Romo-Gapomano Ye-Nomi Paillatene Kote Pilipe Molopa, Yesusinge Kotemo Pilipelie “Kolopili!” Nirimu Temanemoa
15
(Kolomongo-kanga wane. Pulu Yemonga ungumu.)
Ipulueli-ou kolea kokele tangorumu kinie Pulu Yemo popo tonjiringi ye-ailime kinie, Juda-yambomanga tápu-yema kinie, Pulu Yemonga ungu-manemanga puluma pilku mane siringi yema kinie, kanjollo-yema pali,b ˻Yesusinge kotemo pilku pora sikulie˼ enene pali ˻yu tenge mele˼ ungu te ningu panjiringi.
Aku ningu panjikulie yu liku, ka toko, mengo puku, ˻Romo-gapomano ye-nomi˼ Paillate molorumuna mengo puku kote tenjiringi.
2 Paillatene ˻Yesusinge kotemo pilipelie˼ yu walsipe pilipelie nimbendo: “Nu Juda-yambomanga ye-nomi-kingimu molo móloye?” nirimu.
Yesusini pundu topa nimbendo: “Sike nikinu. Akumu na.” nirimu.
Crucifixion and Resurrection of Jesus (Mark 15:1–16:7)
3 Pulu Yemo popo tonjiringi ye-ailimene Yesusi kote tenjiku Paillatendo ˻kolo toko˼ ungu aisili ningulie ningindu “Yesusi yu tepa kenjilimo.” ningu yu kote tenjiringi.
4 Aku niringimunge Paillatene Yesusindu nimbendo: “Nu ulu-keri aisili terinu nikimili mele pilkulie ungu te pundu toko naa nikinuye?” nirimu.
5 Nakolo Yesusi ˻yu tepa kenjirimu niringi mele˼ pundu topa ungu telu kepe naa nimbe ˻we angilirimu kinie kanopalie˼ Paillate mini-wale mundupe konopu aisili lipe mundurumu.
6-7 ˻Yesusi kote tenjiku molangi,˼ ye te, yunge imbi Barapasi, yu kinie ye mare kinie ‘Romo gapomanomone olio Juda-yamboma naa nokopili!’ ningu ou Romo-gapomanomo-kinie opa tekolie yambo mare toko konjiringimunge ka-ulkena peringi. ˻Ponie tenga-tenga Juda-yambomane kolea-aili Jerusalleme ongo akuna suku˼ Pulu Yemone enenga anda-kolepalime Naa Topa We Omba Purumu mele pilingindu langi noringi walema wendo orumu kiniec enene ka-ulkena perimu ye te imbi lelko ‘Wendo liku mundoi!’ ningu mawa teringi kinie ˻Romo-gapomano ye-nomimuni˼ kanu yemo wendo lipe yamboma sirimu.
8 ˻Romo ye-nomimuni kanu walemo wendo orumu kinie aku terimu mele pilkulie˼ yamboma ongo yundu mawa tekolie ningindu: “Ou ponie telu-telu ningu i walemo wendo olemo kinie teleno kanu-mele kinié kepe aku-siku teani!” niringi.
9 Aku niringi pilipelie Paillatene enendo walsipelie nimbendo: “ ‘Juda-yambomanga ye-nomi-kingimu wendo lipu ene siembo!’ konopu lekemeleye?” nirimu.
10 ˻We-yambomane Juda-yambomanga ye-ailime munduku kelko enenga unguma liku su siku Yesusinge ungumu pilku yu lombili andoringimunge˼ Pulu Yemo popo tonjiringi ye-ailimene Yesusi-kinie konopu keri panjikulied kote tenjiringi-ne pilipelie Paillatene aku-sipe nirimu.
11 Nakolo Pulu Yemo popo tonjiringi ye-ailime we-yamboma kondi toko ungu-umbu tonjikulie “ “Yesusi mólo! Barapasi wendo lipe sipili!” niei!” niringi.
