9
(Kolomongo-kanga wane. Pulu Yemonga ungumu.)
Yesusi yuni enendo ungu te pea nimbendo: “Nane enendo paa sike nimbu sikirumu: “Ene ya angilkimilimenga mare ou kolou naa kolangi Pulu Yemo ye-nomi-kingimu omba,a enge nimbe molopa, mélema kinie yamboma kinie pali nokomba ombá kanonge,” nikiru.” nirimu.b
Yesusinge Kangimu Te-Lupe Au Lerimu Temanemoc
2 Yesusini ˻yu lombili andolimendo aku-sipe nimbe sirimu kinie˼ d pe koro te omba purumu kinie Pita keme Jemisi keme Jono keme ene lipe memba pupe mulúe paa olandopa polorumu tenga ola purumu. ‘Olio-oliolio mindi molamili!’ nimbe ene akuna lipe memba purumu. Akuna puringi kinie ene kanoko molangi yunge kangimu alowa tepa,
3 yu pakorumu mulu-wambalema ena tondolo topa mongo paa takele telemo mele aku-sipe paa kake terimu. Ya mana yambo tene wale-pakoli te sópone kulumiye topa kake tenjimbe mele kapola molo! ˻Yunge mulu-wambalema kake terimu mele paa olandopa.˼
4 Yu aku-sipe molopili, ˻Juda-yambomanga koronga-ou moloringili ye-aili talo,˼ Illainja kinie Mosisitolo ongolo Yesusi-kinie ungu ningulu mona angiliringili kanoringi.
5 Kanu-kinie Pitane Yesusindu nimbendo: “Rapai,f olio ya molopamolo peanga lepamo. Olione ulke-takaye yepoko takonjemili! Te nunge, te Mosisinge, te Illainjanga takonjemili!” nirimu.
6 (Nakolo aku nirimumu ene pipilini paa koloringi-ne yuni nimbé mele naa pilipe ungu te walu nirimu.)
7 Kanu-kinie kupe te omba ene aki torumu kinie kupena suku ungu te wendo ombalie nimbendo: “I yemo nanga konopu monjilio Malomo. Yuni ungu nimbéma pilku liengi!” nirimu.
8 Pe walsikale, ene mongo male-male teko kanokolie yetolo altoko naa kanoringi. Yesusi yu-mindi ene-kinie molorumu kanoringi.
9 Múlu polorumumunge manie onge oringi kinie Yesusini ene mane sipelie nimbendo: “Enene kinié kanongi mele isili-ou yambo teluri kepe ningu naa siengi! Pe mindi, Manie Omba Mana-Ye Au Lerimu Yemog kolopalie altopa lomboropa ola molomba kinie temanemo toko anju siengi! Ou molo!” nirimu.
10 Aku nirimu kinie ene yunge ungumu pilku liku ou anju naa niringi nakolo “yu “kolopolie altopo lomboropo ola molombo.” nikimu ungu kanumunge pulumu nambolka ulurindu nikimunje?” ningu ene-eneno kere-pali niringi.
11 Kanu-kinie yu lombili andolimene ˻yu sike molorumu mele ningu kanokolie˼ yundu walsiku pilkulie ningindu: “˻Pulu Yemone ‘olio nokopa konjipe lipe taponjimbe.’ nimbe mako torumu ye-nomi Kirasimu nu liemo˼ Pulu Yemonga ungu-manemanga puluma pilku mane silimele yemane “Illainja ˻kelepa˼ kumbi-lepa ombá. ˻Ye-nomi Kirasimu pe akilipe ombá.˼” nilimele akumu nambemuna nilimeleye? ˻Illainja kelepa naa opili nu koronga orunu moleno kanumu.˼” niringi.
12 Yesusini pundu topa nimbendo: “ “Illainja ˻kelepa˼ kumbi-lepa ombalie mélema pali tepa mimi temba.” nilimele kanumu sike nilimele. Aku liemo Manie Omba Mana-Ye Au Lerimu Yemo kanoko keri kanoko mindili liku singí mele ˻Pulu Yemonga˼ bokuna nambemuna imbi toringi molemoye?
13 Nakolo ˻akumunge ungu te pea nimbu sikiru.˼ Pilieme! Illainja koronga orumu. Yu orumu kinie ˻kanu yemane yu kanoko imbi naa siku˼ ‘Yu we-yere.’ konopu lelkolie ‘yu-kinie temolo.’ ningu piliringi uluma pali teringi.h Yu-kinie aku-siku tenge mele ou bokuna imbi toringi molemola.” nirimu.
