Yesusi aku-sipe Pulu Yemo-kinie nimbe pora sipelie nirimumuni, ˻ipu lepili˼ yu kinie yu lombili andolime^b kinie aku koleamo munduku siye kolko No-Kirone nekendo unju-ollipi ponie lerimuna suku puringi.

2 ˻Ipulueli No-Kirone nekendo unju-ollipi ponie lerimuna puringi aku-mele Yesusi taki-taki yu lombili andolime pea kanu poniemonga puringine˼ Judasi-Isikeriote ene aku poniena taki-taki puringi mele pilirimu. Judasi yu Yesusi pe lipe Yesusi yunge opa-touma sirimu ye kanumu. 3 Kanu-kinie Judasini ˻‘Yesusi akuna pea taki-taki pupu molemolo-na yu akuna molomba.’ konopu lepalie,˼ akuna orumu. Yu ami-ye-talape te kinie^c Pulu Yemo popo tonjiringi ye-ailime kinie^d Parisi-yema kinie^e kanu yemane liku munduringi ele-ye mare kinie akuna memba orumu. Ene kiye kandoko mengo, tepe-llamema kandoko mengo, opa teringi mélema mengo oringi.

4-5 Yesusini yu nondoko tenge mele pilipelie, ene ‘Yesusi ka siengi!’ nirimu ye Judasi pea oringine Yesusi yu anju pupe ene walsipe pilipelie nimbendo: “Ene nae korokomeleye?” nirimu.

Enene pundu toko yundu ningindu: “Kolea Nasarete ye Yesusi korokomolo.” niringi.

Yesusini “Akumu na.” nirimu.

6 Yesusini “Akumu na.” nirimu kinie ene anju bulu mini-mini pukulie a toringi.

7 Yuni altopa ene walsipe pilipelie nimbendo: “Ene nae korokomeleye?” nirimu.

Enene “Nasarete-Ye Yesusi korokomolo.” niringi.

8 Yesusini nimbendo: “ “Akumu na.” nindu kanumu. Enene na korongi liemo na pea molemolo yema ka naa siku, ‘Yando we pangi!’ niei!” nirimu. 9 Yesusi pe temba ou nirimu mele ‘Paa sike aku tepili!’ nimbe aku-sipe opa-toumando “Nanga yema naa ambololi “Anju we pangi!” niei!” nirimu. Yuni ou Pulu Yemondo nimbendo: “Nuni na sirinu yemanga te ulsu pupe mindili nonge aulkena naa pumu,^f ene pali nokopo konjirindu.” nirimu,^g kanu ungumunge pe sike te molopa naa kenjirimu.

10 Kanu-kinie Saimono-Pitane yunge lou pokete-napimu kulu topa wendo lipe Pulu Yemo popo tonjiringi ye-aili-olandopamonga kendemande ye te topa yunge komu te topa laká lenjirimu, aku komumu wendo orumu. Kanu kendemandemonga imbi Malkasi.

11 Yesusini Pitando nimbendo: “Nunge lou pokete-napimu altoko lakilí! Na Tarane “Mindili nani!” nirimu mele naa nomboye?”^h nirimu.

12 Kanu-kinie amime kinie amime nokoli-yemo kinie Juda-yambomanga ele-yema kinie enene Yesusi ka siku mengo puringi.

13 Yesusi ka tokolie ou-pulu-pulu Anasi molorumuna mengo puringi. Anasi yu Kayapasinge ambomonga lapa, yunge kolepa. Kayapasi yu kanu poniemonga Pulu Yemo popo tonjiringi ye-aili-olandopamo^k molorumu. 14 Ye tene Juda ye-ailimendo ou nimbendo: “Ye te yambomanga pali kolo wangopa kolonjimbe kinie papu.” nirimu kanumu Kayapasi yuni nirimu.^l

15 Saimono-Pita kinie Yesusi lombili andoli ye te kinie^m Yesusi lombili pungilí puringili. Kanu lombili andolimu Pulu Yemo popo tonjiringi ye-aili-olandopamone kanopa imbi sirimu-na, kanu ye-aili-olandopamonga ulkena yambo máku toringi koleana sukundu Yesusi mengo puringine yu sumbi-sipe purumu 16 nakolo Pita we-yamboma máku toringi ulke-kerepuluna ulsu we nokopa angilirimu. Akumunge Yesusi lombili andoli ye te molorumu kanumu kelepa yando omba kendemande-ambo ulke-kerepulumu nokorumumundu “Pita sukundu opili!” nimbe mawa tepalie Pita lipe memba sukundu purumu.