12 Aku niringi kinie pilipelie Paillatene enendo nimbendo: “Aku liemo ‘Judamanga ye-nomi-kingi’ nilimelemo nambe-teambonje?” nimbe walsirimu kinie
13 enene tondolo-munduku ningindu: “Yu kolopili, unju-perana uku toko panji!” niringi.
14 Aku niringi pilipelie yuni enendo nimbendo: “Aku nambemunaye? Yu mongo nambolka mongore limuye?” nirimu.
Nakolo enene ˻altoko˼ paa tondolo-munduku ningindu: “Mólo! Yu kolopili, unju-perana uku toko panji!” niringi.
15 Kanu-kinie Paillatene ‘Yamboma konopu peanga leangi!’ nimbelie ye Barapasi ka-ulkena wendo lipe ene sirimu. ˻Aku tepalie˼ Yesusi lipe ˻yunge ami-yema˼ sipelie nimbendo: “Yu ka-pulsene tokolie pe ‘Unju-perana kolopili!’ ningu mengo puku unju-perana uku toko panji-pai!” nirimu.
Romo Ami-Yemane Yesusi Ungu-Taka Tonjiringi. Tonjikulie “Kolopili!” Ningu Mengo Puringi Temanemoe
16 Kanu-kinie ˻Romo˼ ami-yemane Yesusi liku gapomano ye-nomimu perimu ulke-ailif akuna suku yamboma liku máku toringi koleana pukulie, enenga ami-talape yema pali “˻Yesusi ya molemona˼ sukundu-sukundu wai!” niringi.
17 Akuna ongolie niringimuni, ˻‘Yu ye-nomi-kingi te none tepili!’ ningu˼ mulu-wambale kondoli peanga te pakonjiku unju-ka koko molorumu te mulkupiye teko ‘Ye-nomi-kingimunge waniemo.’ ningu pengena mere mundunjiku,
18 pe yu ˻ungu-taka tonjiku˼ imbi we kólo toko ambolko ola linjingindu “Juda-yambomanga ye-nomi-kingimu, nu angilinoye?” ningu
19 ˻koló-kope liku˼ yu pengena kope to-pu-opu tekolie kumbikerena lkambe toko kanjiku, yu angilirimuna ongo koporongo langoko tamalu peko yu we kólo toko kapi ningu imbi ambolko ola linjiringi.
Yesusi Toringi Kolorumu Kinie Óno Teringi Temanemo, Akumunge
Yesusi Unju-Perana Ola Uku Toko Panjiringi. Unju-Perana Pepili Juda-Yambomane Yu Ungu-Taka Tonjiringi Temanemog
20 Yu aku-siku ungu-taka tonjiku pora sikulie mulu-wambale kondolimu kulunjiku yunge ou panjirimu mulu-wambalema altoko panjinjikulie “Yu unju-perana kolopili uku topo panji-pamolo!” ningu yu liku ulsukunduh mengo puringi.
21 ˻Romo ami-yemane Yesusi Jerusalleme pala ulsukundu mengo pungí pukulie niringimuni,˼ kolea Sairinii ye te, yu Allekisanda kinie Rupasi-tolonga lapa Saimono, yu Jerusalleme pumbe orumu kinie kanokolie yu ambolko liku ka-mele siku Yesusi kolomba unju-peramo “Kolo wangoko menji!” ningu siringi.
22 Pukulie kolea Golkota Yesusi mengo puku akuna moloringi.
(Golkotanga ungu-pulumu ‘penge-ombele leli koleamo’.)
23 ˻Yesusi akuna mengo pukulie niringimuni, ‘Yamboma mindili naa nangi!’ ningu˼ no-waenena suku maratene ‘mo’ nili te munduku nosiringi aku no-waenemo ‘Yu nopili!’ ningu, siringi nakolo naa lipe norumu.
