Taa, ero yinhîrî takî tî Sara wakrekn̂e Kaan tîmtapotachonhîrî yaw roro rma. Pahxa kekn̂e yîwya ero yaw roro rma tî n̂iir̂akn̂e.

2 N̂etahsîyakn̂e takî tî Sara. N̂ewruyakn̂e marha tî Abraaw mumuru ciki. Poritomo me xa tî xakn̂e Abraaw ero yimaw. On nuun̂i po xa apici n̂ewruyasî, kachonho yaw roro rma tî Sara n̂ewruyakn̂e, Kaanî mtapotachonho yaw roro xa. Ero wa tî n̂ewruyakn̂e.

3 Isake me takî tî tumumuru nosohcekn̂e Abraaw. Ero wa tî nosohcekn̂e Sara mrerî ciki.

4 Ero yinhîrî takî tî, 8 kaamo enmapuche tak ewrutoponhîrî, tumumuru ciki takî tî nanpikekn̂e Abraaw. Kaanî mtapotachonho yaw roro rma tî ero wa n̂iir̂akn̂e.

5 100 cimn̂ipu tî xakn̂e Abraaw yewrutoponho yumumuru yewruyataw, Isake ha.

6 On wara tî kekn̂e Sara noro yewruche ciki, Cewresom me tak oriw ham Kaan okre. Miyan komo rma n̂ewrexe oyakro ro rma oyewrutopo yentan̂e komo.

7 Yîmxîtantho mak mîkro, kachonho ow, kmokmo ke wokpan̂e pîn mîkro, kachonho marha ow. Noro yipu rma tko kîmxîtai okre Abraaw mumuru me ciki. Poritomo me rma re nasî oyin̂o, yumumuru yon me takî tko was okre, kekn̂e tî. Ero wa tî kekn̂e Sara.

8 Ero yinhîrî rikomo takî tî por̂mamyakn̂e, moomo takî tî nahsîpînkekn̂e. Ero yimaw rma tî erewusmano n̂iir̂akn̂e Abraaw moomo yahsîpînkache xa tumumuru ya. Mer̂pono pînî ro makî tî mokyatken̂e ceseresmaxmu komo. Ero wa tî mokyatken̂e.

9 Ero yimaw takî tî on wara xakn̂e Aka mrerî, Exipsiu mrerî ha. Abraaw mumuru rma mîk xakn̂e. N̂etaporekn̂e tko noro ewruxan poko kica. Ero yipu yenîche Sara ya on wara tî kekn̂e Abraaw ya,

10 Noro men en̂epeko oyantonînho. Yîmrerî yakro rma en̂epeko ha. Awemyawnonhîrî yahsîn̂e pîn me n̂expe kica noro mrerî. Omrerî mak nas ero yipu yahsîn̂e me, Isake ha, kekn̂e tî.

11 Ero wa kacho yentache Abraaw ya ahwora ro makî tî xakn̂e. Tumumuru pînîn yaw tî xakn̂e, Aka mrerî pînîn yaw.

12 Kaanî tko tî nîmtapowakn̂e Abraaw yakro ero yimaw. On wara tî kekn̂e yîwya, Ahwokara rma esko amumuru poko. Yîson poko marha ahwokara esko, awanton komo poko rma. Sara mtapotarî rma tko ewetko. N̂examro rma en̂epeko. Isake mak nasî cewn̂e, Abraaw yepamtho xa mîkro, kacho me ha.

13 Apici yanton mrerî meero tko wepamnoyasî. Anarî yana me tak naxe noro yepamtho komo amn̂e. Ero wa noro wiir̂asî amumuru me exirî ke ha, kekn̂e tî. Ero wa tî kekn̂e Kaan Abraaw ya.

14 Ero ke pahxaxaro rma takî tî pakekn̂e Abraaw. Aka takî tî n̂en̂epekn̂e yîmrerî yakro rma. Torî me so tak poranmekn̂e. Iyuru komo tî n̂enkayakn̂e, weer̂a marha tî narîhcekn̂e tuuna ke. Yîson motaka tî n̂iir̂akn̂e weer̂a. Ero wa tî n̂examro n̂en̂epekn̂e. Ero ke Aka takî tî cekn̂e okwe. Pohnîntari ro makî tî cekn̂e, waimamyakn̂e ro mak okwe. Behseba mehxa tî waimamyakn̂e.

15 Pahkî exiche n̂enahcakn̂e takî tî tuuna, weer̂a yawnonho, wokru komo. Ero ke yîson tîmrerî nîrapekn̂e peen makataka.

16 Ero yinhîrî mooxe n̂he ciki re tî cekn̂e yîson, waiwî tar̂mesî ero wicakî moxenon. Iina takî tî n̂eremekn̂e yîson hara. Omxîkîtho waihtopo yenî xera was okwe, kekn̂e tî. Nîwracekn̂e thakwa tî okwe. Ero wa tî xakn̂e Aka.

17 Rikomo yîwratarî rma tko tî n̂encekn̂e Kaan. Ero ke Kaan yancun tî nîmtapowakn̂e yîson yakro, kah yawno rma. On wara tî kekn̂e yîwya, Ahce wa mai Aka? Erasîra esko. Amrerî mtapotarî tî n̂enta Kaan, mînto etîrapoxapu mtapotarî ha.

