Taa, ero yinhîrî pahkî exiche takî tî Abraw xakn̂e poritomo me. 99 cimn̂ipu tî xakn̂e noro yewrutoponho. Ero yimaw takî tî Kporin komo n̂esenpekn̂e yîwya. On wara tî kekn̂e yîwya, Abraw, Kaan xa Ow ha, karitî ro xa ha. Ero ke oyakrono ro me esko. Kicicitho mîkro, kacho mera ro mak esko.

2 Oroto kir̂wan̂he awitopo tan wekatîmyasî awya. On wara kiir̂asî, mer̂pora ro mak kepamnoyas amn̂e. Yaaro xa wîîkes awya ero poko, kekn̂e tî yîwya.

3 Ero wa kacho yentache takî tî Abraw n̂esewnapekn̂e. Nîmtapowakn̂e rma tî Kaan noro yakro rma.

4 On wara tî kekn̂e hara yîwya, Kir̂an̂he xa on̂irirî me xa masî. Mîk hak rowon pono komo me naxe awepamthîrî komo amn̂e. Noro yipu komo porin me kiir̂asî. Ero wa kiir̂asî.

5 Ero ke anarî me tak kosohcesî. Abraw me exihra tak masî. Abraaw me tak kosohces hara. Ero warai me tak kosohcesî mîk hak rowon pono komo porin me awirirî ke owya, mer̂pono pîn komo porin me ha, kekn̂e tî.

6 Cepamsom me xa tak kiir̂asî. Mer̂pora ro mak tak naxe awepamthîrî komo amn̂e. Mîn hak roowo pono me naxe. Kayaritomo me so marha naxe awepamthîrî komo yaake rma.

7 Ero wa wîîkes awya yaaro xa. Ero wa xa marha wîîkesî awepamthîrî komo ya hara, miya roro ehretawnomaxapu komo ya rma. Eroromerono tan omtapotacho. Ero wara wîîkes awya ponaro xa awehtome, ponaro xa awepamthîrî komo yehtome marha amn̂e awaipuche.

8 On roowo marha wîmyasî arowonî ro me. Awepamthîrî komo rowonî ro me marha wîmyasî eroromerono me xa. Tan masî Kanan po ayanan pîn komo chew. On roowo rma tko wîmyas awya, awepamthîrî komo ya marha wîmyasî. Ponaro xa kehtopo Mîkî Kaan, kexe amn̂e n̂examro opoko, kekn̂e yîwya.

9 On wara marha tî kekn̂e Kaan yîwya, Omtapotarî ponaro men esko, Ero wara kiir̂axe so, kacho ponaro. Ero ponaro marha n̂ehcowpe awepamthîrî kom hara miya roro ehretawnomaxapu komo rma.

10 On wara men ehcoko omtapotacho ponaro awehtome so, kîîrî mren komo anpikacoko ahnoro amumuru kom ha.

11 Amoro meero rma etanpikakî. Kir̂wan̂he kiir̂as amn̂e, wîîkai awya yaaro xa. Ero ke ero wa kachonho kuknon me nasî awetanpikacho komo, omtapotachonho kuknon me ha.

12-13 Kîîrî mren yewruche ciki, 8 kaamo exitaw tak ewrutoponhîrî, ero po xa tak anpikacoko. Ahnoro mak anpikacoko kîîrî mren komo, amxîkrî komo. Amumuru pîn komo marha anpikacoko amîn komo yaw ewruxapu komo. Puranta pona ahsîxapu komo marha anpikacoko watohra ro mak. Ero wa awexitaw so tak omtapotacho kuknon tak nasî apun komo poko rma. Eroromerono xa mîn Kaanî mtapotacho mîn ha, kacho nasî apun komo poko rma.

14 Taa, kîîrî exitaw anpikan ayanan komo mera tak n̂expe noro pen. Omtapotachonho yewetîn̂e pîn mîk noro yipu. Ero ke ayanan pîn me tak nasî, kekn̂e tî. Ero wa tî kekn̂e Kaan Abraaw ya.