Yesusini Kuru Te Makororumu Temanemoi
14 ˻Yesusi kinie yu lombili andoli ye yepoko kinie˼ ene yu lombili andoli ye wema moloringine yando ongo, yambo paa aisili akuna kakapu teko máku toko moloringi kanoringi. Pulu Yemonga ungu-manemanga puluma pilku mane siringi yemanej Yesusi lombili andoli ye wema-kinie ungu ningu, ungu mare walsiku pilku moloringi kanoringila.
Jesus Heals a Boy with an Unclean Spirit (Mark 9:14-29)
15 Yesusi orumu kinie kanokolie kanu máku toko moloringi yamboma suru aili-teko ningu yu orumuna lkisiku ongo yundu “˻Ailimu,˼ nu okonoye?” niringi.
16 Kanu-kinie yuni enendo “Enene ungu nambolka ungumu kere-pali nikimiliye?” nimbe walsirimu kinie
17 kanu máku toko moloringi yambomanga ye tene pundu topa yundu nimbendo: “Ungu-Mane Sílimu, nanga kangomo kuru te yunge konopuna molemomonga ungu manda naa nilimo-na nu molonu ˻konopu lepolie˼ membo ondu.
18 Kurumuni kangomo wale marenga ambolopalie yu topa manie mundulimo kinie yu kuru kopari topa, kere apoupu memba, ungú kinirokó lipe telemo. Nu lombili andolimendo aku temanemo topo sipu enene kanu kurumu ‘Makorangi!’ nimbu mawa tendu nakolo ene manda naa tengi.” nirimu.
19 Aku nirimu kinie pilipelie Yesusini yamboma ˻iri topalie˼ nimbendo: “Kinié molemele yamboma ene ˻‘Pulu Yemone uluma sike manda temba.’ ningu˼ tondolo-munduku naa pilku molemele yamboma, na ene-kinie molopo, wale nambe-tepo mane sipu ulu mare lipu ora simbu kinie mimi-siku pilingíye? ˻Na ene-kinie siye tekemo.˼” nimbelie “Na moliona kangomo mengo wai!” nirimu kinie
20 kangomo yu molorumuna mengo oringi. Mengo oringi kinie ˻kangomonga konopuna molorumu˼ kurumuni Yesusi kanopalie kangomo topa manie mundurumu kinie kangomo kimbu-kime peue mundupe apoupu merimu.
21 Aku terimu kinie kanopalie Yesusini kangomonga lapa walsipelie nimbendo: “Kangomo i kurumu te-wale pulu monjirimuye?” nirimu.
Lapane nimbendo: “Yu kokele anumuni merimu kinie aku-sipe terimu.
22 Wale aisili yu kopari topa tepena topa mundupe, nona topa mundupe telemo kene nuni manda liku taponjini liemo olio kondo kolko liku taponji!” nirimu.
23 Yesusini nimbendo: “Nuni nambemuna “Manda liku taponjini molo móloye?” nikinuye? ‘Nane nu manda lipe taponjimbe.’ ningu tondolo-munduku pilinu liemok uluma pali sike wendo ombá.” nirimu.
24 Yesusini aku nirimu kinie pilipelie kangomonga lapane tondolo ru nimbelie nimbendo: “Nane ‘sike nuni liku taponjini.’ nimbu pilkiru nakolo ‘Sike.’ nimbu pilkiru ungumu tondolo-mundupu ambolombo mele manda naa tekemo kene ‘Sike.’ nimbu pilkiru mele ‘tondolo pupili!’ ningu liku taponjeni!” nirimu.
25 ˻Kanu-kinie˼ yamboma lkisiku sukundu-sukundu kanonge onge oringi kanopalie Yesusini kurumu iri topalie nimbendo: “Kere pipi siku, komu pipi siku teleno kurumu, kangomonga konopuna ongo wendo puku, altoko paa naa ongo molani! Kamu pui!” nirimu kinie
26 kurumuni kangomo tondolo topa manie mundurumu kinie yu kimbu-kime peue mundurumu kinie kurumu kalle nimbe yunge konopuna wendo orumu. Kanu-kinie kangomo yu kolopa lerimu none terimu kanokolie yambo aisilini “Yu kolomu lémo.” niringi.
