2 “I yambo máku toko molemelema na kondo tekemo. Wale yepoko na-kinie molongi, pe kinié ga nonge te naa lemo.

3 Mare aulke suluna oringimunge nane “Ene engele tepa pepili ulkendo pai!” nilkenje ene aulkena kimbu-ki pange-mange tepa, topa ne-munde ya-munde telka.” nirimu.

4 Aku nirimu kinie pilkulie yu lombili andolimene yundu pundu toko ningindu: “˻Sike nikinu nakolo˼ i kolea ku leline molemolo. I yamboma manda nonge mele pillawa kaloli tena lembana lipu simulúye?” niringi.

5 Yesusini enendo “Pillawa kaloli nambepa nosikimiliye?” nimbe walsirimu kinie

6 Kanu-kinie yuni máku toko moloringi yambomando “Manie molai!” nimbelie, pillawa kaloli yepoko-pakara lipe ˻Pulu Yemo-kinie˼ “Ange.” nimbe, akuma pike lepa yu lombili andolimendo “Yamboma moke teko siei!” nimbe ene sirimu. Nirimu kanu-mele teringi.

7 Ene oma kaloli kanga pokore kepe nosiringila, akuma lipe ˻Pulu Yemo-kinie˼ “Angela.” nimbelie yu lombili andolimendo “Ime yamboma moke teko siei!” nirimu.

8 Yamboma ˻langime˼ noringi kinie olo terimu. Pe langi kakena lerimuma lombili andolimene liku wale-basiketemanga lakiliringi, wale aili yepoko-pakara peke lerimu.

9 Ye po-tausinini aku langime noringi.

10 yu lombili andolime kinie yu kinie ene nona andoli sipine suku puku, ˻nomúna nekendo˼ kolea Dallamanuta^c puringi.

11 Akuna puringi kinie Parisi-yema^e Yesusi molorumuna ongo, ‘Yuni nambe-tembanje? Kanamili!’ ningu yu manda-lelko^f mawa tekolie ningindu: “˻Ungu-Mane Sílimu,˼ ‘Nu sike Pulu Yemone ‘Kongono tenjeni!’ nimbe ya mana lipe mundurumunje kanamili!’ ningu mulú-koleana molemo ˻Pulu˼ Yemone mindi manda ulu˻-tondolo˼ telemo mele te tei!” niringi.^g

12 ˻Aku-siku walsiringi kinie pilipe keri pilipelie Yesusi˼ yunge konopuna paa umbuni terimuna múlu aili-tepa lipelie nimbendo: “Kinié mana molemele yambomane “Pulu Yemone mindi ulu-tondoloma manda telemo mele kanamili tei!” ningu na nambemuna mawa telemeleye? ˻Na molio mele nambemuna “Sike.” we naa ningu tondolo-munduku pilimeleye?˼ Nane ene sike nimbu sikiru: “˻Na Pulu Yemo-kinie tapu topo kongono telembolo mele˼ lipe ora simbe kanonge ulu-tondolo te, kinié mana molemele yamboma-kinie wendo naa ombá,” nikiru.” nirimu.

13 Aku-sipe nimbelie nirimumuni, ene mundupe kelepa sipine sukundu kelepa pupelie nomúna nekendo purumu.

14 ˻Kanu-kinie ene nomúna nekendo pungíndu Yesusi lombili andoli yema˼ pillawa kaloli komu siku naa mengo puringi. Pillawa kaloli telu mindi sipine suku lerimu, te pea mólo!

15 Kanu-kinie Yesusini enendo lepi-lepi topa ˻ungu-iku topalie˼ nimbendo: “Paa mimi-siku kanai! Parisi-yema kinie ˻ye-nomi-kingi˼ Erote yunge yema kinie enene pillawa akoli méle isi nosilimelemo kanoko konjei!” nirimu.

16 Aku-sipe nirimu kinie pilkulie yu lombili andoli yemane eneno kere-pali ningulie ningindu: “Olio pillawa kaloli ˻nomolo˼ mare naa lipu membo omulumunge aku-sipe nikimunje.” niringi.

