Taa, ero yinhîrî ancu komo takî tî mokyatken̂e Sotoma pona kokon̂i exitaw. 2 makî tî mokyatken̂e. Iito tî xakn̂e Roo ceremaxi ewto potaw rma. Ancu komo yenîche takî tî n̂examro yîmtapotareso tî cekn̂e. Nutupenwakn̂e takî tî roowo pona cesewnaposo ro.

2 On wara takî tî kekn̂e yîwya so, Apa komo, mîmohcow pawana me? Amaywen xa ow ha. Ero ke omîn yaka amohcoko yîwînso. Ahtarî komo marha mîkorokexe iito. Pahxaxaro rma tak mîpakexe hara awtotome so, kekn̂e tî. Ero wa tî kekn̂e Roo yîwya so. Anarme tko tî n̂eyukyatken̂e ancu komo yîmtaka, Tan mak amna n̂enmayasî roro po mak, ketken̂e tî n̂examro.

3 Okwe, kekn̂e tî Roo yîwya so. Cerewre tî kekn̂e yîwya so. Amohcoko rma ohyaka ha, kekn̂e tî yîwya so. Ero ke rma tî cetken̂e noro yakro. Ero yinhîrî iyotî komo n̂etakekn̂e. Iyuru komo marha tî naipekn̂e wahrututpamnî. Ero ke tî n̂eseresmetken̂e. Ero wa tî xatken̂e.

4-5 Taa, etakrira ka exitaw so kîrkomo takî tî mokyatken̂e Roo mîn yaka. Iitono komo mîkyam mokyatken̂e Sotoma pono komo. Ahnoro ro makî tî mokyatken̂e kica poritomo komo, kar̂pamxan komo marha. Xehxa, mehxa, wara tî mokyatken̂e kîrkomo. Roo mîn tî wamcetken̂e. Roo ya tî ketken̂e, mîîmo mkai rma tî ketken̂e. Ai Roo, ahto natu ahyaka mohxapu komo, oroto mohcow n̂examro? Amna yaka ka ek ha. N̂examro poko cexi xe nas amna, ketken̂e tî kica. Ero wa tî ketken̂e kica.

6 Ero ke yîhyaka so tî n̂epatakekn̂e Roo. Mîîmo yai cepatakache metata nahruyakn̂e hara.

7 On wara tî kekn̂e Sotoma pono komo ya, Oyakno komo, kicicme ro mak maxe ero wa awexitaw so. Ero wa kahra cma re maxe.

8 Oyemsîrî komo xa naxe tan asakî, iin̂omnî komo. N̂examro xa wekyas ahyaka so poko awehtome so tak awanme ro so. Moxam pawana komo pokohra ro mak ehcoko kica. N̂examro yukurunpetome wa wermonopu omîn yaka, kekn̂e tî. Ero wa tî kekn̂e Roo Sotoma pono komo ya kîrkomo ya.

9 On wara tko tî ketken̂e kîrkomo Roo mtaka, Kica, ahce kacho ero wa mîîke kica. Yarî esko, ketken̂e tî kîrkomo yîwya. Kîcheka mohxaputho mak amoro. Ahce kacho amna mîtwerme hara kica? Kicicme ro kr̂a mak amna awir̂asî. N̂examro reha wara n̂he amna n̂iir̂asî, ketken̂e tî kica. Ero ke takî tî Roo pen nahsîyatken̂e. Ciki ketken̂e xa takî tî noro poko. Yîmîn metatan poko marha ciki ketken̂e. Ero yanme emacakaporo takî tî xakn̂e metata kar̂pe karî ke yîwya so.

10 Ero yimaw tko tî pawana komo n̂etapoyetketken̂e, Roo nahsîyatken̂e. N̂ihxikyatken̂e takî tî mîîmo yaka. Ero yinhîrî metata tî nahruyatken̂e hara.

11 Ero yimaw rma takî tî mîîmo mkaino pen komo n̂ewkanoyatken̂e. Poritomo pen komo, kar̂pamxan pen komo, ahnoro makî tî n̂ewkanoyatken̂e. Ero ke pokupoku ketken̂e thakwa tî mîîmo mkai. Metata yape xe tî xatken̂e cewomtome so. N̂ekar̂ketken̂e makî tko tî okwe metata yeporîrî poko. Ero wa tî xatken̂e.

