2 Aku ningu panjikulie yu liku, ka toko, mengo puku, ˻Romo˼-gapomano ye-nomi Paillate molorumuna mengo puku kote tenjiringi.

3 Kanu-kinie Judasi, yu Yesusi lipe yunge opa-touma sirimu ye kanumu, Yesusinge kotemo pilkulie “Kolopili, toko konjengi!” niringi kinie pilipelie yuni Yesusi ene lipe sirimu mele pilipe keri pilipelie, kelepa konopu alowa tepa enenga kou-sillipa wane paono tene ou yu siringime kelepa memba pupe Pulu Yemo popo tonjiringi ye-ailime kinie Juda-yambomanga tapu-yema kinie sipelie nimbendo:

4 “Nane ye ene lipu sindu kanu yemo yu ulu te tepa naa kenjili yemo ‘Toko konjengi!’ nimbu lipu sindumu^d paa ulu-pulu-keri te tendu.” nirimu.

5 Kanu-kinie Judasi yuni kou-sillipa kanuma memba pupe ˻Pulu Yemo popo toringi˼ ulke-tembele palana topa anjukundu mundupelie yu ene mundupe kelepa anju purumu. Anju pupelie ‘Ka nombo kolambo!’ nimbelie ka te lipe memba pupelie ka nomba kolorumu.

6 Pulu Yemo popo tonjiringi ye-ailimene kou kanuma ˻manie polona˼ lerimu kanoko likulie ningindu: “I kouma yambo topo konjimulundu símuluma kene ulke-tembele kouma kinie tere lepo nosimulú kinie kapola naa temba. Akumunge ungu-mane te pelemo kene naa nosemili!” ningulie

7 ungu te ningu panjikulie ningindu: “I kou-monemane mingi-sosipene mane tepa mimi telemo yemonga mamo topo-topo liemili! Yambo ma te naa lepa enenga kolea suluna yambo ya ongo molemelemanga yambo kolongema akuna óno teangi!” ningulie aku-siku topo-toko liringi.

8 ˻Kanu kou-monemane ye te toko konjingí aulkemo akisinjiringi koumane˼ aku teringimunge kanu mamo imbi lelko ‘Yambo Toko Meme Ondoringi Mamo’ niringi mele kinié kepe aku-sipu nilimolo.

9-10 ˻Juda-ye-ailimene˼ aku-siku teringimunge Pulu Yemone ungu-umbu tonjirimuma pilipe yamboma nimbe sirimu ye Jeremayane ulu te pe wendo ombá ou nirimu mele kamu wendo orumu. Yuni nimbendo:

11 Judasi aku-sipe tepa molopili Yesusi Romo-gapomano ye-nomi ˻Paillate˼ molorumumunge kumbi-kerena angilirimu kinie kanu ye-nomimuni ˻yunge kotemo pilipelie˼ yu walsipe pilipelie nimbendo: “Nu Juda-yambomanga ye-nomi-kingimu molo móloye?” nirimu.

12 Pulu Yemo popo tonjiringi ye-ailime kinie, ˻Juda-yambomanga˼ tápu-yema kinie, enene Yesusi kote tenjiku Paillatendo ˻kolo toko˼ ungu aisili ningulie ningindu “Yesusi yu tepa kenjilimo.” ningu yu kote tenjiringi kinie Yesusi yu ungu te naa nimbe we angilirimu.

13 ˻Yesusini ungu te naa nirimu kanopalie˼ Paillatene yundu nimbendo: “Nu ulu-keri aisili terinu nikimili mele nu naa pilkinuye?” nirimu kinie

14 Yesusi ˻yu tepa kenjirimu niringi mele˼ pundu topa ungu teluri kepe naa nimbe ˻we angilirimu kinie kanopalie Romo-˼gapomano ye-nomi kanumuni paa mini-wale mundupe konopu aisili lipe mundurumu.

