Yesusi Lomboropa Ola Molopalie Terimu Mele Temane Marea
Kolomongo-Aili 28 pali
Temane Te: Yesusi Lomboropa Ola Molorumu Kinie Ambo Talone Yu Kanoringili Temanemob
28
(Kolomongo-kanga wane. Pulu Yemonga Ungumu.)
˻Koro moloringi˼ Wale-Sambatemo pora nimbe, enenga pulu-pulu kongono-walemoc wendo ombando kolea tangombando muni lerimu kinie Makatalla taono ambo Maria kinie, Maria te kinie,d pukulu ˻Yesusinge˼ ónomo nosiringi kou-kandena ˻ónomo˼ kanongele puringili.
2 Ailimunge mulú-koleana angello te manie orumu kinie ma jimi-jimi paa tondolo-tepa terimu.e Angellomone omba kou-kandena pupe kou-kande kerepulumu pipi siringi koumu wendo lipe perele-marele memba pupe nosipe akuna ola molorumu.
3 Kanu angellomonga kumbi-keremo kariapá tepa pa telemo mele pa tepa, múlu pakorumuma kalopera topa paa kake telemo mele kake terimu.
4 Yesusi-óno-kolea nokoringi ami-yema angellomo kanoko paa mini-wale munduku pungu-pungu ningulie yambo kololimene ungu naa ningu ulu te naa telemele mele ene aku-siku uluri naa teko we moloringi.
5 Angellomone ambotolondo nimbendo: “Pipili naa kolale! Yesusi ‘Kolopili!’ ningu talko unju-perana uku toko panjiringi kanu yemo kanongele okombele na pilkiru.
6 Yu ya naa lemo. ˻“Kolopolie wale yepoko-sipemonga˼ lomboropo ola molombo.” ou nirimu aku-mele temu. Ónomo ou lerimu koleamo ongo kanale!
7 Kanokololie popenge teko pukulu yunge lombili andolime i-siku ningu siengili: “Yesusi óno-koleana lepalie lomboropa ola molopa kolea Gallilli disirikindu kumbi-lepa pulimo kene ene akuna yu kanonge.”f ningu siengili! ˻Ungu nimbu sinjimbundu ondu˼ kanu ungumu nimbu pora sikiru.” nirimu.
8 ˻Angellomo aku-sipe omba mona molopalie nirimu mele˼ kanoko pilkululie ambotolo pipili kolkolo kamele paa akokolo, aku-sipe konopu talo pepili lkisiku pukulu yunge lombili andolime ningu singilí puringili.
9 ˻Lkisiku pungilí puringili kinie˼ Yesusi lipe sinjipe elte aulkena kanopa lipelie “Okombeleye?” nirimu. Kanu-kinie eltene yunge kimbukundu puku kangulkulu yu kapi ningu imbi ola linjiringili.
10 Kanu-kinie Yesusini eltendo nimbendo: “Pipili naa kolkololie, elte pukulu nanga angenupilindu i-siku ningilindu: “Kolea Gallillindu pangi! Yu akuna kanonge.” ni-pale!” nirimu.
Óno-Koleamo Nokoringi Ami-Ye Mare Puku Pulu Yemo Popo Tonjiringi Ye-Ailimendo Yesusinge Ónomo Kou-Kandena Ulu Te Wendo Orumu Mele Ningu Si-Poringi Temanemog
11 Ambotolo kelko yando ongele oringili kinie Yesusinge ono-kou-kandemo nokoringi ami ye mare kolea-aili ˻Jerusalleme˼ suku puku Pulu Yemo popo tonjiringi ye-ailimendoh uluma wendo orumu mele pali ningu si-puringi.
12 ˻Piliringi kinie˼ popo tonjiringi ye-ailime, Juda-yambomanga ye-ailime kinie pea máku tokolie ene-kinie ˻ungu ningulie ningindu: “We-yamboma i uluma wendo omu mele pilkulie “Yesusi lomboropa ola molomunje.” ningí kene ‘Naa piliengi!’ nimbu nambe-teamolonje?” ningu˼ kere-pali ningulie tenge mele ningu panjikulie niringimuni, ami-yema kou-mone aisili sikulie
13 enendo ningindu: “Yambomane “Yesusi nambe-temuye?” ningu walsingí kinie enene i-siku niengi: “Ipulueli uru pemulu kinie yunge lombili andolimene kiyongo ningu ongo yu liku mengo púngi.” niengi!
14 ˻Olio Juda-yamboma nokolemo Romo-˼gapomano ye-nomimuni ˻aku tengi mele˼ ungu te pilímu liemo ‘ “Ene teko kinjikimili kene mindili nangi!” naa niengi!’ nimbu olione enenga lipu taponjipu yu-kinie ungu nimulú, kanu-kinie ‘Enene óno-koleamo mimi-siku naa nokoko we uru pengi.’ konopu lepalie mindili lipe naa simbe.” niringi.
15 Aku niringimunge pilkulie ami-yemane kou-mone liku enene “Niei!” niringi mele yambomando niringi. Akumunge yandopa kinié i ˻boku tokoro˼ walemo kepe Juda-yambomanga koleamanga pali i ungumu anju-anju pulimo pilkulie yambo aisilini kanu temanemo toko molemele.
Yesusi Omba Yu Lombili Andolime “Nanga Kongonomo Tenji-Pai!” Nimbe Lipe Mundurumu Temanemoi
16 ˻Ambotolo pukululie kanoko piliringili mele temane toko siringili˼ kinie pilkulie Yesusi lombili andoli ye rureponga yepoko kolea Gallilli disiriki puku, Yesusini ma-pangi te imbi lepa ou “Akuna wangi!” nirimu ma-pangine puringi.
17 Akuna puku Yesusi kanokolie niringimuni, yu kapi ningu yunge imbi ambolko ola linjiringi nakolo marene ‘Yesusi kolorumu. Imu Yesusi molo naenje?’ ningu konopu talo-teko leringi.
18 Kanu-kinie Yesusi yu nondopa omba enendo nimbendo: “Tarane nando “Nu-nunu mulú-koleana mélema kinie yamboma kinie, ma-koleana mélema kinie yamboma kinie nokani!” nimbe tondolomoj na sirimu, na-kinie pelemo.
19 Aku ˻tondolo na sirimumu ene simbu ene-kinie pemba˼ kene ene ma-koleamanga pali puku ‘Yamboma pali nanga ungumu pilku liku, nanga lombili andolime molangi!’ ningu, puku ningu si-pukulie ningímuni, ˻pilku liku molonge˼ yamboma no linjingindu Lapa kinie Malo kinie Mini Kake Telimu kinie enenga imbi walsikuk ene no linjiku,
20 enendo “Na lombili andolimene teangi!” nirindu mele pali ‘Aku yamboma teangi!’ ningu ene mane siengi! Aku-siku niliku andoko molonge kinie na ene-kinie alieli molambo mulú-matolo pora nimbé.” nirimu.l
˻Aku pea.˼