12 Ero yinhîrî on wara takî tî ketken̂e pawana komo Roo ya, Ai Roo, Ayanan komo natu tan on ewto po? Awoxin komo, amumuru komo, awemsîrî komo, noro yipu komo na natu tan? Noro yipu komo exitaw arko men ewto poi.

13 On men nakn̂iyas amna ewto pen. Tantono komo yehtopo tî n̂encekn̂e Kporin komo mehxa kah yai. Wara ro mak kan̂e mîkyam, kacho tî n̂encekn̂e. Ero ke amna n̂en̂epew Kporin komo on ewto yakn̂iso, ketken̂e tî. Ero wa tî ketken̂e pawana komo.

14 Ero ke twoxin komo yaka takî tî cekn̂e Roo ekatîmso, cemsîrî yin̂o komo ya. Cemahciyatu ha tî oroto. On pen tî nakn̂iya Kporin komo ewto pen, kekn̂e tî Roo yîwya so. Cetaporesom wara makî tko tî n̂encetken̂e woxin komo okwe. Ero wa tî xatken̂e okwe.

15 Ero yinhîrî enmayataw takî tî Roo n̂enpaketken̂e pawana komo. Yohno men ahtoko, ketken̂e tî yîwya. Apici arko, awemsîrî komo marha arko asakî rma ha. Yohno men arko. Tohra awexitaw so amyamro meero mecakyaxe okwe tantono komo yakro rma, ketken̂e tî. Ero wa tî ketken̂e pawana komo Roo ya.

16 Yohno tohra rma tî xakn̂e Roo. Ero ke takî tî Roo pen nahsîyatken̂e amorî poko, yipici yamorî poko marha, emsîrî komo yamorî poko marha. Ero wa tî ahsîno tak n̂iir̂atken̂e ancu komo. Naar̂atken̂e tî ewto poi. Ero wa tî Roo komo naar̂atken̂e yîpînîn yaw so exirî ke Kporin komo.

17 Taa, ewto poi arîche so on wara tî ketken̂e Roo komo ya, Emahcicoko ro mak ha men okwe waipîra awehtome so okwe. Amkai so enîhra marha ehcoko awemaciyataw so. Tan exihra ro mak ehcoko woskara po. Îh pona xa matko emahcicoko ecakîra awehtome so, ketken̂e tî yîwya so.

18-19 Okwe, kekn̂e hara tî Roo. Opînîn yawno me cma re keen̂asî. Waipîra ow miirî. Ooxatî me mai ham, wîîkesî. On wara xa matko wîîkes awya, îh pona owto xera men was okwe. Kamara men oyeske iina owcetaw, okoyi anarimaw oyeske oko. Kwaihyasî men okwe iina owtoche.

20 Mînto xa nai ewto wahrai ciki. Meyehra mak nai. Iina xa owto xe wasî meyeno pîn pona n̂he waipîra oyehtome. Wahrai cik mak mîn ewtoci, kekn̂e tî Roo yîwya so.

21 Taa, kekn̂e tî pawana, kewehcasî rma. Iina xa etocoko. Ero mak akn̂ipîra wasî ewtoci, an̂etacithîrî ha.

22 Ero ke emahcicoko iina, kar̂pe men etocoko. Akn̂ino cirihra thakwa ka wasî iina tohra awexitaw so, kekn̂e tî. Ero wa tî ketken̂e ancu komo Roo ya. Ero ke Soa me takî tî ero nosohcetken̂e ewtoci. Ero wa tî nosohcetken̂e.

23 Taa, kaamo yepatakache n̂he takî tî Soa pona n̂epatakekn̂e Roo.

24 Ero yimaw xa takî tî wehto nar̂mai Kporin komo Sotoma pona, Komoha pona marha tî. Weeyu warai tî mîn nar̂mekn̂e cetahsîsom ha tko tî oco. Ero yipu tî nar̂mekn̂e kah yai.

25 Ero wa tî ewto komo nakn̂iyakn̂e Kaan, woskara pononho komo ahnoro. Iitono pen komo tî nakn̂itîkekn̂e okwe yîmton me ro mak. N̂examro natîtho meero marha tî nakn̂iyakn̂e oco, weewe marha ahnoro ro mak okwe. Ero wa tî nakn̂iyakn̂e Kaan.