15-16 ˻Yesusi kote tenjiku molangi,˼ ye te, yunge imbi Barapasi, yu mongo lirimu mele yamboma pali pilku moloringi kanu yemo yu ka-ulkena perimu. ˻Ponie tenga-tenga, Juda-yambomane kolea-aili Jerusalleme ongo akuna suku˼ Pulu Yemone enenga anda-kolepalime Naa Topa We Omba Purumu mele pilingindu^f langi noringi walema wendo orumu kinie enene ka-ulkena perimu ye te imbi lelko “Wendo liku mundoi!” ningu mawa teringi kinie ˻Romo-˼gapomano ye-nomimuni kanu yemo wendo lipe yamboma sirimu.

17 ˻Aku-siku te-pu-opu teringi walema kamu wendo omba pepili Yesusi kote tenjiringi pilipelie nirimumuni,˼ Juda-yamboma liku máku toko moloringi kinie Paillatene ene walsipelie nimbendo: “Ye nae ka-ulkena wendo lipu ene siembo konopu lekemeleye? Ye Barapasi wendo lipu siembo, molo enene “Pulu Yemone “Ene nokopa konjimbe ye te lipu mundumbu.” ou nimbe mako torumu ye-nomi Kirasimu.”^g nilimele ye Yesusi wendo lipu siemboye?” nirimu.

18 ˻We-yamboma Juda-yambomanga ye-ailime munduku kelko enenga unguma liku su siku Yesusinge ungumu pilku yu lombili andoringimunge Juda-yambomanga ye-ailime˼ Yesusi-kinie konopu keri panjikulie^h kote tenjiringi-ne pilipelie Paillatene aku-sipe nirimu.

19 Paillate kote-pilili polona ˻molopa ‘Juda ye-ailimene pundu toko ungu te ningínje.’ nimbe nokopa˼ molorumu kinie yunge menuni ungu te yu molorumuna nimbe mundupelie nimbendo: “Nuni andi ye sumbi-nílimu ulu te naa tei! Kinié yu kumbu tepo kanondumunge nanga konopuna umbuni aisili wendo omu kene yu ulu te paa naa tei!” nirimu.

20 ˻Paillatene “Ka-ye nae wendo lipu siemboye?” nirimu kinie pilkulie˼ Pulu Yemo popo tonjiringi ye-ailime kinie, ˻Juda-yambomanga˼ tapu yema kinie, enene we-yamboma kondi toko ungu-umbu tonjikulie “ “Yesusi topa konjipili! Barapasi wendo lipe sipili!” niei!” niringi.

21 ˻Aku niringi kinie pilipelie Romo-˼gapomano ye-nomimuni enendo “yetolonga ‘nae wendo lipu siembo!’ konopu lekemeleye?” nimbe walsirimu kinie

22 Aku niringi kinie pilipelie Paillatene enendo nimbendo: “Aku liemo, enene “Pulu Yemone “Ene nokopa konjimbe ye te lipu mundumbu.” ou nimbe mako torumu ye-nomi Kirasimu.” nilimele ye Yesusi, nambe-teamboye?” nimbe walsirimu kinie

23 Aku niringi pilipelie yuni enendo nimbendo: “Aku nambemunaye? Yu mongo nambolka mongore limuye?” nirimu.

24 Yunge ungumu naa pilku, opa tenge teringi kanopalie Paillatene no mare kolopa lipe, yambo liku máku toko angiliringime kanoko molangi ki kulumiye topalie nimbendo: “I yemo toko konjingí kolomba kinieⁱ ene-kinie ungu pemba; nanga ungu te naa pemba.”^j nirimu.

25 ˻Aku-sipe nirimu kinie pilkulie˼ yambomane pundu toko ningindu: “Yu tonge kolombamonga umbuni pembamo olio kinie olionga ambolangoma kinie pepili!” niringi.

26 Kanu-kinie ye Barapasi ka-ulkena wendo lipe ene sirimu. ˻Aku tepalie˼ Yesusi lipe ˻yunge ami-yema˼ sipelie nimbendo: “Yu ka-pulsene tokolie pe ‘Unju-perana kolopili!’ ningu mengo puku unju-perana uku toko panji-pai!” nirimu.

