Unju-Waene Ponie Nokoringi Ye Kerimenga Ungu-Ikumua
12
(Kolomongo-kanga wane. Pulu Yemonga ungumu.)
Walse Yesusini ˻Juda-yambomanga ye-ailimendo˼ ungu-ikuma ene topa simbendo ungu-iku te i-sipe torumu:
“Ye tene unju-waene ponie tepalie pala terimu. Unju-waene-mongoma kambilipe ingi tepa waene-no monjimbendo poniena sukundu loyekolo akupe tepa mimi tepalie nirimumuni, pe ponie nokonge ulke-takaye te polo kulupe ola takorumu. Ye mare kanopa lipelie enendo nimbendo: “Nanga poniemo tápu-tenjiku unju-mongoma inie toko nokonjengi! Pe waene-mongo polo tomba kinie unju-mongoma moke tepo, kongono tenjingí méle mare ene liengi, méle mare na liembo!” nimbe kanu poniemo ene sipelie yu kolea paa suluringe pupe molorumu.
2 Kanu-kinie pe waene-mongo polo tomba terimu kinie ponie pulu yemone yunge kendemande-ye te “Nanga waene-mongo siengi puku liku menjiku wani pui!” nimbe ponie nokoringi yema moloringine lipe mundurumu.
3 Nakolo kendemande-yemo ˻orumu kinie˼ ponie nokoli yemane yu ambolko likulie yu wale aisili kopene toko waene-mongo mare naa siku yando we liku munduringi.
4 Altopa ponie pulu yemone kendemande-ye te lipe ˻“Nanga waene-mongo linji-pui!” nimbe lipe˼ mundurumu. Nakolo yu ˻orumu kinie˼ ponie nokoli yemane yu ambolko likulie toko pengemo toko siku yu teko kenjiringi.
5 Altopa ponie pulu yemone kendemande-ye te lipe mundurumu kinie enene yu toko konjiringi. Altopa kendemande-ye mare aisili lipe mundurumumanga mare wale aisili kopene toko, mare toko konjiringi.
6 Kanu-kinie ponie pulu yemo yunge ye telu mindi molorumu, yunge malo, yu konopu monjirimu kangomo. Yuni ˻konopuni pilipelie˼ ‘Nanga kangomo pipili kolko liku ai-siku, yu waene-mongo mare singí.’ konopu lepalie yunge malomo kamu lipe mundurumu.
7 Nakolo ponie nokoli yemane ponie pulu yemonga malo ombá orumu kanokolie enene eneno ningindu: “Andi okomo yemo pe lapanga monge-mélema limbe yemo okomo. Yu topo konjipu i poniemo olio kamu liemili!” ningulie
8 enene yu ambolko liku toko konjiku ˻yunge ónomo˼ poniena toko ulsu munduringi.”b ˻nimbe Yesusini nirimu.˼
9 ˻Yesusini ungu-iku akumu topa pora simbendo kanu Juda-yambomanga ye-ailimendo walsipelie nimbendo:˼
“Ponie nokoli yemane aku teringimunge pe ponie pulu yemone ene-kinie nambolka uluri tembaye? Yu omba kanu ye kerime topa konjipelie ‘Ye marene-lupe poniemo nokonjengi!’ nimbe lipe simbe.” ˻nirimu.˼c
10 ˻Yesusini Pulu Yemonga Juda-yamboma nokoringi yemane yu toko konjingí mele pilipelied enendo nimbendo:˼ “Pulu Yemonga bokuna sukundu ungu te kanoko naa pilimeleye? ˻Aku ungumu i-sipe mele:˼
‘Ulke takoringi yemane
kanoko keri kanoko toko ele teringi kou kanumu
kinié kelepa ulke-simu mele
ulke enge-sinjili kou aili peangamo.’e
11 ‘Ailimuni aku ulumu terimu olione
kanopo paa peanga kanolemolo.’f Konana 118:22,23
nimbe molemo kanumu.” nirimu.
12 ˻Kanu Juda-yambomanga ye-ailime˼ enene Yesusini ungu-iku torumu kanumu pilkulie enene yu toko konjingí teko moloringi mele yuni nirimu pilkulie enene yu ka singí teringi nakolo kanu ye-ailimene we-yamboma pipili kolkolie yu liku ka naa siringi. Yu munduku kelkolie anju puringi.
“Gapomano Kou-Takisi Tamili Molo Móloye?” Ningu Yesusi Walsiku Piliringi Temanemog
13 Pe walse ˻Juda-yambomanga ye-ailimene˼h Parisi-ye mare kiniei ye-nomi-kingi Erotenga talape-ye mare kinie liku, “ ‘Yesusini ungu te nimbe kenjipili!’ ningu i-siku i-siku yundu niengi!” ningu Yesusi molorumuna liku munduringi.
