Taa, on wara xatken̂e Kaan nakîhtotho kom ha, anarmerpa tî xatken̂e comota pono ro komo. Okoyi xa tî xakn̂e cesemîknosom me xa anarî komo yopo ro mak, Kporin komo Kaan nakîhtotho komo yopo ha. Taa, noro takî tî nîmtapowakn̂e wooxam yakro. On wara tî kekn̂e yîwya, Ai, ahce wa kekn̂e Kaan awya so? Ahnoro weewe yeperîrî apuhra ro mak ehcoko, omararîn pono yeperîrî ha, kekn̂e ma awya so? kekn̂e tî okoyi wooxam ya.

2 On wara tî n̂eyukyakn̂e wooxam, Weewe yeperîrî rma tî re amna nahya, Kaan mararîn pono yeperî ha.

3 Cewn̂e makî tko tî amna nîmce apuhnî ha. Mararî rakatawno yeperîrî yapuhra ro makî tî nai amna. On wara kekn̂e Kaan ero poko, Ero yeperîrî apupra ro mak ehcoko, apehra meero ehcoko. Apeche awya so mîwayaxe okwe, kekn̂e Kaan amna ya, kekn̂e tî wooxam.

4 On wara tko tî n̂eyukyakn̂e okoyi wooxamu mtaka hara, Waipîra rma mexe maxe ero yapuche, kekn̂e tî.

5 On wara makî kesî kica Kaan apoko so, Ero yeperîrî yapuche yîwya so ero kaamo po rma tak nakîhyaxe kica. Kir̂wan on, kicicitho reha mîn hara, kan̂e me tak naxe. Owara rma tak men natu kica, kesî mak apoko so kica. Ero ke wa anahrî komo n̂ewyomesî. Twara rma awexi xera so mak nai ham kica, kekn̂e tî okoyi.

6 Ero yipu yentache tak weewe yeperîrî takî tî n̂een̂akn̂e wooxam, mararî rakatawno yeperîrî ha. Knahrî mexe ween̂as okre, kekn̂e tî. Cenporem marha mîn okre. Mîn hak poko cehcamhokaxmu me kiin̂e marha mîn ham okre, kekn̂e tî. Ero wa tî kekn̂e wooxam. Ero ke takî tî pohcakn̂e, nahyakn̂e marha tî. Ciin̂o ya marha tî nîmyakn̂e hara. Ero ke noro marha tî nahyakn̂e. Ero wa tî Kaan n̂ewyomatho nahyatken̂e.

7 Apuche takî yîwya so, ewtanîrexapu wa takî tî xatken̂e. Ponomra wa tai mî kopi, ketken̂e takî tî. Ero ke piiku yarîtho makî takî tî natpetken̂e tponon komo me. Ero wa tî natpetken̂e.

8 Taa, amn̂e n̂he takî tî tmararîn pore n̂etar̂akn̂e Kporin komo Kaan. Kokon̂i xa tî n̂etar̂akn̂e twotme exitaw. Yîmtapotarî tî n̂encetken̂e Ataw komo. Ero ke tî n̂eseyamyatken̂e naatî cheka rma. Noro Kaan ha kopi. Keen̂a ha men, ketken̂e tî.

9 Ataw tko tî nan̂ikyakn̂e Kporin komo Kaan, Ataw, ahto mai? kekn̂e tî.

10 On wara tî n̂eyukyakn̂e Ataw, Apa, amtapotarî wenta mararî pore awetar̂ataw. Kîhyapam kopi ponomra oyexirî ke. Ero ke keseyam, kekn̂e tî.

11 Onoke ma nîîka awya so hara, Ponomra maxe kica, nîîka onoke ha? kekn̂e tî Kaan yîwya. On̂ewyomatho tko na mahcow. Apuhra ro mak ehcoko, kachonho na mahcow? kekn̂e tî.

12 On wara tko tî n̂eyukyakn̂e kîîrî, Wooxamtho mîmye owya, oyakrono me mîmye. Noro rma thakwa onahma ero yeperîrî ke. Ero ke thakwa waapu, kekn̂e tî.

13 Ero ke wooxam ya makîrha takî tî kekn̂e hara Kporin komo Kaan. Ahce wa ma meexi ke okwe? kekn̂e tî yîwya. On wara tî n̂eyukyakn̂e wooxam, Okoyitho matko wa oyemîknopu ha ke kica. Ero ke thakwa waapu, kekn̂e tî yîwya.

