Ya Mana Nosilimolo Mélemando Yesusini Ungu Te Nirimu Temanemo
16
(Pulu Yemonga ungumu. Kolomongo-kanga wane.)
˻Aku nimbelie˼ Yesusini yu lombili andolimendo nimbendo:
“Walse ye-kamako te molorumu kinie yunge méle nosirimumanga nokoli ye te molorumula. Walse yambo marene kamakomo molorumuna ongo, yunge mélema nokonjili yemone terimu mele ongolie yundu ningindu: “Nunge méle nosilinomanga nokonjili yemone nu tepa kenjipe, nunge mélema ‘We manie pupili!’ nimbe yu akuma nokopa naa konjilimo.” niringi.
2 Aku niringi pilipelie kamakomone kanu yemondo ‘Oi!’ nimbelie yundu iri topa nimbendo: “I ungu nambolka ungumu nikimiliye? Nuni nanga mélema teko kenjilino mele níngi kinie pilipulie nuni nanga mélema terinu teleno mele bokuna toko, yando sikulie pe pani! Nu nanga mélema altoko manda naa nokani! Nu makorombo.” nirimu.
3 Kanu mélema nokonjili yemo yuyu nimbendo: “Apa! Kinié nambe-teamboye? Nanga ailimuni nanga kongono teliomo wendo lipe na makoromba tekemo kene na nambe-teamboye? Na ma akumbundu tondolo naa pulimo-na aku kongonomo manda naa tembo. Yamboma langi mawa tembondo pipili kolombo.
4 Akumunge na tembo mele kinié pilipero. ˻Nanga ailimuni pundu anjirimu yamboma lipu taponjipulie enendo ‘Pundu ekendo mindi tangi, ekendo manie pupili!’ nimbú kinie˼ pe na makoromba kinie kanu yambomane na konopu siku liku taponjikulie nando “Pea peamili oi!” ningí.” nimbelie nirimumuni,
5 yunge ailimuni pundu anjirimu yamboma ‘Yu-mele-mele wangi!’ nimbe kumbi-lepa orumu yemondo nimbendo: “Nanga ailimuni nu-kinie méle nambepa pundu anjirimuye?” nimbe walsirimu kinie
6 yuni pundu topa nimbendo: “Unju-ollipi mongo wele-mingi pape-paono pundu anjirimu.” nirimu kinie
kamakomonga mélema nokonjili yemone yundu altopa nimbendo: “Pundu anjili bokumu i sikiru; ya manie molko, pape-paono toko monjiringi gomomo ora toko ele-tekolie kolo-wangoko gomo kondena wele-mingi tu-paono-tene welea toko monji!” nirimu.
7 Yunge bulkundu orumu yemondo nimbendo: “Nanga ailimuni nu-kinie méle nambepa pundu anjirimuye?” nimbe walsirimu kinie
yuni pundu topa nimbendo: “Rasi-witi wale pape-paono pundu anjirimu.” nirimu kinie
mélema nokonjili yemone yundu altopa nimbendo: “Pundu anjili bokumu i sikiru; ya manie molko, rasi-witi wale pape-paono toko monjiringi gomomo ora toko ele-tekolie kolo-wangoko gomo kondena rasi-witi wale po-paono welea toko monji!” nirimu.
8 Yu aku terimu pilipelie ye-kamako ailimuni kanu tepa kenjili yemo yu kapi nirimu. Yunge mélema sike wa-mele lipe tepa kenjirimu nakolo yunge pilipe konginjilimu paa olandopa perimu pilipelie yu kapi nirimu.
