2 eltendo nimbendo: “Ne kolea-kanga kanokombelena pukululie kongi-dongi walo te, yambo te yunge bulu-mingine walsikale kepe naa molopa andorumumu ka teko panjingímu ne sukundu molomba kanongele, kanumu puku posiku yando mengo wangili pale!

3 Posingilí teko molongele kinie yambo tene eltendo “Aku nambemuna tekembeleye?” nimu liemo eltene i-siku niengili: “Ailimu^c yu ‘Dongimuni mepili!’ nimuna ombo likimbulu. Yu dongi-walomo altopa nondopa yando lipe mundumbe.” niengili!” nimbe elte lipe mundurumu.

4 Lipe mundurumu yetolo pukulu, kongi-dongi walo te, ulke-kerepuluna ka teko panjiringimu kanokololie kongi kanumu puku posiringili. Aku-siku tengele teringili kanokolie

5 akuna angiliringi yambo marene eltendo “Kongi-dongi walomo nambemuna posikimbiliye?” ningu walsiringi kinie

6 eltene, Yesusini ‘i-siku i-siku niengili!’ nirimu mele niringili kinie “Kapola, ˻dongi-walomo˼ mengo pangili!” niringi.

7 Kanu-kinie eltene kongi-dongi walomo Yesusi molorumuna mengo ongololie, enene enenga mulu-wambalema kulku dongimunge bulu-mingine ola pauwe toringi kinie Yesusi kanuna ola molorumu.

8 Yambo aisilini enenga mulu-wambalema kulku yu ombá aulkena pauwe toliku puku, marene unju-kipiyala poniena puku kipiyala-gomo langoko liku yu ombá aulkena pauwe toliku puringi.

9 Kumbi-lelko puringi yambomane kepe akilku puringi yambomane kepe naka lelko unju ambololiku pukulie ningindu:

11 Kanu-kinie Yesusi Jerusalleme suku pupelie Pulu Yemo popo toko kaloringi ulke-tembelena pupe akuna suku ˻teko moloringi uluma˼ pali kanorumu, nakolo kolea kalá torumu-na kanopalie ˻‘Isili-ou ulu te naa teambo!’ nimbe˼ yu lombili andoli ye engaki rurepo kinie ˻Jerusalleme˼ ulsukundu puku, kolea-kanga Betani ˻pengé˼ puringi.

12 Ipulueli-ou ˻Jerusalleme nondopa lerimu˼ kolea-kanga Betani munduku kelkolie ˻kelko Jerusalleme pungí puringi kinie˼ Yesusi yu engele terimu.

13 Kanu-kinie yu unju-piki te gomo tepa angilirimumu sulu tepa kanopalie ‘Mongo te tomunje.’ nimbe nondopa pupe kanorumu nakolo, piki-mongo torumu walemo ou wendo naa orumumunge unju-mongo te topa naa perimu, gomoma mindi terimu kanorumu.

14 ˻Gomo mindi terimu-na˼ kanopalie “Nu altoko yambomane nonge mongo te naa tani!” nirimu. Aku nirimumu yu lombili andolimene piliringi.

15 Jerusalleme kamu oringi kinie Yesusi yu Pulu Yemo popo toko kaloringi ulke-tembelena ˻“Juda-yambo naa molemele yamboma ‘Pulu Yemo popo tamili!’ ningu máku tolemele kolea” niringi akuna˼ suku pupe kanopalie akuna mélema makete teko moloringi yamboma kinie, mélema topo-toko liku moloringi yamboma kinie, akuma kanopalie ene pali topa makoropa, kou-mone lupe-lupema alowa teko anju siringi yambomanga poloma kinie, kera-waembono makete teko manie moloringi poloma kinie, lipe topele topa, topa bulu-balu sipelie,

16 yambomando nimbendo: “Yamboma kou-mone lingí makete tenge mélema kolea tenga lupe makete tenge pungíndu ulke-tembele palana naa pangi! ˻Anekale teko pangi!˼” nirimu.

17 Ene mane sipelie nimbendo: “Pulu Yemonga bokuna ungu te i-sipe nilimo:

18 Yesusini aku nirimu-na pilkulie Pulu Yemo popo tonjiringi ye-ailime kinie, Pulu Yemonga ungu-manemanga puluma pilku mane siringi yema kinie,^m ene yu toko konjingí aulke te kororingi. We-yamboma yuni mane sirimu mele pilkulie mini-wale munduringi-ne kanokolie kanu Juda-yambomanga ye-ailimene yu pipili kolko yu toko konjingí aulke te kororingi.

