˻Juda-yambomane “Aku yemo paa mólo! Barapasi wendo liku si!”˼^a niringi-ne pilipelie Paillatene Yesusi lipe Romo ami-yemando “Ka-pulsene tai!” nirimu. 2 Aku tekolie enene yu ungu taka tonjiku ˻‘Yu “Ye-nomi-kingimu molio.” nimumunge yu ye-nomi-kingi te none tepili!’ ningu˼ mulu-wambale kondoli peanga te yunge pakonjiku, unju-ka koko mololi te mulkupiye teko ‘Ye-nomi-kingimunge waniemo.’ ningu pengena mere mundunjiku 3 yu angilirimuna puku “Juda-yambomanga kingimu, nu akuna angilinoye?” ni-pu-opu teko, yu kumbi-kerena laruwe toringi.

4 Paillate altopa penando ombalie Judamando nimbendo: “Kanayo! ‘ ‘Yu mongo te limumunge pilipulie yu manda tombo mele mólo!’ ningu piliengi!’ nimbu ene molemelena yu membo okoro.” nirimu. 5 Kanu-kinie Yesusi ka koko mololini teli wanie-kiraono none telimu kinie wale-pakoli kondolimu pakopa wendo orumu kinie Paillatene enendo nimbendo: “Yemo i okomo kanai!” nirimu.

6 Pulu Yemo popo tonjiringi ye-ailime kinie^b enenga kendemande ele-yema kinie enene Yesusi penando kokele orumu kanokolie sumbi-siku ningindu: “Kolopili, unju-perana ola uku toko panjiyo! Kolopili, unju-perana ola uku toko panji!” niringi.

Nakolo Paillatene nimbendo: “Na mólo! Na yu mongo limumunge topo konjimbu mele naa pilkiru kene enene yu mengo puku unju-perana ola uku toko panjai!” nirimu.

7 Judamanga ye-ailimene ningindu: “Olionga ungu-mane te pelemomone nimbendo:

8 Enene “Yu “Pulu Yemonga Malo molio.” nirimu.” niringi-ne Paillatene pilipelie yu paa kamu pipili kolopalie, 9 kelepa ulke-ailine sukundu pupe Yesusindu walsipelie nimbendo: “Nu tena molko orunuye?” nirimu, nakolo Yesusini yundu pundu topa ungu te naa nirimu.

10 Ungu te naa nirimu-na Paillatene yundu nimbendo: “Nando ‘Ungu te naa nimbú.’ konopu lekenoye? Nanga tondolo pelemomone “Nu we pani!” manda nimbúla; “Nu kolani, unju-perana ola uku tangi!” manda nimbúla. Aku nikiru ungumu naa pilkinuye?” nirimu.

11 Yesusini pundu topa nimbendo: “Nunge tondolo pelemomone na ulu te manda naa telena. Olandopa Molemo Yemone ‘Nuni na-kinie teani!’ nimbé mele mindi teni. Akumunge nuni na-kinie teni mele ulu-pulu-keri keló mele teni. Ye na ‘Kolopili!’ nimbe memba omba nu simu yemonga ulu-pulu keri akumu ailimu.” nirimu.

12 Yesusini aku nirimu pilipelie Paillatene Yesusi yu “We pupili!” nimbé aulke te kororumu, nakolo Judamane tondolo-munduku ni-pu-opu tekolie ningindu: “ “Na ye-nomi-kingi te molio.” nilimo ye te Romo-Gapomano Ye Paa Aili Kumbine Sisa-kinie opa-toumu molemo-na nuni aku “Ye-nomi-kingi te molio.” nilimo yemo “We pupili!” ninu liemo aku-siku tenimunge nu Ye-Sisamonga opa-tou te liku taponjinimunge nu-kinie Sisa-kinie pulu naa lemo.” niringi.^e

13 Aku niringi pilipelie Paillatene Yesusi memba penando omba, kolea te akumundu ‘kou-polomo’ niringine pupe kote pilimbe kongono manie molopa terimu polona pupe manie molorumu. (Kou-polomondo Juda-yambomanga unguna ‘Gapata’ niringi.) 14 Aku kote tenjiringi walemo yu kinié mele. Opali Pulu Yemone Juda-yambomanga anda-kolepalime Naa Topa We Omba Purumu mele^f pilku kongi-sipisipi walomo nonge walemo wendo ombá. ˻Aku koro molonge walemo˼ wendo ombá pilkulie kinié-mele Juda-yambomane langi nongema liku undu-undu siringi walemo^g, kanu walemonga ai-tangoli mele, Paillate-kinie Yesusi kote tenjiringi. Paillate kote pilimbe polona omba manie molopalie nirimumuni, Juda-yambomando nimbendo: “Enenga ye-nomi-kingimu kanai!” nirimu.

