Taa, ero yinhîrî takî tî suu yaw roro cekn̂e hara Abraaw. Iina takî tî tîmîn n̂iir̂akn̂e hara. Ewto yotaw tî n̂iir̂akn̂e tîmîn̂. Mehxa tî xakn̂e Kates, xehxa tî xakn̂e Suru hara. Ero yinhîrî anarî ewto pona tî cekn̂e hara Xera pona. Iito takî tî xakn̂e Abraaw.

2 Iito cexitaw on wara tî kekn̂e iitono komo ya, cipici poko rma tî kekn̂e Sara poko. Oyepeka moso, kekn̂e tî okwe. Ero ke iitono komo kayaritomon tî n̂en̂epekn̂e tmaywen komo Sara wece. Naar̂atken̂e takî tî yipici me. Abimereke tî mîk xakn̂e kayaritomo yosotî.

3 Ero po rma tko tî Kaan n̂esenpekn̂e Abimereke ya. Wosoto me makî tî n̂esenpekn̂e yîwya kosope. On wara tî kekn̂e yîwya, Ai Abimereke, mîwaiyasî men okwe. Pinano mîkro mahsî okwe, kekn̂e tî yîwya.

4-5 On wara tko tî xakn̂e Abimereke, Sara yenaka tî ka tohra xakn̂e. Ero ke on wara tî kekn̂e Kaan ya, Apa, kir̂wan komo ma re mîwaike? Ow mîwaike omaywen yakro rma? Oyepeka moso, nîîkai thakwa matko iin̂o owya kica. Wooxam meero marha nîîkai ciin̂o poko hara, Oyepeka moso, kekn̂e marha. Kir̂wan̂he makî cma re oyexi xe wîxakn̂e. Kicicme oyexi xera ro mak wîxakn̂e, kekn̂e tî. Ero wa tî kekn̂e Abimereke.

6 Nhnk, ero wara rma keen̂asî kir̂wan̂he awexi xatî me, kekn̂e tî Kaan yîwya. Ero ke rma wa kwahkotoi kicicme exihra awehtome opoko, noro yahsîpora weexi awya.

7 Ero ke tîmko hara yipici yîwya. Aweronoman̂e komo mîk noro yin̂o. Ero ke noro nîmtapowasî oyakro apoko waipîra awehtome. Tîmîhra rma awexitaw mîwaiyas ha men okwe. Ahnoro ahyawno komo meero waihtîkexe. Ero wa maxe okwe yipici tîmîhra awexitaw hara, kekn̂e tî. Ero wa tî kekn̂e Kaan yîwya.

8 Ero ke enmarî yakro ro rma takî tî Abimereke pakekn̂e. Tmaywen komo takî tî nan̂ikyakn̂e tîhyaka ahnoro. Mokuche so Kaanî mtapotarî tî n̂ekatîmtîkekn̂e yîwya so. Ero yentache tak n̂eraswatken̂e xa tî n̂examro.

9 Ero yinhîrî takî tî Abraaw nan̂ikyakn̂e hara Abimereke. On wara tî kekn̂e yîwya, Ahce wa amna miire kopi? Ahce wa wîxakn̂e awya ooxera awehtome? Amna yikicicire xe xa katî mîxakn̂e kicicitho me ro mak amna yehtome? Ero wa amna cirihra ro mak cexpore nas ha.

10 Ahce wa amna yehtopo meen̂a okiciciren̂e me awehtome, omaywen komo kiciciren̂e me awehtome marha? kekn̂e tî. Ero wa tî kekn̂e Abimereke Abraaw ya.

11 On wara tî n̂eyukyakn̂e Abraaw, On wara wa wîîkekn̂e acheka so omokuche, Kaan ponarono pîn komo ro mak moxam okwe tantono komo. Ero ke owaiketu men okwe opici poyero rma, wîîkekn̂e mak apoko so.

12 Oyepeka rma tko re mîkro. Apapa pen yemsîtho rma mîkro. Yememe pen yemsîtho pîn ha tko. Ero ke wahsîyakn̂e opici me.

13 On wara wîîkekn̂e yîwya pahxa rma apapa mîn yai oyekyataw Kporin komo ya, Ahna so na kîwcetaw so tooto cheka on wara cma re mîîkesî iitono komo ya opoko owaikara ehtome so iitono komo, Oyepeka moso, mîîkesî cma re opoko, wîîkekn̂e yîwya, kekn̂e tî. Ero wa tî kekn̂e Abraaw Abimereke ya.

14 Ero wa kache takî tî Sara nîmyakn̂e hara Abimereke Abraaw ya. Iyoku marha tî nîmyakn̂e yîwya kahn̂eru komo, paaka komo. Anton komo marha tî nîmyakn̂e yîwya kîrkomo, wooxam komo marha. Ero wa tî nîmyakn̂e Abimereke Abraaw ya.

15 On wara marha tî kekn̂e Abimereke Abraaw ya, Miya rma nas orowon. Ero ke awanme ro mak eporko aweken, kekn̂e tî yîwya.

16 Ero wa kache Sara ya tî kekn̂e hara, On wara xa awepeka wiirî, 1.000 exepeyu wîîm yîwya prata. Kicicme oyehtoponho yepetho mîn wîîm yîwya. Ero ke cepemaxi tak nasî awahsîtoponhîrî owya. Kir̂wan̂he tak was hara, kekn̂e tî. Ero wa tî kekn̂e Abimereke.

17 Ero yinhîrî takî tî Kaan yakro nîmtapowakn̂e Abraaw Abimereke poko. Ero wa karî ke kir̂wan̂he takî tî Abimereke n̂iir̂akn̂e hara Kaan, yipici marha tî, anton komo marha tî wooxam komo. Ero wa tî n̂examro n̂iir̂akn̂e kir̂wan̂he yîmxîtachome me xa hara.

18 Yîmxîtara ro makî tî ka xatken̂e Abimereke pici, anton komo marha. Kporin komo rma tî ero wa n̂examro n̂iir̂akn̂e Sara poyero, Abraaw pici poyero ha. Ero wa tî n̂iir̂akn̂e Kporin komo.