14 Liku munduringi yemane Yesusi molorumuna ongo yundu ningindu:
“Ungu-Mane Silimu, olio pilimolo, ‘nuni ungu-sikema mindi ningu, nu yambo teluringe kepe konopu kimbu naa siku, yamboma pipili naa kolko enendo pali ungu telu-siku ningu siku, Pulu Yemone “Teai!” nilimo uluma paa sike unguma mane siku, aku-siku teleno.’ konopu lemolo. ˻Aku-siku teko molenomonga nu nambolka konopu lekenoye?˼ Olione Romo-Gapomano Ye Paa Aili Kumbine ‘Sisa’ nilimu kou-takisi tomulu liemo kapola molo móloye? Yu ˻kou-takisi˼ simulúne naa simulúye? Pulu Yemone akumundu ungu-mane sirimu ungu-mane nambolkamo pelemoye?j Ningu si!” niringi.
15 Nakolo Yesusini ene topele-mapele toli yemak molemele mele pilipelie enendo nimbendo: “ ‘Yuni nimbe kenjipili!’ ningu nambemuna na manda manjiku kolo toko walsikimiliye?l ˻Takisi tolemele˼ kou-mongo te kanambo, mengo ongo siei!” nirimu kinie
16 enene yu molorumuna te mengo ongo yu siringi.
Kanu-kinie Yesusini enendo nimbendo: “I kouna naenga kumbi-keremo kinie imbimu kinie molemoye?” nirimu.
Enene yundu ningindu: “Romo-Gapomano Ye Paa Aili Kumbine Sisamonga kumbi-keremo kinie imbimu kinie molemo.” niringi.
17 Kanu-kinie yuni enendo nimbendo: “˻Kou-monemo Sisamonga˼ kene Sisamonga mélema Sisamo yuyu siku, Pulu Yemonga mélema Pulu Yemo yuyu siei!” nirimu.
Yuni aku-sipe ˻paa sumbi-sipe˼ nirimu mele pilkulie ˻‘Yu paa pilipe konginjili pelemo yemo lepamo.’ ningu pilkulie˼ konopu aisili liku munduringi.
“Kolemele Yamboma Lomboroko Ola Molkolie Altoko Nambe-Tengenje?” Ningu Yesusi Walsiku Piliringi Temanemom
18 ˻Kanu yema Yesusi-kinie kou-takisi toli ungumu ningu pora siringi kinie˼ pe Sadusi-ye maren Yesusi molorumuna oringi. Sadusi-yema ene ‘Pulu Yemone pe kolemele yamboma topa naa makinjimbe, lomboroko ola naa molonge.’ ningu pilku moloringi talapemo. Aku Sadusi-yema ongo Yesusi walsiku pilkulie ningindu:
19 “Ungu-Mane Silimu, ˻Pulu Yemonga ungu-manema olio sirimu ye˼ Mosisini ungu-mane sipelie nimbendo:
“Ambo limbe ye te ambolango naa membalie
ambomo we molopili kolomba kinie
kanu yemo yunge angenu molombamone
yunge ambo-wayemo lipe
angenu lipe taponjipe ambolango menjipili!”o
nirimu aku-sipe nimbe bokuna torumu molemo Ungu-Manema 25:5
“Angenupili yepoko-pakara moloringi. Komomo ambo lipe ambolango te naa membalie kolorumu.
21 ˻Ambolango te naa molopili kolorumu-na˼ yunge bulkundu angenumuni ˻yunge angenu kolorumumunge ambolango ‘Menjembo!’ nimbe˼ ambo-wayemo kelepa lirimu. Yu ambolango te naa menjipelie yu we kolorumula.
Yunge angenu bulkundumuni kanu ambomo lirimula nakolo yu kepe we kolorumu.
22 Aku teliku pukulie ye yepoko-pakara pali ambolango telu kepe naa mengolie kolko pora siringi kinie akiliomo we kolorumula.
Pe ambomo yu kolorumula.
23 “Akumunge, kolemele yamboma pe lomboroko ola molonge kinie kanu ambomo ye yepoko-pakara pali ya mana liringi-ne ambomo yu ye paa naenga menu molombaye?” niringi.
24 Yesusini enendo pundu topa nimbendo: “Ene Pulu Yemonga bokuna ungu molemoma kinie, Pulu Yemo-kinie tondolo pelemo mele kinie, naa pilku lou lemelemonga ˻yamboma pe tengemondo nikimili mele pilku sunduku kolo tokomele˼.
25 Lomboroko ola molonge yambomanga yema ambo naa liku, amboma ye naa puku, aku paa naa tenge. Mulú-koleana molemele angelloma molemele mele aku-siku molonge. ˻Angellomane mana-yamboma telemele mele naa telemele kanumu.˼ Aku tengemonga ˻“Ene Pulu Yemonga ungumu pilku sunduku lawa telemele.” nikiru˼.
