Taa, ero yinhîrî takî cipici poko tî xakn̂e Ataw, Epa poko ha. Ero ke takî tî n̂etahsîyakn̂e noro. Ero yinhîrî takî tî n̂ewruyakn̂e kîîrî, Kain tî osotî. On wara tî kekn̂e yîson, Kîîrî tak nîîm ham Kporin komo owya, kekn̂e tî.

2 Ero yinhîrî takî tî n̂ewruyakn̂e xa hara tî Epa, Kain yakno tî. Abew me tî nosohcekn̂e noro. Amn̂e tak n̂examro por̂mamtîkache takî, Abew tak xakn̂e oper̂a yosom me. Kainî reha tî xakn̂e naatî pokono ro me. Ero wa tî xatken̂e.

3 Taa, ero yimaw takî tî, on wara xatken̂e Ataw mumuru komo, takn̂isom tî nîmyatken̂e Kporin komo ya. Kainî tî nîmyakn̂e tînatîrî yeperîrî.

4 Abew reha tî nîmyakn̂e tookuthîrî pun. Oper̂a pun tî mîn nîmyakn̂e tupurukyem pun ha. Poturu me ewruxapu tî mîn nîmyakn̂e. Ero tî nakn̂iyakn̂e Kaan ya tîmsom me. Ero ke tawake xa tî xakn̂e Kporin komo Abew poko reha, yînmîthîrî poko marha.

5 Kain poko reha tî ahwora xakn̂e Kporin komo, yînmîthîrî poko marha tî ahwora xakn̂e. Ero ke tî Kain nîrwonakn̂e. Cewîrwoxe takî tî xakn̂e okwe. Ero wa tî xakn̂e Kain.

6 Ero ke on wara tî kekn̂e Kporin komo Kain ya, Ai, Kain, ahce kacho mîrwona? Ahce poyero cewîrwoxe mai okwe? kekn̂e tî.

7 Takîhso awexitaw tawake was apoko. Akpîra tko masî. Ero ke awîrîmetîkes okwe kicicme awehtopo. Aropotarî metatawno wara rma nasî kica. Ero yanwekn̂e me rma tko masî yiixe awexitaw ha, kekn̂e tî. Ero wa tî kekn̂e Kporin komo Kain ya.

8 Ero yinhîrî takî tî takno yakro tî nîmtapowakn̂e Kain, Abew yakro. On wara tî kekn̂e yîwya, Kaika okopuci mararî pona, kekn̂e tî. Amn̂e tak mararî po cexitaw so takî taknonhîrî pen takî tî n̂etapekn̂e okwe Kain, Abew pen. Ero wa tî taknonhîrî pen waihkekn̂e Kain okwe.

9 Ero ke on wara tî kekn̂e Kporin komo Kain ya, Ai, Kain, ahto nai awakno? kekn̂e tî. Apohana, kekn̂e tî kica Kain. Oyakno yenîn̂e me ma wai awya? kekn̂e tî.

10 Ahce wa awakno pen miirî ke? kekn̂e tî Kporin komo yîwya. Awakno pen kamxukutho mexe nîmtapowasî roowo chei on̂entarî me.

11 Ero ke kemetanmekyasî tak amoro. Awanwekn̂e me tak nas roowo, awakno pen kamxukutho yeen̂enho, an̂etapathîrî pen kamxukutho yeen̂enho ha.

12 Roowo pometaw tak awya kir̂wan̂he atîhtara ro mak tak nasî anatîrî. Cemahcisom me tak masî waapa komo pona awerahtîmrî ke, twaimamsom me mak tak masî miya so kyam makî. Ero wa tak mas okwe, kekn̂e tî Kporin komo Kain ya.

13 On wara tko tî n̂eyukyakn̂e Kain, Apa, oyopo xa thakwa nasî opanaretopo awya okwe, kekn̂e tî.

14 Tpoxwem poi ow men̂epew okwe roowo poi. An̂enîrî mera ow men̂epesî okwe. Cemahcisom me thakwa ow miir̂asî, twaimamsom me mak ha. Ero ke ahna so na owtoche oyepon̂e komo tak men owaikexe okwe. Ero wa ow miir̂as okwe, kekn̂e tî Kain Kporin komo ya.

15 Ero ke on wara tî n̂eyukyakn̂e Kporin komo, Pîra rma, awaikan̂enhîrî exitaw kepanîyasî ro mak. 7 ro tak kepanîyas ha. Ero wa kepanîyasî, kekn̂e tî. Ero wa tî kekn̂e Kporin komo Kain ya. Ero ke yukuknon takî tî n̂iir̂akn̂e Kaan yupun poko. Moso men waihkara ro mak ehcoko, kacho tî mîn xakn̂e yukuknon ha. Ero wa tî Kaan n̂iir̂akn̂e.

