Taa, on wicakî tî xakn̂e Sara yewrutoponho ero yimaw, 127 cimn̂ipu tî xakn̂e noro yewrutoponho.

2 Ero yimaw takî tî waihyakn̂e noro pen okwe. Kiriaci-Ahba po tî waihyakn̂e. Ebronî rma tî mîn Kiriaci-Ahba. Kanan pono tî mîn ewto. Sara waipuche takî tî Abraaw cekn̂e yîwrataxi noro pen pînîn yaw. Okwe, opici cik okwe, kekn̂e tî.

3 Ero yinhîrî takî tî Abraaw nawomyakn̂e hara okoputhîrî mîtwononho. Iitono komo yakro takî tî nîmtapowakn̂e, Ete yepamtho komo yakro.

4 On wara tî kekn̂e yîwya so, Ai oyakno komo, Anarî yana mak ow, acheka so mohxapu. On wara cma re wîîkes awya so, Arowon komo raconho ciki cma re mîmyaxe owya oyanan komo yokoputho yahrutopo me, kekn̂e tî yîwya so.

5-6 On wara tî n̂eyukyatken̂e Ete yepamtho komo, Ai ha apa, ketken̂e tî. Kayaritomo wara mak awen̂as amna, yukurumîkno wara xa. Ero ke awanme ro mak enko amna yanan komo yokoputho yahrutopo ro raconho. Kir̂wan enko ayananînhîrî pen komo waipuchen. Amna yanan komo yokoputho yahrutopo yamenmekîra ro mak nas amna. Iina tak ahruko apici pen yokoputho ha, ketken̂e tî yîwya.

7 Yîmtapotarî komo yentache piiri takî tî nawomyakn̂e Abraaw. Iitono komo mamakan wara nutupenwakn̂e, Ete yepamtho komo mamakan wara.

8 On wara tî kekn̂e yîwya so, Taa, oyanan komo yokoputho yahrutopo tîmî xe mat ham. Ero ke on wara wîîkes awya so, Ehron yakro cma re mîmtapowaxe, Soa mumuru yakro ha.

9 On wara cma re mîîkexe yîwya, Aweken mapitawno xe cma tî re nai Abraaw, mîîkexe cma re. Noro yeken mapitaw nai îîpî. Ero yexenaw nai ewtarî, porin ha. Makpera pono mîn ha. Ero ke on wara cma re mîîkexe yîwya, Aweken mapitawno cma tî re mîmya Abraaw ya epethîrî pona, kacoko yîwya. Atî wicak ha na epethîrî awya, ero wicakî rma tî nîmya. Tîyanan komo waipuchen xe tî nai okopu yahrutopo me, kacoko yîwya, kekn̂e tî Abraaw.

10 Iitono rma tî mîk xakn̂e Ehron, Ete yepamtho komo chewno me rma. Ete yepamtho rma tî mîk xakn̂e. Ero yimaw tî n̂esenmekyatken̂e yaake Ete yepamtho komo re. Ero ke Ehron takî tî n̂eyukyakn̂e. Tpoyino komo n̂entarî me rma tî nîmtapowakn̂e.

11 On wara tî kekn̂e Abraaw ya, Pîra apa, ow epemara ro mak esko. Kwakresî mak iitono roowo tîmtopo ke, îîpî marha wîmyasî ero pono cewtakem ha. Opoyino komo n̂entarî me rma tan wîîkes awya. Ero ke iina ahruta ahcinhîrî pen yokoputho yiixe awexitaw, kekn̂e tî yîwya.

12 Ero yentache tak nutupenwakn̂e xa hara tî Abraaw iitono komo mamakan wara hara.

13 Ehron ya tî kekn̂e hara Abraaw iitono komo n̂entarî me. On wara tî kekn̂e yîwya, Taa, aweken mapitawno tîmî xe awexitaw owya wepemesî rma. Onî cma re mahsîyasî puranta epethîrî ha. Ahsîche mak awya opici pen yokoputho tak wahruyasî iina, kekn̂e tî.

14-15 On wara tî kekn̂e hara Ehron Abraaw ya, Omtapotarî cma re mencesî apa. 400 exepeyu wicakî nas ero yepetho. Epethîrî ponarora rma tko wasî aaxe oyexirî ke. Ero ke apici pen yokoputho ahruta awanme ro mak, kekn̂e tî yîwya.

16 Ehronî mtapotarî yentache tak exepeyu rma tî nîmyakn̂e Abraaw yîwya. 400 yakenon tî nîmyakn̂e prata. Awsîn tî nukuknomekn̂e ecenarî xa ehtome. Ehronî mtapotarî yaw roro rma tî nukuknomekn̂e. Ete yepamtho komo n̂entarî me tî kekn̂e noro ero yaw roro rma tî nukuknomekn̂e. Twarawantaxmu komo purantan tî mîn nukuknomekn̂e.

17-18 Ero ke Ehron yeken mapitawno takî tî nahsîyakn̂e Abraaw. Eroromero wîmyas awya, kekn̂e tî Ehron yîwya. Ete yepamtho komo n̂entarî me rma tî ero wa nîmtapowakn̂e, ewto potaka mohxapu komo n̂entarî me ha. Makpera pono tî mîn nahsîyakn̂e, Manîre panawno ha. Îîpî meero tî nahsîyakn̂e cewtakem ero pono. Comota meero tî nahsîyakn̂e ero pono, wokpa yawno. Ero yipu tî nahsîyakn̂e Abraaw tîwyanî ro me.

19 Ero yinhîrî tak cipici pen yokoputho takî tî nahruyakn̂e Abraaw, Sara pen yokoputho ha. Ehron yeken mapitawno pona nahruyakn̂e. Ewtarî yaka tî nahruyakn̂e îîpî yexenawno yaka ha. Makpera pono tî mîn xakn̂e, Manîre panawno pono ha. Ebronî rma tî mîn Manîre, Kanan pono ha.

20 Ero wa tî Ehron yeken mapitawno nîmyatken̂e Ete yepamtho komo Abraaw ya. Îîpî marha tî nîmyatken̂e yîwya cewtakem ero pono ha. Eroromerono me tî nîmyatken̂e yîwya okopu yahrutopo me. Ero wa tî nîmyatken̂e Abraaw ya.