Yesusi Ola Molorumu, Yambomane Kanoringi Mele Temanemaa
Kolomongo-Aili 16
Aku Temanemanga Te: Yesusi Lomboropa Ola Molorumu Kinie Ambo Marene Yu Kanoringi Temanemob
16
(Kolomongo-kanga wane. Pulu Yemonga ungumu.)
Ena pupe ipu lerimu kinie ˻koro moloringi˼ Wale-Sambatemoc omba purumu kinie Makatalla taono-kanga ambo Maria kemed Jemisi anumu Maria keme ambo Sallomi keme enene ‘Yesusinge ónona kopongo-wele mune toli pokore ape kanjinjemili.’ ningu mare topo-toko liku ˻nosiku peringi˼.
2 Pekolie paa ipulueli-ou, enenga pulu-pulu kongono walemo wendo ombando ena mundi orumu kinie kanu amboma puku ˻Yesusinge˼ ónomo nosiringi kou-kandena pungí pukulie niringimuni,
3 anju-yando walsikulie ningindu: “Kou-kande kere-pulumu pipi siringi koumu naene wendo lipe perele-marele memba pupe nosinjimbenje?” niringi.
4 Nakolo ongo olando-siku kanoringi kinie kou kanumu, paa kou kapo ailimu, ou wendo liku perele-marele mengo puku nosiringi, ˻kere-pulumu we lerimu˼ kanoringi.
5 Kou-kandena suku pukulie kou-kandemonga ki-umbukundu ye-kango te mulu-maminia sulu paa kake te pakopa molorumumu kanokolie mini-wale munduku konopu liku munduringi.
6 Kanu-kinie yuni enendo nimbendo: “Konopu liku naa mundeyo! Kolea Nasarete ye Yesusi ‘Kolopili!’ ningu talko unju-perana uku toko panjiringi kanu yemo kanonge okomelemo na pilkiru. Yu lomboropa ola molopa omba pumu. Ya naa lemo. Ónomo ou nosiringi koleamo ongo kaname!
7 Kanokolie anju puku Pita kemee yu lombili andolime kinie pali i-siku ningu siengi: “Yesusi kolea Gallilli disiriki kumbi-lepa pulimo kene akuna “Enene na kanonge.” ou nirimu melef sike enene akuna yu kanonge.” ningu si-pai!” nirimu.
8 ˻Angellomone aku-sipe omba mona molopalie nirimu mele˼ kanoko pilkulie amboma pungu-pungu ningu konopu aisili liku mundukulie kou-kandena ulsu puku munduku kelko paa lkisiku puringi. Pipili kolkolie yambo telu kepe kanoko piliringi mele ningu naa siringi.
Makatalla Ambo Maria Kinie Ye Talo Kinie Yesusi Lomboropa Ola Molorumumu Kanokolie Ningu Siringi Temanemog
9 Juda-yambomanga pulu-pulu kongono walemo kinie,h paa ipulueli-ou, Yesusi lomboropa ola molopalie nirimumuni, taono-kanga Makatalla ambo Maria, ou walse kuru yepoko-pakara konopuna moloringime Yesusini topa makororumu ambo kanumu molorumuna pupe ˻‘Na lomboropo ola molondu we molio mele kanopili!’ nimbe˼ lipe ora sirimu.
10 Kanu-kinie Yesusi ˻mona angilirimu˼ kanopalie ambomo yu pupe, ou Yesusi-kinie moloringi yamboma kamele mindili nongo kola teko moloringine pupelie kanorumu mele ene nimbe sirimu.
11 Yuni ene Yesusi konde molorumu mele kanopalie nimbe sirimu kinie pilkulie ‘Yu kolo tokomo.’ ningu piliringi.
12 ˻Makatalla ambo Maria Yesusi yu lipe ora sipelie nirimumuni,˼ pe ˻yu lombili andoringimenga˼ yambo talo ˻kolea-aili Jerusalleme munduku kelkolo˼ aulke tenga puringiline Yesusi yu kumbikere kangi alowa tepa yu ‘kanangili!’ nimbe omba mona angilirimu.
13 Pe yu kanoko imbi sikululie kanu yambotolo kelko yando ongolo ˻lombili andoli˼ wemando eltene kanoringili mele ningu siringili nakolo eltene ningu siringili mele kepe ‘Kolo tokombele.’ ningu piliringila.
Yesusi Omba Yu Lombili Andolime “Nanga Kongonomo Tenji-Pai!” Nimbe Lipe Mundurumu Temanemoi
14 Pe walse lombili andoli rureponga yepoko langi nongo moloringine Yesusi omba mona molopalie nirimumuni, ene iri topalie nimbendo: “Enene na ‘Lomboropa ola molomu.’ ningu tondolo-munduku naa pilku, na konde molondu mele yambo marene kanokolie ene ningu síngi kinie ‘Kolo tokomele. Aku paa naa temu, manda naa temba.’ ningu piliengi, akumu nambemu-na aku-siku karaye teko ningu pilíngiye?” nirimu.
15 ˻Aku nimbelie˼ yuni enendo nimbendo: “Ene ma-koleamanga pali puku yamboma pali temane-peangamo toko siliku ando-payo!
16 Ningí mele pilkulie ‘Akumu sike nikimili.’ ningu tondolo-munduku pilkulie no lingí yamboma ˻kote-walemo wendo ombá kinie˼ Pulu Yemone ene lipe taponjipe ‘Ene mindili nolemelka koleana naa puku, molko konjiku mindi pangi!’ nimbé.j
Nakolo ˻ene lombili andolimene˼ ningí mele pilkulie ‘Akumu kolo tokomele.’ ningu pilkulie liku su singí yamboma ˻kote-walemo wendo ombá kinie˼ Pulu Yemone ‘Ene mindili nongo mindi pungí koleana pangi!’ nimbé.k
17 “ ‘Aku temanemo sike.’ ningu tondolo-munduku pilingí yamboma ‘Na ene-kinie sike molio mele we-yambomane ningu kanangi!’ nimbú kinie ulu-tondoloma tenge kinie yamboma kanonge mele i-sipe:
Ene nanga tondolomonel kuru mare yambomanga konopuna molongema toko makoroko;
umbu-ungu lupe-lupe naa pilingíme ningu;
18 yambo nongo konjili kongi-ka-wambiyema naa kanoko kimuni ambolonge kinie akumane ene naa nongo konjingí;
tomo pelemo no te naa pilku nonge kinie uluri paa naa temba;
kuru tomba yamboma kimuni ambolonge kinie konde pungí.”
nirimu.m
Yesusi Mulú-Koleana Olando Lirimu Temanemon
19 Aili Yesusini ˻yu lombili andolime˼ndo aku-sipe nimbe pora sirimu kinie ˻Pulu Yemone˼ yu mulú-koleana olando lirimu. Akuna ˻imbi ola molopili Pulu Yemo-kinie mélema nokombando˼ Pulu Yemonga ki-umbukundu pupe molorumu.o
20 Yesusi yu mulú-koleana olando purumu kinie yu lombili andolime koleamanga pali puku Yesusinge temane-peangamo yamboma toko siliku andoringi kinie ‘Enene nanga unguma yamboma ningu singí kinie kanu yambomane ‘Ungu-sikemo.’ ningu pilku liengi!’ nimbe Ailimu ene-kinie pupe lipe taponjirimu kinie yuni lipe mundurumu yamboma enene ‘Pulu Yemone mindi ulu-tondoloma manda telka mele teangi!’ nimbe lipe taponjirimu.
˻Aku pea.˼