Taa, ero yinhîrî takî tî Kporin komo mtapotarî n̂encekn̂e Abraw twosoto. On wara tî kekn̂e yîwya, Ai Abraw, erasîra ro mak esko. Awecen̂an xa Ow ha, awepethîrî mer̂pono pîn marha Ow ha, kekn̂e tî yîwya.

2 On wara tko tî kekn̂e Abraw hara, Apa, Kaan Amoro, on wara wîîkes awya, Kemyawnomesî men amn̂e, mîîkai owya. On wara tko wîhtînoyasî, onok ma re nahsîya oyemyawnonho owaipuche? Omxîkrî exihra thakwa nasî ahsîn̂e ha, omaywen, Eriese ha, Tamasku pono.

3 Omxîkrî thakwa tîmîhra ro mak mîxakn̂e owya. Ero ke anarî ro mak nasî oyemyawnonho yahsîn̂e me, omîn yaw ewruxapu ha, kekn̂e tî.

4 On wara tko tî n̂eyukyakn̂e Kaan, Pîra okopuci, awemyawnonhîrî yahsîra ro mak nasî noro. Amxîkrî me ewruxapu xa mîk nahsîyas amn̂e awemyawnonhîrî, kekn̂e tî Kaan.

5-6 Ero wa kache takî tî Abraw naar̂akn̂e Kporin komo katpanaka. On wara takî tî kekn̂e Kaan yîwya, Kaapu ka enko. Xir̂ko ika yukuknomakî. N̂etkuknomape ha ma re awya? Pîra ro mak, yukuknomarî yopo ro mak nasî xir̂ko. Ero wa xa marha naxe awepamthîrî komo amn̂e yukuknomarî yopo, kekn̂e tî Kaan. Taa, ero wa ham Apa, kekn̂e Abraw. Kporin komo mtapotacho tî n̂ewehcakn̂e. Ero wa exirî ke, Kir̂wan mîkro, kacho me takî tî xakn̂e Abraw Kaan ya. Ero wara tî xakn̂e Abraw.

7 Ero yinhîrî on wara tî kekn̂e Kporin komo yîwya, Aporin komo xa Ow ha. Uru poi awekn̂enhîrî Ow ha, Kawtew komo chei ha. Xiya kekyakn̂e on roowo tîmtome awya. Arowonî ro me mahsîyas amn̂e, kekn̂e tî yîwya.

8 Apa, Kaan Amoro, kekn̂e hara tî Abraw yîwya, ahce menpe owya, Yaaro xa on roowo wahsîya ham amn̂e, kachome tak owya? kekn̂e tî yîwya.

9 Taa, awokuthîrî tak ehta xiya, kekn̂e tî Kporin komo yîwya. Paaka eeko woosî, 3 cimn̂ipu ehxapu. Kabra marha eeko, 3 cimn̂ipu ehxapu marha. Kahn̂eru marha eeko, 3 cimn̂ipu ehxapu marha. Potkuku marha eeko, potwo marha, kekn̂e tî Kaan yîwya.

10 Ero ke noro yipu komo takî tî n̂ekyakn̂e Abraw. Ekîche tak kararakekn̂e rakataw so. Xehxa tî n̂iir̂akn̂e yupunthîrî raconho, mehxa tî n̂iir̂akn̂e eeconhîrî hara. Ero wa tî n̂iir̂akn̂e. Tarin̂em komo tko tî kararakara xakn̂e.

11 Ero yinhîrî takî tî kwacinama nîhcekn̂e yupunthîrî pona. N̂en̂epekn̂e ha tko tî Abraw.

12 Ero yinhîrî takî tî kaamo yemihcataw nîwînîkyakn̂e Abraw. Yuhnari tî nîwînîkyakn̂e. Tîwînîkyataw tî n̂eraswakn̂e xa. Awarpan chewno wara ro makî tî xakn̂e twosoto. Ero wa tî xakn̂e Abraw.

13 Ero yimaw on wara tî kekn̂e Kaan yîwya, Abraw, on wara wîîkes awya, yaaro xa tan wîîkes awya, awepamthîrî komo naxe amn̂e anarî yana komo rowon po hara. Iitono komo yanton me thakwa naxe okwe. N̂emetanmekyaxe marha pahkî ro mak, 400 cimn̂ipu pahkînon okwe.

14 Ero yinhîrî tak emetanmekn̂enhîrî komo tak wemetanmekyasî Ow hara. Ero yinhîrî tak awepamthîrî komo mokyaxe n̂examro rowon poi hara. Cemyawnoi xa tak mokaxe.

15 Amoro reha mîwaiyasî ahwokan me rma. Awaipuche tak awokoputhîrî nahruyaxe roowo cheka.

16 Pahkî naxe awepamthîrî komo iito cemetanmekn̂e komo chew. 4 ro n̂ehretawnomexe iito rma. Ero wicakî ro epamche so oona tak ekno wiir̂as hara. Yohno n̂he n̂examro yekîhra ka wasî oona kicicme xa ka ehtîkara exirî ke Amohew komo, Kicicme ehtîkache so mak awepamthîrî komo wekyas hara oona, kekn̂e tî. Ero wa tî kekn̂e Kporin komo Abraw ya.

17 Ero yinhîrî takî tî kokmamyakn̂e. Awarpantache tak wehto n̂esenpekn̂e een yawno, nîsînakn̂e. Weeyu marha tî n̂esenpekn̂e potuhtoxapu ha. Ero yipu tî cekn̂e okno pun raconho yotari. Ero warai tî cekn̂e.

18 Ero kaamo po rma tak Kporin komo nîmtapowakn̂e Abraw yakro noro wakretopo poko. On wara tî kekn̂e yîwya, On xa roowo wîmyasî awepamthîrî komo ya amn̂e. Exitu yepu yecihtawno wîmyasî. Miyanî rma wîmyas hara roowo porin eepu yaka rorono, Ewpratesî yaka rorono ha. Ero wicakno wîmyasî roowo yîwya so.

19-21 Iitono pen komo yekenho wîmyasî yîwya so, anarî yana komo yekenho ha. On wara osotî komo, Ken̂ew, Ken̂esew, Katmon̂ew, Etew, Perisew, Repain, Amohew, Kanan̂eu, Kihkasew, Xebusew. Ero warai komo yekenho wîmyas awepamthîrî komo yeken me hara, kekn̂e tî. Ero wa tî kekn̂e Kporin komo Abraw ya.