2 Parisi-yema kinie Pulu Yemonga ungu-manemanga puluma pilku mane siringi yema kinie^b enene aku teringi mele kanokolie kono-kono ningu ningindu: “I yemo yu tepa kenjikimu. Ulu-pulu-kerime teli yamboma “Pea molamili wai!” nimbelie, langi alieli ene pea nongo molemelela.” niringi.

3 Yesusini ene aku-siku niringi pilipelie ˻i ungu-ikuma ene topa sirimu.˼ Ungu-iku imu topalie nimbendo:

4 “Enenga ye tene kongi-sipisipi^c pape-paono monjilke kinie te talopa lelkanje yuni sipisipi po-paono-tene kelepa nani wema kolea ku leline molangi kelepa pupe, talopa lelka sipisipimu kanopa limbendo korolipe naa pulkeye? ˻Korolipe pulke.˼

5 Pe kanopa lipelie yuni konopu sipe apu topa ulkendo memba pulke.

6 Kanu-kinie ulkendo ombalie yemone yunge pulu lemo yambomando kinie yunge ulke kere-pongolo pelemelka yambomando kinie walsipelie nimbendo: “Nanga kongi-sipisipi talopa lemu kanumu kanopo lindu kene pea konopu sipu molamili wai!” nilke.” ˻nirimu.˼

7 ˻Nimbelie ungu-ikumunge pulumu nimbe para sipelie nimbendo:˼ “Nane ene ungu te nimbu sikirumu: “Yambo konopu sumbi nimbe pepili molemele yamboma aku-siku molemele-na ene ulu-pulu kerime munduku kelko konopu alowa tenge aulke te naa lemo kanumu,^d kanu yamboma mulú-koleana ˻angellomane˼ konopu we silimele. Nakolo sipisipi nokoli yemone yunge sipisipi talopa lelimu kanopa lipelie paa olandopa konopu silke mele aku-sipe ulu-pulu-keri teli yambo te yunge ulu-pulu-keri telemoma pilipe keri pilipe mundupe kelepa konopu alowa tembamonga angellomane paa olandopa konopu singí.” nikiru.” ˻nirimu.˼

8 ˻Nimbelie kelepa ungu-iku te pea topalie nimbendo:˼^e

9 Kanu-kinie kanu koumu kanopa lipelie yunge pulu lemo yamboma kinie yunge ulke kere-pongolo pelemelka yamboma kinie walsipelie nimbendo: “Nanga kou-mone suruli manie pumu kanumu kanopo lindu kene pea konopu sipu molamili wai!” nilke.

10 “Nane ene nimbu sikirumu: “Kanu ambomo konopu silke mele aku-sipe ulu-pulu-keri teli yambo te yunge ulu-pulu keri telemoma pilipe keri pilipe mundupe kelepa konopu alowa tembamonga Pulu Yemonga angellomane konopu singí.” nikiru.” nirimu.^f

11 ˻Aku nimbelie˼ Yesusini kelepa ˻ungu-iku yepoko-sipemo pea topa ye-ailime mane-sipelie˼ nimbendo:

12 Walse kango-akiliomone lapando nimbendo: “Tara, nu kolonimunge monge-mélema isili-ou moke teko na sini mele sieni!” nirimu kinie kanu yemone yunge nosirimu mélema moke tepalie yunge kangotolo sirimu liringili.

13 Kanu mélema elte moke tepa sirimu kinie kango-akiliomo wale pokore mindi molopalie, pe méle sirimuma pali lipe memba aulke sulu tenga purumu. Aulke sulu tenga pupelie nirimumuni, kolea tenga pupe molopalie yu ‘Langi peangama nambo!’ nimbe, ‘Mulu-wambale peangama pakambo!’ nimbe kou-mone aili-tepa pulimo mélema topo-topa lipe panjipelie, ‘No nambo!’ nimbe topo topa lipe, ‘Amboma pea peamili!’ nimbe kou-mone sipe, aku telipe purumu kinie yunge kou-mone mélema pali pora nirimu.

14 Yunge mélema kinie kou-mone kinie pora nirimu kinie yu paa koropa purumu. Kanu-kinie yu molorumu koleana engele aili-tepa lerimu kinie yu mélema pali mólo torumu kinie yu paa engelene kolorumu.

