Yesusi Kinie Nikodimasi-tolo Kerepali Niringili Temanemoa
3
(Pulu Yemonga ungumu. Kolomongo-kanga wane.)
˻Juda-yambomanga ye mare Parisi moloringi. Aku˼ ye Parisimenga ye te, imbi ‘Nikodimasi’, yu Juda-yamboma nokorumu kanjollo ye te,b
2 yu Yesusi molorumuna ipuluelic ombalie nirimumuni, yundu nimbendo: “Rapai,d ‘Nu Pulu Yemo pea molkololie ungu-mane sinindu orunu.’ nimbu pilimolo. Ye te ‘Pulu Yemo-kinie naa molkanje Pulu Yemone ulu-tondoloma telemo mele nuni teleno aku-sipe yuni manda naa telka. Ulu telenomane Pulu Yemo pea molembele mele lipe ora silimo.’e nimbu pilimolo.” nirimu.
Jesus speaks with Nicodemus (John 3:1-21)
3 Yesusini pundu topa yundu nimbendo: “Nane nundu paa sike nimbu sikiru: “Yambo te kelko naa mengi liemof kanu yambomone Pulu Yemo ye-nomi-kingimu molopa yamboma nokolemo koleamog manda naa kanopa, yunge talapena manda naa molomba.” nikiru.” nirimu.
4 Nikodimasini yundu nimbendo: “Yambo te anda lepa molemo kinie yu nambe-teko mengeye? Yu anumunge olona altopa manda suku pumbe, anumuni yu manda membaye?” nirimu.
5 Yesusini pundu topa nimbendo: “Nane nu paa sike nimbu sikiru: “Yambo te nomone kepe Minimuni kepe mei naa mengili liemo kanu yambomo Pulu Yemonga ambolangoh naa molopa, Pulu Yemo ye-nomi-kingi molopa nokolemo koleana suku manda naa pumbe, mólo!” nikiru.
6 Méle kangimuni melemó méle akumu kangimu, yu mana molomba mélemo mindi; méle Pulu Yemonga Minimuni melemó méle akumu minimu, aku mélemo mindi Pulu Yemo molemona manda pupe molomba.
7 “Akumunge nane nundu nimbundu: “ ‘Pulu Yemo ye-nomi-kingimu molopa nokolemo koleana pamili!’ ningí yamboma pali ou altoko meangi!” nikirumundu konopu aisili naa lieyo!
8 Poporomemo yuyu pilipe kolea lupe-lupemanga tolemo kinie enene yunge ungumu pilku, mélema lope-lope telemo kanolemele, nakolo yu naa kanoko yu wendo olemona kepe pulimona kepe naa kanolemele. Pulu Yemonga Minimu aku-sipela. Minimuni melemó yamboma mini konde pepili ene paa yambo lupe mele molemele yambomane kanolemele, nakolo ˻Pulu Yemonga˼ Minimuni kanu yamboma mini kondema silimo kanu Minimu naa kanolemele.” nirimu.
9 Nikodimasini yundu nimbendo: “I uluma nambe tepa wendo okomoye?” nirimu.
10 Yesusini yundu nimbendo: “Nu Isirele-yambomanga ungu-mane sili ye te nakolo i nikiru mele naa pilkinu lepamo.
11 Nane nundu paa sike nimbu sikirumu: Olio pilimolomando nilimolo; kanolemolomando nimbu silimolo. Nakolo i ungu nilimolo unguma enene pali pilku limele yambo te mólo!
12 Ya ma-koleana uluma ene nimbu silio kinie enene ‘Kolo tokomonje.’ ningu pilimelemonga pe kinié mulú-koleana uluma nimbu sindu liemo ‘Sike nikimu’ ningu nambe-teko manda tondolo-munduku pilingíye? Manda naa pilingí lemo.
