Konopu Talo Peli Kolo Toli Yemanea Ulu Peangama Telemele Mele Temolo Kinie Pulu Yemone Olio Méle Naa Kalomba Ungu Mare Akumunge
Ulu Kake Telimenga Ungu Pokore Akumunge
Yambo Koropa Pulime Lipu Taponjimulúmunge Ungu Te
6
(Kolomongo-kanga wane. Pulu Yemonga Ungumu.)
˻Yesusini ungu mare nimbe molopalie nirimumuni, ungu mare pea nimbendo:˼b
“ ‘Yambomane ‘Olio yambo paa peangama. Uluma paa tepo konjilimolo.’ ningu kanangi!’ ningu yamboma kanoko molangi enenga ulu peangama paa naa teangi! Aku-siku tenge kinie yambomane ene kapi ningí. Kanu kapi ningí unguma enenga méle kalolimu lingímunge enenga mulú-koleana molemo Lapamone ene méle naa kalomba.c
2 “˻Enenga mulú-koleana molemo Lapamone aku-siku tenge yamboma méle naa kalomba˼ kene enene yambo koropa-púlime kondo kolko ‘Lipu taponjemili!’ ningu kou-mone te singíndu ‘Temolo mele yambomane kanangi!’ ningu, ru ningu mélte naa siengi! Topele-mapele toli yemaned ‘Na yambomane kapi niengi!’ ningu yamboma máku toko Pulu Yemonga ungumu pilili ulkemanga kinie aulkemanga kinie we-yambo aisilini mongone kanangi yambo-koropama liku taponjilimele. Aku yemane telemele mele enene aku-siku naa teangi! Nane enendo paa sike nimbu sikiru: “Aku telemelemonga ene yambomane kapi nilimele unguma enenga méle kalolimu koronga limele.”e nikiru.
3 “Nakolo enene yambo-koropama kondo kolko mélte singíndu ‘Yambomane paa naa kanangi! Yambo te pea tapu topo andolembolomone kepe naa kanopili, lopi tepo kiyongo nimbu lipu taponjembo!’ niengi!
4 Kanu-kinie yambomane naa kanangi, tenge mele yambo te naa ningu sikulie koropa puli yambo te liku taponjingí kinie enenga ˻mulú-koleana molemo˼ Lapamone lopi teko telemele uluma kanolemomone ene méle kalomba.” ˻nirimu.˼
Pulu Yemo-Kinie Ungu Nimbu Mawa Temolomonga Ungu Tef Kinie
Langi Naa Nongo We Moloringi Ulu-Pulumunge Ungu Te
5 “Ene Pulu Yemo-kinie ungu ningindu topele-mapele toli yemaneg Pulu Yemo-kinie ungu nilimele mele aku-siku naa teayo! Kanu topele-mapele toli yemane ‘Na ye paa peangamo molio mele yambo aisilini mongone kanoko na kapi niengi!’ ningu yamboma máku toko Pulu Yemonga ungu pilili ulkemanga kinie aulkemanga kinie yamboma kanoko molangi konopu siku angilku Pulu Yemo-kinie ungu nilimele. Nane enendo paa sike nimbu sikiru: “Aku-siku telemelemonga ene enenga mele kalolimu koronga limele kanumu.”h nikiru.
6 Nakolo ene Pulu Yemo-kinie ungu ningindu enenga suluminiana sukundu puku nambune sikulie kanu lopi teli koleana enenga ˻mulú-koleana molemo˼ Lapa naa kanolemele yemo kinie ungu nieyo! ˻Yu akuna molemo.˼ Aku tenge kinie enenga ˻mulú-koleana molemo˼ Lapa lopi teko telemele uluma kanolemomone ene pe méle kalomba.
7 “ ‘Na Pulu Yemo-kinie ungu niembo!’ ningulie Isirele talapemonga ulsu molemele yambomanei enenga kuruma molo pulu ye kolo tolime kinie ungu ningindu we-ungu aisili nilimele mele aku-siku naa teangi! Kanu yambomane ‘Na ungu aisili nimbú kinie pilimbe.’ ningu aku-siku nilimele kanumu.j
8 Enenga ˻mulú-koleana molemo˼ Lapamo ou mawa naa teangi ene mólo tolemo mélema yuni pilipe kanolemo kene aku yambomane telemele mele aku-siku naa teangi!
