Kolomongo-Aili 2–4 pali:- YESUSINI ‘YU MOLORUMU MELE KANANGI LIPU ORA SIEMBO!’ NIMBE ULU TONDOLO MARE PULU POLOPA TERIMU TEMANEMO
Kolomongo-Aili 2-4
Akumunge, Yesusini Ulu-Tondoloma Pulu Polopa Tembando Umbu-Nomo No-Waene A Lenjirimu Temanemo
2
(Pulu Yemonga ungumu. Kolomongo-kanga wane.)
Wale yepoko-sipemonga Kena taono, kolea Gallilli-Disiriki sukundu lerimu, akuna ye te ambo limbendo langi koyopa yamboma simbe terimu, akuna Yesusi anumu pea máku toko moloringi.
2 Yesusi kinie yu lombili andolime kiniea kanu ambo limbe yemone “Ene kepe langi pea namili wai!” nirimu-na ene ongo langi pea noringi.
3 Langi nongo molangi no-waene pora nirimu kinie Yesusi anumuni Yesusi yundu nimbendo: “Enenga no-waene pora nimu-na mini-wale mundukumili.” nirimu.
4 Yesusini yundu nimbendo: “Ambomo, nane ulu temboma nunge kongono te mólo! Nane ungu tembo walemo ou wendo naa oli.”b nirimu.
The miracle at Cana (John 2:1-12)
5 Yunge anumuni ˻ulke pulu yemonga˼ kendemande-yambomando nimbendo: “Yuni enendo “Teai!” nimbé mele aku-siku teai!” nirimu.
6 Juda-yambomane no lengendo no kolko monjiringi ma-mingi aili talo-pakara akuna angilirimu. Mingimenga tenga-tenga nimbe no manda manjili wane anderete (100) llita molo wane anderete teti (130) llita mele manda molorumu.
7 Yesusini ˻ulke pulu yemonga˼ kendemande-yambomando nimbendo: “Mingi kanga marenga no puku kolkolie, andi mingi aili lemomanga munduku peke siei!” nirimu. Kanu-kinie ene no kolko paa peke siringi.
8 Yuni enendo kelepa nimbendo: “Olama liku mundukulie langi nokoli yemo mengo puku siei!” nirimu. Kanu-kinie mengo puku yu siringi.
9 Kanu langi nokoli yemone umbu-nomo no-waene au-lerimu naa kanopalie nomo we nomba pilirimu. Nakolo kendemande no koloringimene nomo kanoko imbi siringi. Langi nokoli yemone nomba pilipelie ambo limbe yemondo “Oi!” nimbelie
10 yundu nimbendo: “Yemane pali alieli no-waene peangamo ou sikulie, pe yambomane no aisili nongo pora siku, altoko ko naa pilimele kinie no-keri mele silimele. Nakolo nuni no-waene peangamo ou we nosikulie pe kinié sikinumu, ˻paa papu sikinu˼.” nirimu.
11 Kolea Gallilli-Disiriki sukundu lerimu kolea Kena taonona Yesusini terimu ulu akumu pe yu molopa kongono terimu mele lipe ora sirimu ulu-tondolomac tembando i ulumu pulu-pulu terimu. Aku-sipe yu we-ye te mólo, yu Pulu Yemonga tondolo peli yemo ‘ene kanangi!’ nimbe lipe ora sirimu. Kanu-kinie yu lombili andolimene ‘Yu paa sike ˻Pulu Yemone lipe mundurumu yemo˼.’ ningu tondolo-munduku piliringi.d
12 Ye ambo limbemonga langi nongo pora sikulie Yesusi kinie anumu kinie angenupili keme lombili andolime keme Kapeniame taonondo pukulie, akuna wale pokore moloringi.
Pulu Yemo Popo Toko Kaloringi Ulke-Tembelena Bisinete Teko Moloringi Yema Yesusini Topa Makororumu Temanemo
13 Juda-yambomane ponie tenga-tenga kolea-aili Jerusalleme ongo akuna suku Pulu Yemone enenga anda-kolepalime Naa Topa We Omba Purumu mele piliringi walemae nondopa wendo ombá terimu kinie Yesusi Kapeniame taono mundupe kelepa kolea-aili Jerusalleme olando purumu.