17 Kere-pulu nokorumu ambo kanumuni Pitando nimbendo: “Nu ne-yemonga lombili andoli ye teye?” nirimu.

Pitane “Mólo!” nirimu.

18 Ipulueli ali terimu-na kongono teli kendemandema kinie ele-yema kinie tepe kalkolie makaye teko pilku moloringi. Pita pea ene kinie tepe pilipe angilirimu.

19 Pita kinie yamboma kinie aku-siku ningu molangi Pulu Yemo popo tonjiringi ye-aili-olandopamone Yesusi lombili andolime kinie yuni yamboma ungu-mane sirimu mele kinie Yesusi walsipe pilirimu.

20 Yesusini pundu topa nimbendo: “Na mona molopo yamboma ungu-mane silio. ˻Pulu Yemo popo toko kalemele˼ ulke-tembelemo kinie, yamboma máku toko Pulu Yemonga ungumu pilimele ulkema kinie aku ulke Juda-yamboma pali máku tolemele ulkemanga ungu-mane silio. Lopi tepo kiyongo nimbu ungu te naa nilio. 21 Aku telio-na nuni na ungu niliomo nambemuna walsikinuye? Nanga ungu pilimele yambomando walsiku pilieyo! Nilio mele aku yamboma pilku molemele.” nirimu.

22 Yesusini aku nirimu kinie yu nokoringi ye te yu-kinie nondopa angilirimumuni yu kumbikerena laruwe topalie nimbendo: “Nu aku-siku Pulu Yemo popo tonjili ye-aili-olandopamondo pundu toko nikinumu papuye?” nirimu.

23 Yesusini pundu topa nimbendo: “Nane ungu nindumunge te nimbu kenjindu liemo ungu keri nindu akumu ningu para siyo! Molo sike unguri nindu liemo nuni na nambemu-na tokonoye?” nirimu.

24 Kanu-kinie yu ka toringi akumu we pepili Anasini “Pulu Yemo popo tonjiringi ye-aili-olandopa Kayapasi molemona mengo pai!” nimbe lipe mundurumu.ⁿ

25 Saimono-Pita tepe pilipe angilirimu-na enene yundu ningindu: “Nu ne-yemonga lombili andoli ye teye?” niringi.

Yuni pundu topa ˻kolo topa˼ nimbendo: “Na mólo!” nirimu.

26 Pulu Yemo popo tonjiringi ye-aili-olandopamonga kendemande ye te, kanu yemo kinie Pitane komu karu lerimu yemo kinie pulu lerimu kanumuni Pitando nimbendo: “Nu ne-yemo kinie unju-ollipi ponie lemo koleana pea molongili kanondu kanumu sikeye?” nirimu.

27 Pitane kelepa wale yepoko-sipe “Mólo!” nirimu kinie kera-gulta ko pulu-monjipe torumu.^o (KERA-GULTA KO TOKOMO PILÍ!)

28 ˻Pulu Yemo popo tonjiringi ye-aili-olandopa Kayapasi kinie Juda-yambomanga kanjollo-yema pali kinie enene Kayapasinge ulkena Yesusi kote tenjiku pilku pora sikulie,˼ Judamanga ye-ailime Kayapasi munduku kelko ene nokorumu Romo-gapomano yemonga ulkena Yesusi mengo puringi. Kolea tangomba muni lerimu kinie akuna mengo puringi. Mengo pukulie ene Juda-yambomanga ungu-mane te perimumu pilkulie ‘Olio Romo-yambo tenga ulkena pumulú kinie kalaro-mele molomba kene Pulu Yemone olionga anda-kolepalime Naa Topa We Omba Purumu mele pilimolo walemonga^q kongi-sipisipi walo manda naa nomolo.’ ningu pilkulie ene ulkena sukundu naa puringi.

29 Ene pena ulke-kerepuluna angiliringi-ne kanopalie ene angiliringine Romo-gapomano ye-nomi Paillate pena omba enendo walsipelie nimbendo: “Ene i yemo ulu nambe-temu-na kote tenjikimiliye?” nirimu.