15 On wara marha tî kekn̂e Kaan Abraaw ya, On wara wîîkes apici poko hara Sarai poko, anarî me tak noro osohtoko hara Sarai mera tak. Sara me xa tak osohtoko.

16 Noro marha kir̂wan̂he wiiir̂asî. Amumuru wîmyas awya yîropotainonho rma. Miya xe xa kir̂wan̂he wiir̂asî apici. Mîk hak rowon pono komo yon me tak wiir̂asî. Mîk hak yana kayaritomon komo yon me marha nasî. Ero wa nasî apici amn̂e, kekn̂e tî. Ero wa tî kekn̂e Kaan Abraaw ya.

17 Taa, ero yentache takî Abraaw takî tî n̂esewnapekn̂e xa hara. N̂ewrekn̂e tak tî. On wara tî kekn̂e tîhnaw mak, Tîmxîkwa ma re poritomotho me kexitaw? 100 cimn̂ipu tak nasî oyewrutoponho okyo. Sara marha nasî nocwakomo me. 90 cimn̂ipu nasî noro yewrutoponho hara. Noro yipu ma re n̂ewruya wooxam ha, kekn̂e tî.

18 Ero yinhîrî takî tî on wara kekn̂e Abraaw Kaan ya, Ai apa, Ismaew cma re miir̂as kir̂wan̂he an̂irirî me, kekn̂e tî.

19 On wara tko tî n̂eyukyakn̂e Kaan, Apici rma n̂etahsîyas amn̂e Sara. Amumuru cik n̂ewruyasî noro mrerî rma. Noro yewruche ciki Isake me tak osohtoko. On wara wîîkesî noro poko, kir̂wan̂he on̂irîrî me wiir̂asî, epamthîrî komo marha ero wa wiir̂asî, wîîkesî. Yaarono xa tan omtapotarî.

20 Amtapotarî rma tko wenta Ismaew pokono. Ero ke kir̂wan̂he xa marha wiir̂asî noro hara. Noro marha wepamnoyasî. Mer̂pora ro mak naxe epamthîrî komo amn̂e. Kayaritomo me so marha naxe n̂examro, noro yepamtho komo. 12 yakenon naxe kayaritomo me so noro yepamtho kom ha. Yukurumîkno me so xa naxe.

21 Isake rma tko nas kir̂wan̂he on̂irirî me xa tak, Sara mrerî rma, amumuru. On nuun̂i po rma n̂ewruyasî, on cimn̂ipu ponan po rma ha, kekn̂e tî. Ero wa tî kekn̂e Kporin komo Abraaw ya.

22 Ero yinhîrî takî tî cekn̂e hara Kaan Abraaw yakro yîmtapotaxapunhîrî. Ero wa tî cekn̂e.

23 Ero yinhîrî takî tî Ismaew nanpikekn̂e Abraaw ero kaamo po rma. Kaanî mtapotarî tî n̂ewehcakn̂e. Anarî komo marha tî nanpikekn̂e kîrkomo, tîmîn yaw ewruxapu komo. Puranta pona ahsîxapu komo marha tî nanpikekn̂e. Ero wa tî n̂iir̂akn̂e ahnoro tîmîn yawno komo Kaanî mtapotacho yaw roro rma.

24 Abraaw marha tî n̂etanpikekn̂e. Poritomo me xa tî xakn̂e cetanpiketaw, 99 cimn̂ipu tî xakn̂e noro yewrutoponho.

25 Kar̂pamxan me reha tî xakn̂e Ismaew cetanpiketaw, 13 cimn̂ipu makî tî xakn̂e noro yewrutoponho ero yimaw.

26 Ero re po rma tî n̂etanpiketken̂e Abraaw tumumuru yakro rma Ismaew yakro.

27 Ero po marha tî n̂etanpiketken̂e kîrkomo ahnoro Abraaw mîn yawno kom ha, yîmîn yaw ewruxapu komo tî, anarî komo yantonînho komo marha tî, puranta pona aponxapu komo, noro yipu komo marha tî n̂etanpiketken̂e. Ero re po rma tî n̂etanpiketken̂e ahnoro. Ero wa tî xatken̂e.