“Ya mana molko, Pulu Yemo konopu naa monjilimele yamboma, enenga pilipe konginjilimu paa olandopa; pa teline molko Pulu Yemo konopu monjilimele yamboma enenga pilipe konginjilimu maniendopa. We-yambomane yambo te-kinie kou-kongono tengendo, molo ulu te tengendo, aulkemo sumbi-siku kanoko akisiku konjilimele; pa teline molemele yamboma aku-sipe tondolomo maniendopa pelemo. We-yamboma aku-siku molemelemonga ˻ye-ailimuni tepa kenjili yemo aku-sipe kapi nirimu.˼” ˻nimbe Yesusini nirimu.˼
9 “Nane enendo nimbu siembo: “Kinié ya mana molkolie mana-mélema liku ‘Yamboma nunge angenali mele molangi!’ ningu nunge méle nosilinomanga ene liku taponjeni! Pe mélema pora nimbé kinie nu kolea peanga kamu kamu lembana puni kinie akuna molongemane nundu “Ya kamu pea molamili!” ningí.” nikiru.” ˻nirimu.˼
10 “Yambo tene yambo tenga méle layetolo nokopa konjinjilimo kinie kanopalie ‘Méle aisili simbu kinie nokopa konjinjimbe lemo.’ nilimo. Yambo tene yambo tenga méle layetolo nokopa kenjinjilimo kinie kanopalie “Méle aisili simbu kinie nokopa kenjinjimbe lemo.” nilimo.
11 Nuni ya mana nosilimele mélema nokoko naa konjinu liemo nu paa sike méle peanga aisili lupe-lupe Pulu Yemone silimoma ‘Nokonjeni!’ manda naa nimbé. ˻Ya mana nosilimele mélema maniendopa, Pulu Yemone silimo méle aisili peanga lupema olandopa kanumu.˼
12 Nuni ya mana nosilino mélema paa sike nunge mólo; kanu mélema Pulu Yemonga. Akumunge nuni yunge mélema nokoko naa konjinjinu liemo pe yuni ‘nunge noseni!’ nimbe simbe tepa molemo melema manda simbeye?
13 “Kendemande-yambo teluni ye aili talonga kongonotolo lipe tere lepa manda naa tenjimbe. Ye-aili te konopu keri panjipe, te konopu monjimbe. Molo aku naa temu liemo ye-aili tenga ungu nimbéma paa konopu sipe pilipe lipe kongono nimbéma tondolo-mundupe tenjipe, te konopu keri panjipe yunge ungu nimbéma ta nimbé. Yambomane Pulu Yemonga kongonomo kinie Kou-Monemonga kongonomo kinie liku tere lelko manda naa tenjingí.” nirimu.a
14 Yesusini aku-sipe nirimu pilkulie Parisi yema ene kou-mone kepe mélema kepe konopu paa aisili monjiringimunge yuni ungu nirimumu liku su siku tae teringi kinie
15 Yesusini enendo nimbendo: “Ene-eneno i-siku ningindu: ‘We-yambomane olio Parisi-yema konopu sumbi-sipe pepa, peangama molemolo kanoko niengi!’ ningu molemele nakolo enenga konopuna paa sike pelemo mele Pulu Yemone kanopa molemo. Mana-yambomane kanokolie ‘Méle paa peanga, méle paa olandopamo.’ nilimele mélema Pulu Yemone kanopa keri kanolemo.” ˻nirimu.˼
Ungu-Manemanga Kinie, Temane-Peangamonga Kinie, Yesusini Ungu Te Nirimu Temanemo
16 “˻No-Linjili˼ Jono ou mana naa omba molopili Pulu Yemone yamboma ‘Teai!’ nirimu mele ˻Pulu Yemonga ungu-manema yando nimbe sirimu ye˼ Mosisini torumu bokuma kinie, Pulu Yemone ungu-umbu tonjirimuma pilku yamboma ningu siringi yemane boku toringime kinie, kanu bokumanga molorumu, yandopa-yandopa mane siku yamboma ningu siringi.b Nakolo kinié, Pulu Yemone omba ye-nomi-kingimu molopa yamboma nokopa konjimbe temane-peangamo topo silipu andolemolo. Pulu Yemo ye-nomi-kingimu molopa yamboma nokomba yambo-talapenac sukundu puku molongendo yamboma ekelepa teko pulimele.