24 Kanu-kinie ˻ami-yemane˼ yu unju-perana ola uku toko panjikulie unjumu liku ola anjiringi. ˻Aku tekolie, ou unjuna ola uku toko naa panjikulie˼ yunge mulu-wambale ˻kulunjiku nosiringime˼ ‘Moke teamili!’ ningu ene yu-mele-mele lingí mele pilingindu kou-kate teko pe mulu-wambalema liringi.
25 Ena topa nane killoko terimu kinie yu unju-perana panjiringi.
26 ‘Yu mongo lirimu mele yamboma kanangi!’ ningu
I YEMO JUDA-YAMBOMANGA YE-NOMI KINGIMU
ningu imbi toko unjuna ola monjiringi.
27 Opa tekolo mélema wa liringili ye talo pea unju talonga uku toko panjiringila. Te Yesusi yunge ki-umbukundu uku toko, te ki-tarokondo uku toko panjiringi.
28 (Aku teringimunge ungu te ou Aisayane nimbe boku torumu mele wendo orumu. Aku ungumu i-sipe:
“Yu kinie
yambo mongo liku
ulu-pulu-kerime teli yamboma kinie
liku tere lenjiringi.” j Aisaya 53:12
nirimu.)
29 Akuna ongo puringi yambomane Yesusi ˻kanoko keri kanokolie yu˼ ungu-taka tonjiku iri-mele tokolie ningindu: “Aa! “Ulke-tembelemo tekisipulie altopo wale yepoko omba pupili takopo limbu.” nirinu yemo,k
30 ‘Naa kolambo!’ ningu nu-nunu liku taponjiku unju-perana manie oi!” niringi.
31 Aku-sikula Pulu Yemo popo tonjiringi ye-ailime kinie Pulu Yemonga ungu-manemanga puluma pilku mane siringi yema kiniel enene kepe yu ungu-taka tonjikulie ningindu: “Yu yambo wema ‘Naa kolangi!’ nimbe lipe taponjirimu nakolo yu-yuyu ‘Naa kolambo!’ nimbe manda naa lipe taponjikimu.
32 Yu sike Pulu Yemone olio ‘Nokopa konjimbe ye te lipu mundumbu.’ ou nimbe mako torumu ye-nomi Kirasimu omba molopa, yu sike olio Isirele-yambomanga ye-nomi-kingimum molemo liemo yu-yuyu unjuna manie opili! Yu-yuyu manie ombá kinie kanopolie ‘yu sike Pulu Yemone mako topa lipe mundurumu ye-nomi Kirasimu. Yu sike olionga ye-nomi-kingimu.’ nimbu tondolo-mundupu pilimulú.” niringi.
Ye talo yu-kinie unjutolonga uku toko panjiringi yetolone yu aku-siku ungu-taka tonjiringilila.
Yesusi Kolorumu. Kolorumu Kinie Ulu Te Wendo Orumu Temanemon
33 ˻Yesusi unjuna ola we angilipili˼ ai-tangoli ena tuwellepo-killoko terimu kinie kolea pali sumbulu topalie, pe ipupini ena tere-killoko terimu kinie kelepa tangorumu.
34 Ipupini ena tere-killoko terimu kinie Yesusini ru nimbelie nimbendo:
“Elloi, Elloi, llama sapakatani.”
nirimu. Akumu Juda-yambomanga ungu te. Akumunge ungu-pulumu i-sipe:
“Nanga Pulu Yemo, nanga Pulu Yemo,
na nambemu-na munduku kelenuye?”o
nirimu.
35 Akuna nondoko angiliringimenga marene yuni aku nirimu kinie pilku ˻sundukulie˼ ningindu: “Pilieme! Yu Illainja walsikimu.” niringi.p
36 Aku nirimu kinie piliringimenga ye te lkisipe pupe ulú-pinje mele te lipe no-waene kombili teli mare akuna panjipelie, ‘Yesusi no-waene kombili teli pinjena pelemomo nopili!’q nimbe memba omba unju-pepena tenga ka topa olando sirimu. Sipelie yuni nimbendo: “Kinié unjuna we angilipili! Illainjane sike yu ˻unjuna˼ manie limbendo okomonje, kanopo kanamili!” nirimu.