13 Yambo telu kepe olando-siku mulú-koleana suku naa puringi. Ye telumu mindi, mulú-koleana maniendo-sipe orumu yemo mindi ou mulú-koleana molorumu. Yu Manie Omba Mana-Ye Au Lerimu Yemo.i
14 “Ou Mosisini yambo naa peli kolea kune kongi-ka-wambiye kou-kapane telimu lipe ola uku topa panjirimu melej aku-siku yambomane Manie Omba Mana-Ye Au Lerimu Yemo liku ola uku toko panjingí.k
15 Kanu-kinie, ˻ou yambo wambiyemane nongo konjiringi kolonge teringi yambomane Mosisini lipe ola uku topa panjirimu wambiye kapane telimu kanokolie konde puringi kanu mele˼ pe kinié aku-siku ‘Yambomane yu-mele-mele ‘Manie Omba Mana-Ye Au Lerimu Yemo yu uluma tepa molemo mele sike.’ ningu tondolo-munduku pilingíl yamboma pali molko konjiku mindi pangi!’ nimbe Pulu Yemone ‘Yu unjuna ola uku toko panjengi!’ nimbé nirimu.” nimbe Yesusini nirimu.
16 “Pulu Yemone mana-yamboma konopu paa aili-tepa monjipelie yunge Malo telumu mindi molorumu nakolo yu ˻mana-yamboma˼ sirimu. ‘Yambomane yu-mele-mele ‘Yu sike ˻Pulu Yemone sirimu, olio lipe taponjipe nokopa konjili yemo˼.’ ningu yu tondolo-munduku pilku molonge yamboma mindili nongo molko kenjingí koleana naa puku, alieli molko konjiku mindi pangi!’ nimbe yunge Malo sirimu.m
17 “Pulu Yemone Malondo “Nuni mana-yamboma kote pilku ene ka-ulkena liku mundeni pui!” ni naa nirimu. ‘Nanga kangomo ene lipe taponjipe mindili nolemelka aulkena wendo lipe na-kinie molko konjingí aulkena lipe monjipili!’ nimbe yuni Malondo “Ma-koleana manie pui!” nimbe yu lipe mundurumu.n
18 Yambo “Yu sike ˻Pulu Yemonga Malo, olionga nimbe tenjirimu yemo˼.” nimbe tondolo-mundupe pilipe molomba yambomonga kote naa pemba. Nakolo yambo tene ‘Yu aku-sipe naa molemo. Nanga nimbe ulu te naa tenjirimu.’o nimbe pilimbe yambomo, yunge kotemo koronga wendo okomo. Kanu yambomone Pulu Yemonga Malo telumu mindi molemo kanumundu ‘Yu sike Pulu Yemonga Malo mólo!’ nimbe, yu nimbe naa pilimu-na kanu yambomo kote pilimo yemone lipe kote tenjipe “Yu kolopili!” nimbe koronga-ou tenjirimu.
19 “Kotemonga ungu-pulumu i-sipe: Pa telimu mana wendo orumup nakolo mana yambomane ulu-pulu kerime mindi tekolie pa telimu konopu naa monjiku sumbulu tolimu mindi konopu monjilimele.
20 Yambo ulu-pulu kerime telemelemane pa telimu kanoko keri kanokolie, ‘Pa telimuni nanga uluma mona lenjimbe.’ ningu pa telimunge wendo naa olemele.
21 Nakolo yambo ulu sikema telemo yambomone ‘Pulu Yemone na lipe taponjilimo-na i ulu-pulu-sikema telio kene telio uluma yambomane kanangi!’ nimbe pa telimunge yu wendo olemo.” nirimu.
No-Linjili Jonone Yesusi Molorumu Mele Nimbe Sirimu Temanemo
22 Pe Yesusi kinie yunge lombili andoli yema kinieq kolea Judia-Disiriki lerimu kolea tenga pukulie niringimuni, akuna wale mare yu ene-kinie molkolie, yuni yamboma no linjirimu.r
John testifies about Jesus (John 3:22-36)
23 Jono yu yamboma no linjipe molorumula. Kolea Sellimi nondopa kolea Inono no aisili omba purumu-na Jono yuni akuna yamboma no linjirimu, yambo aisili yu molorumuna no lingí oringi.