27 Kanu-kinie ˻Romo˼-gapomano ye-nomimunge ami-yemane Yesusi liku kanu ye-nomimu perimu ulke-aili^l akuna suku ˻yamboma liku máku toko moloringi koleana˼ pukulie, enenga ami talape yema pali “˻Yesusi ya molemona˼ sukundu-sukundu wai!” niringi.

28 Kanu-kinie yunge mulu-wambalema kulku wendo linjiku, ‘Yu ye-nomi-kingi te none tepili!’ ningu mulu-wambale kondoli peanga te pakonjiku,

29 unju-ka koko molorumu te mulkupiye teko ‘Ye-nomi-kingimunge waniemo.’ ningu pengena mere mundunjiku, kingimene unju-kope te we ambolemele mele koló te liku yunge ki-umbukundu amonjikulie niringimuni, yu angilirimuna koporongo langoko ungu-taka tonjiku imbi we kólo toko ola linjingindu “Juda-yambomanga ye-nomi-kingimu, nu angilinoye?” ningu

30 yunge kumbi-kerena lkambe toko kanjiku, koló kope ambolorumumu liku yunge pengena kope to-pu-opu teringi.

31 Yu aku-siku ungu-taka tonjiku pora sikulie mulu-wambale kondolimu kulunjiku, yunge ou panjirimu mulu-wambalema altoko panjinjikulie “Yu unju-perana kolopili, panji-pamolo.” ningu yu liku mengo puringi.

32 ˻Romo-ami-yemane Yesusi Jerusalleme palana˼ ulsu mengo pungí pukulie niringimuni,ⁿ kolea Sairini^o ye te, yunge imbi Saimono, ambolko liku ka-mele siku Yesusi kolomba unju-peramo “Kolo wangoko menji!” ningu siringi.

33 ˻Pukulie˼ kolea Golkota puku akuna moloringi. (Golkotanga ungu-pulumu ‘penge ombele leli koleamo’.)

34 ˻Yesusi akuna mengo pukulie niringimuni, ‘Yamboma mindili naa nangi!’ ningu˼ no-waenena suku maratene kombili teli te munduku nosiringi aku no-waenemo^p ‘Yu nopili!’ ningu, siringi nakolo aku no-waenemo nomba pilipelie “Mólo!” nimbe naa norumu.^q

35 Kanu-kinie ˻ami-yemane˼ yu unju-perana ola panjikulie unjumu liku ola anjiringi. ˻Aku tekolie, ou unjuna ola uku toko naa panjikulie˼ yunge mulu-wambale ˻kulunjiku nosiringime˼ ‘Moke teamili!’ ningu ene yu-mele-mele lingí mele pilingindu kou-kate teko pe mulu-wambalema liringi.^r

36 Pe yu unju-perana ola angilipili tápu-teko kanoko moloringi.

37 ‘Yu mongo lirimu mele yamboma kanangi!’ ningu

38 Opa tekolo mélema wa liringili ye talo pea unju-pera talonga uku toko panjiringila. Te Yesusi yunge ki umbukundu uku toko, te ki tarokondo uku toko panjiringi.^s

39 Akuna ongo puringi yambomane Yesusi ˻kanoko keri kanokolie yu˼ ungu-taka tonjiku iri-mele tokolie

40 ningindu: “Aa! “Ulke-tembelemo tekisipulie altopo wale yepoko omba pupili takopo limbu.” nirinu yemo,^t ‘Naa kolambo!’ ningu nu nunu liku taponji! Nu sike Pulu Yemonga Malo liemo unju-perana manie oi!” niringi.

