Taa, ero yinhîrî takî tî Abraaw nukukmekn̂e Kaan. On wara tî kekn̂e Kaan yîwya, Ai, Abraaw, kekn̂e tî. Tan was Apa, kekn̂e tî noro.

2 Abraaw, amumuru arko, kekn̂e tî Kporin komo yîwya. Cewn̂an xa mîkro amumuru noro arko yiixe awehtopo rma okwe. Miya etocoko Moria pona. Iito awexitaw tak noro waihkakî amumuthîrî rma. Yupunthîrî tak akn̂iko owya tîmsom me. Iina awepatakache so îîpî wenpes awya ero po tak akn̂iko, kekn̂e tî Kaan yîwya.

3 Ero ke pahxaxaro rma takî tî Abraaw pakekn̂e. Weewe yaatopo tî n̂iir̂akn̂e tooku mkahsî, buhu mkahsî ha. Tmaywen tî nan̂ikyakn̂e asakî kar̂pamxan komo. Isake marha tî nan̂ikyakn̂e. Wehto takî tî nîrakekn̂e Kaan ya tîmsom yakn̂itopo. Ero wa exitaw tak n̂examro takî tî cetken̂e miya. Kaan kekn̂e Abraaw ya iina tî cetken̂e.

4 Asakî ro enmapuche takî tî îîpî n̂een̂akn̂e Abraaw. Mooxe tî n̂een̂akn̂e.

5 Ero ke on wara tî kekn̂e Abraaw tmaywen komo ya. Tan ka ehcoko amyamro buhu yakro. Amna ka cesî îh pona omumuru yakro mak. Kaan ya tîmsom amna nîmyasî iito. Ero yinhîrî amna mokyas hara oona, kekn̂e tî.

6 Ero wa kache wehto kamerî takî tî n̂enîhcekn̂e Abraaw. Isake mkahsî tî nanîmyakn̂e, tumumuru mkahsî ha. Wehto tî nahsîyakn̂e Abraaw, mariya marha tî. Ero yinhîrî cetken̂e tak n̂examro re mak asakî.

7 Cetaw so on wara tî kekn̂e Isake Abraaw ya, Apa, kekn̂e tî. Ahce okopuci? kekn̂e hara tî yîîm. Apa, tan nasî wehto, kamerî marha. Ahto wa nai kahn̂eru xîkrî takn̂isom, Kaan ya knîmrî ha? kekn̂e tî.

8 On wara tî n̂eyukyakn̂e Abraaw, Okopuci, Kaanî rma n̂enpesî kîwya oper̂a xîkrî, tîwya tîmsom ha, kekn̂e tî. Ero ke cetken̂e rma tî asakî.

9 Taa, îh pona takî tî cetken̂e n̂examro Kaan n̂etacitho pona. Iito takî tî toopu n̂enmekyakn̂e Abraaw Kaan ya tîmsom yakn̂itopo me. Kamerî marha tî n̂iir̂akn̂e akn̂itopo kanahtaka. Ero yinhîrî Isake pen takî tî napomiyakn̂e tumumuru rma. Kamerî pona takî tî nîrapekn̂e akn̂itopo pona rma.

10 Ero yinhîrî takî tî mariya nahsîyakn̂e Abraaw tumumuru waihkachome.

11 Ero yimaw xa takî tî nîmtapowakn̂e Kaan yancun Abraaw yakro. Kah yawno tî Mîk kekn̂e on wara, Abraaw, Abraaw, kekn̂e tî. Tan wasî, kekn̂e hara tî Abraaw.

12 Pîra, amumuru paraxkara esko. Waihkara ro mak esko, kekn̂e tî. Oroto tak awehtopo ween̂asî. Kaan ponaro xa mai ham. Ero wa keen̂asî amumuru ewyomara ro mak awexirî ke. Cewn̂anî rma ewyomara meexi. Mîmyasî rma owya, kekn̂e tî. Ero wa tî kekn̂e ancu Abraaw ya.

13 Ero yinhîrî takî tî peen wece n̂een̂akn̂e Abraaw. Tîmkai tî n̂een̂akn̂e kahn̂eru. Peen poko tî xakn̂e cetamxiso meretîrî. Ero ke tî ahsîso cekn̂e Abraaw. Ahsîche paraxkekn̂e takî tî akn̂itome Kaan ya tîmsom me. Tumumuru yemtakan me takî tî nakn̂iyakn̂e.

14 Ero ke iitono takî tî nosohcekn̂e Abraaw kahn̂eru yakn̂itoponho. Yiixe kehtopo komo yenpon̂e Mîkî Kporin komo, kacho me tî nosohcekn̂e. Oroto rma ero wa kexe iitono komo. Kporin komo yeken po rma n̂esenpesî yiixe kehtopo, îh po, kexe. Ero wa kexe iitono komo.

15 Ero yinhîrî Kporin komo yancun takî tî nîmtapowakn̂e xa hara Abraaw yakro.

16-17 On wara tî kekn̂e yîwya, Ai Abraaw, on wara tî nîîke Kporin komo awya, Omtapotarî mewet ham okre. Amumuru yewyomara meexi, mîwaikarî ha re mî. Cewn̂anînhîrî ro mak amumuru okwe. Ero ke yaaro xa tan wîîkes awya, oyehtopo rma wetahcasî, Yaaro ham, kachome awya omtapotarî poko. On wara wîîkes awya, kwakresî xa tak amn̂e. Awepamthîrî komo marha wepamnoyasî mer̂pora cehso ro. Mer̂pora xa nasî xir̂ko, kah yawno. Mer̂pora xa marha nasî axawa pupuntho. Ero wicakî xa marha naxe awepamthîrî komo amn̂e mer̂pora ro mak. Tîîxatî pîn komo kayaritomon me marha naxe, kekn̂e tî.

18 Awepamthîrî ke rma tak mîk hak rowon pono komo naxe onakronomarî me. Roowo poko hakno komo naxe ero wa amn̂e. Omtapotachonho yewetîrî ke mak awya ero wa naxe, kekn̂e tî. Ero wa tî kekn̂e ancu Abraaw ya.

19 Ero yinhîrî tmaywen komo yaka takî tî n̂etîramekn̂e hara Abraaw. N̂examro yakro tî cekn̂e Behseba pona hara. Iito takî tî xakn̂e Abraaw cekenke. Ero wa tî xakn̂e.

20 Taa, iito cexitaw takî tî tîyanan komo yehtopo tî n̂encekn̂e Abraaw. On wara kacho tî n̂encekn̂e, Yaake tak naxe awakno mumuru komo, Nao mumuru kom ha, Miwka mrerî komo, kacho tî n̂encekn̂e.

21-23 Potuthîrî tî mîk Uus. Noro yakno rma tî mîk Buus, Kemuew marha tî Aran yîîm. Kesece, Aso, Piwtas, Xicrape, Betuew. Ero wa naxe awakno mumuru komo, kacho tî n̂encekn̂e. Taa, Betuew yemsîrî tî xakn̂e hara, Hebeka tî mîk xakn̂e noro yosotî. Ero wa tî xatken̂e Abraaw yakno mumuru komo, Nao mumuru kom ha. 8 tî xatken̂e. Miwka mrerî komo tî mîkyam xatken̂e.

24 Taa, anarî tî xakn̂e Nao pici, yipici wara cehsom mak. Hewma tî xakn̂e noro yosotî. On wara tî xakn̂e noro mrerî kom hara, Teba, Kaan, Taasa, Maaka. Ero wa tî xatken̂e Nao mumuru komo xa hara. Ero wa tî xatken̂e noro yipici wara cehsomu mrerî komo.