26 On wara tko tî xakn̂e Roo pici, tîmkai tî n̂een̂akn̂e. Ero ke takî tî noro pen n̂etakîcekn̂e yîmîtî me okwe, piirino rma thakwa. Ero wa tî xakn̂e Roo cinho pen okwe.

27 Taa, meye rma tî xakn̂e Abraaw tîmîn yaw rma. Enmarî yakro ro takî tî noro cekn̂e. Pahxa Kporin komo yeepatai n̂ecececekn̂e iina xa hara tî cekn̂e.

28 Iito cexitaw takî tî Sotoma wece n̂een̂akn̂e, Komoha wece marha. Ahnoro tî n̂een̂akn̂e woskara. Nîsînakn̂e ro makî tî kopi iitono ahnoro roowo ha. Mararî yecakyatawno wara ro makî tî nîsînakn̂e kopi.

29 On wara tko tî xakn̂e Kporin komo woskara pono yakn̂iyataw ewto pen, Abraaw mtapotachonho ponaro rma tî xakn̂e. Ero yanme tî Roo n̂en̂epekn̂e takn̂isom komo chew ecakîra ehtome. Ero yanme tî n̂en̂epekn̂e.

30 On wara tko tî xakn̂e Roo Soa po cexitaw, n̂eraswakn̂e ro makî tî kopi. Ero ke îh pona rma tî cekn̂e hara. Cemsîrî komo rma tî naar̂akn̂e 2 komo. Ewtarî yaw makî tî nîwînîkyatken̂e, îîpî yexenawno yaw. Ero wa tî xatken̂e okwe.

31 Taa, iito cexitaw so takî tî on wara ketken̂e emsîrî komo, poturu tî kekn̂e mahtîkîthîrî ya, Ai cîw, poritomotho me xa thakwa nasî apapa okwe. Anarî exihra ro mak nasî kîîrî tan okwe, kpokono. Roowo poko hakno komo naxe wooxam poko ero wara kpoko cehsom exihra nas okwe.

32 Ero ke apapa tîtwokparî kawaxiyem ke wenîmtome. Wenîmche tak noro yenaka tak tîhcesî kîmxîkmachome. Ero wa cexirî, kekn̂e tî.

33 Ero ke kosope takî tî tîîm komo wokpetken̂e kawaxiyem ke. Wenîmche tak potuthîrî tî cekn̂e noro yenaka. Twen̂ekarî ro makî tî xakn̂e yîîm okwe cemsîrî yetakrirî poko. Yîhtorî poko marha tî twen̂ekarî xakn̂e.

34 Enmapuche tak potuthîrî tî nîmtapowakn̂e xa hara tmahtîkîthîrî yakro. On wara tî kekn̂e yîwya, Taa, kokon̂oro apapa yenaka kîwtoi ow. Ero ke apapa tîtwokparî xa hara oroto kosope kawaxiyem ke. Amoro makîrha tak etoko noro yenaka. Ero wa cexirî apapa yepamrî komo ehtome amn̂e, kekn̂e tî.

35 Ero ke ero po xa hara tî tîîm komo wokpetken̂e kawaxiyem ke. Wenîmche hara mahtîkîthîrî takî tî cekn̂e tîîm yenaka hara. Twen̂ekarî ro makî tî xakn̂e yîîm okwe cemsîrî yetakrirî poko. Yîhtorî poko marha tî twen̂ekarî xakn̂e. Ero wa tî xakn̂e.

36 Ero ke takî tî tîmxîkye xatken̂e Roo yemsîrî komo tîîm xîkrî ke rma.

37 Ero yinhîrî takî tî potuthîrî n̂ewruyakn̂e kîîrî ciki. Moabe me tî nosohcekn̂e tîmrerî. Noro takî tî xakn̂e Moabita komo porin me. Naxe rma oroto Moabita komo.

38 Ero yinhîrî takî tî mahtîkîthîrî n̂ewruyakn̂e hara kîîrî xa marha. Ben-Ami me tî nosohcekn̂e noro hara. Noro takî tî xakn̂e Amonita komo porin me. Amonita komo naxe rma oroto. Ero wa xatken̂e Roo komo.