41 Aku-sikula Pulu Yemo popo tonjiringi ye-ailime kinie, Pulu Yemonga ungu-manemanga puluma pilku mane siringi yema kinie,^u ˻Juda-yambomanga˼ tapu-yema kinie, enene kepe yu ungu-taka tonjikulie ningindu:

42 “Yu yambo-wema ‘Naa kolangi!’ nimbe lipe taponjirimu nakolo yu-yuyu ‘Naa kolambo!’ nimbe manda naa lipe taponjikimu. Yu ‘Isirele-yambomanga ye-nomi-kingimu ˻molio.’ nilimo mele sike aku-sipe˼ molemo liemo yu-yuyu unjuna manie opili! Yu-yuyu unjuna manie ombá kinie kanopolie ‘Yu sike olionga ye-nomi-kingimu.’ nimbu tondolo-mundupu pilimolo.^v

43 Yuni ‘Pulu Yemone na lipe taponjimbe.’ nimbe tondolo-mundupe pilipe molemo kanumu; yu “Pulu Yemonga Malo molio.” nilimo^w kene Pulu Yemone yu kanopa peanga kanopa, ‘Yu manie we olkanje papu.’ konopu lemu liemo kapola, yu omba yu lipe taponjipe ˻unjuna wendo lipili˼! ˻Aku-sipe temu liemo ‘Yu sike Pulu Yemonga Malo.’ nimbu tondolo-mundupu pilimolo˼.” niringi.

44 Wa noli ye talo yu-kinie unjutolonga uku toko panjiringi yetolone yu aku-siku ungu-taka tonjiringilila.

45 ˻Yesusi unjuna ola we pepili˼ ai-tangoli ena tuwellepo-killoko terimu kinie kolea pali sumbulu topalie, pe ipupini ena tere-killoko terimu kinie kelerimu.

46 Ipupini ena tere-killoko mele terimu kinie Yesusini ru nimbelie nimbendo:

47 Akuna nondoko angiliringimenga marene yuni aku nirimu kinie pilku ˻sundukulie˼ ningindu: “Pilieme! Yu Illainja walsikimu.” niringi.^z

48 Aku nirimu kinie piliringimenga ye te tamburembu lkisipe pupe ulú-pinje mele te lipe no-waene kombili teli mare akuna panjipelie, ‘Yesusi no-waene kombili teli pinjena pelemomo nopili!’^a nimbe memba omba unju-pepena tenga ka topa olando sirimu.

49 ˻Nakolo yu no-waenemo sirimu mele kanokolie˼ we-yambomane ningindu: “Mólo! Kinié unjuna we angilipili! Illainjane sike yu ‘Naa kolopili!’ nimbe lipe taponjipe manie limbendo okomonje, kanopo kanamili!” niringi.

50 Yesusini ungu te tondolo ru nimbelie,^b pe yunge minimundu ‘Pui!’ nimbe yu kolorumu.

51 Yu aku-sipe kolorumu kinie ˻ulu-aili mare˼ walsikale ˻wendo orumu.˼ Pulu Yemo popo toko kaloringi ulke-tembele ˻Jerusalleme suku angilirimu akuna sukundu Pulu Yemo molorumu˼ suluminia paa kake telimunge kere-puluna ˻‘Yamboma sukundu naa pangi!’ ningu ou alieli˼ mulu-wambale aili tene pipi siku panjiringi angilirimu. ˻Yesusi kolopa pora sirimu kinie˼ kanu mulu-wambalemo ai-suku-singine olakondo maniendo-sipe olá torumu.^c ˻Aku tepa,˼ ma jimi-jimi te tepa, kou ailime topa ungu-mengu topa,

52 yambo ou óno teringi koleama anju-yando pupe, Pulu Yemonga yambo kake teli ou koloringime^d ˻Pulu Yemone˼ topa makinjirimu.

53 Lomboroko ola molko óno-kolea peringine wendo ongolie, Yesusi pe lomboropa ola molorumu kinie Pulu Yemonga kolea-aili kake teline^e suku pukulie yambo aisili ‘Kanangi!’ ningu puringi.

54 ˻Romo-˼ami-ye wane-anderete nokorumu yemo kinie, yu pea Yesusi terimu mele tápu-teko kanoko moloringi ami-yema kinie, enene ma jimi-jimi tepa ulu lupe-lupema wendo orumu kinie kanokolie ene paa mini-wale mundukulie ningindu: “I yemo yu paa sike Pulu Yemonga Malo lepamo.” niringi.