17 Mulú kinie ma kinie walse manda pora nimbé nakolo Pulu Yemone ungu-manema Mosisini yando nimbe sipe boku torumu molemo imbimenga imbi telu paa wallo-kolte kepe manie manda naa pumbe.d Pulu Yemonga ungu-manema pali lepa mindi pumbe.” ˻nirimu.˼
Ye Tene Ambo Te “Kelko Pui!” Nilimomonga Yesusini Ungu Te Nirimu Temanemoe
18 “Ye tene yunge ou limo ambomo makoropa “Kamu pui!” nimbelie kelepa ambo te limo kinie aku yemone wa-ulu-kerinele telemo. “Pui!” nimbe makorolemo ambomo pe ye tene yu limo kinie kanu yemo kepe wa-ulu-kerinele telemóla.” ˻nirimu.˼
Ye-Kamakomo Kinie Ye-Koropa LLasirasi-tolonga Temanemo
19 ˻Nimbelie Yesusini kelepa temane te topalie nimbendo:˼
“Ye-kamako te molorumu. Yunge wale-pakoli paa peanga kou paa olandopa pulime pakopa, alieli yunge ulkena langi peangama mindi nomba perimu.
20 Ye-koropa te molorumula, kanumunge imbi LLasirasi. Yu enamanga taki-taki ‘Kamakomone yu kondo kolopa kou-mone te molo langi te simbenje.’ ningu yunge ulke-kerepuluna ‘Molopili!’ ningu mengo ongo monjiringi. Yunge kangime pali ereli terimu.
21 Aku erelime owamane ongo pene mane leringi. Yu ‘Kamakomonga langi-pundu manie pumbema lipu nombó.’ nimbe molorumu.
22 Pe walse koropamo kolorumu. Kolorumu kinie angellomane yunge minimu liku, ˻Juda-yambomanga pulu-pulu anda-kolepa˼ Eporayamo molorumuna mengo puringi.
Kamakomo kolorumula. Yambomane yu ono teringi.
23 Kanu-kinie yu tepe-koleana mindili nomba molopalie, yuni mongone olando sipe kanopa aulke suluna Eporayamo kanopa LLasirasi pea moloringili kanorumu.
24 Kanopalie ungu te tondolo-mundupe nimbendo: “Toto Eporayamo, na kondo kolkolie ‘LLasirasini nona ki-sundumu manie mundupelie ‘Nanga alimbeluna koma lepili!’ nimbe tenjipili!’ ningu yu yando munduyo! Na i tepemonga paa mindili nombo molio.” nirimu.f
25 Nakolo Eporayamone yundu nimbendo: “Toto, ou moloringili mele pílie! Elte mana moloringili kinie nu méle aisili nosiku kapola molorunu; LLasirasi yunge méle kerime nosipe, molopa kenjirimu kanumu. Pe kinié yu konopu peanga pepili molemo, nu mindili nongo moleno.
26 Molo nane “E.” nilkenje yu andine manda naa-la olka. Olio kinie ene kinie ai-suku-singine ˻Pulu Yemone˼ kombu ailimu lirimu lemo kanumu. Pe kinié ya molemolo yamboma ‘Ene molemelena anju pamili!’ ningí kinie manda naa pungíla; enenga yamboma ‘Yando wamili!’ ningí kinie yando manda naa ongela.” nirimu.
27 Kanu-kinie kamakomone nimbendo: “Aku lepamo kene, Toto, ‘Yu nanga pulu-koleana pupili mundeni!’ nimbu mawa tekero.
28 Nanga angenupili te-pakara molemele kanumu. I kolea mindili noli koleana ene kepe naa wangi kene yuni ene lepi-lepi topa ungu nimbe sipe konjipili!” nirimu.
29 Nakolo Eporayamone yundu nimbendo: “Mosisini boku torumu bokuma kinie Pulu Yemone ungu umbu tonjirimuma pilku yamboma ningu siringi yemane boku toringi bokuma kinieg nosilimele kanumu. Enene kanu bokuma molemo unguma kanoko piliengi!” nirimu.
30 Kanu-kinie kamakomone nimbendo: “Toto Eporayamo, aku manda mólo! Kolorumu yambo te lomboropa ola molopa ene molemelena pupe nimbe simu liemo ulu-pulu-keri telemelema pilku keri pilkulie siye kolko konopu alowa tenge.” nirimu.
31 Eporayamone yundu nimbendo: “Mosisinge unguma kinie Pulu Yemone ungu-umbu tonjirimuma pilku yamboma ningu siringi yemanga unguma kinie ˻bokumanga toringi molemo akuma˼ pilí naa pilíngi liemo kolorumu yambo te lomboropa ola molopa pupe nimu liemo yunge ungumu naa-la pilingí.” nirimu.” nimbe Yesusini temane te aku-sipe torumu.