2 (Nakolo Yesusi yu lombili puringi yamboma yuni no naa linjirimu, yu lombili andoli yemane^d yamboma no linjiringi.)

3 ˻Yesusini yambo no linjirimu˼ temane akumu Parisi-yemane piliringi mele pilipelie Ailimuni kanu walemonga kolea Judia-Disiriki mundupe kelepa kolea Gallilli-Disirikindu kelepa pumbe purumu.

4 Yu Gallilli purumu aulke akumu kolea Sameria^e ai-suku-singine lepa purumu.

5 Aulkemo aku-sipe lerimu-na yu kolea Sameria lerimu taono tenga orumu, aku taonomonga imbimu Saika. Aku koleamo Juda-yambomanga anda-kolepa Jekopone yunge malo Josepo sirimu mamonga nondopa lerimu.

6 Jekopone ‘No molopili!’ nimbe muru akurumu aku no-mongolomo kanu mamonga lerimu.^f Yesusi aulke suluna orumumunge siye terimu-na aku no-kélona omba manie molopa mulu pilirimu. Kolea ai-tangoli mele akuna omba molorumu.

7-8 (Yesusi yu lombili andoli ye pea oringime yu mulu pilipe molopili ene langi topo toko lingíndu Saika taonona puringi.) Pe yu mulu pilipe molorumu kinie Sameria ambo te no kolombando orumu kinie Yesusini yundu nimbendo: “No te nambo kolko si!” nirimu.

9 Sameria-ambomone yundu nimbendo: “Nu Juda-yemo. Na Sameria-ambomo. Pe nambemu-na nando “No kolko si!” nikinuye?” nirimu. (Aku nirimumunge ungu-pulumu i-sipe: Juda-yambomane Sameria-yamboma konopu keri panjiku langi telumu moke teko naa nongo, ene-kinie teluna tapu toko naa andoringimunge aku nirimu kanumu.)

10 Yesusini pundu topalie ambomondo nimbendo: “Pulu Yemone mélemo we silimo méle pilku, i ye “No kolko si!” nikimu yemo kanoko imbi silinanje yundu “No si!” nilina kinie yuni konde molopa mindi puli nomo^g nu silke.” nirimu.

11 Ambomone pundu topa nimbendo: “Ailimu, nu no koloni mingi te naa menu, no-mongomo paa maniendopa lemo. Pe i no konde molopa mindi puli nikinu nomo nu tena kolkolie siniye?

12 Olionga anda-kolepa ye Jekopone i no-mongolomo sirimu kanu yemo, yu kinie yunge ambolangoma kinie kongime kinie i nomo noringi, ‘kanu yemo maniendopa nu olandopa.’ ningu nikinuye?” nirimu.

13 Yesusini pundu topa nimbendo: “I no-mongolona no nonge yamboma altopa no waka lemba,

14 nakolo nane no simbu nonge yamboma pe ene no paa waka naa lemba. Nane paa sike nikiru: “Nane no simbu akumu nonge yambomanga konopuna no pikipe mindi molopa, konde molko mindi pungí ulu-pulumu simbe.” nikiru.” nirimu.

15 ˻Yesusini ungu-iku torumu mele naa pilipelie nirimumuni,˼ ambomone yundu nimbendo: “Ailimu, na no altopa waka naa lepili, ya altopo taki-taki ombo no naa kolambo kene nuni no nikinumu nambo si!” nirimu.

16 Yuni yundu nimbendo: “Nunge yemo pea kelko wangili, puku walsi-pui!” nirimu.

17 Ambomone pundu topa nimbendo: “Nanga ye te naa molemo.” nirimu.

18 Ou nu ye te-pakara purunu. Pe kinié nu ye te pea pelembelemo nunge emena mólo! Nuni kinié ungu nikinumu sike nikinu.” nirimu.

19 Ambomone yundu nimbendo: “Ailimu, na pilkiru nu Pulu Yemone ungu-umbu tonjilimoma pilku yamboma ningu silino ye te lepamo.^h

20 Olionga anda-kolepalimene i ma-pangine Pulu Yemo popo toko kapi niringi nakolo ene Juda-yambomane ningindu: “Pulu Yemo popo toko kapi ningí koleamo paa Jerusalleme mindi.” nilimele.” nirimu.

21 Yesusini tondolo-mundupe nimbendo: “Ambomo, nane ya nikirumu nu pilku lieni! Wale te wendo ombá kanu walemonga i ma-pangine kepe Jerusalleme kepe yambomane Lapa popo toko kapi naa ningí.” nirimu. ˻Aku ungumunge pulumu i-sipe: “Koleamanga pali Pulu Yemo popo toko kapi ningí.” nimbe nirimu kanumu.˼

22 “Ene Sameria-yambomane popo toko kapi nilimele yemo pilku sunduku we nilimele. Olio Juda-yambomane popo topo kapi nilimolo yemo molemo mele pilipu konjilimolo. Nambemu-na, mana-yamboma Pulu Yemone lipe taponjipe, mindili nolemelka aulkena wendo lipe, yu-kinie pea molko konjingí aulkena lipe monjilimo ulu-pulumu Juda-yamboma-kinie wendo ombá, enene koleamanga pali yamboma liku ora singímunge aku-sipe.

