohtopo ka wekatîmyasî, kekn̂e tî. Taa, kekn̂e tî Rabaw, ekatîmko ka amna ya, kekn̂e tî.

34 Ero ke on wara takî tî kekn̂e yîwya so, Abraaw maywen ow.

35 On wara nasî oyantoman̂e, Kaan nwakretho me xa nasî. Ahce na nîmye yîwya mer̂pora ro makî. Iyoku nasî mer̂pora, oper̂a, paaka, kameru, buhu, ero wa nasî iyok ha. Tupurantai marha nasî, prata ke, ooru ke marha. Anton komo xa marha naxe mer̂pora, kîrkomo, wooxam komo marha. Ero yipu ke oyantoman̂e wakresî Kporin komo.

36 Taa, oyantoman̂e pici tak n̂ewruyakn̂e, nocwakomotho rma n̂ewruyakn̂e. Kîîrî me ciki n̂ewruyakn̂e oyantoman̂e mumuru ha. Noro tak nasî cetîtîkaxi. On wara tî kekn̂e yîîm yîwya, Oyemyawnonho tak ahsîko amn̂e amoro rma. Owaipuche ahsîko ha, kekn̂e tî yîwya.

37 Kokon̂oro tak oyantoman̂e kekn̂e on wara owya, On wara wîîkes awya, Kanan pono komo chew tan wasî, n̂examro yemsîrî ahsîra ro mak men esko omumuru pici me, wîîkes awya.

38 Apapa yekenho pona xa etoko, oyanan komo yaka ha. N̂examro yemsîrî mak xa ehta omumuru pici me, wîîkes awya, kekn̂e owya oyantoman̂enho.

39 Ahce wa wai amn̂e tmoku xera cexitaw wooxam oona? wîîkai yîwya.

40 On wara tko nîîkai owya, Kporin komo tko tanton n̂en̂epesî ancu, awakronoman̂e. Yîmîtwono me wasî Noro xa n̂en̂epesî ancu. Noro awir̂asî ehn̂an me rma. Ero ke mekyasî rma omumuru pici. Oyanan komo yemsîrî rma mekyasî, oyekenho pono komo yemsîrî ha.

41 Tîmîhra rma exitaw oyanan komo awya ero yimaw towso rma tak n̂asî yaarononhîrî amtapotachonhîrî, kekn̂e owya Abraaw.

42 Ero ke oroto kmoko tuuna yanîmtopo mîtkoso. Omokuche rma Kaan yakro kîmtapota. On wara wîîka, Apa kah yawno, Kaan xa Amoro, ponaro oyantoman̂e yehtopo xa. On wara cma re wîîkes awya, oyakronoma xe xa awexitaw on wara cma re ow makronomesî.

43 Tan ka kecececesî tuuna yanîmtopo mîtwo. Emasî mokuche yîwya wîîkesî, Okopuci, owokru xe cma re wasî tuuna awer̂an yawno, wîîkesî yîwya.

44 Taa, erko, awokru ha. Awoku meero wokpes ha, kee ha na. Ero wa ketaw, Kporin komo nîhtînoputho xa moso ham, oyantoman̂e mumuru pici me cehsom, wîîkesî. Ero wa cma re anmen̂ekathîrî menpes owya, wîîka Kaan ya.

45 Taa, ohnaw omtapowataw rma ka moso awepeka tak moko weer̂a ke tmotawnoi. Ahtoxapu yaka nîhto, tuuna nanmo. Ero ke wîîka yîwya, Okopuci, owokru xe cma re wasî tuuna, wîîka yîwya.

46 Ero ke yohno rma twer̂an n̂enîhto. On ha awokru, nîîka owya. Awoku wokru marha wanîmyasî, nîîka marha owya. Ero ke weerî ha. Ero yinhîrî tak oyoku wokpa hara.

47 Ero yinhîrî on wara tak wîîka yîwya, Onoke yemsîrî amoro? wîîka. Betuew yemsîrî ow ha, Nao parî ha. Noro pici mrerî yemsîrî ow, nîîka owya. Ero wa kacho yentache noro panatarîn wiirî panaka, emeknumci marha wumunko.

48 Ero yinhîrî kutupenta, Kir̂wan̂he xa mai ham Apa, wîîka Kporin komo ya. Kaanî Amoro, ponaro oyantoman̂e yehtopo ha, wîîka. Yaaro xa ow mek ham oona. Oyantoman̂e yakno yemsîrî yakro esepotpona xa ow mek okre, noro mumuru pici me cehsom yakro, wîîka. Ero wa wîîka Kaan ya.

49 Ero ke on wara wîîkes awya so, oyantoman̂e wakre xe awexitaw so, yaarono me marha awesenpo xe awexitaw so, Taa, ero wa ham, mîîkexe cma re owya. Wakre xera awexitaw so reha, Pîra ha, kacoko men owya anana owtotome hara anarî yeposo, kekn̂e tî. Ero wa tî kekn̂e Abraaw maywen yîwya so.