9 “Ene Pulu Yemo-kinie ungu ningindu i-siku niengi:
“Olionga mulú-koleana moleno Tara,
yambomane ‘Nu imbi ola molopa
ye kake teli peangamo moleno.’
ningu molangi!
10 Nu ye-nomi-kingimu molko
yamboma nokoni walemok wendo opili!
Nunge ungumu mulú-koleana pilku liku telemele mele
aku-siku ya ma-koleana pilku liku teangi!
11 Olio kinié langi nomolo mele kinié siyo!
12 Yambomane olio teko kenjíngi kinie
siye kolopo ulu te naa temulu mele
aku-sikula olione nu tepo kenjímulu uluma
siye kolko olio ulu te naa teyo!l
13 Olio ‘Ulu tene kondi topili!’ naa ningu
ulu-kerimenga pali ulu-pulumu pelemo ˻kuru˼munim
‘olio naa ambolopili!’ ningu yunge kíne wendo liyo!
(Nu koleama kinie mélemanga pali
ye-nomi-kingimu molko,
tondolo olandopamo nu kinie pepa,
nu imbi paa olandopa molopa
nu-kinie pa tondolo tepa tepili
alieli molko mindi pulino kene
aku-sipe tepili!)”n
ningu aku-siku Pulu Yemo-kinie ungu niengi!
14 “Yambomane ene teko kenjingí uluma ‘We manie pupili!’ ningu siye kolongi liemo enenga mulú-koleana molemo Lapamone enenga ulu-pulu-kerime ‘Manie pupili!’ nimbe siye kolombala.
15 Nakolo yambomane ene teko kenjingí uluma ‘We manie naa pupili!’ ningu siye naa kolongi liemo enenga ˻mulú-koleana molemo˼ Lapamone enenga ulu-pulu-kerime ‘Manie naa pupili!’ nimbe siye naa kolombala.” ˻nirimu.˼o
16 “Ene langi naa nongo mi toko we molonge ulu-pulumu tengendo topele-mapele toli yemanep ‘Na nono nimbu molambo.’ nilimele mele aku-siku naa niengi! Kanu yemane ‘Na langi naa nombondo mi topo molio mele yambomane kanangi!’ ningu ene kumbi-kere teko enenga kumbi-kerema teko kenjiku molemele. Nane enendo paa sike nimbu sikiru: “Kanu yemane aku telemelemonga yambomane ene kapi nilimele unguma enenga méle kalolimu koronga limele.”q nikiru.
17-18 “Nakolo ene langi naa nongo mi toko we molongendo ‘We-yambomane na aku tekero mele naa kanangi! Tarane manjipe kanopili!’ ningu we-yambomane kanonge uluma naa teangi! Aku tenge kinie enenga ˻mulú-koleana molemo˼ Lapa lopi teko telemele uluma kanolemomone ene méle kalomba.” ˻nirimu.˼
Pulu Yemonga Mélema Konopu Kimbu Sipu Molopo Mana-Mélema Konopu Kimbu-Sipu Naa Molamilimunge Ungu Te, Akumunge
Mulú-Koleana Mélema Nosipu Mana-Mélema Konopu Naa Monjipu Molamilimunge Ungu Te, Akumunge
Méle Kande-Kandema Mulú-Koleana Nosilimolomonga Ungu Ter
19 “Ya ma-koleana méle nosilimelema urelo tepa koka molo lkurinia mélemane ongo teko kenjiku, wa lili yema ongo mélema wa limele kene ‘˻ya mana˼ kamako molopo méle aisili lipu nosemili!’ ni naa niengi!
20 Aku naa tekolie mulú-koleana mélema urelo naa tepa koka molo lkurinia méltene omba tepa naa kenjipe, wa lili yema ongo wa naa limele kene ene mulú-koleana ˻pe pungímunge˼ ‘méle aisili pe limulúma ou lepili!’ ningu ya ma-koleana ulu-peangama teko molangi!
21 Enenga nosilimele mélema lemo kolea akuna ene konopuni pilku konopu monjiku molemele kene ˻‘mulú-koleana mindi mélema lepili!’ ningu molangi!” nirimu˼.
Yambomanga Mongomo Tepe-LLame Melemonga Ungu Tes Kinie
Yambo Tene Ye Aili Talonga Kongono Walsikale Manda Naa Tembamonga Ungu Te
6:22-23,24 (6:19-34 pali)
22 “Nunge mongomo nunge kangimunge tepe llame mélemo. Aku-kene nunge mongo peanga angilimo kinie nu kangi pali pa tepili moleno kinie nu molko konjilino.
