Taa, on wara tî xatken̂e tooto komo, roowo pono komo ero yimaw, n̂epamyatken̂e tak. Emsîrî komo marha tî n̂ewruyatken̂e. Ero wa tî xatken̂e.

2 Ero wa exitaw takî tî on wara xatken̂e Kaan mumuru komo, tooto komo yemsîrî tî n̂een̂atken̂e. Cenpore xa tî n̂een̂atken̂e. Ero ke cipici me takî tî nahsîyatken̂e. Tanme ro so makî tî men̂eketken̂e cipici komo. Ero wa tî n̂ipiwatken̂e.

3 Taa, on wara takî tî kekn̂e Kporin komo, Tooto komo weronoman̂e me ka nas Oyekatî. Miya roro tko yîmtapotara nasî tooto komo yakro kicicme ehtopo komo poko. Yupun me thakwa makî naxe n̂examro tooto komo. 120 cimn̂ipu makî ka nasî Oyekatî n̂examro weronomarî poko, kekn̂e tî. Ero wa tî kekn̂e Kporin komo.

4 On wara tî xatken̂e tooto komo ero yimaw, porin me so tî xatken̂e anarî komo. On wara marha tî xatken̂e Kaan mumuru komo ero yimaw, tooto komo yemsîrî tî nahsîyatken̂e cipici me so. Noro yipu mumuru komo tî xatken̂e karitî me xa. Pahxan pen komo tî mîkyam xatken̂e. Karitî me cekahcaxmu tî mîkyam xatken̂e. Ero warai komo tî mîkyam xatken̂e.

5 Taa, ero yimaw tî on wara n̂een̂akn̂e Kaan tooto komo yehtopo, kicicme ro makî tî n̂een̂akn̂e. Ero wa tî n̂een̂akn̂e roowo yakwerî poko hakno komo. Kicicitho ponaro makî tî xatken̂e kica. Kaamo po roro tî ero wa xatken̂e. Kicicitho poko makî tî n̂esehtînotîketken̂e. Ero wa tî xatken̂e miya roro yîtîhkan me ro mak okwe.

6 Ero ke ahwora ro makî tî xakn̂e Kporin komo. On wara tî kekn̂e, Tooto yakîhtora ro mak xa re weexirî ham okwe.

7 Ero ke tooto pen komo tak waihketîkesî roowo pononho komo, onakîtotho kom ha ahnoro. Ero wa tooto komo waihkesî, yaipi komo, kooso komo, akri komo. Sehrere me tîtosom komo marha, tarin̂em komo marha, ahnoro waihketîkesî. Ahwora ro mak wasî onakîtotho komo poko, kekn̂e tî. Ero wa tî kekn̂e Kporin komo tooto komo poko.

8 Ero warahra reha tko tî Noe n̂een̂akn̂e. Kir̂wan̂he reha tî n̂een̂akn̂e noro.

9 Taa, on warai tî mîk xakn̂e Noe, kir̂wan tî mîk xakn̂e. Takîhso tî n̂esenpekn̂e tpoyino komo ya. Kaan yakrono ro xa tî mîk xakn̂e. Ero wa tî xakn̂e Noe.

10 On wara marha tî xakn̂e Noe, osorwaw tî xatken̂e yumumuru komo. Sem, Kaw, Xape, ero wa tî xatken̂e yumumuru komo yosotî.

11 Kicicme ro makî tî xatken̂e tooto komo ahnoro roowo poko hakno komo. Kokem wara ro makî tî enîno n̂iir̂akn̂e Kaan. Cesetapaxmu me so tî xatken̂e oko miyan komo rma, ceparaxkaxmu me so marha tî xatken̂e oko.

12 Ero ke kicicme ro makî tî roowo pono komo n̂een̂akn̂e Kaan, kokem wara ro makî tî. Tanme ro so rma n̂ekiciciretken̂e kica. Ero wa ehtopo komo tî n̂een̂akn̂e Kaan.

13 Ero ke on wara tî kekn̂e Kaan Noe ya, Ai Noe, tooto komo waihkacho tak men wîhtînoyasî oroto. Waihketîkes ha ahnoro. Cesetapaxmu me so mak naxe okwe tooto komo, ceparaxkaxmu me so marha naxe okwe. Ero ke waihketîkesî. Ahnoro tuhn̂em komo waihketîkesî roowo poko hakno pen kom ha, kekn̂e tî.

14 Ero ke kanawa tak akîhtoko amoro. Sahsamaxapu akîhtoko kanawa me. Kir̂wan sahsamakî weewe, kope yepu. Mîîmo cirko kanawa yaw rma, tamtakpoi cirko. Mer̂pora cirko amtakpon. Taa, akîhtoche tak ahkoromakî maan̂i warai ke. Yai ahkoromakî, yîmkari marha. Ero wa ahkoromakî xuxuxu kahra ehtome, kekn̂e tî.

15 On wicakî kanawa akîhtoko, 150 metru akîhtopo ehyatkawnon, 25 metru reha akîhtoko akwerî, 15 metru kawnon cirko mîîmo, kanawa yawno ha. Ero wicakî kanawa cirko, kekn̂e tî Kporin komo Noe ya.

16 On wara marha kekn̂e yîwya, Taa, cewkanapai cirko mîîmo wacan. Meia metru makî reha cirko ewkanapan. Tmetatai marha cirko mîîmo wacan. Eseporero cirko mîîmo kuraran, awetapitopo kom ha. Osorwaw cirko yukuraran, rooporeno, rakatawno, eporeno, ero wa cirko mîîmo kuraran eseporero ha, kekn̂e tî.

17 On wara marha tî kekn̂e Kaan Noe ya, Kanawa ciriche tak awya Owî rma tak roowo wukmanîyasî. Tooto pen wenorinokesî, ahnoro kesesîtopo ken̂arî pen komo, karitî me cehsom kom ha. Kah ratari tîtosom komo waihkesî, roowo pore cetarisom komo marha ahnoro ro mak wenorinohkesî. Ero ke waihyaxe ahnoro mak okwe.

18 Amoro makî reha waipîra masî. Yaaro xa tan wîîkes awya towîhnî me ro mak. Ero ke kanawa yaka esenkacoko amn̂e amoro, amumuru komo marha, apici marha, amumuru komo pici marha. Ero wa esenkacoko waipîra awehtome so amyamro reha.

19 Roowo pore cetarisom komo marha enkacoko kanawa yaka, karitî me cehsom komo ahnoro. Asakî so enkacoko, kîîrî, woosî, ero wara so. Ero wa enkacoko waipîra ehtome so mîk hakî komo ahnoro.

20 Tarin̂em komo enkacoko, paaka komo, sehrere me tîtosom komo, ero warai komo enkacoko ahnoro kanawa yaka. Asakî so enkacoko waipîra ehtome so.

21 Yînahrî komo marha enkacoko kanawa yaka, paaka nahrî, tarin̂em komo nahrî marha. Anahrî komo marha enkacoko. Ero wa enkacoko kanawa yaka, kekn̂e tî.

22 Ero wa tî Noe nantomekn̂e Kporin komo. Ero ke ero yaw roro tî n̂iir̂akn̂e noro watohra. Ero wa tî xakn̂e Noe.