Taa, on wara tî xakn̂e Sarai, Abraw pici, yîmxîtara ro makî tî xakn̂e okwe. Noro yantonî tko tî xakn̂e Exipsiu wosîn. Aka tî mîk xakn̂e noro yosotî.

2 Ero yimaw takî tî on wara kekn̂e Sarai Abraw ya, On wara thakwa oriye ham okwe Kporin komo, yîmxîtanî ro me. Ero ke oyanton yenaka cma re mîîcesî. Noro n̂he tak na nîmxîkwa omxîkrî me cik ha, kekn̂e tî. Ero wa tî kekn̂e Sarai ciin̂o ya okwe. Ero ke cipici mtapotarî tî n̂ewehcakn̂e Abraw.

3 Ero ke takî tî tanton nîmyakn̂e Sarai ciin̂o ya, Abraw ya. Yipici me tî nîmyakn̂e, Exipsiu ha. 10 cimn̂ipu tî xakn̂e Kanan po n̂examro yehtoponho, ero yimaw.

4 Ero ke Aka takî tî nahsîyakn̂e Abraw. Ahsîche n̂etahsîyakn̂e tak ha tî noro wooxam. Tarke tak wai ham, kekn̂e takî tî. Ero yimaw takî tî tantoman̂e xera xakn̂e kica Aka, Sarai xera.

5 Ero ke on wara tî kekn̂e Sarai Abraw ya, Kicicme wehxe ham kica. Apona tko wiir̂asî kicicme oyehtoponho. Oyanton wîmye awenakan me. Tarke wai ham, kache yîwya, ooxatî pîn me tak n̂ehtîka okwe. Ero ke Kporin komo tak ken̂ekape. Kicicme mîxakn̂e kica, nîîke na awya, owya katî nîîke ero wara. Noro xa kape kîwya, kekn̂e tî.

6 Ai ha, amoro ha tko, kekn̂e tî Abraw yîwya. Awanton mîkro. Ahce wa na noro ciri xe mai, awanme ro mak yîhtînoko, kekn̂e tî. Ero ke takî tî Aka pen n̂eiyakn̂e ro makî takî tî Sarai. Ero ke tak tî n̂emahciyakn̂e tantoman̂e ya ceirî ke. Ero wa tî xakn̂e okwe.

7 Mooxe tî cekn̂e tuuna pîtho mîtkoso. Pohnîntawno mîn xakn̂e tuuna pîtho, Suu yesamarî yakumyawno ha. Iito exitaw takî tî Kporin komo yancun mokyakn̂e noro yenso, Kporin komo yanton ha.

8 On wara tî kekn̂e noro Aka ya, Ai Aka, Sarai yantonînho amoro. Ahn̂i xa wa mîmoko? Ahna wa mîîce hara? kekn̂e tî yîwya. On wara tî n̂eyukyakn̂e Aka, Oyantoman̂e yai kemahciw, Sarai yai, kekn̂e tî ancu ya.

9 On wara tî kekn̂e hara Kporin komo yancun yîwya, Awantoman̂e yaka rma etok hara. Noro rma ewetko hara, kekn̂e tî ancu yîwya.

10 On wara marha tî kekn̂e Kporin komo yancun yîwya, Miya xe xa tak wepamnoyas awepamthîrî komo amn̂e. Yukuknomarî yopo ro mak naxe awepamthîrî komo amn̂e, kekn̂e tî.

11 Tarke masî. N̂ewruyasî ciki tak amn̂e amrerî. Ewruche Ismaew me tak osohtoko. Ero wa osohtoko apînîn yaw exirî ke Kporin komo. Awemetanmekrî yentarî ke apînîn yaw nasî. Ero ke ero wa osohtoko amrerî amn̂e.

12 On warai me nasî amrerî amn̂e, yîrwonpontho me mak nasî. Miyan komo xatî pîn me nasî. Noro xera marha naxe tooto kom hara miyan komo rma. Tîyanan komo chewno me rma tko nas amn̂e, kekn̂e tî. Ero wa tî kekn̂e ancu Aka ya.

13 Ero wa kacho yentache tî Aka tak nosohcekn̂e iitono, tuuna pîtho, Kaan Amoro Apa. Ow xa meen̂asî, kacho me tî nosohcekn̂e. On wara tî kekn̂e, Oyenîn̂e ro xa wenwo tan, kekn̂e tî. Ero ke tî ero wa tuuna nosohcekn̂e.

14 Ero ke on wara tak n̂esetacasî tuuna, Bee-Raai-Hoi, kacho me tak n̂etahcaxe iitono komo. Kates mehxa nasî, Berece xehxa reha nasî. Iyotawno mîn ero tuuna.

15 Taa, ero yinhîrî takî tî Aka xîkrî n̂ewruyakn̂e. Abraw mumuru ciki tî mîk n̂ewruyakn̂e ha. Ismaew me takî tî tumumuru cik nosohcekn̂e Aka. Ero wa tî nosohcekn̂e.

16 86 cimn̂ipu xakn̂e Abraw yewrutoponho. Ero yimaw tî n̂ewruyakn̂e Ismaew, Aka mrerî ciki, Abraw mumuru rma. Ero wa tî n̂ewruyakn̂e.