23 Nakolo nunge mongomo keri lemba kinie nunge kangi pali sumbulu topili andoni. Kanu-kinie nunge kangine pa teli pembamo alowa tepa sumbulu tomba kinie akumu paa kamu sumbulu tomba.” ˻nirimu.˼
24 “Yambo tene ye aili talonga kongono lipe tere lepa manda naa tenjimbe. Ye aili te konopu keri panjipe, te konopu monjimbe. Molo aku naa temu liemo ye aili tenga ungu nimbéma paa konopu sipe pilipe lipe kongono nimbéma tondolo-mundupe tenjipe, te konopu keri panjipe yunge ungu nimbéma ta nimbé. Yambomane Pulu Yemonga kongonomo kinie Kou-Monemonga kongonomo kinie liku tere lelko manda naa tenjingí.t
Yesusini “Na Lombili Andolemelema, Mini-Wale Munduku Konopu Aisili Naa Leai!” Nirimu Ungumuu
25 “Akumunge nane ene ˻tenge mele˼ nimbu siembo: ‘Kangikundu molopo konjemili!’ ningu konopu aisili liku naa mundengi! Langi nongemonga kepe no nongemonga kepe mulu-wambale pakongemonga kepe akumanga konopu aisili liku munduku naa molangi! Ene kapola molonge mele ulu-pulumu langi kinie mulu-wambale kinie mindiye?
26 Kerama kaname! Langi te panjikulie nou lemo kinie liku mengo ulkendo puku nosiku naa nolemele nakolo ene yambomanga mulú-koleana molemo Lapamone kerama langi silimo. Kerama we-mele ene yamboma olandopamonga yuni ene naa nokombaye?
27 Enenga yambo tene konopu aisili lipe mundumbemone yu kolomba ena te manda ‘We lepili!’ nimbéye? Manda naa nimbé.
28-29 “Ene pakonge mélemanga konopu aisili nambemuna liku mundulimeleye? Pillawa-sindime mana olemo mele ene naa kanolemeleye? Pillawa-sindimene kongono mindili siku naa teko, mulu-wambale te teko mimi naa telemele nakolo pillawa-sindime molemele mele olandopa, ˻ye-nomi-kingi˼ Sollomonov kongono aisili tepalie wale paa peangama pakopa au nirimu mele maniendopa.
30 Era-sindi tolemoma kinié mele molemo, opali mele poroko tepena kalemelema Pulu Yemone aku-sipe nokopa konjilimo liemo ene ‘Pulu Yemone olio manda nokombanje.’ ningu laye-kolte mindi pilimele yamboma pakonge mélemanga yuni manda lipe naa taponjimbeye? Ene paa sike lipe taponjimbe.
31 “˻Pulu Yemone kerama kinie era-sindime kinie aku we-mélema aku-sipe nokolemo˼ kene ene konopu aisili liku mundukulie ‘Esi, langi te tena lipu nomolonje?’; molo ‘No tena kolopo nomolonje?’; molo ‘Wale-pakoli te tena lipu pakomolonje?’ ningu pilku naa molangi!
32 Pulu Yemonga yamboma naa molko ulsukundu molemele yambomane aku-siku telemele nakolo enenga mulú-koleana molemo Lapamone ene yunge yambomanga méle mólo tolemoma kanopa molemo.
33 ˻Ene langi nongemanga kinie mulu-wambale pakongemanga kinie konopu naa liku munduku,˼ Pulu Yemo ye-nomi-kingi molopa yamboma nokolemow uluma kinie yu kanopa kake telemo kanolemo uluma kinie mélema kinie ‘Kumbi lepo teambo!’ konopu lelko molangi! Aku tenge kinie yuni we-mélema kepe ene simbe.
34 Yuni aku temba kene ‘Opali nambe-tembonje?’ ningu kinié konopu aisili liku naa mundengi! Opalimunge langi molo mélema aku opali, kiniémonga langi molo mélema kinie, opalimunge kinie, liku tere lelko naa piliengi! Enamanga yu-mele-mele umbunime pelemo pembama kanu enamanga mindi. Kinié umbuni wendo ombáma kinie, opali talú umbuni wendo ombámanga kinie tere lelko konopu liku naa mundengi!” ˻nirimu.˼