2 Nanga yamboma aku-sipe kondi tomba yambomo yu kou paa aili te^c moko toko nomine lenjiku ‘Yu kamu kolo-pupili!’ ningu paka toko nomúna paa maniekondo mundulimelkanje paa papu. Aku-siku toko mundulimelka kinie yu kolopalie pe yu Pulu Yemonga ambolango tendo ‘Ulu-kerime tepili!’ nimbe kondi manda naa tolka. Nakolo yu aku-siku nomúna naa mundulimelka kinie yu yamboma kondi tombamonga Pulu Yemone yu ‘Mongo aili-tepa likimu.’ nimbe “Mindili paa nopili!” nilke kene enene yu nomúna papu paka toko mundulimelka.

3 “Nanga yamboma, ene-eneno telemele mele kanoko konjeme!

4 Kanu-kinie ena telumunge yu wale yepoko-pakara aku-sipe nu-kinie tepa kenjipe, pe kelepa wale yepoko-pakara konopu alowa tepa nundu “Ano, kondo kolambo!” nimbé kinie kapola, nu wale yepoko-pakara kanu ulu-keri tembama ‘Manie pupili!’ ningu siye kolani!” nirimu.^d

5 Kanu-kinie Yesusini ou “Nanga kongonomo tenji-pai!” nimbe lipe mundurumu yemane^e yundu ningindu: “Ailimu, nu ungu nilino mele olio ‘Sike-ungumu.’ nimbu laye-tepo mindi pilipu lipu ambolemolo kene nuni ‘aili-teko pilku liku tondolo-munduku ambolangi!’ ningu liku taponjeni!” ningu mawa teringi kinie

6 ˻Ailimuni˼ enendo pundu topa nimbendo: “Unju tenga mongo akumu méle paa kangamo nakolo kanu mongomo mana mundulimolo kinie unju akopa ai-lepa angilimo kanumu. Aku-sipe mele, ene nane ungu nilio mele unju-mongo kanga-mele paa wallo-kolte mindi pilku liku ambolemelkanje, enene ‘Pulu Yemone nanga ungumu manda pilimbe.’ ningu ya angilkimu unju aili akumundu “Nu pulkeno pali lkuruku puku, nomúna kelko angili!” nilimelka kinie kanu unjumu enenga ungumu pilipe lipelie aku-sipe manda telka.” ˻nirimu.˼^f

7 ˻Nimbelie Yesusini ungu te pea nimbéndo:˼ “Enenga ye te yunge kendemande-ye tene ponie tenjimbe molo kongi-sipisipi tápu tenjimbe kinie pe ipupini ulkendo ombá kinie yunge ailimuni yundu “Ya ongo manie molko ga noi!” nimbéye? ˻Aku manda naa nimbé.˼

8 Kanu kongono tenjili yemo yu kongono tepa kelepa ulkendo ombá kinie yunge ailimuni yundu i-sipe nimbé: “Nanga ga kalonjiku boroko sikulie pe na-nanu ga nombo pora simbu kinie nu puku nunge ga kalko nani!” nimbé.

9 Ye-ailimuni ‘Tei!’ nimbé mele yunge kendemande-yemone pilipe lipe tembamonga “Ange, papu tenu.” nimbéye? Aku naa nimbé.

10 “Aku-sipela, enene Pulu Yemone enendo “Kongono tenjei!” nilimo mele pali teko likulie ene-eneno ningindu: ‘Olio kendemande kerime.’ niengi! ‘Yuni olio “Teai!” nilimo mele manjipu tepo, kongono olandopa te naa tepolie olio kendemande kerime molemolo.’ niengi!” nirimu.

11 Yesusi kolea-aili Jerusalleme pumbe pupelie nirimumuni,^g kolea-Gallilli kolea-Sameria disirikitolo aulke ai-suku-singine pupelie,

12 kolea-kanga tenga sukundu purumu. Sukundu purumu kinie kuru-kendí noli ye^h rureponga talo yu aulke omba purumuna ongo anju-siku angilku

13 enene ru ningulie ningindu: “Yesusi, Ye-Nomimu,ⁱ olio kondo koloi!” niringi.

14 Yuni ene kanopalie nimbendo: “Pulu Yemo popo tonjili yema molemelena puku, enenga kangime liku ora si-pai!” nirimu. Kanu-kinie ene pungí puringi kinie ene kuru pora nimbe umbu-kangi angilirimu.^j

15 Enene konde pukulie kanoringi kinie ye akumanga te yando omba ungu-tondolo nimbe Pulu Yemonga imbi ambolopa ola linjilipe omba

16 Yesusi angilirimuna manie pupe tamalu pepa yundu “Paa ange!” nirimu. Kanu yemo yu Sameria-yemo.^k

17 Kanu-kinie Yesusini nimbendo: “Nane ye rureponga talo tepo konde naa linduye?^l Pe kinié rureponga telu akuma tena molemeleye?

