Taa, ero yinhîrî takî tî kayaritomo komo n̂etar̂metken̂e. On wicakî tî xatken̂e cetar̂maxmu komo, Anrapew, Sina pono komo kayaritomon. Arioke, Erasa pono komo kayaritomon, Ketorawme, Eraw pono komo kayaritomon, Citaw, Koin komo kayaritomon. Ero wa tî mokyatken̂e kayaritomo komo waapa me.

2 Taa, n̂examro tî n̂etar̂metken̂e Bera yakro, Sotoma pono komo kayaritomon yakro. Bihsa yakro marha, Komoha pono komo kayaritomon yakro. Sinabe yakro marha tî n̂etar̂metken̂e, Atma pono komo kayaritomon yakro, Semebe yakro marha tî, Seboin pono yakro. Bera pono komo kayaritomon yakro marha tî n̂etar̂metken̂e. Soa rma tî mîn ewto, Bera ha. N̂examro yakro tî n̂etar̂metken̂e mehxa mohxapu komo yakro.

3 Woskara po tî n̂etar̂metken̂e. Sitin tî mîn ero yosotî woskara ha. Iito tak nasî n̂ikitho porin, Yîmîtî Ken̂arî, kacho.

4 12 cimn̂ipu tî xatken̂e iitono komo Ketorawme yepeman̂e me. Ero wa tî xatken̂e Sotoma pono komo, yîmîtwono komo marha. 13-nhîrî po takî tî nanwekyatken̂e. Noro purantan takî tî arpora xatken̂e. Noro yepeman̂e me cexi xera takî tî xatken̂e.

5-6 Ero ke 14-nhîrî po cimn̂ipu po takî tî n̂examro waparî me mokyakn̂e Ketorawme. Noro yakro mokyatken̂e kayaritomo komo. Repain pen komo cokorî tî ka nar̂metken̂e n̂examro Asteroci-Karnain pono pen kom ha. Susim pono pen komo marha tî nar̂metken̂e Aan pono pen kom ha. Emin pen komo marha tî nar̂metken̂e Sape-Kiriatain pono pen kom ha. Orew pen komo marha tî nar̂metken̂e Seei pono pen kom ha. Ew-Paran pono komo meero tî nar̂metken̂e. Axawa imo yemyatwono tî mîn Ew-Paran. Iitono pen komo tî nar̂metken̂e ha ka tmokrî me so.

7 En̂exa takî tî n̂etîrametken̂e hara En-mispace pona hara. Kates rma mîn En-mispaci. Amarekita pen komo takî tî nar̂metken̂e miyan komo rma. Amohew pen komo marha tî nar̂metken̂e, Asesontama pono pen komo mak.

8 Ero yimaw takî tî Sotoma pono komo kayaritomon cekn̂e hara mehxa mohxapu komo yakro etar̂maxi. Noro yakro marha tî cetken̂e Komoha pono, Atma pono, Seboin pono, Bera pono. Soa rma tî mîn Bera. Ero warai komo tî cetken̂e Ketorawme komo waparî me hara. Ero ke takî tî n̂etar̂metken̂e Sitin po capahno po.

9 On warai komo yakro tî n̂etar̂metken̂e, Ketorawme yakro, Eraw pono komo kayaritomon yakro. Citaw yakro, Koin komo kayaritomon yakro, Amrapew yakro, Sin̂a pono komo kayaritomon yakro, Arioke yakro, Erasa pono komo kayaritomon yakro ha. Ero warai komo yakro tî n̂etar̂metken̂e. Ero wa tî n̂etar̂metken̂e.

10 N̂emahciyatken̂e tko tî Sotoma pono pen kom okwe, Komoha pono pen komo marha. Sitin pore tî n̂emahciyatken̂e. Kicicme tko tî xakn̂e iitono roowo. Cewtake so tî xakn̂e kica. Maan̂i warai tî xakn̂e ewtarî yaw. Ero yipu yaka tî n̂epîrketken̂e Sotoma pono pen komo okwe, Komora pono pen komo marha. Waihyatken̂e thakwa okwe. Epîrkan komo reha tî n̂emahciyatken̂e îh pona.

11 Ero ke Sotoma pono pen komo yemyawnonho naar̂atken̂e Ketorawme komo, Komoha pono pen komo yemyawno marha. Naatîketken̂e okwe. Yînaputhîrî komo marha naatîîketken̂e. Ero yinhîrî takî tî cetken̂e hara.

12 Roo pen marha tî naar̂atken̂e, Abraw yaknonho pen mumutho, Sotoma pononho ha. Noro yemyawnonho marha tî naar̂atken̂e. Ero yinhîrî takî tî cetken̂e hara. Ero wa tî naar̂atken̂e iitononhîrî pen komo.

13 Anarînhîrî tko tî arîhra xatken̂e. Emahcixapu tî mîk xakn̂e. Noro takî tî ekatîmso cekn̂e Abraw yaka, Ebrew me cehsom yaka. Cepahno po tî xakn̂e Abraw ero yimaw Manîre rowon po, kapar̂u ken̂arî po. Amohew tî mîk xakn̂e Manîre. Eskorî yakno tî mîk xakn̂e, Aan̂e yakno marha. Kwaparî komo mokuche cetakronomacerî, kan̂e komo tî mîkyam xatken̂e Abraw yakro. Noro yipu komo mîtwo tî xakn̂e Abraw. Iina tî cekn̂e ekatîmn̂e. Ai Abraw, ayanan pen komo naacow okwe, kekn̂e tî yîwya.

