Taa, ero yinhîrî takî tî Kporin komo n̂esenpekn̂e xa hara Abraaw ya. Manîre po exitaw tî n̂esenpekn̂e yîwya kapar̂u yepu ken̂arî po. Ceremaxi tî xakn̂e noro tîmîn potaw, roona potaw. Ero wa tî xakn̂e Abraaw kamarakataw kaamo exitaw.

2 Ero wa cexitaw tak nîhkanwakn̂e takî tî Abraaw. Pawana tî n̂een̂akn̂e tîmîtwo kîrkomo. 3 tî n̂eenakn̂e iito cececetoso so. N̂examro yenîche yohno rma tî cekn̂e yîhyaka so. Tîtoche takî tî nutupenwakn̂e cesewnaposo ro.

3 On wara tî kekn̂e Abraaw, Apa, tawake awexitaw opoko anana so cma re ka tohra masî ohyai.

4 Tuuna ka wekpesî ahtarî komo korokacho. Mekar̂kacow ha na. Ero ke on weewe yapomyaw ka eremacoko.

5 Awru komo marha wekyasî awahworetopo komo, akaritotopo kom ha. Ero yinhîrî tak mîîcexe hara awanme ro so. Ero wara awehtome so na mîmohcow ohyaka. Awanton komo mak ow ha, kekn̂e tî. Ero wa tî kekn̂e Abraaw tîhyaka mohxapu komo ya. Taa, ketken̂e yîwya, ero wara rma kasko, ketken̂e tî yîwya pawana komo.

6 Ero ke yohno takî tî cekn̂e Abraaw tîmîn yaka Sara yaka. On wara tî kekn̂e yîwya, Puruma ehta yohno pin̂ipici me aposokaxapu, 3 een yukuknomakî. Ero wicakî tak esmakî cuure me aitome awya, kekn̂e tî. Ero wa tî kekn̂e cipici ya.

7 Ero wa kache takî tî tok wece cekn̂e hara Abraaw paaka wece. Kar̂pe tî cekn̂e. Paaka xîkrî tî n̂ekyakn̂e kir̂wan, yupun cukmano. Tanton tî nantomekn̂e waihkatopo poko. Noro takî tî nakpocakn̂e kan̂poritome tak yohno.

8 Ero yinhîrî tak pawana yotî me takî tî naar̂akn̂e hara. Katî marha tî naar̂akn̂e, paaka mown marha tî. Ero takî tî n̂etakekn̂e erewsî. Ero ke tî n̂eseresmetken̂e. Eseresmetaw so piiri rma tî xakn̂e Abraaw yîmîtwo so. Weewe yapomyaw tî xatken̂e. Ero wa tî xatken̂e.

9 Taa, eseresmatîkache so tak on wara tî kekn̂e pawana Abraaw ya, Ahto nai apici Sara? kekn̂e tî. Mînto nai mîîmo yaw, kekn̂e tî Abraaw.

10 Taa, on wara wîîkes awya apici poko, kekn̂e tî, amn̂e ahyaka so kmokyas hara on nuun̂i po rma anarî cimn̂ipu po. Ero po tak apici n̂ewruyasî, Sara ha. Kîîrî me cik n̂ewruyasî, kekn̂e tî. Ero wa ketaw mîîmo yaw rma tî xakn̂e Sara, metataw mak. Abraaw mkai tî xakn̂e. En̂exa tî n̂encekn̂e pawana komo mtapotarî.

11 On wara tko tî xakn̂e Abraaw, poritomo me ro makî tî xakn̂e. Nocwakomo me marha tî xakn̂e Sara hara. Tîmxîtaxmu mera tak tî xakn̂e okwe nocwakomo kaxi.

12 Ero ke tî n̂ewrekn̂e Sara tîhnaw mak. On wara tî kekn̂e tîhnaw, Nocwakomotho me thakwa was okwe. Oyin̂o marha nasî poritomotho me hara. Noro yipu ma re kewruya okyo tawake oyehtome? kekn̂e tî tîhnaw.

13 On wara takî tî kekn̂e Kporin komo Abraaw ya, Ahce kacho n̂ewrew Sara? Kewruya ha ma re wa nocwakomotho rma, nîîka kica.

14 Cehn̂axmu me katî nai Kporin komo awya so? Ahyaka so rma wa kmokyas amn̂e on nuun̂i po rma, anarî cimn̂ipu po. Ero yimaw Sara n̂ewruyasî. Ero ke ahce kacho n̂ewrew hara? kekn̂e tî. Ero wa tî kekn̂e pawana Abraaw ya.

15 Yîmtapotarî tko tî nanwekyakn̂e Sara. Pîra, ewrera ro mak weexi, kekn̂e tî. N̂eraswakn̂e makî tî n̂examro pona. Mewrew rma okwe, kekn̂e tî pawana yîwya. Ero wa tî ketken̂e Abraaw mumuru yewrutopo poko.

16 Taa, ero yinhîrî takî tî pawana komo nawomyatken̂e hara. Sotoma yesamarî yaw tî cetken̂e. Akro so rma tî ka cekn̂e Abraaw.

17 Ero yinhîrî on wara tî kekn̂e Kporin komo, Owya ciino ritopo yekatîmra xa ma re wai Abraaw ya?

18 Cepamsom xa moso Abraaw. Anarî yana me tak naxe amn̂e noro yepamtho komo. Mer̂pora ro mak naxe noro yepamtho komo, karitî me marha naxe. Noro poyero tak Mîk hak rowon pono komo naxe onwakrerî me amn̂e ahnoro.