30 Enene pundu toko ningindu: “Yu mongo naa lilkenje nu molonuna naa membo ombo silimelka.” niringi.

31 Paillatene nimbendo: “Yu yando mengo pukulie ene-eneno enenga ungu-mane pelemomane nilimo mele pilkulie yu kote tenjiku umbuni singí mele eneno pilku siei!” nirimu.

Juda-˻yambomanga aili˼mene^r ningindu: “Aku teamili mangali Romo-gapomanomone olio ungu-mane sipelie nimbendo: “Ene we yambomane yambo toko konji naa konjei!” nilimo kanumu.” niringi. 32 Aku niringimunge Yesusini yu kolomba mele ou nimbe sirimu aku-sipe sike kolombando ene yuni nirimu mele naa pilkulie we eneno pilkulie “Yu kolopili!” ningu yu Paillate molorumuna mengo oringi.^s Yesusini “ ‘Na kolambo!’ ningu unju-perana uku toko panjingí.” ou nirimu mele Romo-gapomanomone mindi mongo liringi yamboma aku-sipe topa konjirimu, Juda-yambomane aku-siku manda naa teringi.

33 Juda ye-ailimene niringi mele pilipelie, Paillate altopa ulke-ailimunge sukundu pupe Yesusindu “Ou!” nimbelie yundu walsipelie nimbendo: “Nu Juda-yambomanga ye-nomi-kingimu^t molenoye?” nirimu.

34 Yesusini pundu topa walsipelie nimbendo: “Nuni nunu pilkulie aku ungumu nikinunje molo nando yambo-lupemane nu ningu síngi-ne pilkulie akumu nikinuye?” nirimu.

35 Paillatene pundu topa nimbendo: “Na ‘Juda yere.’ ningu pilkulie aku-siku walsikinuye? Nunge yamboma kinie nunge Pulu Yemo popo tonjili ye-ailime kinie akumane nu na molonduna mengo ongi. Nu nambe-tenu-na liku mengo ongiye?” nirimu.

36 Yesusini nimbendo: “Na ya mana ye-nomi-kingimu molopo mana yamboma nokombo mele mólo! Sike mana ye-nomi-kingimu molkanje nanga yambo-talapemane na “Juda-yambomane ka naa siengi!” ningu opa telemelka. Nakolo na mana ye-nomi-kingimu mólo!” nirimu.^u

37 Paillatene nimbendo: “Aku liemo nu paa sike ye-nomi-kingi te lepamo. Sike nikiruye?” nirimu.

Yesusini pundu topa nimbendo: “Sike! Pulu Yemone ‘Na kingimu molopili meai!’ nirimu-na meringila. ‘Yamboma ungu-sikema piliengi!’ nimbu mana orundula.^v Yambo ‘ungu-sikema’ waka kolkolie ‘piliemili!’ nilimele yambomane na pilimele.” nirimu.

38 Paillatene ˻ungu-taka tonjipelie˼ nimbendo: “Ungu-sike te pelemoye? Te naa pelemo.” nirimu.

Aku nimbelie yu altopa Juda-yema angiliringine penando pupelie nimbendo: “Yu mindili simbumunge mongo te limumu naa pilkiru. Yuni ulu te tepa naa kenjimu.” nirimu.

39 Paillatene ˻Yesusi uluri naa tepa kenjirimu konopu lepalie ‘Naa kolopili!’ nimbe pilipelie˼ Juda-yambomando nimbendo: “Ene kinie na kinie telemolo ulu-pulu pelemomo pilipulie teambo! Ponie tenga-tenga, ene Juda-yambomane enenga anda-kolepali kolea Isipi moloringi kinie Pulu Yemone ene Naa Topa We Omba Purumu mele pilingindu langi noringi walema^x wendo olemo kinie enene ka-ulkena perimu ye te imbi lelko ‘Wendo liku mundu!’ ningu mawa telemele kinie nane kanu yemo wendo lipu ene silio. Akumunge, kinié kanu walemo wendo okomomonga ‘Juda-yambomanga ye-nomi-kingimu wendo lipu ene siembo!’ konopu lekemeleye?” nirimu.

40 Nakolo enene anju tondolo-mundukulie ningindu: “Aku yemo paa mólo! Barapasi wendo liku si!” niringi. (Barapasi yu Romo-gapomano-kinie opa terimumunge ka siringi yemo.)^y