Taa, ero yinhîrî takî tî Noe wakrecho poko nîmtapowakn̂e Kaan. Yumumuru komo wakrecho poko marha. On wara tî kekn̂e yîwya so, Epamcoko tak hara mer̂pora ehtome so xa hara roowo pono komo.

2 On wara marha wîîkes awya so, on wara tak naxe yaipî komo, apona so cerahsom me tak naxe. Ero wa xa marha naxe kooso komo, kamara komo marha, roowo pore cetarisom komo ahnoro mak ha. Ero wa xa marha naxe tarin̂em komo, kaikokoro cetarisom kom ha. Ero wa xa marha naxe sehrere me cetarisom kom hara, yukwawno komo marha ootî kom ha. Noro yipu komo naxe awoh komo warai me mak ha.

3 Awotî komo me tak wiir̂asî ahnoro cetarisom komo, karitî me cehsom komo ahnoro. Pahxa rma ka tatîhtaxmu komo wîmyakn̂e awya so anahrî komo me. Ero wa xa marha wîmyas awya so cetarisom kom hara, awotî komo me wîmyasî, kekn̂e tî.

4 On wara tko wîîkes awya so ero poko, Yupunthîrî komo ton̂etaw awya so kamxukre tonohra men ehcoko. Kar̂pe ehtopo rma moro kamxuku. Ero ke kamxukre tonohra ehcoko.

5 Akamxukru komo ponarono xa Ow ha. Ero ke on wara wîîkesî waapa me ehxapu komo ya, Tooto pen mîkamxukai okwe. Ero ke amoro pen makîrha mekamxukesî hara oyanme, wîîkesî yîwya so. Ero wa wîîkesî kamara komo ya, okoi komo ya marha, ero warai komo ya wîîkesî ahnoro ya. Tooto komo ya marha wîîkesî ero wara, waapa me ehxapu komo ya mak ha.

6 Tooto waihkache awya so tooto komo xa marha tak men awaikexe so hara okwe, wîîkesî tak awya so. Kaan Ow ha. Owarai me rma tooto wakîhcekn̂e. Ero ke twaihkapore nasî tooto wapatho.

7 On wara marha tak wîîkes awya so, Amxîtacoko. Ero wa epamcoko mer̂pora ehtome so roowo pono komo, kekn̂e tî. Ero wa tî kekn̂e Kaan Noe komo ya.

8-11 On wara marha tî kekn̂e Kaan Noe ya, yumumuru komo ya marha, Tuuna yekmexpora tak wasî ahnoro karitî komo waihkacho, wîîkes awya so. Ero wa xa marha wîîkesî awepamthîrî komo ya hara. Ero wa xa marha wîîkesî yaipî komo ya hara, kamara komo ya marha, tarin̂em komo ya marha, paaka komo ya marha. Kanawa yawnonho komo ya wîîkesî ahnoro ya. Ahnoro karitî komo waihkacho xa hara ekpora ro mak tak wasî, wîîkesî yîwya so. Yaaro xa tan ero wa wîîkesî.

12-13 Ero ke on wara tak wiir̂asî, omtapotachonho kuknon wiir̂asî kukawa roowo pono komo n̂enîrî me. Tuuna yewru chew tak meen̂axe amn̂e. Iina wiir̂asî omtapotachonho ponaro xa awehtome so, Ahnoro roowo pono komo waihkacho yekmexpora xa hara wasî, kacho ponaro ha. Karitî me cehsom komo ya wîîkesî miyan komo ya rma awakrono komo ya ha. Yaaro xa wîîkesî. Miya roro ehretawnomaxapu komo n̂entarî tan wîîkesî. Ero ke ero ponaro exi xe so wasî awepamthîrî komo miya rorono kom ha.

14-15 Ero ke awepore so tuuna yewru yekmexpetaw owya, iito kukawa tak n̂esenpesî. Ero ke omtapotachonho ponaro wasî, on wara kachonho ponaro, Yukmanîretopo ke tak waihkatîkano cirihra xa hara was amn̂e, kachonho ponaro. Ero wa wîîka awya so, yaaro xa wîîka ha. Ahnoro kar̂pe cehsom komo poko wîîka, anarmerpan komo poko ha.