26 “Nakolo ˻ene Sadusimene˼ ‘Kolemele yamboma lomboroko ola naa molonge.’ konopu lemelemonga ungu te niembola! Mosisi unju kanga tenga ˻tepe nomba perimu tepemone unjumu naa norumu kanopalie nirimumuni˼ akuna Pulu Yemonga ungu te wendo omba Mosisindu ungu te nirimu temanemo enene naa kanoko pilimeleye? Pulu Yemone Mosisindu nimbendo:
“Na Eporayamo kinie Aisake kinie Jekopo kinie
enenga Pulu Yemo molio.” nirimu.p
Pulu Yemonga bokuna Mosisini torumu aku ungu molemomo naa kanoko pilimeleye? ˻‘Enenga Pulu Yemo molorundu.’ naa nirimu. ‘Enenga Pulu Yemo molio.’ nirimu kanumu.˼
27 Pulu Yemo yu kololi yambomanga Pulu Yemo molo; yu konde mololi yambomanga Pulu Yemo. Aku-siku pilku sundukulie ene lou lemele.” nirimu.q
Pulu Yemone Ungu-Mane Sirimu Ungu-Manemanga Talo Olandopamonga Temanemor
28 ˻Sadusi-yema kinie Yesusi kinie˼ aku-siku kere-pali ningu molangi Pulu Yemonga ungu-manemanga puluma pilipe mane sirimu ye tes omba ene anju-yando ungu-mele teko kere-pali ningu moloringi omba pilirimu. Enene ungu mare Yesusindu walsiku piliringi kinie yuni anju pundu topa nimbe konjirimu mele pilipelie ungu-mane sirimu yemone Yesusindu walsipe pilipelie nimbendo: “Pulu Yemone ungu-mane sirimu pelemomanga pali nambolka ungu-manemo yu olandopamoye?” nirimu.
29 Yesusini pundu topa nimbendo: “Ungu mane olandopamo i-sipe:
‘Isirele-yamboma, pilieme!
Aili Yawe olionga Pulu Yemo
yu mindi Aili telumu molemo,
te lupe mólo!
30 Enene enenga kamelema kinie,
enenga minime kinie,
enenga pilipe konginjilime kinie,
enenga tondolomo kinie,
akumane Aili Yawe enenga Pulu Yemo manjiku
tondolo-munduku konopu monjengi!’t Ungu-Manema 6:4-5
nimbe, ungu-mane paa olandopamo aku-sipe ˻nimbe˼ molemo.
31 Ungu mane talo-sipemo i-sipe:
‘Enene eneno yu mele mele konopu monjiku
enenga kangimu eneno
kondo kolko nokolemele mele
aku-sikula pulu lemo yamboma
konopu monjiku nokoko molangi!’u LLipai 19:18
nimbe molemo. Aku ungu-manetolonga olandopa te paa naa pelemo, mólo!” nirimu.
32 ˻Yesusini aku nirimu pilipelie˼ yemone yundu nimbendo: “Ungu-Mane Silimu, papu nikinumu. Nuni ninindu: “Pulu Yemo telumu mindi molemo. We-te-lupe naa molemo. Yu-yuyu molemo.” nikinumu paa sike nikinu.
33 ‘Yu konopu monjingíndu
enene enenga kamelema kinie,
enenga pilipe konginjilime kinie,
enenga tondolomo kinie,
akumane ˻Ailimu enenga Pulu Yemo˼ manjiku
tondolo-munduku konopu monjengi!’
nimbe pelemo ungu-manemo kinie
‘Ene enenga kangime eneno kondo kolemele mele
yambo pulu lemomav aku-siku kondo kolangi!’
nimbe pelemo ungu-manemo kinie, aku ungu-manetolo temolo kinie olandopa; Pulu Yemo kongime kinie mélema popo topo kalopo “Imu nu sikiru.” nilimolo akumu maniendopa.” nirimu.
34 Yuni pundu topa nimbe konjirimu pilipelie Yesusini yundu nimbendo: “Nu konopu lelko molenomonga Pulu Yemone ye-nomi-kingi molopa nokolemo yambo-talapena sukunduw nondoko puni tekeno lemo.” nirimu.
Kanu-kinie ˻Yesusindu walsiku piliringi unguma pali yuni pundu topa anju nimbe konjirimu pilkulie˼ altoko yu ungu te walsiku pilingindu pipili kolko naa walsiringi.