14 Ero wa kacho yentache Abraw ya tanton komo takî tî nan̂ikyakn̂e. Ketar̂macho poko ehcamhokaxapu komo tî mîkyam xatken̂e. Yaake tî xatken̂e 318 ha tî. Abraw yaw ewruxapu komo tî mîkyam xatken̂e. Mokuche so tak Abraw yakro tî cetken̂e. Sotoma pono pen komo wapatho tî wenatîketken̂e. Mooxe tî cetken̂e Taan pona roro ha tî.

15 Iito takî tî waapa komo n̂een̂atken̂e kosope. Takrono komo tî nîraconkekn̂e Abraw. Xiya tî n̂en̂epekn̂e anarî komo, miya tî n̂en̂epekn̂e anarî kom hara. Etakpache so tak, Yuu yuu yuu, ketken̂e tî. Waapanhîrî komo wece takî tî cetken̂e kar̂pe waparî komo me hara. Anarî pen komo tî n̂emahciyatken̂e. Emahcixapu komo wenari ro so rma tî cetken̂e Abraw komo. Mooxe tî cetken̂e Oba pona roro. Tamasku mîtwono mîn Oba, poowa n̂ixan. Iina tî cetken̂e emahcixapu komo wenari rma.

16 Ero yinhîrî takî tî Sotoma pono komo yemyawnonho n̂ekyatken̂e hara Abraw komo waapa narîtho. Roo marha tî n̂ekyatken̂e, noro yemyawnonho marha tî. Wooxam komo marha tî n̂ekyatken̂e kîrkomo marha tî. Ahnoro tî n̂ehtîketken̂e hara Abraw komo.

17 Ero wa tî Ketorawme pen nar̂metken̂e Abraw komo. Akrononhîrî pen komo marha tî nar̂metken̂e kayaritomo pen kom ha. Ero yinhîrî takî tî mokyatken̂e hara. Esama yaw rma ka exitaw so, Sotoma pono komo kayaritomon tî cekn̂e yîhyaka Xape pona. Capahno mîn xakn̂e Xape, kayaritomo roronî rma. Ero ke iina tî cekn̂e kayaritomo, Sotoma pono, Abraw yenso.

18 Mewkiseteke marha tî mokyakn̂e Abraw yenso. Cuure tî n̂ekyakn̂e wooku marha tî. Kaan yaka cewomsom tî mîk xakn̂e, kyopono ro yaka cewomsom ha.

19 On wara tî xakn̂e noro tmokuche, nîmtapowakn̂e Kaan yakro tî Abraw yakronoma cho poko. On wara tî kekn̂e, Yîtîhkathîrî xa Mîk Kaan moso yakronoma xe wasî. Kaapu yosom Mîk, roowo yosom marha Mîk ha. Noro yipu ya Abraw yakronoma xe wasî, kekn̂e tî.

20 On wara marha tî kekn̂e Abraw ya, Kir̂wan̂he xa mai ham okre, kapore nasî Kaan ya yîtîhkathîrî ya ha. Aaxatî pîn pen komo nar̂mapekn̂e awya. Ero ke ero wa kapore nasî yîwya, kekn̂e tî. Ero wa tî kekn̂e Mewkiseteke Abraw ya. Ero wa kache takî tî Sotoma pono komo yemyawnonho poyinonho takî tî nîmyakn̂e Abraw Mewkiseteke ya. 10-înhîrî poyinonho tî 1 nîmyakn̂e yîwya. Ero wa tî nîraconkekn̂e tîn̂ekîthîrî ahnoro. Mewkiseteke ya tîmsom me tî nîraconkekn̂e.

21 Taa, on wara tî kekn̂e Sotoma pono komo kayaritomon Abraw ya, Oyakno, omaywenînho komo mak na wahsîya. Ero ke amna yemyawnonho rma arko rma amoro. Awemyawno me tak ahsîko, kekn̂e tî yîwya.

22-23 On wara tko tî n̂eyukyakn̂e Abraw, Pîra, ahsîra ro mak wasî. On wara wîîkai Kaan ya, Sotoma pono komo kayaritomon yemyawnonho yahsîra ro mak wasî. Mawîrka ciki, yîhtarî micitho cik, ero yipu komo meero ahsîra wasî, wîîkai. Ero wa ketaw owya kapockantai Kporin komo Kaan wece, yîtîhkathîrî wece xa. Kaapu yosom Mîk, roowo yosom marha, Noro wece kapockantai. Ahce na yarîhra ro mak wasî n̂examro yemyawnonho, wîîkai yîwya. Cemyawnoyem mîk Abraw onîmîtho ke mak, kahra awehtome ero wa wîîkai yîwya.

24 Moxam nahrî mak wîmye kar̂pamxan komo nahrî, oyakro toxapu komo nahrî ha. Taa, moxam naxe hara, oyakro toxapu komo, Manîre komo, Eskoro komo, Aan̂e komo, n̂examro ya xa tîmko ha awemyawnonhîrî raconho. Ero rma naacowpe n̂examro reha, kekn̂e tî. Ero wa tî kekn̂e Abraw Sotoma pono komo kayaritomon ya.