55 Ambo aisili mele, ˻Yesusi unju-perana kolorumu˼ akuna sulu-teko kanoko angiliringi. Ou kanu amboma ˻enenga pulu-˼kolea Gallilli disiriki munduku kelko Yesusi lombili andoko liku taponjiku nokoko ˻Jerusalleme pea˼ oringi amboma.

56 Enenga ambo te Makatalla-taono ambo Maria, te Jemisi kinie Josese kinie eltenga anumu Maria, te ye Seperinge malotolonga anumu.

57 Ipupini, kolea kala tomba terimu kinie Arimatia-taono ye kamako te, yunge imbi Josepo, yu kepe Yesusi lombili andorumu ye te, yu omba

58 ˻Romo-gapomano ye-nomi˼ Paillate molorumuna pupe, “Yesusinge ónomo na si!” nimbe mawa terimu kinie Paillatene yu “Ónomo lipili!” nimbe ˻ami-yemando nimbe mundurumu˼.

59 ˻Paillatene “Kapola.” nirimu kinie˼ Josepo pupe ónomo manie lipe, mulú konde tene lipe kulupi torumu. Kulupi topalie

60 kou-kande konde te, Josepo yu ‘Kolombo kinie akuna na óno teangi!’ nimbe kou-kande te akupe nosirimu kou-kandemonga suku memba pupe nosirimu. Nosipelie kou-kande kere-puluna kou aili te perele-marele memba omba pipi sipelie yu kelepa purumu.

61 Makatalla-taono ambo Maria kinie Maria te kinie^g elte kou-kandemo lerimu kere-puluna nondoko ˻yu ónomo kou-kandena nosirimu mele kanoko˼^h moloringili.

62 ˻Kanu-kinie,˼ ‘Opali ˻koro molomolo˼ Wale-Sambatemo.’ⁱ ningu pilkulie, kinié mele, mélema undu-undu siringi kanu walemo pora nirimu kinie opalikundu Pulu Yemo popo tonjiringi ye-ailime kinie, Parisi-yema kinie,^j ene ˻Romo-gapomano ye-nomi˼ Paillate molorumuna puku liku máku toko angilkulie

63 ningindu: “Ye-Ailimu, ye kanumu ou naa kolopa we molopalie yambomane ‘Sike.’ ningu pilingí unguma kolo topa nirimu kanu yemo yu “Kolopolie wale-yepoko omba pumbe kinie lomboropo ola molombo.” nirimu^k olio pilirimulu kene

64 ˻nuni ami-yemando˼ “Kanu yemo ˻bonongo˼ óno tengi kou-kandemo wale-yepoko paa mimi-siku nokai!” nieni! Naa nokonge kinie yunge lombili andoli yemane ónomo ongo wa liku mengo pukulie “Yu lomboropa ola molopa omba pumu.” ningí. Aku-siku kolo toko ningí kinie yuni ou ‘ ‘Sike nikimu.’ niengi!’ nimbe kolo torumu ungumu maniendopa, enene ‘Yambomane ‘Yuni sike aku-sipe temu.’ niengi!’ ningu kolo tonge ungumu paa olandopa pemba.” niringi.^l

65 Paillatene ˻Juda-ye-ailimendo˼ pundu topa nimbendo: “˻Aku liemo,˼ ami-ye mare liku mengo puku, “Yemo óno tengi koleamo nokoko konjengi!” ningu monjiku, ‘Yambomane óno-koleamo ulu te naa teangi!’ ningu ‘Aulkemo tondolo pipi siemili!’ konopu lenge mele teangi!” nirimu.

66 ˻Aku nirimu kinie˼ pilkulie ami-ye mare liku mengo puku, yambo-óno kou-kandemo pipi siringi koumu pala teko pele lelko enenga imbimu akuna toko monjikulie, “Ami-yema akuna nokoko molangi!” ningu monjikulie ˻ene puringi˼.