15 Nakolo enene tondolo-munduku ningindu: “ “Kolopili!” niyo! “Kolopili!” niyo! Unju-perana ola uku toko panji!” niringi.^h

Paillatene walsipelie nimbendo: “ ‘ ‘Enenga ye-nomi-kingimu kolopili!’ nimbu unju-perana ola uku topo panjembo!’ konopu lelkolie nikimiliye?” nirimu.

Pulu Yemo popo tonjiringi ye-ailimene pundu toko ningindu: “Olionga ye-nomi-kingi te lupe naa molemo. Romo-Gapomano Ye Paa Aili Kumbine Sisamo mindi.” ⁱ niringi.

16 Kanu-kinie Paillatene kamu nimbendo: “Kapola, ‘Unju-perana kolopili!’ ningu mengo puku unju-perana uku toko panji-pai!” nirimu.

Paillatene aku-sipe nirimu kinie Romo ami-yemane yu ambolko liku mengo pukulie 17 yu unju-pera te siringi, akumu yu-yuyu memba Jerusalleme ulsu purumu.

Yesusi unju-pera siringimu memba pupili ene Jerusalleme munduku kelko ‘Kolea Penge-Ombele’ niline mengo puringi. (‘Kolea Penge-Ombele’ kanumundu Juda-yambomanga unguna ‘Golkota’ niringi.) 18 Aku koleana Yesusi unju-perana ola uku toko panjiringi. Ye talo pea unju-pera talonga uku toko panjikulie, te ekendonga anjiku, te ekendonga anjiku, Yesusi suku-singine anjiringi.

19 Paillatene “Yesusinge unju-perana ola imbi toko monjei!” nirimu mele toko monjiringila. Akumu i-sipe:

22 Paillatene pundu topa nimbendo: “Nane imbi “Toko monjei!” nindu aku ungumu papu tongi. Altopo ungu te naa nimbú. Ou tongi aku ungumu molopili!” nirimu.

23 Ami-yemane Yesusi unju-perana ola uku toko panjiku pora sikulie, yunge mulu-wambale ˻kulku nosiringime˼ liku, ene ye kise lingí mele moke teko liringi. Aku tekolie wale telu mindi, sukundu pakorumumu, goli lerimu. Akumu suku-singi tenga tambulu naa tambulku we sulumu teringi-ne 24 ami-yemane ningindu: “Imu olá naa tamili kene ye telu manjipe lipili kene ou kou-kate teamili!” niringi. Aku teringi mele Pulu Yemonga bokuna ungu te molemomone pe aku-siku tenge ou nirimu mele wendo orumu. ˻Konana torumu yemone yu-yuyu-kinie kepe teringi mele kanopalie torumu mele˼ bokuna molemomone nimbendo:

25 Yesusi unju-perana ola perimu akuna nondopa yunge anumu kinie, anumu-papamo kinie, Killiopasinge ambo menu Maria kinie, kolea Makatalla ambo Maria kinie, aku amboma angiliringi.^m 26 Anumu kinie anumu nondopa angilirimu ye Yesusini konopu monjirimu yemo kinieⁿ Yesusini kanopalie anumundu “Andi yemo nunge malo molopili!” nimbe, 27 kanu lombili andoli yemondo^o “Andi ambomo nunge aminie molopili!” nirimu. Aku nirimu pilipelie kanu lombili andolimuni Yesusi anumu lipe yunge ulkendo memba pupe nokopa molorumu.

