Taa, ero yimaw Noe ponaro rma tî xakn̂e Kaan, miyan komo ponaro marha tî xakn̂e. Paaka komo ponaro meero tî xakn̂e, yaipî komo ponaro, kooso komo ponaro ha. Ero wa tî xakn̂e Kaan Noe yawno komo ponaro. Ero ke ocowo takî tî n̂ekmexpekn̂e Kaan, puu kekn̂e tî. Ero ke takî tî tuuna napaiyakn̂e hara.

2 Yuhnawnonhîrî takî tî mokuhra xakn̂e tuuna. Kaapu yewkanapan marha tî n̂etahruyakn̂e hara. Mokuhra takî tî xakn̂e tuuna.

3 Ero ke takî tî tuuna napaiyakn̂e, sîrî, sîrî, sîrî, pahkî. 150 kaamo exiche takî tî tapaiso xakn̂e tuuna.

4 Ero yimaw takî tî kanawa n̂eremekn̂e îh pona Ararace pona. Ero wa tî xakn̂e 7-nhîrî nuun̂i po. 17-nhîrî kaamo po xa tî ero wa xakn̂e kaamo po.

5 Napaiyakn̂e rma ka tuuna 10-înhîrî nuun̂i pona roro. Ero po rma takî tî n̂esenpekn̂e îîpî komo meretîrî. 1-înhîrî kaamo po xa tî n̂esenpekn̂e.

6 Ero yinhîrî takî tî 40 kaamo exiche takî kanawa yewkanapan takî tî nahrunkekn̂e Noe. Tînakîtothîrî rma mîn nahrunkekn̂e.

7 En̂exa takî tî n̂en̂emhatakekn̂e maxweren̂e warai. Noro tî cekn̂e miya so. Cekn̂e, cekn̂e, cekn̂e, yarpa so tî n̂etar̂akn̂e. Tuuna yapaitîkarî tî ka n̂een̂akn̂e.

8 Anarî marha tî n̂en̂emhatakekn̂e potkuku hara. Moso xa wen̂epesî, tuuna tak napaitîka ham, kachome tak owya, kekn̂e tî Noe.

9 Cetahsîtopo tko tî enîhra rma xakn̂e potkuku apaitîkara exirî ke tuuna, roowo yesenpotorî ke marha. Ero ke kanawa yaka tî n̂etîramekn̂e hara. Ero ke potkuku tî nahsîyakn̂e hara Noe. Kanawa yaka tî n̂enkayakn̂e hara.

10 Ero ke kanawa yaw rma tî xakn̂e Noe 7 kaamo xa hara. Ero yinhîrî takî tî n̂en̂emhatakekn̂e xa hara potkuku.

11 Kokon̂i takî tî potkuku mokyakn̂e hara Noe yaka. Oripera yarî tak n̂ekyakn̂e tîmtaw. Nnn, tapaiso tak nai ham tuuna. Yukmara n̂he tak nai ham roowo, kekn̂e tî Noe.

12 Ero yinhîrî kanawa yaw rma tî ka xakn̂e Noe 7 kaamo xa hara. Ero yinhîrî tî n̂en̂emhatakekn̂e xa hara potkuku. Mokuhra takî tî xakn̂e Noe yaka. Cekn̂e ro mak tak ha. Ero wa tî xakn̂e.

13 Taa, ero yimaw takî tî tapaitîkaxi xakn̂e tuuna. 601 cimn̂ipu exitaw Noe yewrutoponho ero wa tî xakn̂e. 1-înhîrî nuun̂i po tî ero wa xakn̂e. 1-înhîrî kaamo po xa tî xakn̂e. Ero po marha tî kanawa yahruru nahrunkekn̂e Noe. Miya so takî tî n̂een̂akn̂e. Turpe takî tî xakn̂e roowo okre.

14 Ero wa takî tî xakn̂e roowo turpe tak. 2-înhîrî nuun̂i po tî ero wa xakn̂e, 27-nhîrî kaamo po xa.

15-16 Ero po takî tî on wara kekn̂e Kaan Noe ya, Ahtocoko tak amoro, apici, amumuru komo, amumuru pici komo marha, kekn̂e tî.

17 Tarin̂em komo marha en̂emhatakakî ahyawnonhîrî kom ha. Paaka komo marha en̂emhatakakî, sehrere me tîtosom komo marha, karitî me cehsom komo ahnoro. Ero wa ahyawnonhîrî komo en̂emhatakakî roowo pona hara epamtome so. Epam xe so was mer̂pora ro mak. Roowo poko hakî etakpa xe so xa hara wasî, kekn̂e tî Kaan Noe ya.

18 Ero ke n̂epataketken̂e takî tî Noe, yipici, yumumuru komo, yumumuru komo pici. Ero wa tî n̂epataketken̂e.

19 Yaipî komo marha tî, kooso komo marha tî, kamara komo marha tî, ahnoro ero warai komo tî n̂epataketken̂e. Tarin̂em komo marha tî n̂epataketken̂e, sehrere me tîtosom komo marha tî. Ero wa tî n̂epataketken̂e kanawa yai.

20 Taa, ero yinhîrî toopu takî tî n̂enmekyakn̂e Noe Kaan ya tîmsom yakn̂itopo me. Noro ya tîmsom tî paraxkekn̂e paaka komo, tarin̂em komo marha. Ero warai komo tî paraxkekn̂e Kaan ya tîmsom me. Yupunthîrî tî nakn̂iyakn̂e ero pona enmexapu pona.

21 Ecakyataw takî tî kotopore xakn̂e Kporin komo ya. Ero ke on wara tî kekn̂e Noro tîhnaw, Roowo wîwîrîmatîkai kicicme tooto komo exirî poyero. Ero wa yîwîrîmara xa hara wasî. Pîra ro makî. Kicicitho ponarono rma mîkyam okwe tooto komo. Ero wa naxe mehxa ro tîmren nai ro so rma okwe. Ero wa exirî komo poyero wa waihkano wiire. Karitînhîrî pen komo waihkai ahnoro. Ero wara waihkatîkano cirihra xa hara was amn̂e.

22 On wara marha wîîkesî roowo poko, naatî ciitopo me roro tak nasî, epetacho me roro marha, twotme roro marha nasî twotme ehtopo me exitaw, kaamo me roro marha nasî kaamo me ehtopo me exitaw hara. N̂enmayasî roro marha, kokmamyasî roro marha. Ero wa tak nasî miya roro roowo yehcamnotopo pona roro, kekn̂e tî. Ero wa tî kekn̂e Kporin komo.