3 “Nuni angenanga mongona nurupulu te lemomo kanoleno nakolo nunge mongona unju-kalie aili te lemomo naa kanoleno akumu nambemuna telenoye?

4 Nunge mongona unju-kalie aili lemomo naa kanokolie angenando “Ano, nunge mongona nurupulu te lemomo wendo linjembo!” nambe teko nilinoye?

5 Topele-mapele toli yambomo,^e nuni nunge mongona lemo unju-kalie ailimu ou wendo likulie pe kanoko konjiku angenanga mongona lemo nurupulumu manda wendo linjiní.” ˻nirimu.˼^f

6 “ ‘Pulu Yemonga’ nilimele melema liku owa naa sieme! Nombalie pe topele topa ene nombanje kene aku naa teangi! Enenga méle peangama kongi angilimbena toko naa mundengi! Kimbuni kambilimbenje kene aku naa teangi!” ˻nirimu.˼

7 “˻Lapa, mulú-koleana molemo yemo˼^h mélema mawa teko “Si!” niengi! Aku tenge kinie mélema sike simbe lingí. ˻Lapa molemona˼ mélema korangi! Aku tenge kinie mélema sike kanoko lingí. Ulke-kerepuluna angilku “Sukundu wamili!” niengi! Aku ningí kinie “Sukundu wai!” nimbe nambune tonjimbe.

8 Mawa tenge mélema sike simbe lingí, koronge mélema sike kanoko lingí; “Sukundu wamili!” ningí kinie sike nambune tonjimbe. Aku temba kene aku teai!ⁱ

9 “Enenga ye te yunge malo ombalie “Tara, pillawa-kaloli te nambo si!” nimbé kinie yunge lapane yu kou-mulú te simbeye?

10 Molo kangomone “Tara, oma te nambo si!” nimbé kinie yunge lapane wambiye te simbeye?

11 Pe ene konopu keri pepili molemele yambomane aku-siku enenga ambolangoma méle peangama silimele liemo enenga Lapa mulú-koleana molemomone “Mélema si!” ningu mawa tenge yamboma méle peangama paa olandopa naa simbeye? ˻Paa simbemo.˼

12 Akumunge, ‘Yambomane nu-kinie teangi!’ konopu leno mele nuni anju yamboma aku-siku teani! ‘Aku teangi!’ nikinu ulumuni Mosisini Pulu Yemonga ungu-mane sirimu bokuna torumumanga pulumu kinie, Pulu Yemone ungu-umbu tonjirimuma pilku yamboma ningu siringi yemane bokuna toringi ungumanga pulumu kinie,^j lipe tere-lepa nilimo kene aku-siku anju-yando yamboma-kinie teko konjengi!”^k ˻nirimu.˼

13 “Ene pala-kerepulu kangamonga paa pangi!^l Kolea kerine pulimo kere-pulumu paa ailimu, akuna pulimo aulkemo paa anju-yando pupe paa pará lemo akuna yambo aisili mindili naa siku we-we teko pulimele.

14 Nakolo alieli konde molopa konjipe mindi puli koleana^m pulimo kere-pulumu paa kanga, yunge aulkemo paa tengepea teli kangamo lemona yamboma akuna pungíndu mindili silimelemonga yambo telu-telu ningu mindi aku aulkemo kanokolie pulimele.ⁿ Aku telemele kene ene kanu kerepulu kangamonga pangi!” ˻nirimu.˼

15 “Pulu Yemone ungu-umbu tonjilime naa pilku we kolo toko yando ningu singí yema onge kene kanoko konjiku molayo! Kongi-sipisipi paa taka lelko molemele mele aku-siku kanu yamboma ongo molonge nakolo owa-takara^q paa engelene kolkolie ‘Mélte topo namili!’ ningu andoko molemele mele aku-siku kanu yambomane ‘Ene mindili nangi! Ene tepo kenjemili!’ ningu molemele.^r

