Taa, ero yinhîrî on wara tî kekn̂e Kporin komo Noe ya, Esenkakî tak ha kanawa yaka. Apici, amumuru komo, amumuru pici komo marha, ero wa esenkacoko kanawa yaka. Ero wa wîîkes awya kir̂wan me awenîrî ke owya. Kicicme so ween̂asî apoyino kom okwe.

2 Paaka komo marha enkacoko, oper̂a komo marha, noro yipu komo enkacoko ahnoro Kaan ya tîmsom me takn̂isom kom ha. 7 so enkacoko kîîrî, woosî ero wara. Kaan ya tîmîhnî komo marha enkacoko ha re 2 so makî reha, kîîrî, woosî, ero wa mak ha.

3 Tarin̂em komo marha enkacoko 7 so, kîîrî, woosî, ero wa. Ero wa so enkacoko waipîra ehtome so.

4 7 kaamo enmapuche tak tuuna wekmexpesî roowo yukmanîren̂e ha. Pahkî xa tuuna mokyasî 40 kaamo. Ero ke rma onakîtotho pen komo wîhcamnoyasî exihra cehso ro. Wîhcamnotîkesî roowo pononho pen komo, karitî me cehsom komo ahnoro, kekn̂e tî. Ero wa tî kekn̂e Kaan Noe ya.

5 Ero ke Kporin komo mtapotachonho yaw roro takî tî n̂iir̂akn̂e Noe watohra ro makî. Ero wa tî n̂iir̂akn̂e.

6 600 cimn̂ipu tî xakn̂e Noe yewrutoponho ero yimaw roowo yukmetaw. Ero wa tî xakn̂e.

7 Ero ke kanawa yaka takî tî n̂esenkayakn̂e Noe, yumumuru komo marha, yipici marha, yumumuru pici komo marha. Enorira cehtome so tî n̂esenkayatken̂e.

8 Kaan ya tîmsom komo marha tî n̂enkayatken̂e, paaka komo, oper̂a kom ha. Kaan ya tîmîhnî komo marha tî n̂enkayatken̂e. Tarin̂em komo marha tî n̂enkayatken̂e, sehrere me tîtosom komo marha. Noro yipu komo tî n̂enkayatken̂e.

9 Ero ke noro yipu komo tî n̂ewomyatken̂e kanawa yaka. Noe yakro rma tî n̂ewomyatken̂e. Asakî so so tî n̂ewomyatken̂e, kîîrî, woosî, ero wa tî. Kaanî mtapotachonho yaw roro rma tî n̂ewomyatken̂e.

10 Ero yinhîrî takî, 7 kaamo enmapuche tuuna takî tî nukmekn̂e, roowo pen takî tî nukmekn̂e okwe. Ero wa tî xakn̂e.

11 Ero wa tî nukmekn̂e 600 cimn̂ipu exitaw Noe yewrutoponho. 2-înhîrî nuun̂i po tî nukmekn̂e. 17-nhîrî kaamo po xa tî nukmekn̂e. Ero wa tî tuuna nukmekn̂e. Yuhnawnonhîrî takî tî n̂epatakekn̂e roowo pen. Ero yahrutho komo tî n̂etîmtakekn̂e. Kaapu yewkanapan marha tî n̂etahrunkekn̂e.

12 Ero ke xii kekn̂e ro makî tî tuuna. Pahkî ro makî tî mokyakn̂e 40 kaamo. Kosope meero tî mokyakn̂e, katpanaw meero. Ero wa tî mokyakn̂e tuuna.

13 Ero po xa tî Noe n̂esenkayakn̂e kanawa yaka tuuna mohtopo po xa. Yumumuru komo marha tî n̂esenkayatken̂e. Sem, Kaw, Xape, ero wa tî n̂esenkayatken̂e yumumuru komo. Noe pici marha tî n̂esenkayakn̂e, yumumuru pici komo marha tî, osorwaw rma.

14 Ero wa tî n̂esenkayatken̂e kanawa yaka. Yaipî marha tî n̂esenkayakn̂e, kooso komo, akri komo, ero warai komo tî n̂esenkayatken̂e ahnoro. Paaka komo marha tî n̂esenkayatken̂e ahnoro. Sehrere me tîtosom komo marha tî n̂esenkayatken̂e ahnoro, tarin̂em komo marha tî, torowo komo marha tî.

15 Ero wa tî n̂esenkayatken̂e kanawa yaka. Noe yaka tî n̂ewomyatken̂e. Asakî so so tî n̂ewomyatken̂e cesesîsom komo ahnoro.

16 Woosî tî n̂ewomyakn̂e, kîîrî marha tî, ero wara so tî n̂ewomyatken̂e kanawa yaka. Kaanî mtapotachonho yaw roro rma tî n̂ewomyatken̂e. Ewomuche so takî tî Kporin komo nahruyakn̂e metata. Ero ke tahruso tak xatken̂e Noe komo kanawa yaw. Ero wa tî xatken̂e.

17-18 Ero yinhîrî tuuna takî tî mokyakn̂e mer̂pora ro mak. 40 kaamo tî mokyakn̂e. Nukmekn̂e ro mak weyun me cehso ro. Ero ke kanawa takî nanîmyakn̂e tuuna. Miya ro makî tî nawomtîkekn̂e yukmarî yakro ro.

19 Porin me xa takî tî n̂ehtîkekn̂e tuuna. Îîpî pen komo tak n̂enoritîkekn̂e ahnoro ro mak, kawno komo meero. Roowo yakwerî poko hakî tî nukmekn̂e tuuna.

20 Ero wa tî îh pen komo meero tî n̂emicinoyakn̂e yukmacho. Îh pen komo yemicitîkache 8 metru xa hara tî nukmekn̂e.

21 Ero ke takî tî waihyatken̂e roowo pore cetarisomînhîrî pen kom ahnoro. Tarin̂em pen komo marha tî waihyakn̂e, paaka pen komo, yaipî pen komo, kooso pen komo, kamara pen komo. Ero warai komo tî waihyatken̂e, sehrere me tîtosom pen komo marha tî, tooto pen komo marha tî waihyatken̂e ahnoro.

22 Ahnoro tî waihyatken̂e roowo pononho pen kom ha, kesesîtopo ken̂arî komo, karitînhîrî kom ha.

23 Ero wa tî karitînhîrî komo waihkekn̂e Kporin komo roowo pononho pen komo okwe. Tooto pen komo waihkekn̂e, paaka pen komo marha, sehrere me tîtosom pen komo marha, tarin̂em pen komo marha. Ero warai komo tî waihketîkekn̂e ahnoro okwe. Noe makî tî n̂etîmcekn̂e waipîra. Yipici, yumumuru komo, yumumuru pici komo marha, ero warai komo makî tî n̂etîmcetken̂e kanawa yawno kom ha.

24 Taa, pahkî tî xakn̂e roowo tukmaxi. 150 kaamo tî xakn̂e apaitopo. Ero wa tî xakn̂e.