24 (Jono yu ye-nomi-kingi Erotene ka ou naa sipilis aku tepa molorumu.)
25 Walse ˻No-Linjili˼ Jononga lombili andoli yema kinie Juda ye te kinie anju-yando tondolo kere-pali ningulie, “Olio nambe-tepo kimbu ki kangime kulumiye tomolo kinie Pulu Yemone olio kake temba kanombaye?” ningu kere-pali niringi.
26 Pe Jononga lombili andolime Jono yu molorumuna ongolie ningindu: “Rapai,t ye te No-Jodane nekendo nu pea moloringili kinie nuni yu molemo mele ningu sirinu kanu yemone no linjipe molemona yambo aisili pukumili.” niringi.
27 Aku niringi pilipelie Jonone pundu topa nimbendo: “Mulú-koleana Pulu Yemone ‘Ye te ulu te tepili!’ ni naa nilkenje kanu yemone manda naa telka.
28 Nane ene ou nimbu sirindu piliringi mele i-sipe: Nane nimbundu: “Pulu Yemone ‘Olio nokopa konjimbe ye te lipu mundumbu.’ nimbe mako torumu ye-nomi Kirasimuu na mólo! Pulu Yemone ‘Ye-nomi Kirasimu molomba yemo yu ombá.’ nimbe na ou kumbi lepa lipe mundurumu.” nirindu piliringi kanumu.
29 Ye ambo limbe ambomo yemo yunge mindi. Ye ambo limbe yemone ungu nimbé mele yemo yunge pulu lemba yemone ambo limbe yemone ungu nimbé mele pilimbendo pulu lemba yemo komu tenjipe molomba. Yunge ungumu pilipelie paa konopu simbe. Akumunge yemo-kinie pulu lemba yemo konopu simbe mele na aku-sipu kamu konopu silio.v Ambo limbe yemo olandopa. Yunge pulu lemo yemo yu-kinie we tapu topa molemo, aku yemo maniendopa.
30 Aku-sipe mele ne no linjipe molemo yemo yunge imbimu sike paa olandopa pumbe. Nanga imbimu sike manie pumbe.” nirimu.
31 Ye wi-ola molopalie maniendo orumu yemo yambomanga pali yu olandopamo. Olio mana-yambo molemoloma mana-mélemanga mindi molopo, mana-mélemanga mindi imbime nimbu sipu temane tolemolo. Olio maniendopa, mulú-koleana molopalie manie orumu yemo yu yambomanga pali olandopa.
32 Yuni mulú-koleana kanopa pilirimu mele nimbe silimo nakolo yambomane “Kolo tokomo.” ningu liku su siku naa pilimele.
33 Yambo tene yunge ungumu pilipe lipe “Sike nikimu.” nimbé yambomone aku-sipe “Pulu Yemone sike nilimo.” nimbéla.
34 I Pulu Yemone lipe mundurumu yemo Pulu Yemo yunge Minimu paa aili-tepa silimo konopuna pepa kapola telemo-na yuni Pulu Yemonga ungumu sumbi-sipe nilimo.
35 Lapane Malo konopu monjipelie ‘Mélema pali Malone nokopili!’ nimbe yu sirimu.
36 Yambo tene ‘˻Yu sike nikimu.˼ Yu sike Pulu Yemonga Malo.’ nimbe tondolo-mundupe pilimbe yambomo alieli konde molopa mindi pumbe, nakolo yambo te Malo bulu sipe yunge ungumu lipe su sipe naa pilimbe yambomo konde mololi ulu-pulumu naa limbe. Aku yambomo kinié kepe pe kamu-kamu kepe Pulu Yemone mindili lipe simbe ulu-pulumu yu-kinie pelemo.