23 Nakolo Pulu Yemo sike popo toko kapi ningí yambomane Taranga ungumu ‘Sike ungumu.’ ningu pilku yunge Minimuni tondolo silimomonga Pulu Yemo popo toko kapi ningí wale wendo ombámo koronga wendo omu. Pulu Yemo aku-siku popo toko kapi ningí yamboma Tarane korolemomonga kanu walemo wendo omu.

24 Pulu Yemo yu minimu, akumunge yu popo toko kapi ningí yambomane yunge Minimuni tondolo silimomonga ‘Yunge ungumu sike-ungumu.’ ningu sumbi-siku aku tenge.” nirimu.

25 Ambomone nimbendo: “Ye-nomi Mesayamoⁱ ombá. Yu ombalie ungumanga puluma pali olio mimi-sipe nimbe simbe mele na pilipu molio.” nirimu. (Ipuru-Unguna ‘Mesaya’ niringi akumu, Giriki-Unguna ‘Kirasi’^j niringi aku ungutolonga pulumu telumu. Ungutolonga pulumu i-sipe: Pulu Yemone “Olio nokopa konjimbe ye te lipu mundumbu.” nimbe mako torumu ye-nomi kanumu.)

26 Kanu-kinie Yesusini tondolo-mundupe nimbendo: “Nu “Ye-nomi Mesayamo ombá.” nikinu akumu na. Na nu-kinie ungu nimbu molkombolo-yemo kinie, nuni “Ye-nomi Mesaya” nikinu kanu yemo kinie, ye telumu.” nirimu.

27 Yu aku nimbe molopili yu lombili andoli yema kelko yando ongolie niringimuni, yu ambo te-kinie ungu ningu moloringili kanokolie mini-wale munduku konopu aisili liku munduringi. Nakolo enenga ye tene “Nu nambolka mélte lini tekenoye?”, molo “Yu-kinie nambemu-na ungu ningu molembeleye?” ningu tene kepe naa walsiringi.

28 Kanu-kinie ambo kanumu yunge no-mingimu mundupe kelepa yu kelepa kanu taonona yando pupe yambomando nimbendo:

29 “Na ulu terinduma pali ye tene na nimbe simu yemo ene ongo kaname! Pulu Yemone “Olio nokopa konjimbe ye te lipu mundumbu.” nirimu ye-nomi Kirasimu yunje.” nirimu.

30 Aku nirimu-na pilkulie yamboma taono munduku kelko Yesusi molorumuna onge oringi.

31 Aku teko molangi yu lombili andolimene yu paa karaye tekolie ningindu: “Rapai,^k langi te nou!” niringi.

32 Nakolo yuni enendo nimbendo: “Na langi nombómo lemo, nakolo akumu ene naa pilku naa kanolemele.” nirimu.

33 Aku nirimu pilkulie yu lombili andolimene anju-yando kere-pali ningulie ningindu: “Yambo tene langi ou memba omba simunje?” niringi.

34 Yesusini nimbendo: “Nanga langi i-sipe: Na ‘kongono teani pui!’ nimbe lipe mundurumu yemone^l konopu silimo uluma tepo, yunge kongonomo tepo pora simbu. Akumu nanga langimu.^m

35 Enene “Oli kise omba pumbe kinie rasi-witi nou lemba, inie topo lipu nosimulú.” nilimele kanumu. Nakolo nane enendo nimbundu: “Poniema kaname!ⁿ Langi pali koronga nou lemu.” nikiru.

36 Langi inie tonjilimo yemo langi inie tonjilimomonga méle kaloli koronga lipe, ‘Lepa mindi pupili!’ nimbe langime inie tonjipe molemo. Aku tenjilimomonga ponie tepa langi panjirimu yemo kinie langi inie tonjilimo yemo kinie peatolo konopu singilí.

37 Akumunge ungu te pelemomo sike. ‘Ye tene langi umbu tonjilimo. Tene langi inie tonjilimo.’ nilimele ungumu sike.

38 Langi enene umbu naa toringime nane “Ene inie to-pai!” nimbu lipu mundurundu. Yambo-lupemane ponie mindili siku teringi, nakolo yambo-lupemane teringi langime ene inie tolemele.” nirimu.

39 Ambomone “Na ulu terinduma pali yuni na nimbe simu.” nirimu-na pilkulie kanu taonona moloringi Sameria-yambo^o aisili ‘Yu sike ˻Pulu Yemone ‘Ene nokopa konjimbe ye te lipu mundumbu.’ nimbe ou mako torumu˼ ye-nomi Kirasimu.’ ningu tondolo-munduku piliringi.^p

40 Akumunge Sameria-yamboma yu molorumuna ongo, “Nu paa ya pea molamili!” niringi, kanu-kinie wale talo yu ene-kinie molorumu.

