Taa, ero yinhîrî takî tî on wara kekn̂e Kporin komo Abraw ya, Ai Abraw, arowonthîrî tak ahsîpînkakî, ayanan komo marha. Aamo mîn yai marha etoko. Anarî pona tak etok hara roowo pona. Wenpesî tak amn̂e roowo aweken me cehsom.

2 On wara tak kiir̂as amn̂e, kepamnoyasî mer̂pora ro makî. Kwakresî marha, cekaiporesom me xa marha wiir̂asî awosotî. Apoyero mer̂pono pîn komo wakronomesî.

3 Awakronoman̂e komo wakronomes Ow hara. Awîrîman̂e komo reha wîwîrîmesî. Apoyero tak kir̂wan̂he wiir̂asî anarî yana komo ahnoro, roowo poko hakno komo, kekn̂e tî. Ero wa tî kekn̂e Kporin komo Abraw ya.

4 Ero ke takî tî cekn̂e Abraw Kporin komo mtapotachonho yaw roro rma. Roo marha tî cekn̂e noro yakro. 75 cimn̂ipu exitaw Abraw yewrutoponho cetken̂e Aran poi.

5 Cipici tî naar̂akn̂e Abraw, Sarai ha. Roo marha tî naar̂akn̂e takno pen mumutho. Cemyawno komo marha tî naar̂atken̂e ahnoro. Tanton komo marha tî naar̂atken̂e Aran po ahsîxapunhîrî kom ha. Kanan yesamarî yaw tî cetken̂e. Iina roro tî cetken̂e Kanan pona roro.

6 Yîtîtmamra rma tî cekn̂e Abraw Kanan pore rma. Siken pona tî cekn̂e. Iito tî xakn̂e kahpar̂u yepu, porin ha. More tî xakn̂e ero yosotî. Iina xa tî cekn̂e. Ero yimaw Kananew komo tî xatken̂e iito Kanan po.

7 Ero yimaw Abraw ya takî tî n̂esenpekn̂e Kporin komo. On wara tî kekn̂e yîwya, Ai Abraw, onî rma wîmyas amn̂e roowo awepamthîrî komo ya, kekn̂e tî yîwya. Ero ke iina rma tî Kaan ya tîmsom yakn̂itopo n̂iir̂akn̂e Abraw, tîn̂enîthîrî ya tîmsom yakn̂itopo ha.

8 Ero yinhîrî takî tî More poi cekn̂e hara Abraw. Îh pona tî cekn̂e Betew mîtwono pona. Betew mkaino mîn xakn̂e îîpî resce n̂ixan. Ero pona takî tî tîmîn n̂iir̂akn̂e roona. Mehxa n̂he tî xakn̂e Betew oesce yaw roro. Xehxa reha tî xakn̂e hara Aai resce yaw roro hara. Iina tî tîmîn n̂iir̂akn̂e Abraw îh pona. Iina marha tî Kporin komo ya tîmsom yakn̂itopo n̂iir̂akn̂e hara. Ciriche takî tî nîmtapowakn̂e Kporin komo yakro. Owî cma re mukurunpesî Apa awosoken me oyexirî ke, kekn̂e tî.

9 En̂exa takî tî cekn̂e xa hara Abraw suu yaw roro. Ero wa tî cekn̂e.

10 Taa, ero yinhîrî takî tî rooma poko tî xatken̂e iitono komo ahnoro ro mak. Yînatîrî komo tî atîhtara xakn̂e okwe. Ero ke tî Exitu pona cekn̂e hara Abraw. Cerewre ro makî exirî ke tî rooma iina cekn̂e. Iina takî tî n̂esekenmekn̂e hara Exitu pona.

11 Taa, on wara tî xakn̂e Abraw tîcetaw rma ka, Exitu pahnoke cexitaw, cipici ya tî kekn̂e, Sarai ya, Ai, cenpore xa awehtopo ponaro wasî.

12 Ero ke awen̂ataw Exipsiu komo ya, on wara men ketu, Yipici mîkro ha, ketu men apoko. Ero ke ow pen thakwa oyetapexe okwe. Amoro reha, awetapara naxe.

13 Ero ke on wara xa kasko yîwya so amn̂e, Oyepeka moso, kasko mak opoko. Ero wa ketaw tak awya kir̂wan̂he oriyaxe, awanme oyetapara naxe, kekn̂e tî. Ero wa tî kekn̂e Abraw cipici ya.

14 Taa, Exitu pona epatakache so Abraw komo yipici takî tî n̂een̂atken̂e iitono komo. Okre, wooxam yenpotho ro mak okre, ketken̂e tî noro poko.

15 Paraw maywen komo marha tî noro n̂een̂atken̂e, antomano rin̂e kom ha. Ero ke Paraw ya tî ketken̂e, wooxam yenpotho mîk okre, ketken̂e tî Abraw pici poko. Ero ke takî tî noro nan̂ikpekn̂e tîmîn yaka. Ero wa tî Abraw cinho nan̂ikpekn̂e Paraw okwe.

16 Ero yimaw takî tî Abraw wakrekn̂e Paraw. Iyoku nîmyakn̂e mer̂pora oper̂a komo, paaka komo, buhu komo, kîîrî, woosî wara. Kameru komo marha nîmyakn̂e, anton komo marha kîîrî, wooxam kom ha. Ero warai tî nîmyakn̂e Paraw Abraw ya yipici yepetho me.

17 On wara tko tî Paraw pen n̂iir̂akn̂e Kporin komo ero yimaw, yîhyawno komo marha, eper̂anmano takî tî n̂iir̂akn̂e. Cerewrem yaw xa tî xatken̂e. Abraw pici yahsîrî poyero tî ero wa n̂iir̂akn̂e Kporin komo, Sarai yahsîrî poyero ha.

18 Ero ke takî tî Abraw nan̂ikpekn̂e Paraw. On wara tî kekn̂e yîwya, Ahce kacho mîcemarontai hara kica? Ahce kacho, Opici moso, kahra mehxe ke owya?

19 Oyepeka moso, mîîkai thakwa kica? Opici me wahsîrî ha re kica. Ero ke moso hara apici. Arko hara. Etoko tak ohyai hara, kekn̂e tî.

20 Ero wa tî kekn̂e Paraw Abraw ya. Ero yinhîrî tî tmaywen komo tî panatanmekyakn̂e, Moso pici pokohra ro mak men ehcoko, kekn̂e tî yîwya so. Ero wa kache takî tî Abraw n̂en̂epetken̂e, yipici marha tî, anton komo marha tî ahnoro. Ero wa tî Abraw n̂en̂epetken̂e hara.