19 Pe ipupini, kolea kala tomba terimu kinie ˻kolea-aili Jerusalleme˼ ulsu pupe ˻tengaⁿ pe-purumu˼.

20 Ipulueli-ou, ˻unju-piki angilirimu koleana˼ ongo pukulie kanu unju-pikimu kamu pulu pali kolorumu kanoringi.

21 Aku-sipe terimu mele Pitane kanopalie ˻Yesusini unjumundu bonongokondo nirimu mele˼ kelepa pilipelie yundu nimbendo: “Rapai,^o kána! I unju-piki nuni ˻bonongo˼ iri tonumu ˻walsikale˼ kolomu.” nirimu.

22 Yesusini pundu topa nimbendo: “Pulu Yemone nanga ungumu sike pilimbe˻monga nimbú mele ‘Paa sike wendo ombá.’ ningu˼ tondolo-munduku piliengi!

23 Nane ene paa sike nimbu sikirumu: “Yambo tene ‘nane nimbú mele paa sike wendo ombá.’ nimbe konopu talo-tepa naa pepili ne ma-pangimundu “Ungú toko nomú-kusana sukundu pui!” nimbé kinie yu nimbé mele paa sike wendo ombá.” nikiru.

24 Akumunge ene i-sipu nimbu siembo: “ ‘Olio ˻Pulu Yemone paa sike lipe taponjimbemonga ‘Teamili!’ nimulú mele sike manda aku-sipu temolo.’ molo ‘Nimulú kinie sike aku-sipe wendo ombá.’ ningu˼ tondolo-munduku pilkulie Pulu Yemo-kinie popo toko ungu ningu mawa tenge mele pali Pulu Yemone sike tenjimbemonga kanu uluma sike wendo ombá.” nikiru.” nirimu.^p

25 “ ‘Ulu-pulu-keri temuluma olionga Lapa, mulú-koleana molemomone ‘We manie pupili, siye kolambo!’ nipili!’ ningu, Pulu Yemo-kinie popo toko ungu ningu angilkulie yambomane ene teko kenjingímunge konopu keri panjiku molonge uluma ‘We manie pupili! Siye kolamili!’ niengila!^q

26 (Nakolo yambomane ene teko kenjingí uluma ‘We manie pupili!’ ningu siye naa kolongi liemo enenga Lapa, mulú-koleana molemomone kepe enene ulu-pulu-keri tengema ‘Manie pupili!’ naa-la nimbe siye naa-la kolomba.)”^r nirimu.

27 Jerusalleme altoko oringi kinie Yesusi yu ulke-tembelena suku andorumu kinie ye mare, Pulu Yemo popo tonjiringi ye-ailime kinie, Pulu Yemonga ungu-manemanga puluma pilku mane siringi yema kinie, Juda-yambomanga tápu-yema kinie,^t

28 ene ongo yu walsiku pilkulie ningindu: “Nu namba nambolka nambamo likulie i kongonomo telenoye? Naene i kongonomo ‘Te-pui!’ nimbe nu nambamo sipe lipe mundurumuye?” niringi.

29 Yesusini enendo pundu topa nimbendo: “Nane ene ungu te walsipu piliembola! Pe nane ene walsimbu mele na sumbi-siku pundu toko níngi liemo ‘Na i kongonomo teambo!’ nimbe namba sirimumunge pulumu ene nimbu simbula.

30 ˻Nane i-sipu ene walsipu pilkiru:˼ Ou ˻No-Linjili˼ Jono omba yamboma no linjirimu kinie yu mulú-koleana molemo yemonga kongonomo tenjimbendo yamboma no linjirimu molo ya mana-yambomanga kongonomo tenjimbendo yamboma no linjirimuye? ˻Naene “Tei!” nirimu-na terimuye?˼ Ningu siei!” nirimu.

31 ˻Yuni aku-sipe walsirimu mele pilkulie˼ enene eneno kere-pali ningulie ningindu: “Yuni walsikimu mele olione pundu topo, ‘˻Jono˼ yu mulú-koleana ˻molemo yemonga kongono tenjimbendo yamboma no linjirimu˼.’ nímulu liemo yuni oliondo nimbendo: ‘Aku liemo ene Jonone nirimu ungumu nambemuna ‘I ungumu sike.’ ningu naa pilku liringiye?’ nimbé.

32 Molo olione nimulúndu: ‘Yu mana-yambomanga ˻kongono tenjimbendo yamboma no linjirimu˼.’ nímulu liemo we-yambomane olio tongenje.” ningu aku-siku ningindu pipili koloringi. “We-yambomane ‘˻No-Linjili˼ Jono yu paa sike Pulu Yemone ungu-umbu tonjirimumu pilipe yamboma nimbe sirimu ye te molorumu.’^u ningu pilimele kene olio nambe temolonje?” ningu eneno aku-siku kere-pali niringi.

33 ˻Eneno aku-siku anju-yando kere-pali ningulie˼, Yesusindu pundu toko ningindu: “˻Nuni walsikinu mele˼ olio naa pilkimulu.” niringi.