41 Kanu-kinie yambo aisili pea yu-yuyu ungu nirimumu pilkulie ‘Yu sike ˻ye-nomi Kirasimu omba molemo. Yuni sike nikimu.˼’ ningu tondolo-munduku piliringila.

42 Enene ambomondo ningindu: “Nuni ou ungu ninumu pilipu ‘Yu sike ye-nomi Kirasimu.’ nimbu tondolo-mundupu pilímulu nakolo kinié olio-oliolio yunge ungumu pilipulie ‘Sike i yemo olio mana-yamboma Lipe Taponjipe Mindili Nolemelka Aulkena Wendo Limo Yemo^q molemo.’ nimbu tondolo-mundupu pilkimulu.” niringi.

43 Sameria-yamboma-kinie wale talo molopalie Yesusi ene mundupe kelepa kolea Gallilli-Disiriki pumbe purumu.

44 (Gallilli akumu Yesusi yunge pulu-koleamo. Ou walse Yesusi yuni nimbendo: “Pulu Yemone ungu-umbu tonjilimoma pilipe yamboma nimbe silimo ye tene yunge pulu-koleamonga yamboma ungu nimbe silimo kinie pilkulie nilimelemone, enene ‘Yu olionga we-yere. Yu imbi mololi ye te mólo!’ ningu yu nilimo unguma naa pilku limele.” nirimu kanumu.)^r ˻‘We-koleamanga yambomane kanu yemonga ungumu limele nakolo yunge pulu lemo yambomane naa pilku limele.’ nimbe nirimu.˼

45 Yu Gallilli suku purumu kinie Gallilli-yambomane yu orumu kanokolie “Papu okono.” ningu konopu siringi. Ou Pulu Yemone Juda-yambomanga anda-kolepalime Naa Topa We Omba Purumu mele^s piliringi walema wendo orumu kinie ene Jerusalleme puku molangi yuni akuna ulu mare terimu kanoringimunge enene aku-siku teringi.

46 Yesusi kolea Gallilli-Disiriki pupelie altopa Kena-taonona sukundu orumu. Kanu taonomonga ou yuni umbu-no koloringime no-waene au lenjirimu.^t Kapeniame taonona ye-nomi-kingimunge kongono tenjili ye-aili te kanu kolea Kena omba molorumu, kanumunge malo kuru aili te torumu.

47 ‘Yesusi kolea Judia-Disiriki mundupe kelepa kolea Gallilli-Disiriki sukundu orumu.’ pilipelie nirimumuni, kanu yemo Yesusi molorumuna pupelie nirimumuni, yundu mawa tepalie nimbendo: “Nanga kangomo nondopa kolomba tekemo kene maniendo ongo yu teko konde li!” nirimu.

48 Aku nirimu kinie pilipelie Yesusini yundu nimbendo: “ ‘Na sike ˻Pulu Yemo-kinie molopalie mana maniendo orumu˼.’ we ningu naa pilingí lemo. Pulu Yemone ulu-tondoloma telemo mele ‘Yuni aku-sipe mele temba kinie kanopolie ‘Yu sike ˻Pulu Yemo-kinie molopalie mana maniendo orumu˼.’ nimbu tondolo-mundupu pilimolo.’ ningu nando alieli “Ulu-tondoloma ongo tei!” ningu mawa telemele.”^u nirimu.

49 Kingimunge kongono tenjili ye-ailimuni yundu nimbendo: “Ailimu, nanga kangomo mini ou naa pupili nu welea maniendo oi!” nirimu.

50 Yesusini yundu nimbendo: “Marena konde pumu kene pui!” nirimu.

51 Maniendo pumbe purumu kinie yunge kendemandema aulkena ongo yu maniendo orumu kanoko likulie enene yundu ningindu: “Marena konde pumu.” niringi.

52 Kanu-kinie yuni enendo nimbendo: “Ena nambolkana kuru topa kelemuye?” nimbe walsipe pilirimu.

53 Lapane pilipelie Yesusini “Marena konde pumu.” nirimu kanu enamonga ‘Kangi nomba kelemu lepamo.’ nimbe pilipelie, yu kinie yunge ulke peringi yamboma kinie enene ‘Yesusi yu sike ˻Pulu Yemo-kinie molopalie mana manie orumu lepamo˼.’ ningu tondolo-munduku piliringi.

54 Kolea Judia-Disiriki mundupe kelepa^v kolea Gallilli-Disiriki omba molopalie Yesusini kangomo tepa konde lirimu kanu ulumu aku koleana yu molorumu mele lipe ora sirimu ulu-tondolo talo-sipe mele terimu. Te ou walse aku koleana umbu-no koloringime no-waene au lenjirimu kanumu.^w