˻Koro moloringi˼ Wale-Sambatemo^a pora nimbe, enenga pulu-pulu kongono-walemo wendo orumu kinie kolea sumbulu topa pepili paa muni-kinie-ou kolea Makatalla ambo Maria Yesusinge ónomo nosiringi kou-kandena omba kanorumu. Omba kanopalie kou-kande kere-pulumu pipi siringi koumu perele-marele pupe ekendonga lepa kere-pulumu we lerimu kanorumu. 2 Kanopalie yu lkisipe pupe Saimono-Pita kinie Yesusi lombili andoli Yesusini ou konopu monjirimu yemo kinie^b moloringiline pupelie nimbendo: “Yambomane olionga Ailimu óno-koleana wendo língi. Yu nosíngi koleamo olio naa pilkimulu.” nirimu.

3 Aku nirimu kinie pilkulie Pita kinie Yesusi lombili andoli ye te akumu kinie óno teringi kou-kandena pungilí puringili. 4 Lkisiku pukululie, lombili andoli ye te akumuni Pita topa akilinjipe yu kumbi-lepa óno teringi kou-kandena purumu. 5 Pupe kou-kandena wake tepa kanopalie Yesusi kulupi toko óno teringi múluma ˻mindi˼ we lerimu kanorumu, nakolo yu sukundu naa purumu.

6 Kanu-kinie Saimono-Pita akilipe omba kou-kandena sukundu pupe kanopalie, Yesusinge ónomo kulupi toko óno teringi múluma óno teringi koleana we lepa, 7 yunge pengena ka toringi múlumu yunge penge lerimu koleana ka toringi mele we lerimu kanorumu. 8 Kanu-kinie lombili andoli kumbi-lepa orumumu yu kepe sukundu pupe kanopalie, ‘˻Yu paa˼ sike ˻lomboropa wendo pumu lepamo˼.’ nimbe tondolo-mundupe pilirimu. 9 (Pulu Yemonga bokumuni Yesusi lomboropa ola molomba ou nimbe sirimu^c nakolo Yesusi sike lomboropa ola molorumu ou naa kanokolie yu lombili andolimene kanu ungumu naa pilku konjiringi. Yu kolorumu kinie ‘Kamu kolomu.’ konopu lelko, ‘Lomboropa ola molomba.’ konopu naa leringi.)

10 Kanoko pora sikululie yu lombili andoli yetolo kelko ulkendo puringili.

11 Kolea Makatalla ambo Maria Yesusi lombili andoli yetolo kumbi-lelko puringili kinie akilipe ombalie Yesusi óno teringi kou-kande kere-puluna kola tepa angilirimu. Kola tepa angilipelie kou-kandena sukundu wake tepa kanorumu kinie 12 mulú-koleana angello talo wale pakoli kake teli talo pakokolo Yesusi óno ou lerimuna moloringili kanorumu. Te yunge penge ou lerimuna molopa, te yunge kimbu lerimuna molorumu.

13 Eltene yundu walsikulie: “Ambomo, nambemuna kola tekenoye?” niringili.

Yesusi lomboropa ola molorumu mele naa pilipelie yuni eltendo nimbendo: “Nanga Ailimu yu liku mengo puku nosíngi koleamo na naa pilkiru.” nirimu. 14 Aku nimbelie yu topele topa kanorumu kinie yunge bulkundu Yesusi angilirimu kanorumu. Nakolo ‘akumu Yesusi’ nimbe kanopa imbi naa sirimu.^d

15 Yuni nimbendo: “Ambomo, nu nae korokolie kola tekenoye?” nirimu.

Yesusi yu ‘ponie tapu yemo’ konopu lepalie Makatalla ambo Maria yuni nimbendo: “Yemo, nuni Yesusi mengo punu liemo nosinu koleamo na ningu siyo! Yu lipu membo pambo!” nirimu.

16 Yesusini yundu nimbendo: “Maria.” nirimu.

Yu angilirimuna ambomo kamu topele topa sumbi-sipe kanopalie Juda-yambomanga Ipuru-Ungu nimbelie “Raponai.” ^e nirimu. (Akumunge pulumu ‘Ungu Mane Sílimu’.)

17 Yesusini nimbendo: “Na Tara molemona kelepo olando ou naa pundu kene na naa amboloyo! Nanga angenupilime molemelena puku enendo ningu sikulie ninindu: “ “Na kinie ene kinie olionga Lapa Pulu Yemo molemona kelepo olando pukuru.” nimu.” ni!” nirimu.

18 Kanu-kinie Maria yu Yesusi lombili andolime moloringine pupe yu Ailimu^f kanorumu mele kinie Ailimu yuni nirimu mele kinie pupe temane topa sirimu.