16 Ero yinhîrî takî tî miya cekn̂e Kain. Kporin komo yeken poi tî cekn̂e Eten poi. Miya tî cekn̂e kaamo yepatakacho wece. Noce pona takî tî n̂esekenmekn̂e hara.

17 Iito cexitaw takî cipici poko takî tî xakn̂e Kain. Ero ke takî tî n̂etahsîyakn̂e noro, n̂ewruyakn̂e marha kîîrî. Enoke me tî nosohcetken̂e ewruxan ciki. Ero yinhîrî takî tî ewto imo n̂iir̂akn̂e Kain. Ciriche tak Enoke me marha tî nosohcekn̂e ewto tumumuru yosohcaro rma. Ero wa tî nosohcekn̂e.

18 Taa, ero yinhîrî Enoke por̂mamtîkache takî tî noro mumuru xakn̂e hara. Irace tî xakn̂e noro yosotî. Ero yinhîrî takî tî Irace mumuru xakn̂e hara, Mewxaew tî noro yosotî. Ero yinhîrî takî tî noro mumuru xakn̂e hara, Metusaew tî noro yosot hara. Ero yinhîrî takî tî noro mumuru xakn̂e hara. Rameke tî xakn̂e noro yosot hara. Ero wa tî n̂epamyatken̂e Kain yepamtho komo.

19 Taa, ero yinhîrî takî tî Rameke n̂ipiwakn̂e. Asakî tî cipici nahsîyakn̂e. Anarî yosotî tî xakn̂e Ata. Anarî yosotî tî xakn̂e hara Sira. Ero wa tî xakn̂e Rameke pici yosotî.

20 Ero yinhîrî takî tî Ata n̂ewruyakn̂e kîîrî. Xabaw tî noro yosotî xakn̂e. Amn̂e Xabaw por̂mamîche takî noro mîn tî xakn̂e roona yatpoxapu. Paaka yosom me marha tî xakn̂e. Yihcirî xa tî mîk xakn̂e roona ke tîmîyem. Yihcirî xa marha tî mîk xakn̂e paaka ke tokyem hara. Noro xa n̂ihciyakn̂e ero poko kehtopo.

21 Taa, Xabaw yakno tî xakn̂e hara. Xubaw tî xakn̂e noro yosotî. Noro ratîn tî xakn̂e tîyorkaxmu, cecesom marha tî xakn̂e yîhyaw. Noro reha takî tî n̂ihciyakn̂e raatî yecetopo poko, iyorkacho poko marha. Ero wa tî xakn̂e Xubaw ha.

22 Taa, Sira makîrha takî tî n̂ewruyakn̂e hara kîîrî xa marha. Tubaw-Kain tî xakn̂e yîmrerî yosotî. Tpor̂mamche tak kuripara pokono me tî xakn̂e noro. Maria ciin̂e me tî xakn̂e noro, yawaka ciin̂e me, pururi ciin̂e me ha. Ero yipu me tî n̂iir̂akn̂e pehu, bronse marha. Ero yipu ciitopo yenpon̂e me marha tî xakn̂e noro anarî komo ya. Ero wa tî xakn̂e Tubaw-Kain. Taa, noro yepeka tî xakn̂e hara, Noema tî osotî. Ero wa tî xatken̂e n̂examro.

23 Ero yinhîrî takî Rameke takî tî nîmtapowakn̂e cipici komo yakro. On wara tî kekn̂e, Ai, Ata, Sira, opici amyamro. Awakro so kîmtapowasî oroto. Ero ke omtapotarî ka entacoko. Oyetapai kar̂pamxan cerewre ro mak oko. Ero ke tak kesepanîye, wetapai okwe twaihso ro. Ero wa owî waikai okwe.

24 On wara tko wîhtînoyas ha, Kaan nukurunperî me tî xakn̂e Kain pen. Awetapan̂e exitaw kepanîyasî 7 ro, kekn̂e tî Kaan noro pen ya. Soroso xa tak oyepanîya Kaan. 70 x 7 ro oyepanîyasî. Ero wa kekn̂e tî Rameke.

25 Taa, ero yinhîrî cipici poko tî xakn̂e xa hara Ataw. Ero ke tî noro n̂ewruyakn̂e kîîrî xa hara. Sece me takî tî nosohcekn̂e yîson. On wara tî kekn̂e noro, Omrerî xa hara nîm ham Kaan. Abew pen yemtakan moso Kaan nîm ham, Kain n̂etapatho pen yemtakan ha, kekn̂e tî. Ero wa tî kekn̂e Ataw pici.

26 Taa, ero yinhîrî tak Sece por̂mamche noro pici n̂ewruyakn̂e hara kîîrî, Sece mumuru ha. Noro tî nosohcekn̂e Enos me. Ero wa tî xakn̂e Sece mumuru yosotî. Taa, ero yimaw takî tî tooto komo n̂ehsametken̂e Kporin komo yosotî poko. Ero wa tî xatken̂e.