16 Kanu kolo toli yamboma ongo ulu tengema kanokolie, ‘Ene sike kolo tolime.’ ningu kanonge. ‘Amu namili!’ ningu takeme manda olko toko nolemelkaye? Molo ‘Me te namili!’ ningu silipú manda akuku nolemelkaye? Paa mólo! ‘Amu lupe, takeme lupela; me lupe, silipú lupela.’ ningu kanolemele. ˻Aku-siku mele Pulu Yemone sike ungu-umbu tonjilime pilku yamboma sike ningu silimele mele lupe, Pulu Yemone ungu-umbu naa tonjilime yamboma kolo toko ningu silimele mele lupela ningu kanonge.˼ Unjuma mongo tolemo kinie kanokolie ‘Ime nomolo lemo. Ime naa nomolo lemo.’ ningu kanoko imbi silimele kanumu.^s

17 Unju peangamone mongo peangamo tolemo; unju kerimuni mongo kerimu tolemo.

18 Unju peangamone mongo keri te manda naa tomba; unju kerimuni mongo peanga te manda naa-la tomba.^t

19 Unju-mongo peangama naa tomba unjuma pali peko tokolie tepena kalemele.^u

20 Unjuma mongo tolemo kinie kanokolie, “Imu peanga, imu keri.” ningu apurulimele mele, onge yambo kanumane tenge uluma enene kanokolie yamboma molemele mele sike aku-siku kanonge.

21 “ ‘Yambomane nando ‘Ailimu. Ailimu.’ nilimele yamboma pali Pulu Yemone nokolemo mulú-koleana^v suku pungí.’ ningu naa pilieyo! Tara mulú-koleana molemomonga unguma pilku liku tenge yamboma mindi akuna pungí.

22 Yamboma apurumbe wale kanumu wendo ombá kinie yambo aisilini nando ningindu: “Ailimu, nane nunge imbi lepo^w nunge unguma nimbu sirindu kanumu; nunge imbi lepo yambomanga konopuna kuru moloringime “Ongo ulsu pai!” nirindu kanumu; nunge imbi lepo ulu-tondolo aisili terindu kanumu.” ningí.

23 Nakolo aku-siku ningí kinie nane enendo nimbundu: “Na enenga imbime paa naa pilipu ene kanopo imbi naa silio.^x Ene Pulu Yemonga ungumu naa pilku liku teringi kene nanga kumbi-kerena naa ongo anju pai!” nimbú.

24 “Akumunge, i nanga unguma pilku liku tenge yamboma ene ye te molemo mele niembo: Ye pilipe konginjili perimu ye te yuni yunge ulkemo ‘Ingi nimbe angilipili!’ nimbe kou-polona ola takorumu.

25 Pe lo topa no topa poporome topalie ulkemo paa topa kalalu simbe terimu nakolo ulke-simumu kou-polona angilirimuna topa tekisi naa tekisipe ingi nimbe we angilirimu. Nanga unguma pilku liku telemele yamboma ene kanu yemo mele molemele.

26 “I nanga unguma pilku liku na tenge yamboma ene ye te molemo mele niembo: Ye pilipe konginjili naa perimu ye tene yunge ulkemo okiana ola takorumu.

27 Pe lo topa no topa poporome topalie ulke kanumu topa kalalu sipe paa bulu-balu sirimu. Nanga unguma na pilku liku tenge yamboma ene kanu yemo mele molemele.” nirimu.

28 Yesusini aku unguma nimbe pora sirimu kinie yuni mane sirimu pilku moloringi yambomane yuni ungu-mane sirimu mele pilkulie mini-wale munduringi.

29 Pulu Yemonga ungu-manemanga puluma pilku ene mane siringi yemane^z we mane siringi mele Yesusini aku-sipe mane naa sirimu. Namba lerimu yemane pipili naa kolko tondolo-munduku mane siringi mele aku-sipe mane sirimu-na pilkulie ene mini-wale munduringi.