27 Nakolo Yesusini yunge kimu ambolopalie yu ola lirimu kinie ola angilirimu.
28 ˻Kanu-kinie Yesusini kurumu topa makoropa pora sipelie˼ ulkena sukundu ˻yu lombili andolime-kinie˼ purumu kinie lombili andolime enene Yesusi pea eneno molkolie yu walsiku pilkulie ningindu: “Kuru akumu olione nambemuna manda naa makoromuluye?” niringi kinie
29 Yesusini pundu topa nimbendo: “I ulumu mele temolondo (langi mi lepo naa nombo)l Pulu Yemo-kinie ungu nimbu mawa temolomone mindi manda temolo. We manda naa temolomo.” nirimu.
Yesusini Yu Toko Konjingí Kinie Kolopalie Lomboropa Ola Molomba Mele Wale Talo-Sipe Nimbe Sirimu Temanemom
9:30-33ekendo
30-31 ˻Yesusi kinie yu lombili andolime kinie˼ ene aku koleamo munduku siye kolko ˻yamboma moloringi koleama naa puku˼ kolea Gallilli-Disiriki sumbi-siku ongo pungí puringi. Akuna pungí puringi kinie yu lombili andolime ungu-mane silipe purumu-kulu ‘Na lombili andolime ungu-mane sikiru mele we yambomane naa piliengi kene olio we-yambomane naa kanangi, pea naa pamili!’ nimbe yu kinie yu lombili andolime kinie eneno kiyongo ningu puringi. ˻Yu-kinie pe wendo ombá mele˼ yuni ene ungu-mane silipe purumu mele i-sipe:
“Manie Omba Mana-Ye Au Lerimu Yemo ka sikulie ˻yu toko konjingí yema anju singí kinien enene yu toko konjingí. Kolopalie wale yepoko-sipemonga yu lomboropa ola molomba.” nirimu.
32 Nakolo yuni nirimu ungumu pilku sundukulie, ‘I ungumunge pulumu nambolkarenje, naa pilkimulu.’ niringi nakolo “Nambolka ningu nikinuye?” ningu walsiku pilingíndu pipili kolko naa walsiringi.
33 ˻Ongolie˼ kamu Kapeniame taonona suku oringi.
Pulu Yemo Ye-Nomi-Kingi Molopa Nokolemo Yambomanga Yambo Paa Imbi Olandopa Molemomonga Ungu Teo
9:33ekendo-37
Molonge ulkena suku puku moloringi kinie Yesusini yu lombili andolime walsipe pilipelie nimbendo: “Ene aulkena ungu nambolkarenga kere-pali niliku ongiye?” nirimu.
34 Nakolo enene ‘Olionga ye nae paa olandopa molemoye?’ ningu kere-pali ningu keru-kuru liringi-ne Yesusindu ene niringi mele ningu para singímunge pipili kolkolie molko duma liringi.
35 Kanu-kinie Yesusi yu manie molopalie yu lombili andoli rurepondo “Na moliona wai!” nimbelie nimbendo: “Yambo tene ‘Yambomanga ailimu molambo!’ nimbelie yu we-yambomo molopa yambomanga kendemandemo molopili!” nirimu.p
36 Aku nimbelie ambolango kanga te lipe ene moloringine monjipelie nirimumuni, aku ambolangomo yuni kangulupe enendo nimbendo:
37 “Yambo tene ‘Na Ailimunge yambomo molio.’ nimbeq i ambolangomo mele lipe taponjimbe kinie kanu yambomone aku tembamonga na lipe taponjimbela. Na lipe taponjimbe yambomone na manjipe naa lipe taponjimbe. Ambolangomo lipe taponjimbemonga kanu yambomo yuni na lipe mundurumu yemo lipe taponjimbela.” nirimu.r
Yesusini Nimbendo: “Olio Kinie Opa-Tou Naa Molemele Yamboma ‘Olionga Opa-Lkerayema.’ Niemili!” Nirimu Temanemos
38 ˻Yesusi lombili andoli ye˼ Jonone Yesusindu nimbendo: “Ungu-Mane Sílimu, olio kanomulu, ye tene nunge imbimu lepat walsipe kuru mare yambomanga konopuna molongime “Ongo wendo paa!” nimbe topa makoropa molomu kanomulu. Kanopolie yu olio pea tapu-topo naa molemolo kene yundu “Nu aku-siku naa tei!” nímulu.” nirimu.
39 Aku nirimu kinie pilipelie Yesusini yundu ˻kanu yemone terimu ulumundu˼ nimbendo: “Yambo tene nanga imbi lepa walsipe ulu-tondolo te tepalie yuni kelepa nondopa nando ungu te manda nimbe naa kenjimbe kene enene yundu “Mólo!” naa niengi!