17 Aku-siku niringi mele pilipelie Yesusini enendo nimbendo: “Enene “Pillawa kaloli naa memulu.” ningu nambemuna kere-pali nikimiliye? Kinié kepe enene naa kanoko, mimi siku naa pilkimiliye? Na tondolo te perimu-na pillawa kalolime kinie ulu-tondolo te terindu mele ene naa piliringiye? Ene konopu naa pepili molemelemonga nane nikiru mele ungu-pulumu naa pilkimiliye?ⁱ

18-19 Ene mongo angilimo nakolo mélema naa kanokomeleye? Komu angilimo nakolo unguma naa pilkimiliye? Pillawa kaloli te-pakara lipu pike lepo ye pape-tausini moke tepo sirindu kanumu ene komu sikimiliye? ˻Nongo pora siringi kinie˼ langi kakena lerimuma liku wale-basikete nambepa toko peke siringiye?”^j nirimu kinie

20 ˻Yuni enendo kelepa nimbendo:˼ “Pe pillawa kaloli yepoko-pakara lipu pike lepo ˻ye˼ po-tausini moke tepo sirindu kinie ˻nongo pora siringi kinie˼ wale-basikete aili nambepa langi kakena lerimuma toko peke siringiye?” nimbe walsirimu kinie

21 Yuni enendo ˻kelepa˼ nimbendo: “Kinié kepe enene mimi-siku naa pilkimiliye?”^k nirimu.

22 Yesusi kinie, yu lombili andolime kinie, ene Besaida taonona puringi kinie mongo keri lerimu ye te Yesusi molorumuna mengo ongo mawa tekolie ningindu: “Nuni i yemo kini amboloi!” niringi.

23 Aku niringi kinie Yesusini mongo keri lerimu yemo ki ambolopa taono ulsukundu memba pupelie yunge mongotolonga lkambe topa kanjipe kimuni ambolopalie nimbendo: “Nu kinié mélte kanokono molo móloye?” nirimu kinie

24 yemone olando-sipe kanopalie nimbendo: “Na kinié yambo mare, ene unju-melema ongo pukumili kanokoro.” nirimu.

25 Yesusini yunge mongotolonga kelepa ambolorumu kinie yemo yu mongo makilipe mélema pali mongotolone sumbi-sipe kanorumu.

26 Yesusini yemondo “Ulkendo pui!” nimbelie nimbendo: “Nu kelko ulkendo punindu ne kolea ˻molopo wendo ombulu˼ akuna ˻kelko anju˼ naa pui!” nirimu.^l

27 Yesusi kinie yu lombili andolime kinie puku kolea-aili Sisaria-Pillipai nondopa lerimu kolea-kangamanga pungí puringi. Akuna pungí puringi kinie Yesusini yu lombili andolimendo walsipelie nimbendo: “Yambomane na imbi lelko nae nilimeleye?” nirimu.

28 Enene yundu ningindu: “Marene “Nu No-Linjili Jono ˻kolorumu kanumu kelepa lomboropa ola molemo˼.” ningu pilimele; marene “Nu ˻Pulu Yemone ou konde molopili olando lirimu ye˼ Illainja kelepa omba molemo.” ningu pilimele; marene “Nu Pulu Yemone ungu-umbu tonjirimuma pilipe yamboma nimbe sirimu ye te ˻ou kolorumu kinié lomboropa ola molemo.˼” ningu pilimele.” niringi.ⁿ

29 Aku niringi pilipelie Yesusini enendo walsipe pilipelie nimbendo: “˻We-yambomane aku-siku nilimele˼ nakolo ene-eneno na nae nilimeleye?” nirimu.

