Ero ke Exitu poi takî tî cekn̂e hara Abraw, yipici, anton komo, Roo, ero wicakî tî cetken̂e Abraw komo. Kanan pona tî n̂etîrametken̂e hara, mapitawno pona mak ha tî ka, suu yaw rorono pona ha tî. Tokye tî cekn̂e, cemyawnoi marha tî.

2 Tokyem xa tî mîk xakn̂e Abraw. Paaka tî xakn̂e iyoku mer̂pono pînî ro mak. Tupurantayem marha tî mîk xakn̂e. Prata tî xakn̂e mer̂pora yîhyaw, ooru marha tî. Ero wa tî xakn̂e.

3 Ero yinhîrî takî tî ero poi cekn̂e hara Abraw suu n̂ixa. Betew mîtwono pona tî cekn̂e xa hara, pahxa tî yîmîn xakn̂e iina xa marha tî cekn̂e hara. Betew tî xakn̂e mehxa n̂he, Ai tî xakn̂e xehxa hara. Iina takî tî cekn̂e hara Abraw.

4 Pahxa tî n̂iir̂akn̂e Kaan ya tîmsom yakn̂itopo iina xa marha tî cekn̂e hara. Iito takî tî Kporin komo yakro nîmtapowakn̂e hara. On wara tî kekn̂e yîwya, Apa, owî cma re mukurunpesî awosoken me oyexirî ke, kekn̂e xa hara tî Kporin komo ya. Ero wa tî kekn̂e Abraw.

5 Iina marha tî cekn̂e Roo Abraw yakro. Mer̂pora marha tî xakn̂e noro yok hara oper̂a komo, paaka komo. Yaake xa marha tî xatken̂e maywen komo, maywen komo mîn marha.

6 N̂enahcakn̂e thakwa tko tî okwe cuupu iyoh komo nahrî. Mer̂pora xakn̂e iyoh komo iito re exirî komo yarohra thakwa okwe. Ero wa tî xatken̂e Abraw komo, Roo yakro.

7 Ero ke ceseisom me takî tî xatken̂e Abraw yok yenîn̂e komo Roo yok yenîn̂e komo yakro ha. Cuupu poyero tî n̂eseiyatken̂e. Ero yimaw iito rma tî xatken̂e Kanan pono komo meyehra. Peresew komo marha tî xatken̂e iito ha re.

8 Ero ke on wara tî kekn̂e Abraw Roo ya, Ai okopuci, on wara wîîkes awya, eseira ro mak cexirî kîw. Oyakno amoro okwe. Eseira marha n̂ehcowpe koh komo yenîn̂e.

9 Takweke rma nasî roowo cuupu yeken. Ero ke ohyai takî cma re mîîcesî. Awanme ro tak eporko aweken. Oesce yaw roro awcetaw, ow kîwcesî resce yaw roro hara. Resce yaw roro reha awcetaw owî reha kîwcesî oesce yaw roro hara, kekn̂e tî. Ero wa tî kekn̂e Abraw Roo ya.

10 Ero ke Xotaw Yepu yecihtawno takî tî n̂een̂akn̂e Roo. Capape tî xakn̂e iitono roowo okre. Tuuna ken̂e marha tî xakn̂e miya ro mak. Kporin komo natîtho wara xakn̂e okre. Exitu wara marha tî xakn̂e Soa yesamarî yawno wara. Ero wa tî xakn̂e Xotaw Yepu yecihtawno roowo. Ero wa tî xakn̂e iitono roowo Sotoma yakn̂ipîra ka exitaw Kporin komo, Komoha yakn̂ipîra exitaw marha.

11 Ero ke Xotaw Yepu yecihtawno takî tî men̂ekekn̂e Roo ceken me. Ero ke iina tî cekn̂e resce yaw roro. Ero wa tî cekn̂e Roo Abraw yai.

12 Kanan pono komo mîtwo rma tî xakn̂e Abraw. Roo reha tî xakn̂e ewto po capahno po. Sotoma pono komo chew tî n̂iir̂akn̂e tîmîn.

13 Kicicitho komo tko tî mîkyam xatken̂e kica iitono komo. Kicicme ro makî tî xatken̂e Kporin komo poko. Ero wa tî xatken̂e.

14 Taa, ero yinhîrî takî tî on wara kekn̂e Kporin komo Abraw ya Roo toche yîhyai, Ai Abraw, Betew mîtwo masî. En̂exa tak enko nohce yaw roro, suu yaw roro, resce yaw roro, oesce yaw roro. Ero wa enko.

15 En̂exa tak meen̂asî miyanî rma roowo, ero rma wîmyas amn̂e arowon me, awepamthîrî komo rowon me marha. Eroromero wîmyas awya so.

16 Awepamthîrî komo tak wepamnoyasî mer̂pora cehso ro. Roowo pupuntho wara naxe. Roowo pupuntho yetkuknomapetaw ketaw ha re awya, ero wa xa marha re n̂etkuknomapesî awepamthîrî komo amn̂e. Ero wa naxe awepamthîrî komo amn̂e.

17 On an̂enîthîrî pore etar̂ko roowo pore. Ero yakwerî poko hak etar̂ko, ehyatkawnon poko hak marha etar̂ko. Ero rma wîmyas awya so arowon komo me, kekn̂e tî. Ero wa tî kekn̂e Kporin komo Abraw ya.

18 Ero yinhîrî takî tî en̂exa tak cekn̂e hara Abraw Manîre pona. Ebron mîtwono mîn Manîre. Iina takî tî tîmîn n̂iir̂akn̂e hara kapar̂u yepu cheka. Ero ciriche tak Kporin komo ya tîmsom yakn̂itopo tî n̂iir̂akn̂e hara iina. Ero wa tî n̂iir̂akn̂e Abraw.