40 Yambo te olio-kinie opa-toumu naa molemomo olionga opa-lkerayemo molemo kanumu.” ˻nirimu.˼
41 “Nane enendo paa sike nimbu sikirumu: “Ene no waka lemba kinie yambo tene ‘Ene ye-nomi Kirasimunge yamboma molemele kene no te nangi kolopo siembo!’ nimbe ene te kolopa simu liemo, Kirasinge kongono tenjingí yamboma yuni méle kalomba kinie kanu yambomo kepe komu naa sipe yu konopu lipe mundupe méle kalombala,” nikiru.” nirimu.
Olio Kirasinge Yamboma Kondi Tolemele Uluma Kinie, Olio Ulu-Pulu-Keri Telemolo Uluma Kinie, Aku Ulumanga Yesusini Mane Sipe Ungu-Iku Torumu Temanemou
42 “Yambo tene i ambolangomonga ˻mele yambo˼ te na ‘Sike’ nimbe tondolo-mundupe pilimo ambolangomov ‘Ulu-pulu-kerime tepili!’ nimbe kondi tombamonga kanu ambolangomo tondolo-mundupe pilimo mele mundupe siye kolopa bulu simu liemo ˻ambolangomo ou kondi naa topili˼ kanu yemo kou paa aili tew moko toko nomine lenjiku ‘Yu kamu kolo-pupili!’ ningu paka toko nomúna paa maniekondo mundulimelkanje paa papu.x Aku-siku toko mundulimelka kinie yu kolopalie pe yu Pulu Yemonga ambolango tendo ‘Ulu-pulu-kerime tepili!’ nimbe kondi manda naa tolka. Nakolo yu aku-siku nomúna naa mundulimelka kinie yu yamboma kondi tombamonga yu Pulu Yemo-kinie mongo aili pelka kene enene yu nomúna papu paka toko mundulimelka.
43-44 “Nunge kitolone ulu-pulu-keri te temu liemo aku kitolo karu lelko ele-teani! Nu konde mololiku mindi puni koleanay kitolo naa angilipili puni kinie peangamo. Nunge ki talo we angilipili nu tepe kolea,
(‘akuna Pulu Yemo teko kenjilimele yambomanga korowama
kolou naa kolopa nolipe mindi pulimo,
tepe toko kumunji naa kumunjilimele kolea’)z
akuna suku toko mundungí kinie kerimu.
45-46 “Molo nunge kimbutolone ulu-pulu-keri te temu liemo aku kimbutolo karu lelko ele-teani! Nu konde mololiku mindi puni koleana kimbutolo naa angilipili puni kinie peangamo. Nunge kimbu talo we angilipili nu tepe kolea,
(‘akuna Pulu Yemo teko kenjilimele yambomanga korowama
kolou naa kolopa nolipe mindi pulimo,
tepe toko kumunji naa kumunjilimele kolea’)a
akuna suku toko mundungí kinie kerimu. Aisaya 66:24
47-48 “Molo nunge mongotolone mélte kanokolie konopuni ‘liemboa!’ ningu pilku ulu-pulu-keri te tenu liemo aku mongotolo akuku ele-teani! Nu Pulu Yemo ye-nomi-kingimu molopa nokolemo koleanab mongotolo naa angilipili puni kinie peangamo. Mongo talo we angilipili nu tepe kolea,
‘akuna Pulu Yemo teko kenjilimele yambomanga
korowama kolou naa kolopa nolipe mindi pulimo,
tepe toko kumunji naa kumunjilimele kolea’c
akuna suku toko mundungí kinie kerimu. Aisaya 66:24
49 “Yambomane Pulu Yemo popo toko kalemele mélema singíndu ‘Pulu Yemone kanopalie ‘Langi kake telime.’ nimbe kanopili!’ ningu api-kusa mundukulie silimeled aku-siku mele yamboma molongena tepémo, api-kusa mele, yamboma-kinie pali wendo ombá.e
50 Api-kusa yu méle peangamo nakolo yu songo naa temba kinie ‘Yu kelepa songo tepili!’ ningu ulu te manda telemeleye?f ˻Api-kusa langimenga mundulimele kinie songo telemo aku-siku˼ ene api-kusa mele molko yamboma-kinie anju-yando konopu teluna pupili taka liku molangi!”g nirimu.