16 Ero ke ero wa wasî kukawa yesenpetaw tuuna yewru chew, ween̂asî roro omtapotachonho ponaro oyehtome. Kaan xa Ow ha. Eroromerono xa mîn ha omtapotacho. Ahnoro roowo pono komo poko wîîka, kar̂pe cehsom poko, anarmerpan komo poko ha.

17 Ero wa kekn̂e Kaan Noe ya. Ero ha men kukawa, yaaro xa omtapotachonho kuknon. Roowo poko hakno komo poko wîîka, anarmerpan poko. Ero kuknon mîn kukawa, kekn̂e. Ero wa Kaan kekn̂e Noe ya.

18 Taa, on wicak makî tî xatken̂e Noe mumuru komo, Sem, Kaw, Xape. Ero wa tî xatken̂e yumumuru komo, kanawa yai epatakaxapu kom ha. Kanan yîîm tî mîk xakn̂e Kaw.

19 Osorwaw makî tî xatken̂e Noe mumuru komo. N̂examro yepamtho komo takî tî n̂etakpayatken̂e miya so roowo yakwerî poko hakî. Ero wa so tî n̂etakpayatken̂e.

20 Taa, ero yinhîrî naatî pokono me takî tî xakn̂e Noe. Uupa tî n̂iir̂akn̂e tînatîrî cewtîro.

21 Ero yinhîrî takî tî uupa yukun n̂eer̂akn̂e kawaxiyem. Ero yanme takî tî wenakn̂e kica. Twenataw tak ponomra ro mak takî tî xakn̂e noro roona warai yaw tîmîn yaw ha. Ero wa tî xakn̂e kica.

22 Ero yimaw iito rma tî xakn̂e Kaw, Kanan yîîm ha. Noro takî tî n̂een̂akn̂e tîîm ponomra exirî. Noro yenîche takno komo ya tî n̂ekatîmyakn̂e.

23 Ero yipu yentache on wara takî tî n̂iir̂atken̂e Sem komo, Xape komo, poono tî nahsîyatken̂e, tmotaka so tî n̂iir̂atken̂e. Tîîm komo yaka takî tî n̂ewomyatken̂e, tîmkai so tî cetken̂e. Noro takî tî n̂ewoponmetken̂e. Tîmkai ro so tî enîhra rma xatken̂e. Ero ke tîîm komo yenîhra tî xatken̂e ponomra exirî. Ero wa tî xatken̂e.

24 Taa, ero yinhîrî takî tî n̂ewenîmhokekn̂e Noe. Ero wa cexiche tak on wara tî kekn̂e, Ero wa oyenwo kica omumuru rma, mahtîkîthîrî ha, kekn̂e tî.

25 Ero ke on wara xa hara tî kekn̂e, Kaan nîwîrîmarî me tak nasî Kanan amn̂e. Antonano yanton me makî tak nas okwe, kekn̂e tî.

26 Ero yinhîrî on wara tî kekn̂e noro yakno komo poko hara, Kir̂wan̂he nai ham okre, kacho me tak nas amn̂e Kporin komo Kaan, ponaro Sem yehtopo. Sem yanton me tak nas amn̂e Kanan yepamtho komo, kekn̂e tî.

27 On wara tak nasî Xape hara, noro n̂epamnoyasî Kaan mer̂pora ro mak tak. Sem yepamtho komo mîn yaw tko n̂enmayaxe amn̂e Xape yepamtho komo. N̂examro yanton me marha naxe Kaw komo. Ero wa naxe amn̂e, kekn̂e tî. Ero wa tî kekn̂e Noe.

28 Taa, ero yinhîrî pahkî rma tî ka xakn̂e Noe waipîra. 350 xa hara tî n̂icimn̂ipunwakn̂e.

29 Ero ke mer̂pora takî tî xakn̂e cimn̂ipu Noe pen yewrutoponho, 950 tî xakn̂e. Ero yinhîrî takî tî waihyakn̂e okwe. Ero wa tî xakn̂e Noe pen.