18 Ero ke awomko tak ha, amrerî anîmta, amorî poko ahsîko. Waipîra rma nasî. Noro xa matko wepamnoyas amn̂e mer̂pora ro mak cehso ro. Anarî yana me marha naxe amn̂e noro yepamtho komo, mer̂pora ro mak naxe, kekn̂e tî. Ero wa tî kekn̂e ancu Aka ya.

19 Ero yimaw rma takî tî cewkem me Kaan n̂iir̂akn̂e noro. Tuuna takî tî n̂een̂akn̂e iito ahtoxapu. Ero ke weer̂a yarîhtoso tî cekn̂e. Tîmrerî takî tî wokpekn̂e ero ke. Ero wa tî xakn̂e.

20 Ero yinhîrî takî tî rikomo por̂mamyakn̂e. Pohnîntawno po makî tko tî xakn̂e. Wooto woon̂e ro me tî por̂mamyakn̂e. Kaanî rma tî nakronomekn̂e.

21 Paran yaxawan po makî tî xakn̂e noro pohnîntaw. Iito tî xakn̂e Aka mrerî. Etîtîkache takî tî yipici n̂ekyakn̂e yîson Exitu pononho. Ero wa tî n̂iir̂akn̂e yîson.

22 Taa, ero yinhîrî on wara tî xakn̂e Abraaw, Piristew komo chew tî xakn̂e. Pahkî exiche iito Piristew komo kayaritomon tî nîmtapowakn̂e Abraaw yakro. Abimereke tî mîk xakn̂e noro yosotî. Sowtatu komo yantoman̂e marha tî nîmtapowakn̂e Abraaw yakro. Pikow tî mîk xakn̂e noro yosot hara. On wara tî ketken̂e yîwya, Ai Abraaw, awakronome Kaan ham okre ahce na poko awexitaw.

23 Ero ke oyakro cma re mîmtapowasî Kaan n̂entarî me. On wara cma re mîîkes owya, Yaaro xa tan wîîkes awya, cemaro mero ro makî. Kir̂wan̂he was apoko. Awemetanmekîra ro mak wasî. Ero wa xa marha was amn̂e amumuru komo poko hara, awepamthîrî komo poko hara, kir̂wan̂he wasî n̂examro poko, mîîkesî cma re owya. Kir̂wan̂he wehxe apoko, ero ke kir̂wan̂he marha cma re masî opoko hara, omaywen komo poko marha, kekn̂e tî. Ero wa tî kekn̂e Abimereke Abraaw ya.

24 Taa, kekn̂e tî Abraaw, ero wara rma wîîkesî Kaan ya, yaaro xa wîîkesî cemaro mera ro mak, kekn̂e tî.

25 Ero yimaw on wara tî kekn̂e hara Abraaw Abimereke ya, On wara wîîkes awya, Ahce poyero otunarî ahtoxapu nahsîce amaywen komo okwe. Tîrwon̂e mak nahsîce okwe, kekn̂e tî.

26 Apohana, kekn̂e tî Abimereke, onoke na moro nahsîye atunarî? Pahxa ekatîmra mîxakn̂e owya. Oroto mak wencesî, kekn̂e tî. Ero wa tî kekn̂e Abimereke Abraaw ya.

27 Ero yinhîrî takî tî tookuthîrî nîmyakn̂e Abraaw Abimereke ya, oper̂a, paaka marha, ero wa tî nîmyakn̂e. On wara tî ketken̂e ero yimaw, Aaxatîmnokara ro mak was ow ha, ketken̂e tî n̂examro re rma.

28 Ero yinhîrî oper̂a xîkrî takî tî n̂ekyakn̂e Abraaw. 7 tî n̂ekyakn̂e woosî re. Ero wa tî n̂ekyakn̂e.

29 Noro yipu yenîche on wara tî kekn̂e Abimereke Abraaw ya, Ahce kacho wa meekî oper̂a? kekn̂e tî yîwya.

30 Ahsîko rma kekn̂e tî Abraaw yîwya. Omtapotarî ponaro awehtopo rma mîk oper̂a xîkrî weekî, kekn̂e tî Abraaw yîwya. Enîche awya on wara tak kasko amn̂e, Abraaw nahtotho moso ham tuuna, kasko roro, kekn̂e tî. Ero wa tî kekn̂e Abraaw.

31 Ero ke takî tî Abraaw nosohcekn̂e tuuna iitono, Behseba me tî nosohcekn̂e. Kaan n̂entarî me tîmtapotarî ke Abimereke yakro ero me nosohcekn̂e, towîhnî me ro mak tîmtapotarî ke ha.

32 Ero wa tî nîmtapowatken̂e iito Behseba po. Etîxatîmnokara ro mak cehtopo komo poko tî nîmtapowatken̂e. Ero wa kache takî tî cekn̂e hara Abimereke. Akro rma tî cekn̂e Pikow, sowtatu yantoman̂e ha. Piristew komo rowon pona tî cetken̂e hara.

33 Ero yinhîrî takî tî tînatîrî n̂iir̂akn̂e Abraaw iina Behseba pona. Weewe tî mîn n̂iir̂akn̂e cepetaxmu ha. Ero yimaw marha tî Kporin komo Kaan yakro nîmtapowakn̂e, Waipînî ro yakro ha. Ayanan ow ha Apa. Ero ke owî cma re makronomesî, kekn̂e tî yîwya.

34 Ero yinhîrî pahkî tî xakn̂e Abraaw iito Piristew komo rowon po. Ero wa tî xakn̂e.