19 On warai me ween̂asî noro, tîmxîkrî panatanmekn̂e me xa ween̂asî. Tanton komo panatanmekn̂e me marha ween̂asî. Ero ke Kporin komo mtapotacho yewetîn̂e me naxe n̂examro yîwya tpanatanmekrî ke so. Kicicme ciino rin̂e pîn me naxe. Ero wa nasî Abraaw, yîhyawno komo marha tak kir̂wan̂he n̂iir̂asî Kporin komo ya, tîmtapotachonhîrî yaw roro rma wakrechome ha, kekn̂e tî. Ero wa tî kekn̂e Kporin komo Abraaw poko.

20 Taa, ero yinhîrî takî tî on wara kekn̂e hara Kporin komo Abraaw ya xa tak, Sotoma pono komo yehtopo xa n̂esencesî. Kicicitho me ro makî tî nat okwe. Ero wa xa marha n̂esencesî Komoha pono komo yehtopo hara.

21 Ero ke n̂examro yenso tak kîwcesî, Yaaro xa ham, kachome owya. Wara ro mak kan̂e me ehtopo komo wencekn̂e ero wara rma nat ham okwe, kachome kîwcesî. Kicicme xa exihra rma exitaw so tko, Pîra rma ham, wîîkesî tak, kekn̂e tî. Ero wa tî kekn̂e Kporin komo Abraaw ya.

22 Ero wa kache takî tî Kporin komo yakrono komo n̂esewkor̂metken̂e tîtotome so. Sotoma yesamarî yaw tî cetken̂e. Iito rma tko tî xakn̂e Kporin komo tohra. Iito marha tî xakn̂e Abraaw Kporin komo yeepatai rma.

23 Kporin komo mîtkoso takî tî cekn̂e Abraaw, akro tîmtapotachome. On wara tî kekn̂e yîwya, Apa, kir̂wan komo meero ma mîwaike kicicitho komo yakro rma ha?

24 Ahce wa miir̂a iitono komo 50 exitaw kir̂wan kom ha? Iitono komo waihkara rma na mai ha ero wicakî exitaw so kir̂wan komo? Ahnoro rma katî mîwaike iitono pen komo? kekn̂e.

25 Ero wa ciino rin̂e pîn me tko kîhtînoyasî, kir̂wan komo waihkan̂e pîn me kîhtînoyasî kicicitho komo yakro rma. Ero wara rma waihkano riyataw ketaw ha re awya, Kicicitho amyamro kica, kan̂e wara rma na mai kir̂wan komo ya rma hara. Ero warai pîn me tko kîhtînoyasî. Roowo poko hakno komo yen̂ekan̂e xa Amoro. Ero ke kir̂wanhe ciino rin̂e me xa kîhtînoyasî, kekn̂e tî Abraaw Kporin komo ya.

26 On wara tî n̂eyukyakn̂e Kporin komo, Pîra, 50 exitaw kir̂wan komo iito, n̂examro pînînke waihkano cirihra ro mak wasî, kekn̂e tî.

27 Ero yinhîrî takî tî on wara kekn̂e hara Abraaw, Tweeno pîn wara rma kîmtapowas okwe awakro, Kporin komo yakro ha. Noro pîntho rma tko ow ha. Roowotho mak ow, wemronho mak ha. Wara rma kîmtapowasî rma cma re ka awakro.

28 On wara wîîkes awya, ahce wa miir̂a 50 exihra rma exitaw so kir̂wan komo iito? 45 mak exitaw so ahce wa miir̂a? Ahnoro ewto pono komo katî mîwaike rma? kekn̂e tî. Pîra, kekn̂e tî Kporin komo, iitono komo waihkara ro mak wasî 45 komo mak exitaw so kir̂wan komo, kekn̂e tî.

29 Nîmtapowakn̂e xa hara tko Abraaw. On wara tî kekn̂e hara, Ahce wa ciino miir̂a 40 mak exitaw kir̂wan kom hara iito? kekn̂e tî. Taa, 40 mak exitaw, waihkano cirihra rma wasî ero wicakno pînînke, kekn̂e tî.

30 Nîmtapowakn̂e xa hara tî Abraaw. On wara tî kekn̂e, Kîmtapowasî rma cma re ka awakro Apa. Opoko cma re yîrwomra masî. Ahce wa miir̂a 30 mak exitaw iito ha? kekn̂e tî yîwya. Taa, kekn̂e xa hara tî Kporin komo, 30 mak exitaw so waihkano cirihra rma wasî, kekn̂e tî.

31 Apa, kekn̂e xa hara tî Abraaw, Tweeno pîntho wara ro mak kîmtapowas okwe awakro. Wara rma wîîkesî cma re ka awya. Ahce wa miir̂a hara 20 mak exitaw iito? Taa, waihkano cirihra wasî 20 mak exitaw iito, kekn̂e tî.

32 Nîmtapowakn̂e xa hara Abraaw. On wara tî kekn̂e yîwya, Apa, cewn̂e ro xa tak tan kîmtapowas awakro. Yîrwomra cma re mas opoko. Ahce wa miir̂a 10 mak exitaw iito ha? kekn̂e tî. Taa, 10 mak exitaw so waihkano cirihra rma wasî, kekn̂e tî. Ero wa tî kekn̂e Kporin komo Abraaw ya.

33 Ero wa kache takî tî miya cekn̂e Kporin komo Abraaw yakro tîmtapotache. Tîmîn yaka tî n̂etîramekn̂e hara Abraaw. Ero wa tî cetken̂e.