14 Ero yinhîrî okoyi yakro takî tî nîmtapowakn̂e hara Kaan. On wara tî kekn̂e yîwya hara, Ahce kacho wooxam memîknopu kica. Ero wa noro yemîknorî ke awya kemetanmekyasî kr̂a oroto. Cesemetanmeso rma re nai paaka komo, yaipî komo, kooso komo ahnoro mak. Noro yipu komo yopo ro mak tak cemetanmesom me masî Amoro. Ararî po kr̂a tak etar̂ko sehrere me kyam makî. Roowo kyam mak tak ahko miya roro awaitopo pona roro.

15 Etîxatî pîn me tak kiir̂asî, amoro wooxam yakro. Etîxatî pîn me marha wiir̂asî awepamthîrî komo amn̂e wooxam yepamtho yakro ha. Akanakatapesî tak Noro. Noro marha mîhtakmarunkatapesî amoro hara. Ero wa maxe amn̂e, kekn̂e. Ero wa tî kekn̂e Kaan okoyi ya.

16 Ero yinhîrî wooxam ya makîrha takî tî kekn̂e hara Kaan on wara, Okopur̂wa, on wara wîîkesî awya hara, cerewîmsom me takî kiir̂asî. Emapona roro tak metahsîyasî. Cerewre tak mewruyasî. Aan̂o ya rma metîmyasî. Noro yewetîn̂e me tak masî. Ero wa kiir̂asî, kekn̂e tî Kaan wooxam ya.

17 Ero yinhîrî Ataw ya makîrha takî tî kekn̂e hara on wara, Apici mtapotarî mewet ham kica. On yeperîrî mahcow ham. Apuhra men ehcoko, kachonho owya mahcow rma mî kica. Ero ke tîwîrîmaxi tak nasî roowo apoyero. Ero poko tak mekaricesî okwe anahrî komo yahtome. Miya roro mekaricesî awaitopo pona roro okwe.

18 Cekyekyem komo tak natîkwasî roowo po, peen marha natîkwasî. An̂irithîrî tak mahyasî anatîrî yeperîrî ha.

19 Mîperamkwasî tak anatîrî cirirî poko, atkacho poko marha. Ero wa aperamtarî ke makî tak awru mokyasî. Ero wa masî miya roro roowo cheka awetahrutopo pona roro okwe. Ero poi amkaxapu mak amoro. Roowothonhîrî mak amoro. Ero ke roowo me cehso ro tak mîmaces hara amn̂e, kekn̂e tî. Ero wa tî kekn̂e Kaan Ataw ya.

20 Taa, ero yinhîrî takî tî cipici nosohcekn̂e Ataw, Epa me takî tî nosohcekn̂e tooto komo yon me exirî ke miyan komo yon me rma. Ero wa tî cipici nosohcekn̂e Ataw.

21 Ero yimaw marha tî Ataw pononmekn̂e Kporin komo Kaan, yipici marha tî. Kooso pichotho ke tî pononmano n̂iir̂akn̂e, kamara pichotho ke marha. Ero warai ke tî Kaan pononmano n̂iir̂akn̂e.

22 On wara marha tî kekn̂e Kporin komo Kaan, Kwarai me xa tak naxe tooto komo. Kir̂wan on ha, kicicitho mîn hara, kan̂e me tak naxe weewe yeperîrî yahrî ke yîwya so. Anarî yeperîrî tak men nahyat hara waipîn me kiin̂e yepu yeperîrî okwe. Ero yipu yapuche waipîn me tak naxe okwe eroromero, kekn̂e tî Kaan.

23 Ero ke n̂examro takî tî n̂en̂epekn̂e Kporin komo Kaan. Tmararîn poi tî n̂en̂epekn̂e Eten poi. Ero wa tî Ataw komo n̂en̂epekn̂e mararî pomon̂e me tak okwe. Poi Kaan nakîhcekn̂e ero pomon̂e me rma tak xakn̂e okwe.

24 Ero wa tî tooto n̂en̂epekn̂e Kaan. En̂epeche takî tî kerubin komo n̂iir̂akn̂e mararî panaw. Kacipara imo marha tî n̂iir̂akn̂e iina. Kaamo yepatakacho n̂ixa tî n̂iir̂akn̂e. Cetapomrisom tî mîn xakn̂e kacipara imo, yarpa so cetapomrisom ha. Waipîn me kiin̂e yepu yesamarî wahkoton̂e me xakn̂e. Ero wa Kaan n̂iir̂akn̂e.