30 ˻Pitane aku nirimu pilipelie˼ Yesusini enendo tondolo-mundupe nimbendo: “Na molio mele ˻Pitane kinié nikimumu˼ enene anju yambo telurindu kepe ˻isili-ou˼ paa naa ningu siei!” nirimu.^o

31 Kanu-kinie Yesusi yu lombili andolimene yundu ˻“Pulu Yemone olio “Nokopa konjimbe ye te lipu mundumbu.” nimbe mako torumu ye-nomi Kirasimu nu.” ningu, ningu para siringi kinie pilipelie˼ yuni yu-kinie wendo ombá mele pulu monjipe^q ene mane sipelie nimbendo: “Manie Omba Mana-Ye Au Lerimu Yemo mindili aisili nombá. Juda-yamboma nokolemele tápu-yema kinie, Pulu Yemo popo tonjili ye-ailime kinie, Pulu Yemonga ungu-manemanga puluma pilku mane sili yema kinie,^r enene ˻ningindu: “Yu Pulu Yemone naa lipe mundurumu. Yu Pulu Yemonga Malo naa molemo.” ningu˼ yu liku bulu siku yu toko konjingí. Yu toko konjingí kolomba kinie wale talo omba pumbe kinie yepoko-sipemonga yu lomboropa ola molomba.” nirimu.

32 Yesusi yu-kinie wendo ombá mele aku-sipe sumbi-sipe nimbe para sirimu kinie pilipelie Pitane yu anju lipe memba pupelie ˻Yesusi yuni “Na toko konjingí.” nirimumunge˼ yu pulu monjipe iri torumu.

33 Nakolo ˻yuni kurumanga nomi Setenene^s ungu-umbu tonjirimu mele pilipelie nirimu-na pilipelie˼ Yesusini topele topa yu lombili andolime kanopalie Pita iri topalie yundu nimbendo: “Setene, nu anju pa! Nu Pulu Yemone konopu lemo mele naa leno. Yambomane konopu lemele mele mindi leno kene anju pui!” nirimu.

34 Kanu-kinie yambo akuna liku máku toko moloringime pali kinie yu lombili andolime pea “Na moliona wai!” nimbelie enendo nimbendo: “Yambo tene ‘Yu lombili pambo!’ nimbelie yuni yunge konopumuni pilimo mélemanga ‘Topo manie mundembo!’ nimbe yamboma unju-perana angilku mindili nongo kolemele mele yuni unju-pera mele gomo lembando ‘Na yu lombili pumbundu mindili nondu liemo papula; kolondu liemo papula.’ nimbelie na lombili opili! We naa opili!

35 Yambo tene yunge mana konde molopa naa kololi ulu-pulumu ambolomba temba kinie yu kolopalie sike molopa kenjipe mindi pumbe. Nakolo yambo te na konopu monjipe nanga yambomo molopa, ‘Yamboma temane-peangamo piliengi!’ nimbe ene nimbe sipe molomba kinie yu kolopalie yu konde molopa konjipe mindi puli ulu-pulumu sike kanopa limbe.

36 ˻Akumu nambemuna nikiruye?˼ Yambo tene mana-mélema pali yuyu lipe nosipelie yu mini-pali Pulu Yemo naa molomba koleana pupe mindili nomba molopa kenjilkenje kanu mélemane kanu yambomo nambe-tepa lipe taponjilkenje? Lipe naa taponjilkemo.

37 Yambo tene ‘Na mini-pali konde molopo konjipu mindi pambo!’ nimbelie yu nambolka méltene mini-pali konde molopa konjipe mindi puli ulu-pulumu topo topa lilkeye? Méltene manda topo topa naa limbe.

38 “Nanga yambo mare ulu-pulu-keri teko Pulu Yemo munduku kelko méle lupema imbi ambolko ola linjiku molemele yamboma-kinie molkolie pipili kolko ningindu: “Olio Yesusinge unguma pilipu lipu, yu lombili andopo molemolo mele we-yambomane naa piliengi!” ningulie na kiyongo ningu lombili andolemele yamboma, ene-kinie ulu te pe wendo ombá mele nimbu siembo: Manie Omba Mana-Ye Au Lerimu Yemo^t pe Lapanga tondolo pa telimu-kinie ˻mulú-koleana˼ angello kake telime-kinie ˻manie˼ ombá temba kinie, kanu we-yamboma molongena yunge yamboma mona molongendo we-yamboma molongena kanokolie, yu ou naa opili ‘Olio yunge yamboma molemolo mele we-yambomane naa piliengi!’ ningu pipili kolko lopi teko molonge yamboma yuni lipe wekendo kanopa, “Na moliona naa wai!” nimbéla.” nirimu.