15 Yu engele terimu-na yu kanu kolea pulu ye te molorumuna pupe “Kou-kongono te teambo si!” nimbe mawa terimu kinie yuni nimbendo: “Kapola, nanga kongi tápu tenjiku ‘Langi nangi!’ ningu liku si!” nirimu.

16 Yu ˻engelene paa kolopalie˼ ga-kiluma kinie konapa-buluma kinie kongi sirimuma ‘Namboa!’ nimbe pilipe molorumu. Nakolo yambo tene yu langi te naa siringi.

17 Kanu-kinie pe yu konopu lipe mundupe pilipelie yu yuyu nimbendo: ‘Taranga kongono tenjilimele yamboma ga aisili nongo olo telemo nakolo na ya engelene kolopolie kamu kolombo tekero.

18 Akumunge na yando pupu Tara molemona pupulie yundu nimbundu: “Tara, nu kinie Mulú-Koleana Molemo Yemo kinie nane tepo kenjirindu.

19 Na kango kerimu kene nunge marena molombo kapola naa temba kene nunge kongono-ye te molambo!” nimbú.’ nimbe pilirimu.

20 Aku nimbe pilipelie yu molorumu koleamo mundupe kelepa, lapa molorumuna ˻ulke-koleando˼ pumbe purumu.

21 Kanu-kinie kangomone lapando nimbendo: “Tara, nu kinie Mulú-Koleana Molemo Yemo kinie nane tepo kenjirindu. Na kango keri kene nunge marena molombo kapola naa temba kene nunge kongono-ye te molambo!” nirimu.

22 Aku-sipe nimbe molorumu kinie lapane yunge kongono tenjiringi kendemande-yemando nimbendo: “Welea puku nanga mulu-wambale peangamo liku mengo ongo yu pakonjiku, ki-ongi te liku yunge kíne monjinjiku, kimbu-su liku yunge kimbuna monjinjeyo!

23-24 Aku tekolie kongi-kao walo ailimu toko kalonjiku molombolona mengo wai!” nirimu. “Nanga kangomo yu koronga-ou purumu, ‘Yu kolorumunje.’ nimbu pilirindu nakolo kinié yu kelepa okomo. Yu ou pupe tepa nema lirimu nakolo kinié altopa okomo kanopo likimulu kene konopu sipu kongi-kao nombo molamili!” nirimu kinie ene aku-siku konopu siku kongi nongo moloringi.

25 Nakolo yunge kango-komomo poniena kongono tepa molopalie pe ipupini ulkendo ombá orumu kinie ene konopu siku musiki toko denisi teko moloringi ungumu pilipelie

26 yuni kongono kendemande-ye tendo “Ungu te niembo oi!” nimbelie nirimumuni, yundu walsipelie nimbendo: “Ulu tekemelemo nambemuna tekemeleye?” nimbe walsirimu.

27 Kanu kongono kendemande-yemone yundu pundu topa nimbendo: “Angena omu-na laniene kanopa yu manda mele molopa ulu te naa tepa omu-na kanopalie konopu sipe “Kongi-kao walo ailimu namili!” nimbe topa kalomu.” nirimu.

28 Aku-sipe nirimu pilipelie kango-komomo yu mumindili kolopalie “Na ulkena suku paa naa pumbu!” nirimu.

29 lapando pundu topa nimbendo: “Pílie! Na alieli, ponie aisili, nunge kongono tenjipu molopolie nuni nilino unguma alieli pilipu lipu tenge panjipu, walse kepe nunge ungu te bulu naa sipu molio nakolo nuni nando walse kepe kongi-meme walo te ‘Kangoma-kinie pea konopu siku nongo molangi!’ ningu naa silino.

30 Nakolo kinié nunge kango te omba, yuni ambomando “Na pea peambili kou-mone siembo!” nimbe nunge kou-mone ene sipe pora sirimu, kanu kangomo omu kinie nu konopu siku ‘Kongi-kao walo ailimu namili!’ ningu tonu lepamo.” nirimu.

31 Lapane yundu pundu topa nimbendo: “Kangomo, nu kinie na pea alieli molembolo kinie nanga mélema pali oltonga.

32 Nakolo kinié angena kolorumu^g kanumu altopa omu. Yu ou pupe tepa nema lirimu, kinié kelepa omu kanopo likimulu kene olio papu konopu sipu musiki topo langi nombo molkomolo akumu kapola tekemolo.” nirimu.” ˻nimbe Yesusini˼ nirimu.^h