Jesus in the Temple courtyard (John 2:13-25)
14 ˻Pulu Yemo popo toko kaloringi˼ ulke-tembele akuna sukundu pupe kanorumu kinie kongi pirimu-kao kondema kinie kongi-sipisipi kondema kinie kera-waembono kondema kinie kou-mone liku bisinete teringi yamboma kepe, kou-mone alowa teringi yamboma kepe akuna sukundu aku teko moloringi kanorumu.f
15 Kanopa keri kanopalie nirimumuni, ka mare lipe lakopalie kanu ka-pulsemone kongime pali ulke-tembelena topa makoropa pena-pena tepa, kou alowa teringi yambomanga kou-mone walena perimuma lipe ondo-lepa enenga kou nosiringi poloma lipe topele topalie,
16 kera monjiku bisinete teringi yambomando nimbendo: “I Taranga ulkena bisinete naa teko i mélema wendo liku mengo pame! I Taranga ulkemo sitoamoye?” nirimu.
17 Yuni aku terimumu yu lombili andolimene kanokolie enene ungu te Pulu Yemonga bokuna sukundu nimbe molemomo konopuni piliringi. Aku ungumuni nimbendo:
“Na paa mindili sipulie nunge ulkemo
‘Angilipe peanga tepili!’ nimbu nokopo molio.” g Konana 29:9
nimbe molemo kanu ungumu konopuni piliringi.
18 Kanu-kinie yuni terimumu Juda-ye aili˼meneh kanokolie yundu ningindu: “Nu namba nambolka nambare likulie aku-siku tekenoye? ‘Lipu ora siembo!’ ningu Pulu Yemone “Tei!” nimu liemo Pulu Yemone telemo mele ulu-tondolo te olio kanamili tei!” niringi.i
19 Yesusini enendo pundu topa nimbendo: “Enene i ulke-tembelemo tekisingí kinie nane wale talo takopo, yepoko-sipemonga takopo limbu.” nirimu.j
20 Nirimu mele Juda ˻ye-aili˼mene pilkulie ningindu: “I ulke-tembelemo ponie paono talo omba pupe kelepa ponie talo-pakara omba purumu kinie takoko liringi kanumu. Pe nuni “Wale talo takopo, yepoko-sipemonga takopo limbu.” nikinuye?” niringi.
21 Nakolo yuni “ulke-tembelemo” nirimu akumu yunge kangimundu nirimu.
22 Kanu-kinie pe Yesusi kolopa wale talo óno-koleana pepa, yepoko-sipemonga lomboropa ola molorumu kinie yu lombili andolimene yuni ou ulke-tembelemondo nirimu mele kelko piliringi. Pilkulie Pulu Yemonga bokuna ˻Yesusindu˼ nimbe molorumu ungumu kinie Yesusini nirimu ungumu kinie ‘Sike.’ ningu tondolo-munduku piliringi.
Yesusini Yamboma Pali Teko Moloringi Mele Pilipe Kelerimu Temanemo
23 Pulu Yemone Juda-yambomanga anda-kolepalime Naa Topa We Omba Purumu mele piliringi walemangak Yesusi Jerusalleme molopalie yambomane yuni yu molopa kongono terimu mele lipe ora sirimu ulu-tondolo terimuma kanokolie ‘Yu sike Pulu Yemone ‘Ene nokopa konjimbe ye te lipu mundumbu.’ nimbe mako torumu yemo omba molemo.’l ningu tondolo-munduku piliringi.
24-25 Nakolo Yesusini yamboma pali teko moloringi mele pilipe kelepalie uluma pali yambo tene yu nimbe naa sipili yu-yuyu pilipe molorumu. Enene ningu piliringi mele yuni konopuni pilipelie, ˻‘We ningu pilimele. Sike kinié aku-siku ningu pilimele nakolo opali kepe talú kepe konopu alowa tekolie na ‘Topo konjemili!’ ningu pilingí.’ nimbe pilipelie,˼ ‘Ene-kinie we walu-sipu molambo!’ ni naa nirimu.