18 Te pea yando ongo Pulu Yemonga imbi ambolko ola naa linjikimiliye? I ye-lupemo mindi okomoye? Isirele-ye kuru-kendí nomu tepo konde linduma tena molemeleye?” nirimu.

19 Kanu-kinie yuni Sameria-yemondo nimbendo: “Ola angilku puyo! Nane nu manda tembomonga “Sike.” ningu tondolo-munduku pilinumuni nu konde punu.” nirimu.

20 Parisi-yemaneⁿ Yesusi walsiku pilkulie ningindu: “Pulu Yemo ye-nomi-kingimu molopa yamboma nokomba walemo te-wale wendo ombáye?” niringi.

21 Ene kinié ya molemelena Pulu Yemo koronga ye-nomi-kingimu molopa yambo mare nokolemo-na yu ye-nomi-kingimu molopa yamboma kinie mélema pali nokomba ulumundu yambo tene “Kaname! I wendo okomo.” ningu, “Andi wendo okomo.” ningu, aku-mele manda naa ningí. Kanu walemo koronga wendo okomo lémo.” nirimu^o.

22 Aku nimbelie Yesusini yunge lombili andolimendo nimbendo: “Enene “Manie Omba Mana-Ye Au Lerimu Yemo wallo-kolte kanamili!” ningí walema wendo ombá nakolo naa kanonge.

23 Yambomane “Wíne molemo.”, “Ya molemo.”, ningí. Nakolo aku-siku ningí kinie kolo tonge kene ene lombili naa pangi!

24 Kariapá lipe sinjipe telemo kinie koleama pali pa telemo yambomane pali kanolemele. Manie Omba Mana-Ye Au Lerimu Yemo aku-sipe mele kelepa ombá.

25 Nakolo ou yu mindili aili-tepa nombá, kinié molemele yambomane yu liku su-siku bulu singí. ˻Kanu-kinie kolopa lomboropa ola molopalie nimbemone,˼ pe “Ombá.” nikiru mele ombá.

26 “Ou ye Noa molopili yambomane teringi mele Manie Omba Mana-Ye Au Lerimu Yemo ombá temba kinie yambomane aku-siku tengela.

27 ˻Ma-koleamanga pali˼ no ou naa topili yamboma langi nongo, yema ambo liku, amboma ye puku, aku uluma mindi teko mololiku puringi.^p Noa nona andoli sipi-ulkemonga suku purumu kinie kepe ene aku-siku uluma mindi teko molangi no topa ˻koleama pali none aki topa˼ yamboma pali topa konjirimu.^q

28 “Ye LLote pea moloringi yambomane aku-siku teringila. Ene langi nongo bisinete teko ponie panjiku ulke takoko, we ulu akuma teko moloringi.

29 Nakolo LLote kolea-aili Sodomo mundupe kelepa kowa purumu kanu walemonga tepe kinie kou tepene nolime kinie lo-mele mulúna manie omba Sodomo moloringi yamboma pali topa konjirimu.^r

30 “Manie Omba Mana-Ye Au Lerimu Yemo kelepa ombá walemonga ou teringi nikiru mele pe aku-siku teko molongela.

31 “Yu ombá kanu walemo wendo ombá kinie ulke imuna ola molonge yamboma altoko ulkendo puku enenga ulke sukundu nosingí melema puku naa li-pangi! Aku-sikula poniena molonge yamboma mélema ulkena lepili nosiku poniena pungí kinie kanu walemo wendo ombá kinie ulkena nosingí mélema altoko puku naa li-pangi!

32 LLote-menu terimu mele pilieme! ˻LLote pea Sodomo munduku kelkolo kowa puringili nakolo Sodomo tepe manie orumuna pilipelie Pulu Yemonga angello tene ou “Iki-teko naa kanokolo we sumbi-siku kowa pale!” nirimu mele LLote-menu naa pilipe lipe, iki-tepa kanorumu kinie api-kusa au-lepa kou-mele we angilirimu.˼^s

33 “ ‘Na naa kolopo konopu simbu uluma mindi tepo molambo!’ ningu Pulu Yemonga ungu naa pilku lingí yamboma sike kolonge. Nakolo ‘Na kolondu liemo papula.’ ningu Pulu Yemonga ungu pilku liku teko molonge yamboma naa kolko molko mindi pungí.

34 “Nane enendo paa sike nimbu sikirumu: “Manie Omba Mana-Ye Au Lerimu Yemo kelepa ombá walemonga ipulueli yambo talo suluminia teluna pengele kinie ˻Pulu Yemonga angello tene˼ omba yambo te we pepili mundupe kelepa te lipe memba pumbe.

35 Ambo talo langi kalongele teko molongele kinie ˻angello te omba˼ ambo te we molopili mundupe kelepa te lipe memba pumbe.

36 (Ye talo lamana^t unju toko angilingilí kinie ˻Pulu Yemonga angello tene omba˼ ye te we molopili mundupe kelepa te lipe memba pumbe,)” nikiru.” nirimu.

37 ˻Yuni nirimu mele pilkulie˼ enene ningindu: “Ailimu, aku ulumu tena tembaye?” niringi.