50 Ero wa kacho yentache on wara tî n̂eyukyakn̂e Rabaw, Betuew marha tî kekn̂e, yîîm ha. Kporin komo yanme mîmoko ham. Ero ke, Kir̂wan̂he okre, kahra nas amna. Kicicme kica, kahra marha nas amna.

51 Noro ha Hebeka. Arko rma awantoman̂e mumuru pici me. Kaanî mtapotarî yaw roro rma arko ha, ketken̂e tî yîwya.

52 Taa, ero wa kacho yentache tak Abraaw maywen ya roowo pona takî tî n̂esewnapekn̂e. Oporin xa Amoro, kir̂wan̂he xa mai ham okre, kekn̂e tî Kporin komo ya.

53 Ero yinhîrî wooxam porokru takî tî nîmyakn̂e xa hara tîyamatan yawnonho. Prata ciixapu tî mîn nîmyakn̂e, ooru ciixapu marha. Ponon marha tî nîmyakn̂e. Ero yipu tî nîmyakn̂e Hebeka ya. Epeka ya marha tî nîmyakn̂e ahce na cepethîkem, yîson ya marha tî. Ero wa tî nîmyakn̂e.

54 Ero yinhîrî takî tî n̂eseresmetken̂e. Wooku marha tî n̂eer̂atken̂e. Ero wa tî n̂eseresmetken̂e Abraaw maywen, akrono komo marha. Iito rma tî ka n̂enmayatken̂e. Enmapuche takî tî on wara kekn̂e Abraaw maywen yîwya so, Oroto rma ow en̂epecoko oyantoman̂e yaka, kekn̂e tî.

55 On wara tko tî ketken̂e hara Hebeka yepeka komo, yîson kom ha, Tanî cma re ka ciri xe nas amna yohno mak, 10 kaamo mak ha na. Ero yinhîrî tak maar̂as ha, ketken̂e tî yîwya epeka, yîson komo marha.

56 On wara tko tî n̂eyukyakn̂e Abraaw maywen, Owî cma re porohkara maxe. Ehn̂ara or̂mexpo Kporin komo. Ero ke owî cma re men̂epexe oroto rma oyantoman̂e yaka hara, kekn̂e tî yîwya so.

57 Ai ha, emasî ha tko, ketken̂e takî tî iyanan komo. Noro ka nan̂ikyas amna yîwya kachome, Oroto rma awto xe mai ha? kesî ka amna yîwya, ketken̂e tî.

58 Ero ke Hebeka takî tî nan̂ikyatken̂e. On wara tî ketken̂e yîwya, Oroto rma awto xe mai ha moso yakro ha? ketken̂e tî yîwya. Kîwces ha, kekn̂e tî Hebeka.

59 Ero ke takî tî ero po rma Hebeka n̂en̂epetken̂e iyanan komo. Noro yakronoman̂e marha tî n̂en̂epetken̂e wooxam ha. Abraaw maywen marha tî n̂en̂epetken̂e akrono komo marha.

60 On wara tî ketken̂e Hebeka ya, Amna yepeka amoro. Ero ke awakre xe xa men nas amna Kaan ya. Mer̂pora ro mak awepamthîrî komo exi xe nas amna. Tîîxatî pînînhîrî pen komo kayaritomon me exi xe nas amna awepamthîrî komo, ketken̂e tî yîwya ha.

61 Ero yipu yentache tak Hebeka takî tî cekn̂e tanton komo yakro rma. Yaake tî xatken̂e noro yanton komo emasî kom ha. Kameru po so tî cetken̂e Abraaw maywen wenari. Ero ke takî tî Hebeka naar̂akn̂e Abraaw maywen, ceken pona cekn̂e hara.

62 Taa, ero yimaw takî tî Isake mokyakn̂e tîîm yaka. Bee-Raai-Hoi pononho tî mîk mokyakn̂e. Iitonhîrî tî mîk xakn̂e suu n̂ixa.

63 Ero ke kokon̂i xa tî cekn̂e Isake mararî pona Kaan poko esehtînoso. Iito cexitaw mooxe takî tî n̂een̂akn̂e kameru. Yaake tî n̂een̂akn̂e twece mokrî.

64 Mehxa marha tî Isake n̂een̂akn̂e Hebeka hara. Ero ke takî tî nîhcekn̂e kameru mkai.

65 On wara takî tî kekn̂e Abraaw maywen ya, Mîkro tooto mokyasî mararî pore. Kpotkoso so mokya ham. Onoke mîkro? kekn̂e tî yîwya. Oyantoman̂e mîkro, kekn̂e tî Abraaw maywen yîwya. Ero ke takî tî n̂esewoponcekn̂e Hebeka xwaraxwarano ke. Ero wa tî xakn̂e.

66 Taa, Isake mokuche takî tî Abraaw maywen n̂ekatîmtîkekn̂e yîwya tîtotoponhîrî.

67 Ero yinhîrî Hebeka takî tî n̂ekyakn̂e Isake tîson pen yetatho yaka. Cipici me takî tî nahsîyakn̂e. Yiixe takî tî xakn̂e. Ero ke cipici yahsîche tahwore tî xakn̂e hara tînocwan pen pînîn yaw ahwokaxapunhîrî. Ero wa tî xakn̂e Isake.