28 Pe Yesusini yunge kongonoma pali tepa pora sirimu pilipelie, “Na no waka lekemo.” nirimu. Aku ungu nirimumu ungu te ou niringi Pulu Yemonga bokuna molemomone ulu te pe wendo ombá mele pilipelie ‘Wendo opili!’ nimbe aku-sipe nirimu. 29 No-waene kombili teli mingi te akuna lerimu kanokolie ulú-pinje melte liku no-waene akuna suku mundukulie, pinje melemo no pepili unju-isopi kola tene unju toko olando-siku Yesusinge kerena koponjiringi.^q

30 Yuni nomo nombalie “Nanga kongonomo pora nikimu.” nirimu. Aku nimbelie ma kanopa yunge pengemo maniendo-sipe mundupe ‘Kinié kolambo!’ nimbe yunge minimu “Pui!” nimbelie yu kolorumu.

31 Yu kolorumu walemo akumu kinié mele, opali mele enenga koro molonge Wale-Sambate olandopa te wendo ombá terimu. Sambate-Walemo wendo ombá kinie koro molongendo kinié mele, mélema liku undu-undu siringi walemo.^r Akumu pilkulie Juda-yambomanga ye-ailimene ‘Opali Sambate-Walemo kinie yema unju-perana ola we penge kapola naa temba.’ ningulie enene Paillatendo puku mawa tekolie ningindu: “Yema kinié manie liemili kene ˻‘Ene kinié mindi walsikale kolangi!’˼ ningu “Enenga kimbuma elke tonjei!” ni!” niringi.

32 Kanu-kinie ami-yema ongolie kumbi lelko Yesusi-kinie wikindunge perimu yemonga kimbutolo elke tonjiku, pe merekendonga perimu yemonga kimbutolo elke tonjiringi. 33-34 Nakolo Yesusi perimuna ongo yu kanoringi kinie yu koronga kolorumu kanokolie siye koloringi. Yunge kimbutolo elke naa tonjiringi nakolo ami-ye tene Yesusinge wanguna tolone torumu, akuna meme kinie no kinie waka-maka orumu.

35 Aku teringi mele ye mongone kanorumu yemone teringi mele temanemo topa sikimu. Aku yemonga ungumu sike. Yu ‘Sike nikiru.’ nimbe pilipelie ‘Ene i temanemo pilingí yambomane pilkulie ‘Yesusi yu molopa terimu mele akumu sike!’ ^s ningu tondolo-munduku piliengi!’ nimbe i temanemo topa sikimu.^t 36 Ulu pe wendo ombá Pulu Yemonga bokumuni ou nirimu ulu pokore sike wendo ombando enene aku-siku Yesusi-kinie teringi. Pulu Yemonga bokuna molemo ungu te i-sipe:

38 Yesusi kolopa pora sirimu kinie pe kolea Arimatia-ye Josepo pupe Paillatendo “Yesusinge ónomo na si!” nirimu. Josepo yu Yesusinge ungumu pilipe lipe molorumu ye te, nakolo Juda ˻ye-aili lupe˼ma^w pipili kolopalie mona lombili naa andopa kiyongo nimbe Yesusinge unguma pilipe molorumu.

“Ónomo si!” nirimu kinie

Paillatene “Kapola, li!” nirimu kinie Josepo yu omba ónomo manie lirimu. 39 Ye te, ou walse ipuluelikundu Yesusi molorumuna purumu pea ungu ningulu moloringili ye te, yunge imbi Nikodimasi,^x kanu yemo yu Josepo pea oringili. Yu unju talonga unju-to liku akumuni kopongo mune toli te telemele akumu aisili, yunge umbuni teti-pape (35) killokereme mele púlimu, memba orumu.

40 Elte pukulu Yesusinge ónomo manie likululie niringilimuni, ˻Juda-yambomane óno tengendo teringi mele pilkululie tengelendo˼ múlu te liku olo-mala toko, unju-totolone teringi kopongomo ónomonga kanjikululie ónomo kulupi toringili. 41 Yesusi unju-perana ola toringi koleana unju-ponie te lepa, akuna kou-kande te lerimu. Kanu kou kandena óno te ou naa nosiringi, yu mindi pulu-pulu nosiringili. 42 Yesusi óno teringili walemo yu kinié-mele, opali-mele ˻Juda-yambomanga koro moloringi˼ Wale-Sambatemo nondopa wendo ombá terimu. Sambate-Walemo wendo ombá kinie koro molongendo kinié-mele mélema liku undu-undu siringi walemo. Sambate-Walemo nondopa wendo ombá terimu pilkululie aku óno teringi kou-kandemo nondopa lerimuna Yesusi akuna óno teringili.