19 Yesusi lomboropa ola molorumu kanu walemo Juda-yambomanga pulu-pulu kongono-wale lerimu kanumunge ipupini lepa kolea kalá torumu kinie lombili andolimene Juda ye-ailime^g pipili kolkolie niringimuni, ene moloringi ulkemo lloko toko molangi Yesusi omba ene moloringine angilipe enendo nimbendo: “Ene konopu pe nipili molai!” nirimu. 20 Aku nimbelie, ‘Na toringi uruma kanokolie ‘Na sike enenga Ailimu omba angilkimu.’ ningu piliengi!’ nimbe yunge kitolo kinie wanguna kinie lipe ora sirimu. Ailimu kanokolie enene konopu paa aili-teko siringi.

21 Yesusini enendo altopa nimbendo: “Ene konopu pe nipili molayo! Tarane na lipe mundurumu mele ene nane lipu mundukurula.” nirimu. 22 Aku nimbelie yuni ene moloringine kere múlumu popo topa ulsu mundupelie nimbendo: “Mini Kake Telimu enenga konopuna molopili lieyo! 23 Enene yambo te ulu-pulu-keri tembama ‘Omba manie pupili!’ níngi liemo kapola kanu ulu-pulu keri tembama omba manie pupe pora simbemo. Molo yambo tenga ulu-pulu-kerime ‘We pepili!’ ningí kinie kapola kanu yambomonga ulu-pulu kerime we pembamo.” nirimu.^h

24 Yesusi lombili andolime moloringine Yesusi lomboropa ola molopalie ou orumu kinie enenga ye te naa molorumu. Kanu yemo Tomasi. (Yunge imbi te “Didimasi” ⁱ niringila.) Yu Yesusi lombili andoli ye rurepo akumanga tela. 25 Ye-lupemane “Ailimu ya omu kanomulu.” niringi kinie

yuni ‘Kolo tongi.’ konopu lepalie nimbendo: “Nanga mongone yunge kíne pirimúni toringi urumu naa kanopo, akuna nanga ki-sundumu suku naa mundupu, tolone wanguna toringine nanga kimu suku naa mundundu liemo ‘Yu lomboropa ola molomu.’ nimbu naa pilimbu, paa mólo!” nirimu.

26 Pe wale engaki omba purumu kinie Yesusi yunge lombili andolime altoko Tomasi pea ulkena suku moloringi. Ene ulke moloringimu kunema pali lloko toringi nakolo Yesusi omba ene moloringine angilipelie, “Ene konopu pe nipili molai!” nirimu. 27 Nimbelie yuni Tomasindu nimbendo: “Nunge ki-sundumuni nanga kimu simbi tonjikulie kanoyo! Nanga wanguna nunge kimu sinio siku mundukulie kanoyo! Kanokolie na ‘Lomboropa ola manda naa molomba.’ ningu pilkinu mele naa teko, ‘Sike lomboropa ola molomu.’ ningu tondolo-munduku pilí!” nirimu.

28 Tomasini yundu nimbendo: “Nanga Ailimu, nanga Pulu Yemo.” nirimu.

29 Kanu-kinie Yesusini yundu nimbe sipelie nimbendo: “Na kanokolie ‘Sike lomboropa ola molomu we molemo.’ ningu pilkinu. Na naa kanokolie ‘Yu sike lomboropa ola molorumu, kinié we molemo.’ ningu tondolo-munduku pilingí yamboma ene Pulu Yemone “Konopu peanga pepili molko konjengi!” nilimo aulkena molonge.” ^j nirimu.

30 Yesusi lombili andolime kanoko molangi Yesusi yuni ˻Pulu Yemone yu lipe mundurumu-na omba molorumu, yu Pulu Yemo-kinie tapú-topa molopa kongono tenjirimu mele˼ lipe ora sirimu ulu-tondolo aisili^k terimu, kanu uluma pali i bokuna naa tondu, pokore mindi tondu.^l 31 Nakolo ‘Yesusini enenga nimbe tenjirimumunge ene alieli molko konjiku mindi pangi!’ nimbu ‘ ‘Pulu Yemone “Ene nokopa konjimbe ye te lipu mundumbu.” nimbe ou mako torumu yemo, pe Yesusi yu sike kanu ye-nomi Kirasimu^m orumu.’ ningu pilku, ‘Yu sike Pulu Yemonga Malo.’ ningu piliengi!’ nimbuⁿ i boku wallo-kolte tondu. Kanu-kinie ene sike aku-siku ningu tondolo-munduku pilingí kinie yuni ya ma-koleana enenga nimbe tenjirimumunge ene alieli molko konjiku mindi pungí.^o