Yesusini “Ye-Nomi Kirasimu Naenga Maloye?” Nimbe Walsirimu Temanemox
35 Yesusi ˻Pulu Yemo popo toko kaloringi˼ ulke-tembelena suku yamboma ungu-mane sipe molorumu. Mane sipe molopalie ungu te nimbendo: “Pulu Yemonga ungu-manemanga puluma pilku mane sili yemane ningindu: “Pulu Yemone “Ene nokopa konjimbe ye te lipu mundumbu.” ou nimbe mako torumu ye-nomi Kirasimu ˻ye-nomi-kingi˼ Depisini kalopa limbe yemo molomba.” nilimele akumu nambemuna “Yu Depisini kalopa limbe yemo molomba.” nilimeleye?y
36 ˻Aku nilimele yemane˼ Depisi yuni yuyu ˻kanu yemondo nirimu mele naa pilimelenje.˼ Mini Kake Telimu Depisinge konopuna molorumu kinie Depisi yuni ˻ye-nomi Kirasimu molomba mele˼ nimbendo:
“Aili ˻Pulu Ye Yawene˼ nanga Ailimundu nimbendo:
“ ‘Nunge opa-touma nuni nokani!’ nimbu,
pe ene topo manie mundunjimbu kene
isili-ou nu ˻na-kinie pea
tapú-topolo ye-nomitolo molopolo
mélema nokambili˼
nanga ki-umbukundu ongo molani!” nirimu.”z Konana 110:1
nimbe Depisini nirimu kanumu.
37 Depisini ˻ye-nomi Kirasimu˼ yundu “Nu nanga Ailimu.” nirimu. Pe enene “Yu Depisini kalopa limbe yemo ˻mindi˼ molomba.” nambe-teko pilkulie nilimeleye?” nirimu.
We-yambo aisili máku toko moloringime Yesusini nirimu unguma pilkulie konopu aili-teko siku pilku moloringi.
Ungu-Manema Pilku Mane Siringi Yemane Teko Kenjiringi Ulumanga Ungu Tea
38 Yesusini ungu-mane sipe molopalie nirimumuni ˻lepi-lepi topa˼ ungu te nimbendo:
“Enene Pulu Yemonga ungu-manemanga puluma pilku mane sili yemab mimi-siku kanoko konjiku ˻enene telemele mele manda lelko naa teko˼ molayo!
˻‘Yambomane olio kanoko “Ye peangama” niengi!’ ningu˼ kanu yemane wale-pakoli paa sulu peangama, ˻ye-nomime pakolemele mele,˼ pakoko andolemele. Yamboma máku toko molemele koleamanga mongo kenge teko andonge kinie ‘We-yambomane olio kapi niengi!’ ningu pilkulie konopu siku pilku andoko molemelela.
39 Yamboma máku toko Pulu Yemonga ungumu pilimele ulkemanga sukundu pukulie manie molongendo ye ailime molemele polo peanga akuna mendo puku polo akuna konopu siku molemelela.c Yambomane langi nongo yambomando “Namili wai!” nilimele kinie kanu yema ongolie ye ailimenga polo kumbikundu ‘olio molamili!’ ningu konopu siku molemelela.
40 “Yema kolemele kinie enene kanu yemanga ambo-wayema toko makoroko mundukulie ulkema ‘Olionga’ ningu we limele. Pulu Yemo-kinie ungu ningindu ningu sulu-munduku we kolo toko nilimele.d Pulu Yemone we-yamboma ulu-pulu-keri telemelemonga ene sike “Mindili nangi!” nimbé nakolo ya ye nikirumane aku uluma telemelemonga Pulu Yemone aku yema “Mindili paa aili-tepa nangi!” nimbé.” nirimu.
Ambo-Waye Koropa Tene Ulke-Tembelena Kou-Mone Mundurumu Temanemoe
41 Yesusi ˻Pulu Yemo popo toko kaloringi ulke-tembele˼ kere-puluna ulke-tembelena sukundu kongono tenge kou-monema munduringi unju-ketena nondopa manie molopalie yambo aisilini aku unju-ketena kou-mone ongo munduringi mele kanopa molorumu. Kanopa molorumu kinie yambo-kamakomane kou-mone aisili ongo munduringi kanorumu.
The Widow’s offering (Mark 12:41-44)
42 ˻Aku-sipe kanopa molorumu kinie˼ ambo-waye paa koropa te omba yu kou-kololi talo mindi mundurumu. Kanu kou-kololitolo lipe tere lepa kou paa koltalo melef mundurumu.
43 ˻Ambo-wayemone aku terimu kanopalie˼ Yesusini yu lombili andolime walsipe “Wai!” nimbelie enendo nimbendo: “Nane enendo paa sike nimbu sikirumu: “Andi ambo-waye koropamo yuni kou-mone mundukumumu paa olandopa mele mundukumu, we mundukumilime maniendopa mele.” nikiru.
44 Ene kou-mone aisili nosilimelemanga layetolo mindi ongo mundukumili. Nakolo ambo-wayemo kou-mone te paa naa nosilimo. Yunge kou layetolo nosimutolo pali memba omba mundumu. Langi nombá kepe te naa nosilimo.” nirimu.