37 Yesusi ungu te tondolo-mundupe nimbelier kolorumu.
38-39 ˻Romo˼ ami-ye wane anderete nokorumu ye te Yesusi toringi ami-yema nokopa molorumu kanu yemone Yesusi ungu te nimbe kolorumu mele pilipe kanopalie nimbendo: “I yemo yu paa sike Pulu Yemonga malo lepamo.” nirimu.
˻Yesusi aku-sipe kolorumu kinie ulu-aili te walsikale wendo orumu.˼ Pulu Yemo popo toko kaloringi ulke-tembele ˻Jerusalleme suku angilirimu akuna sukundu Pulu Yemo molorumu˼ Suluminia Paa Kake Telimunge kerepuluna ˻‘Yamboma sukundu naa pangi!’ ningu ou alieli˼ mulu-wambale aili tene pipi siku panjiringi angilirimu. ˻Yesusi kolopa pora sirimu kinie˼ kanu mulu-wambalemos ai-suku-singine olakondo maniendo-sipe olá torumu.
40 Ambo mare ˻Yesusi toringi mele˼ sulu teko kanoko angiliringi. Akumanga ambo te Makatalla taono ambo Maria, te Josese kinie angenu Jemisi kinie eltenga anumu Maria, te ambo Sallomi.
41 Yesusi kolea Gallilli disiriki, ˻kanu ambomanga pulu-kolea,˼ akuna ou we andorumu kinie kanu amboma yu lombili andoko liku taponjiku nokoringi. Yu kinie, Jerusalleme olando oringi ambo aisili wema kepe, ambo pokore kanoko angiliringi akuna ene kepe ˻Yesusi toringi mele˼ kanoko angiliringi.
Yesusi Óno Teringi Temanemot
42 Opalikundu ˻koro moloringi˼ Wale-Sambatemou nondopa wendo ombá terimu. Sambate-Walemo wendo ombá kinie koro molongendo kinié-mele mélema liku undu-undu siringi walemo wendo orumu, aku walemonga ˻Yesusi ou kolopili˼ kolea kala tomba terimu kinie,
43 Arimatia taono ye Josepo, yu Juda-yambomanga kanjollo ye-aili te molopa, yu kepe ‘Pulu Yemo ye-nomi-kingimu molopa olio nokomba walemov wendo opili!’ nimbe nokopa molorumu yemo. Yu omba pipili naa kolopaw ˻Romo-gapomano ye-nomi˼ Paillate molorumuna sumbi-sipe pupe “Yesusinge ónomo na si!” nimbe mawa terimu.
44 Yesusi walsikale kolorumu pilipelie Paillate yuni ˻‘Yamboma unju-perana uku topo panjilimolo kinie ena aisili omba pupili we pelemele. Pe kinié yu sike walsikale kolomunje molo nambe-temunje?’ nimbe pilipe˼ konopu lipe mundupe ami-ye wane-anderete nokorumu yemo “Opili!” nimbelie yundu walsipelie “Yesusi koronga kolomuye?” nirimu.
45 Ami-yema nokoli yemone “E.” nirimu kinie pilipelie yuni ami-yema nokolimundu nimbendo: “Kapola, ya yemone ˻Yesusinge˼ ónomo lipili!” nirimu.
46 ˻Paillatene “Kapola.” nirimu kinie˼ Josepo pupe mulu-wambale te topo-topa lipe ónomo manie lipe, múlumuni kulupi topalie kou-kande te ou akuku nosiringi kou-kandemonga suku memba pupe nosirimu. Nosipelie kou-kande kerepuluna kou aili te perele-marele memba omba pipi sirimu.
47 Makatalla taono ambo Maria kinie Josese anumu Maria-tolone yunge ónomo ˻kou-kandena˼ nosirimu mele kanoringili.